೯. ದುತಿಯದುಟ್ಠದೋಸಸಿಕ್ಖಾಪದಂ

೩೯೧. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಮೇತ್ತಿಯಭೂಮಜಕಾ ಭಿಕ್ಖೂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತಾ ಅದ್ದಸಂಸು ಛಗಲಕಂ [ಛಕಲಕಂ (ಸ್ಯಾ.)] ಅಜಿಕಾಯ ವಿಪ್ಪಟಿಪಜ್ಜನ್ತಂ. ದಿಸ್ವಾನ ಏವಮಾಹಂಸು – ‘‘ಹನ್ದ ಮಯಂ, ಆವುಸೋ, ಇಮಂ ಛಗಲಕಂ ದಬ್ಬಂ ಮಲ್ಲಪುತ್ತಂ ನಾಮ ಕರೋಮ. ಇಮಂ ಅಜಿಕಂ ಮೇತ್ತಿಯಂ ನಾಮ ಭಿಕ್ಖುನಿಂ ಕರೋಮ. ಏವಂ ಮಯಂ ವೋಹರಿಸ್ಸಾಮ. ಪುಬ್ಬೇ ಮಯಂ, ಆವುಸೋ, ದಬ್ಬಂ ಮಲ್ಲಪುತ್ತಂ ಸುತೇನ ಅವೋಚುಮ್ಹಾ. ಇದಾನಿ ಪನ ಅಮ್ಹೇಹಿ ಸಾಮಂ ದಿಟ್ಠೋ ಮೇತ್ತಿಯಾಯ ಭಿಕ್ಖುನಿಯಾ ವಿಪ್ಪಟಿಪಜ್ಜನ್ತೋ’’ತಿ. ತೇ ತಂ ಛಗಲಕಂ ದಬ್ಬಂ ಮಲ್ಲಪುತ್ತಂ ನಾಮ ಅಕಂಸು. ತಂ ಅಜಿಕಂ ಮೇತ್ತಿಯಂ ನಾಮ ಭಿಕ್ಖುನಿಂ ಅಕಂಸು. ತೇ ಭಿಕ್ಖೂನಂ ಆರೋಚೇಸುಂ – ‘‘ಪುಬ್ಬೇ ಮಯಂ, ಆವುಸೋ, ದಬ್ಬಂ ಮಲ್ಲಪುತ್ತಂ ಸುತೇನ ಅವೋಚುಮ್ಹಾ. ಇದಾನಿ ಪನ ಅಮ್ಹೇಹಿ ಸಾಮಂ ದಿಟ್ಠೋ ಮೇತ್ತಿಯಾಯ ಭಿಕ್ಖುನಿಯಾ ವಿಪ್ಪಟಿಪಜ್ಜನ್ತೋ’’ತಿ. ಭಿಕ್ಖೂ ಏವಮಾಹಂಸು – ‘‘ಮಾವುಸೋ, ಏವಂ ಅವಚುತ್ಥ. ನಾಯಸ್ಮಾ ದಬ್ಬೋ ಮಲ್ಲಪುತ್ತೋ ಏವಂ ಕರಿಸ್ಸತೀ’’ತಿ.

ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಪಟಿಪುಚ್ಛಿ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಯಿಮೇ ಭಿಕ್ಖೂ ಆಹಂಸೂ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ದುತಿಯಮ್ಪಿ ಖೋ ಭಗವಾ…ಪೇ… ತತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಯಿಮೇ ಭಿಕ್ಖೂ ಆಹಂಸೂ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ‘‘ನ ಖೋ, ದಬ್ಬ, ದಬ್ಬಾ ಏವಂ ನಿಬ್ಬೇಠೇನ್ತಿ. ಸಚೇ ತಯಾ ಕತಂ ಕತನ್ತಿ ವದೇಹಿ, ಸಚೇ ತಯಾ ಅಕತಂ ಅಕತನ್ತಿ ವದೇಹೀ’’ತಿ. ‘‘ಯತೋ ಅಹಂ, ಭನ್ತೇ, ಜಾತೋ ನಾಭಿಜಾನಾಮಿ ಸುಪಿನನ್ತೇನಪಿ ಮೇಥುನಧಮ್ಮಂ ಪಟಿಸೇವಿತಾ, ಪಗೇವ ಜಾಗರೋ’’ತಿ! ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖುವೇ, ಇಮೇ ಭಿಕ್ಖೂ ಅನುಯುಞ್ಜಥಾ’’ತಿ. ಇದಂ ವತ್ವಾ ಭಗವಾ ಉಟ್ಠಾಯಾಸನಾ ವಿಹಾರಂ ಪಾವಿಸಿ.

ಅಥ ಖೋ ತೇ ಭಿಕ್ಖೂ ಮೇತ್ತಿಯಭೂಮಜಕೇ ಭಿಕ್ಖೂ ಅನುಯುಞ್ಜಿಂಸು. ತೇ ಭಿಕ್ಖೂಹಿ ಅನುಯುಞ್ಜೀಯಮಾನಾ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ – ‘‘ಕಿಂ ಪನ ತುಮ್ಹೇ, ಆವುಸೋ, ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಥಾ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಮೇತ್ತಿಯಭೂಮಜಕೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಥಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ದಬ್ಬಂ ಮಲ್ಲಪುತ್ತಂ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೩೯೨. ‘‘ಯೋ ಪನ ಭಿಕ್ಖು ಭಿಕ್ಖುಂ ದುಟ್ಠೋ ದೋಸೋ ಅಪ್ಪತೀತೋ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಯ್ಯ – ‘ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾ ಚಾವೇಯ್ಯ’ನ್ತಿ. ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನೋ ವಾ ಅಸಮನುಗ್ಗಾಹೀಯಮಾನೋ ವಾ ಅಞ್ಞಭಾಗಿಯಞ್ಚೇವ ತಂ ಅಧಿಕರಣಂ ಹೋತಿ ಕೋಚಿದೇಸೋ ಲೇಸಮತ್ತೋ ಉಪಾದಿನ್ನೋ, ಭಿಕ್ಖು ಚ ದೋಸಂ ಪತಿಟ್ಠಾತಿ, ಸಙ್ಘಾದಿಸೇಸೋ’’ತಿ.

೩೯೩. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಭಿಕ್ಖುನ್ತಿ ಅಞ್ಞಂ ಭಿಕ್ಖುಂ.

ದುಟ್ಠೋ ದೋಸೋತಿ ಕುಪಿತೋ ಅನತ್ತಮನೋ ಅನಭಿರದ್ಧೋ ಆಹತಚಿತ್ತೋ ಖಿಲಜಾತೋ.

ಅಪ್ಪತೀತೋತಿ ತೇನ ಚ ಕೋಪೇನ, ತೇನ ಚ ದೋಸೇನ, ತಾಯ ಚ ಅನತ್ತಮನತಾಯ, ತಾಯ ಚ ಅನಭಿರದ್ಧಿಯಾ ಅಪ್ಪತೀತೋ ಹೋತಿ.

ಅಞ್ಞಭಾಗಿಯಸ್ಸ ಅಧಿಕರಣಸ್ಸಾತಿ ಆಪತ್ತಞ್ಞಭಾಗಿಯಂ ವಾ ಹೋತಿ ಅಧಿಕರಣಞ್ಞಭಾಗಿಯಂ ವಾ. ಕಥಂ ಅಧಿಕರಣಂ ಅಧಿಕರಣಸ್ಸ ಅಞ್ಞಭಾಗಿಯಂ? ವಿವಾದಾಧಿಕರಣಂ ಅನುವಾದಾಧಿಕರಣಸ್ಸ ಆಪತ್ತಾಧಿಕರಣಸ್ಸ ಕಿಚ್ಚಾಧಿಕರಣಸ್ಸ ಅಞ್ಞಭಾಗಿಯಂ. ಅನುವಾದಾಧಿಕರಣಂ ಆಪತ್ತಾಧಿಕರಣಸ್ಸ ಕಿಚ್ಚಾಧಿಕರಣಸ್ಸ ವಿವಾದಾಧಿಕರಣಸ್ಸ ಅಞ್ಞಭಾಗಿಯಂ. ಆಪತ್ತಾಧಿಕರಣಂ ಕಿಚ್ಚಾಧಿಕರಣಸ್ಸ ವಿವಾದಾಧಿಕರಣಸ್ಸ ಅನುವಾದಾಧಿಕರಣಸ್ಸ ಅಞ್ಞಭಾಗಿಯಂ. ಕಿಚ್ಚಾಧಿಕರಣಂ ವಿವಾದಾಧಿಕರಣಸ್ಸ ಅನುವಾದಾಧಿಕರಣಸ್ಸ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ. ಏವಂ ಅಧಿಕರಣಂ ಅಧಿಕರಣಸ್ಸ ಅಞ್ಞಭಾಗಿಯಂ.

ಕಥಂ ಅಧಿಕರಣಂ ಅಧಿಕರಣಸ್ಸ ತಬ್ಭಾಗಿಯಂ? ವಿವಾದಾಧಿಕರಣಂ ವಿವಾದಾಧಿಕರಣಸ್ಸ ತಬ್ಭಾಗಿಯಂ. ಅನುವಾದಾಧಿಕರಣಂ ಅನುವಾದಾಧಿಕರಣಸ್ಸ ತಬ್ಭಾಗಿಯಂ. ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಸಿಯಾ ತಬ್ಭಾಗಿಯಂ ಸಿಯಾ ಅಞ್ಞಭಾಗಿಯಂ.

ಕಥಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ? ಮೇಥುನಧಮ್ಮಪಾರಾಜಿಕಾಪತ್ತಿ ಅದಿನ್ನಾದಾನಪಾರಾಜಿಕಾಪತ್ತಿಯಾ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ. ಅದಿನ್ನಾದಾನಪಾರಾಜಿಕಾಪತ್ತಿ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ. ಮನುಸ್ಸವಿಗ್ಗಹಪಾರಾಜಿಕಾಪತ್ತಿ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅದಿನ್ನಾದಾನಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ. ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿ ಮೇಥುನಧಮ್ಮಪಾರಾಜಿಕಾಪತ್ತಿಯಾ ಅದಿನ್ನಾದಾನಪಾರಾಜಿಕಾಪತ್ತಿಯಾ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ಅಞ್ಞಭಾಗಿಯಾ. ಏವಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ಅಞ್ಞಭಾಗಿಯಂ.

ಕಥಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ತಬ್ಭಾಗಿಯಂ? ಮೇಥುನಧಮ್ಮಪಾರಾಜಿಕಾಪತ್ತಿ ಮೇಥುನಧಮ್ಮಪಾರಾಜಿಕಾಪತ್ತಿಯಾ ತಬ್ಭಾಗಿಯಾ. ಅದಿನ್ನಾದಾನಪಾರಾಜಿಕಾಪತ್ತಿ ಅದಿನ್ನಾದಾನಪಾರಾಜಿಕಾಪತ್ತಿಯಾ ತಬ್ಭಾಗಿಯಾ. ಮನುಸ್ಸವಿಗ್ಗಹಪಾರಾಜಿಕಾಪತ್ತಿ ಮನುಸ್ಸವಿಗ್ಗಹಪಾರಾಜಿಕಾಪತ್ತಿಯಾ ತಬ್ಭಾಗಿಯಾ. ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿ ಉತ್ತರಿಮನುಸ್ಸಧಮ್ಮಪಾರಾಜಿಕಾಪತ್ತಿಯಾ ತಬ್ಭಾಗಿಯಾ. ಏವಂ ಆಪತ್ತಾಧಿಕರಣಂ ಆಪತ್ತಾಧಿಕರಣಸ್ಸ ತಬ್ಭಾಗಿಯಂ.

ಕಿಚ್ಚಾಧಿಕರಣಂ ಕಿಚ್ಚಾಧಿಕರಣಸ್ಸ ತಬ್ಭಾಗಿಯಂ. ಏವಂ ಅಧಿಕರಣಂ ಅಧಿಕರಣಸ್ಸ ತಬ್ಭಾಗಿಯಂ.

೩೯೪. ಕಿಞ್ಚಿ ದೇಸಂ ಲೇಸಮತ್ತಂ ಉಪಾದಾಯಾತಿ ಲೇಸೋ ನಾಮ ದಸ ಲೇಸಾ – ಜಾತಿಲೇಸೋ, ನಾಮಲೇಸೋ, ಗೋತ್ತಲೇಸೋ, ಲಿಙ್ಗಲೇಸೋ, ಆಪತ್ತಿಲೇಸೋ, ಪತ್ತಲೇಸೋ, ಚೀವರಲೇಸೋ, ಉಪಜ್ಝಾಯಲೇಸೋ, ಆಚರಿಯಲೇಸೋ, ಸೇನಾಸನಲೇಸೋ.

೩೯೫. ಜಾತಿಲೇಸೋ ನಾಮ ಖತ್ತಿಯೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಖತ್ತಿಯಂ ಪಸ್ಸಿತ್ವಾ ಚೋದೇತಿ – ‘‘ಖತ್ತಿಯೋ ಮಯಾ ದಿಟ್ಠೋ [ಏತ್ಥ ‘‘ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ’’ತಿ ಪಾಠೋ ಊನೋ ಮಞ್ಞೇ, ಅಟ್ಠಕಥಾಯಂ ಹಿ ‘‘ಖತ್ತಿಯೋ ಮಯಾ ದಿಟ್ಠೋ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ’’ತಿ ದಿಸ್ಸತಿ]. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಬ್ರಾಹ್ಮಣೋ ದಿಟ್ಠೋ ಹೋತಿ…ಪೇ… ವೇಸ್ಸೋ ದಿಟ್ಠೋ ಹೋತಿ…ಪೇ… ಸುದ್ದೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಸುದ್ದಂ ಪಸ್ಸಿತ್ವಾ ಚೋದೇತಿ – ‘‘ಸುದ್ದೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೩೯೬. ನಾಮಲೇಸೋ ನಾಮ ಬುದ್ಧರಕ್ಖಿತೋ ದಿಟ್ಠೋ ಹೋತಿ…ಪೇ… ಧಮ್ಮರಕ್ಖಿತೋ ದಿಟ್ಠೋ ಹೋತಿ…ಪೇ… ಸಙ್ಘರಕ್ಖಿತೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಸಙ್ಘರಕ್ಖಿತಂ ಪಸ್ಸಿತ್ವಾ ಚೋದೇತಿ – ‘‘ಸಙ್ಘರಕ್ಖಿತೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೩೯೭. ಗೋತ್ತಲೇಸೋ ನಾಮ ಗೋತಮೋ ದಿಟ್ಠೋ ಹೋತಿ…ಪೇ… ಮೋಗ್ಗಲ್ಲಾನೋ ದಿಟ್ಠೋ ಹೋತಿ…ಪೇ… ಕಚ್ಚಾಯನೋ ದಿಟ್ಠೋ ಹೋತಿ…ಪೇ… ವಾಸಿಟ್ಠೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ವಾಸಿಟ್ಠಂ ಪಸ್ಸಿತ್ವಾ ಚೋದೇತಿ – ‘‘ವಾಸಿಟ್ಠೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೩೯೮. ಲಿಙ್ಗಲೇಸೋ ನಾಮ ದೀಘೋ ದಿಟ್ಠೋ ಹೋತಿ…ಪೇ… ರಸ್ಸೋ ದಿಟ್ಠೋ ಹೋತಿ…ಪೇ… ಕಣ್ಹೋ ದಿಟ್ಠೋ ಹೋತಿ…ಪೇ… ಓದಾತೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಓದಾತಂ ಪಸ್ಸಿತ್ವಾ ಚೋದೇತಿ – ‘‘ಓದಾತೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೩೯೯. ಆಪತ್ತಿಲೇಸೋ ನಾಮ ಲಹುಕಂ ಆಪತ್ತಿಂ ಆಪಜ್ಜನ್ತೋ ದಿಟ್ಠೋ ಹೋತಿ. ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೦. ಪತ್ತಲೇಸೋ ನಾಮ ಲೋಹಪತ್ತಧರೋ ದಿಟ್ಠೋ ಹೋತಿ…ಪೇ… ಸಾಟಕಪತ್ತಧರೋ ದಿಟ್ಠೋ ಹೋತಿ…ಪೇ… ಸುಮ್ಭಕಪತ್ತಧರೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಸುಮ್ಭಕಪತ್ತಧರಂ ಪಸ್ಸಿತ್ವಾ ಚೋದೇತಿ – ‘‘ಸುಮ್ಭಕಪತ್ತಧರೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೧. ಚೀವರಲೇಸೋ ನಾಮ ಪಂಸುಕೂಲಿಕೋ ದಿಟ್ಠೋ ಹೋತಿ…ಪೇ… ಗಹಪತಿಚೀವರಧರೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಗಹಪತಿಚೀವರಧರಂ ಪಸ್ಸಿತ್ವಾ ಚೋದೇತಿ – ‘‘ಗಹಪತಿಚೀವರಧರೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೨. ಉಪಜ್ಝಾಯಲೇಸೋ ನಾಮ ಇತ್ಥನ್ನಾಮಸ್ಸ ಸದ್ಧಿವಿಹಾರಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಇತ್ಥನ್ನಾಮಸ್ಸ ಸದ್ಧಿವಿಹಾರಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸ್ಸ ಸದ್ಧಿವಿಹಾರಿಕೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೩. ಆಚರಿಯಲೇಸೋ ನಾಮ ಇತ್ಥನ್ನಾಮಸ್ಸ ಅನ್ತೇವಾಸಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಇತ್ಥನ್ನಾಮಸ್ಸ ಅನ್ತೇವಾಸಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸ್ಸ ಅನ್ತೇವಾಸಿಕೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ’’…ಪೇ… ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೪. ಸೇನಾಸನಲೇಸೋ ನಾಮ ಇತ್ಥನ್ನಾಮಸೇನಾಸನವಾಸಿಕೋ ದಿಟ್ಠೋ ಹೋತಿ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ. ಅಞ್ಞಂ ಇತ್ಥನ್ನಾಮಸೇನಾಸನವಾಸಿಕಂ ಪಸ್ಸಿತ್ವಾ ಚೋದೇತಿ – ‘‘ಇತ್ಥನ್ನಾಮಸೇನಾಸನವಾಸಿಕೋ ಮಯಾ ದಿಟ್ಠೋ. ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೫. ಪಾರಾಜಿಕೇನ ಧಮ್ಮೇನಾತಿ ಚತುನ್ನಂ ಅಞ್ಞತರೇನ.

ಅನುದ್ಧಂಸೇಯ್ಯಾತಿ ಚೋದೇತಿ ವಾ ಚೋದಾಪೇತಿ ವಾ.

ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾಚಾವೇಯ್ಯನ್ತಿ ಭಿಕ್ಖುಭಾವಾ ಚಾವೇಯ್ಯಂ, ಸಮಣಧಮ್ಮಾ ಚಾವೇಯ್ಯಂ, ಸೀಲಕ್ಖನ್ಧಾ ಚಾವೇಯ್ಯಂ, ತಪೋಗುಣಾ ಚಾವೇಯ್ಯಂ.

ತತೋ ಅಪರೇನ ಸಮಯೇನಾತಿ ಯಸ್ಮಿಂ ಖಣೇ ಅನುದ್ಧಂಸಿತೋ ಹೋತಿ, ತಂ ಖಣಂ ತಂ ಲಯಂ ತಂ ಮುಹುತ್ತಂ ವೀತಿವತ್ತೇ.

ಸಮನುಗ್ಗಾಹೀಯಮಾನೋತಿ ಯೇನ ವತ್ಥುನಾ ಅನುದ್ಧಂಸಿತೋ ಹೋತಿ ತಸ್ಮಿಂ ವತ್ಥುಸ್ಮಿಂ ಸಮನುಗ್ಗಾಹೀಯಮಾನೋ.

ಅಸಮನುಗ್ಗಾಹೀಯಮಾನೋತಿ ನ ಕೇನಚಿ ವುಚ್ಚಮಾನೋ.

ಅಧಿಕರಣಂ ನಾಮ ಚತ್ತಾರಿ ಅಧಿಕರಣಾನಿ – ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ.

ಕೋಚಿ ದೇಸೋ ಲೇಸಮತ್ತೋ ಉಪಾದಿನ್ನೋತಿ ತೇಸಂ ದಸನ್ನಂ ಲೇಸಾನಂ ಅಞ್ಞತರೋ ಲೇಸೋ ಉಪಾದಿನ್ನೋ ಹೋತಿ.

ಭಿಕ್ಖು ಚ ದೋಸಂ ಪತಿಟ್ಠಾತೀತಿ ತುಚ್ಛಕಂ ಮಯಾ ಭಣಿತಂ, ಮುಸಾ ಮಯಾ ಭಣಿತಂ, ಅಭೂತಂ ಮಯಾ ಭಣಿತಂ, ಅಜಾನನ್ತೇನ ಮಯಾ ಭಣಿತಂ.

ಸಙ್ಘಾದಿಸೇಸೋತಿ …ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೪೦೬. ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ’’…ಪೇ… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಥುಲ್ಲಚ್ಚಯಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಥುಲ್ಲಚ್ಚಯೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ… ಥುಲ್ಲಚ್ಚಯೇ ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ… ಸಙ್ಘಾದಿಸೇಸದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ’’ …ಪೇ… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ದುಬ್ಭಾಸಿತೇ ದುಬ್ಭಾಸಿತದಿಟ್ಠಿ ಹೋತಿ…ಪೇ… ದುಬ್ಭಾಸಿತೇ ಸಙ್ಘಾದಿಸೇಸದಿಟ್ಠಿ ಹೋತಿ… ಥುಲ್ಲಚ್ಚಯದಿಟ್ಠಿ ಹೋತಿ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಏಕೇಕಂ ಮೂಲಂ ಕಾತುನ ಚಕ್ಕಂ ಬನ್ಧಿತಬ್ಬಂ.

೪೦೭. ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸಙ್ಘಾದಿಸೇಸೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಥುಲ್ಲಚ್ಚಯಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಥುಲ್ಲಚ್ಚಯೇ ಥುಲ್ಲಚ್ಚಯದಿಟ್ಠಿ ಹೋತಿ…ಪೇ… ಥುಲ್ಲಚ್ಚಯೇ ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ… ದುಬ್ಭಾಸಿತದಿಟ್ಠಿ ಹೋತಿ… ಸಙ್ಘಾದಿಸೇಸದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ’’…ಪೇ… ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

ಭಿಕ್ಖು ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ದುಬ್ಭಾಸಿತೇ ದುಬ್ಭಾಸಿತದಿಟ್ಠಿ ಹೋತಿ…ಪೇ… ದುಬ್ಭಾಸಿತೇ ಸಙ್ಘಾದಿಸೇಸದಿಟ್ಠಿ ಹೋತಿ… ಥುಲ್ಲಚ್ಚಯದಿಟ್ಠಿ ಹೋತಿ… ಪಾಚಿತ್ತಿಯದಿಟ್ಠಿ ಹೋತಿ… ಪಾಟಿದೇಸನೀಯದಿಟ್ಠಿ ಹೋತಿ… ದುಕ್ಕಟದಿಟ್ಠಿ ಹೋತಿ. ತಞ್ಚೇ ಪಾರಾಜಿಕೇನ ಚೋದಾಪೇತಿ – ‘‘ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸಿ, ನತ್ಥಿ ತಯಾ ಸದ್ಧಿಂ ಉಪೋಸಥೋ ವಾ ಪವಾರಣಾ ವಾ ಸಙ್ಘಕಮ್ಮಂ ವಾ’’ತಿ, ಏವಮ್ಪಿ ಆಪತ್ತಞ್ಞಭಾಗಿಯಂ ಹೋತಿ ಲೇಸೋ ಚ ಉಪಾದಿನ್ನೋ, ಆಪತ್ತಿ ವಾಚಾಯ, ವಾಚಾಯ ಸಙ್ಘಾದಿಸೇಸಸ್ಸ.

೪೦೮. ಅನಾಪತ್ತಿ ತಥಾಸಞ್ಞೀ ಚೋದೇತಿ ವಾ ಚೋದಾಪೇತಿ ವಾ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ದುತಿಯದುಟ್ಠದೋಸಸಿಕ್ಖಾಪದಂ ನಿಟ್ಠಿತಂ ನವಮಂ.