೯. ಛತ್ತುಪಾಹನವಗ್ಗೋ

೧. ಪಠಮಸಿಕ್ಖಾಪದಂ

೧೧೭೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಛತ್ತುಪಾಹನಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಛತ್ತುಪಾಹನಂ ಧಾರೇಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಛತ್ತುಪಾಹನಂ ಧಾರೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಛತ್ತುಪಾಹನಂ ಧಾರೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಛತ್ತುಪಾಹನಂ ಧಾರೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

‘‘ಯಾ ಪನ ಭಿಕ್ಖುನೀ ಛತ್ತುಪಾಹನಂ ಧಾರೇಯ್ಯ, ಪಾಚಿತ್ತಿಯ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೧೧೭೯. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ. ತಸ್ಸಾ ವಿನಾ ಛತ್ತುಪಾಹನಂ ನ ಫಾಸು ಹೋತಿ…ಪೇ… ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಅನುಜಾನಾಮಿ, ಭಿಕ್ಖವೇ, ಗಿಲಾನಾಯ ಭಿಕ್ಖುನಿಯಾ ಛತ್ತುಪಾಹನಂ. ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೮೦. ‘‘ಯಾ ಪನ ಭಿಕ್ಖುನೀ ಅಗಿಲಾನಾ ಛತ್ತುಪಾಹನಂ ಧಾರೇಯ್ಯ, ಪಾಚಿತ್ತಿಯ’’ನ್ತಿ.

೧೧೮೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಗಿಲಾನಾ ನಾಮ ಯಸ್ಸಾ ವಿನಾ ಛತ್ತುಪಾಹನಂ ಫಾಸು ಹೋತಿ.

ಗಿಲಾನಾ ನಾಮ ಯಸ್ಸಾ ವಿನಾ ಛತ್ತುಪಾಹನಂ ನ ಫಾಸು ಹೋತಿ.

ಛತ್ತಂ ನಾಮ ತೀಣಿ ಛತ್ತಾನಿ – ಸೇತಚ್ಛತ್ತಂ, ಕಿಲಞ್ಜಚ್ಛತ್ತಂ, ಪಣ್ಣಚ್ಛತ್ತಂ ಮಣ್ಡಲಬದ್ಧಂ ಸಲಾಕಬದ್ಧಂ. ಧಾರೇಯ್ಯಾತಿ ಸಕಿಮ್ಪಿ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ.

೧೧೮೨. ಅಗಿಲಾನಾ ಅಗಿಲಾನಸಞ್ಞಾ ಛತ್ತುಪಾಹನಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ. ಅಗಿಲಾನಾ ವೇಮತಿಕಾ ಛತ್ತುಪಾಹನಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ. ಅಗಿಲಾನಾ ಗಿಲಾನಸಞ್ಞಾ ಛತ್ತುಪಾಹನಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಛತ್ತಂ ಧಾರೇತಿ ನ ಉಪಾಹನಂ, ಆಪತ್ತಿ ದುಕ್ಕಟಸ್ಸ. ಉಪಾಹನಂ ಧಾರೇತಿ ನ ಛತ್ತಂ, ಆಪತ್ತಿ ದುಕ್ಕಟಸ್ಸ. ಗಿಲಾನಾ ಅಗಿಲಾನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಗಿಲಾನಾ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಗಿಲಾನಾ ಗಿಲಾನಸಞ್ಞಾ, ಅನಾಪತ್ತಿ.

೧೧೮೩. ಅನಾಪತ್ತಿ ಗಿಲಾನಾಯ, ಆರಾಮೇ ಆರಾಮೂಪಚಾರೇ ಧಾರೇತಿ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಿಕ್ಖಾಪದಂ

೧೧೮೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಯಾನೇನ ಯಾಯಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ. … ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

‘‘ಯಾ ಪನ ಭಿಕ್ಖುನೀ ಯಾನೇನ ಯಾಯೇಯ್ಯ, ಪಾಚಿತ್ತಿಯ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೧೧೮೫. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ, ನ ಸಕ್ಕೋತಿ ಪದಸಾ ಗನ್ತುಂ…ಪೇ… ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಅನುಜಾನಾಮಿ, ಭಿಕ್ಖವೇ, ಗಿಲಾನಾಯ ಭಿಕ್ಖುನಿಯಾ ಯಾನಂ. ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೮೬. ‘‘ಯಾ ಪನ ಭಿಕ್ಖುನೀ ಅಗಿಲಾನಾ ಯಾನೇನ ಯಾಯೇಯ್ಯ, ಪಾಚಿತ್ತಿಯ’’ನ್ತಿ.

೧೧೮೭. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಗಿಲಾನಾ ನಾಮ ಸಕ್ಕೋತಿ ಪದಸಾ ಗನ್ತುಂ.

ಗಿಲಾನಾ ನಾಮ ನ ಸಕ್ಕೋತಿ ಪದಸಾ ಗನ್ತುಂ.

ಯಾನಂ ನಾಮ ವಯ್ಹಂ ರಥೋ ಸಕಟಂ ಸನ್ದಮಾನಿಕಾ ಸಿವಿಕಾ ಪಾಟಙ್ಕೀ.

ಯಾಯೇಯ್ಯಾತಿ ಸಕಿಮ್ಪಿ ಯಾನೇನ ಯಾಯತಿ, ಆಪತ್ತಿ ಪಾಚಿತ್ತಿಯಸ್ಸ.

೧೧೮೮. ಅಗಿಲಾನಾ ಅಗಿಲಾನಸಞ್ಞಾ ಯಾನೇನ ಯಾಯತಿ, ಆಪತ್ತಿ ಪಾಚಿತ್ತಿಯಸ್ಸ. ಅಗಿಲಾನಾ ವೇಮತಿಕಾ ಯಾನೇನ ಯಾಯತಿ, ಆಪತ್ತಿ ಪಾಚಿತ್ತಿಯಸ್ಸ. ಅಗಿಲಾನಾ ಗಿಲಾನಸಞ್ಞಾ ಯಾನೇನ ಯಾಯತಿ, ಆಪತ್ತಿ ಪಾಚಿತ್ತಿಯಸ್ಸ.

ಗಿಲಾನಾ ಅಗಿಲಾನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಗಿಲಾನಾ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಗಿಲಾನಾ ಗಿಲಾನಸಞ್ಞಾ, ಅನಾಪತ್ತಿ.

೧೧೮೯. ಅನಾಪತ್ತಿ ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಿಕ್ಖಾಪದಂ

೧೧೯೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಅಞ್ಞತರಿಸ್ಸಾ ಇತ್ಥಿಯಾ ಕುಲೂಪಿಕಾ ಹೋತಿ. ಅಥ ಖೋ ಸಾ ಇತ್ಥೀ ತಂ ಭಿಕ್ಖುನಿಂ ಏತದವೋಚ – ‘‘ಹನ್ದಾಯ್ಯೇ, ಇಮಂ ಸಙ್ಘಾಣಿಂ ಅಮುಕಾಯ ನಾಮ ಇತ್ಥಿಯಾ ದೇಹೀ’’ತಿ. ಅಥ ಖೋ ಸಾ ಭಿಕ್ಖುನೀ – ‘‘ಸಚಾಹಂ ಪತ್ತೇನ ಆದಾಯ ಗಚ್ಛಾಮಿ ವಿಸ್ಸರೋ ಮೇ ಭವಿಸ್ಸತೀ’’ತಿ ಪಟಿಮುಞ್ಚಿತ್ವಾ ಅಗಮಾಸಿ. ತಸ್ಸಾ ರಥಿಕಾಯ ಸುತ್ತಕೇ ಛಿನ್ನೇ ವಿಪ್ಪಕಿರಿಯಿಂಸು. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಸಙ್ಘಾಣಿಂ ಧಾರೇಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ. … ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಸಙ್ಘಾಣಿಂ ಧಾರೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಸಙ್ಘಾಣಿಂ ಧಾರೇತೀ’’ತಿ [ಧಾರೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಸಙ್ಘಾಣಿಂ ಧಾರೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೯೧. ‘‘ಯಾ ಪನ ಭಿಕ್ಖುನೀ ಸಙ್ಘಾಣಿಂ ಧಾರೇಯ್ಯ, ಪಾಚಿತ್ತಿಯ’’ನ್ತಿ.

೧೧೯೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಙ್ಘಾಣಿ ನಾಮ ಯಾ ಕಾಚಿ ಕಟೂಪಗಾ.

ಧಾರೇಯ್ಯಾತಿ ಸಕಿಮ್ಪಿ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ.

೧೧೯೩. ಅನಾಪತ್ತಿ ಆಬಾಧಪ್ಪಚ್ಚಯಾ, ಕಟಿಸುತ್ತಕಂ ಧಾರೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಿಕ್ಖಾಪದಂ

೧೧೯೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇಸ್ಸನ್ತೀ’’ತಿ …ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೯೫. ‘‘ಯಾ ಪನ ಭಿಕ್ಖುನೀ ಇತ್ಥಾಲಙ್ಕಾರಂ ಧಾರೇಯ್ಯ, ಪಾಚಿತ್ತಿಯ’’ನ್ತಿ.

೧೧೯೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಇತ್ಥಾಲಙ್ಕಾರೋ ನಾಮ ಸೀಸೂಪಗೋ ಗೀವೂಪಗೋ ಹತ್ಥೂಪಗೋ ಪಾದೂಪಗೋ ಕಟೂಪಗೋ. ಧಾರೇಯ್ಯಾತಿ ಸಕಿಮ್ಪಿ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ.

೧೧೯೭. ಅನಾಪತ್ತಿ ಆಬಾಧಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಿಕ್ಖಾಪದಂ

೧೧೯೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೯೯. ‘‘ಯಾ ಪನ ಭಿಕ್ಖುನೀ ಗನ್ಧವಣ್ಣಕೇನ ನಹಾಯೇಯ್ಯ, ಪಾಚಿತ್ತಿಯ’’ನ್ತಿ.

೧೨೦೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಗನ್ಧೋ ನಾಮ ಯೋ ಕೋಚಿ ಗನ್ಧೋ. ವಣ್ಣಕಂ ನಾಮ ಯಂ ಕಿಞ್ಚಿ ವಣ್ಣಕಂ. ನಹಾಯೇಯ್ಯಾತಿ ನಹಾಯತಿ. ಪಯೋಗೇ ದುಕ್ಕಟಂ, ನಹಾನಪರಿಯೋಸಾನೇ ಆಪತ್ತಿ ಪಾಚಿತ್ತಿಯಸ್ಸ.

೧೨೦೧. ಅನಾಪತ್ತಿ ಆಬಾಧಪ್ಪಚ್ಚಯಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಿಕ್ಖಾಪದಂ

೧೨೦೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೦೩. ‘‘ಯಾ ಪನ ಭಿಕ್ಖುನೀ ವಾಸಿತಕೇನ ಪಿಞ್ಞಾಕೇನ ನಹಾಯೇಯ್ಯ, ಪಾಚಿತ್ತಿಯ’’ನ್ತಿ.

೧೨೦೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ವಾಸಿತಕಂ ನಾಮ ಯಂ ಕಿಞ್ಚಿ ಗನ್ಧವಾಸಿತಕಂ. ಪಿಞ್ಞಾಕಂ ನಾಮ ತಿಲಪಿಟ್ಠಂ ವುಚ್ಚತಿ. ನಹಾಯೇಯ್ಯಾತಿ ನಹಾಯತಿ. ಪಯೋಗೇ ದುಕ್ಕಟಂ, ನಹಾನಪರಿಯೋಸಾನೇ ಆಪತ್ತಿ ಪಾಚಿತ್ತಿಯಸ್ಸ.

೧೨೦೫. ಅನಾಪತ್ತಿ ಆಬಾಧಪ್ಪಚ್ಚಯಾ, ಪಕತಿಪಿಞ್ಞಾಕೇನ ನಹಾಯತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಿಕ್ಖಾಪದಂ

೧೨೦೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ. ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೦೭. ‘‘ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೧೨೦೮. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಭಿಕ್ಖುನಿಯಾತಿ ಅಞ್ಞಾಯ ಭಿಕ್ಖುನಿಯಾ. ಉಮ್ಮದ್ದಾಪೇಯ್ಯ ವಾತಿ ಉಮ್ಮದ್ದಾಪೇತಿ [ಉಬ್ಬಟ್ಟಾಪೇತಿ (ಸೀ.)], ಆಪತ್ತಿ ಪಾಚಿತ್ತಿಯಸ್ಸ. ಪರಿಮದ್ದಾಪೇಯ್ಯ ವಾತಿ ಸಮ್ಬಾಹಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

೧೨೦೯. ಅನಾಪತ್ತಿ ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೮-೯-೧೦. ಅಟ್ಠಮ-ನವಮ-ದಸಮಸಿಕ್ಖಾಪದಂ

೧೨೧೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಸಿಕ್ಖಮಾನಾಯ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ…ಪೇ… ಸಾಮಣೇರಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ…ಪೇ… ಗಿಹಿನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪಿ. ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪೀತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇನ್ತಿಪಿ ಪರಿಮದ್ದಾಪೇನ್ತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸ್ಸನ್ತಿಪಿ ಪರಿಮದ್ದಾಪೇಸ್ಸನ್ತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೧೧. ‘‘ಯಾ ಪನ ಭಿಕ್ಖುನೀ (ಸಿಕ್ಖಮಾನಾಯ…ಪೇ… ಸಾಮಣೇರಿಯಾ…ಪೇ…) ಗಿಹಿನಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೧೨೧೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಿಕ್ಖಮಾನಾ ನಾಮ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಾ.

ಸಾಮಣೇರೀ ನಾಮ ದಸಸಿಕ್ಖಾಪದಿಕಾ.

ಗಿಹಿನೀ ನಾಮ ಅಗಾರಿನೀ ವುಚ್ಚತಿ.

ಉಮ್ಮದ್ದಾಪೇಯ್ಯ ವಾತಿ ಉಮ್ಮದ್ದಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಮದ್ದಾಪೇಯ್ಯ ವಾತಿ ಸಮ್ಬಾಹಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

೧೨೧೩. ಅನಾಪತ್ತಿ ಗಿಲಾನಾಯ [ಆಬಾಧಪ್ಪಚ್ಚಯಾ (ಕ.)], ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಅಟ್ಠಮ ನವಮ ದಸಮಸಿಕ್ಖಾಪದಾನಿ ನಿಟ್ಠಿತಾನಿ.

೧೧. ಏಕಾದಸಮಸಿಕ್ಖಾಪದಂ

೧೨೧೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದನ್ತಿ. ಭಿಕ್ಖೂ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೧೫. ‘‘ಯಾ ಪನ ಭಿಕ್ಖುನೀ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದೇಯ್ಯ, ಪಾಚಿತ್ತಿಯ’’ನ್ತಿ.

೧೨೧೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಭಿಕ್ಖುಸ್ಸ ಪುರತೋತಿ ಉಪಸಮ್ಪನ್ನಸ್ಸ ಪುರತೋ. ಅನಾಪುಚ್ಛಾತಿ ಅನಪಲೋಕೇತ್ವಾ. ಆಸನೇ ನಿಸೀದೇಯ್ಯಾತಿ ಅನ್ತಮಸೋ ಛಮಾಯಪಿ ನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ.

೧೨೧೭. ಅನಾಪುಚ್ಛಿತೇ ಅನಾಪುಚ್ಛಿತಸಞ್ಞಾ ಆಸನೇ ನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ವೇಮತಿಕಾ ಆಸನೇ ನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ಆಪುಚ್ಛಿತಸಞ್ಞಾ ಆಸನೇ ನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ.

ಆಪುಚ್ಛಿತೇ ಅನಾಪುಚ್ಛಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ಆಪುಚ್ಛಿತಸಞ್ಞಾ, ಅನಾಪತ್ತಿ.

೧೨೧೮. ಅನಾಪತ್ತಿ ಆಪುಚ್ಛಾ ಆಸನೇ ನಿಸೀದತಿ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಏಕಾದಸಮಸಿಕ್ಖಾಪದಂ ನಿಟ್ಠಿತಂ.

೧೨. ದ್ವಾದಸಮಸಿಕ್ಖಾಪದಂ

೧೨೧೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನ್ತಿ. ಭಿಕ್ಖೂ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೨೦. ‘‘ಯಾ ಪನ ಭಿಕ್ಖುನೀ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛೇಯ್ಯ, ಪಾಚಿತ್ತಿಯ’’ನ್ತಿ.

೧೨೨೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅನೋಕಾಸಕತನ್ತಿ ಅನಾಪುಚ್ಛಾ. ಭಿಕ್ಖುನ್ತಿ ಉಪಸಮ್ಪನ್ನಂ. ಪಞ್ಹಂ ಪುಚ್ಛೇಯ್ಯಾತಿ ಸುತ್ತನ್ತೇ ಓಕಾಸಂ ಕಾರಾಪೇತ್ವಾ ವಿನಯಂ ವಾ ಅಭಿಧಮ್ಮಂ ವಾ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ. ವಿನಯೇ ಓಕಾಸಂ ಕಾರಾಪೇತ್ವಾ ಸುತ್ತನ್ತಂ ವಾ ಅಭಿಧಮ್ಮಂ ವಾ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ. ಅಭಿಧಮ್ಮೇ ಓಕಾಸಂ ಕಾರಾಪೇತ್ವಾ ಸುತ್ತನ್ತಂ ವಾ ವಿನಯಂ ವಾ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ.

೧೨೨೨. ಅನಾಪುಚ್ಛಿತೇ ಅನಾಪುಚ್ಛಿತಸಞ್ಞಾ ಪಞ್ಹಂ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ವೇಮತಿಕಾ ಪಞ್ಹಂ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ಆಪುಚ್ಛಿತಸಞ್ಞಾ ಪಞ್ಹಂ ಪುಚ್ಛತಿ, ಆಪತ್ತಿ ಪಾಚಿತ್ತಿಯಸ್ಸ.

ಆಪುಚ್ಛಿತೇ ಅನಾಪುಚ್ಛಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ಆಪುಚ್ಛಿತಸಞ್ಞಾ, ಅನಾಪತ್ತಿ.

೧೨೨೩. ಅನಾಪತ್ತಿ ಓಕಾಸಂ ಕಾರಾಪೇತ್ವಾ ಪುಚ್ಛತಿ, ಅನೋದಿಸ್ಸ ಓಕಾಸಂ ಕಾರಾಪೇತ್ವಾ ಯತ್ಥ ಕತ್ಥಚಿ ಪುಚ್ಛತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದ್ವಾದಸಮಸಿಕ್ಖಾಪದಂ ನಿಟ್ಠಿತಂ.

೧೩. ತೇರಸಮಸಿಕ್ಖಾಪದಂ

೧೨೨೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಅಸಙ್ಕಚ್ಚಿಕಾ [ಅಸಙ್ಕಚ್ಛಿಕಾ (ಸ್ಯಾ.)] ಗಾಮಂ ಪಿಣ್ಡಾಯ ಪಾವಿಸಿ. ತಸ್ಸಾ ರಥಿಕಾಯ ವಾತಮಣ್ಡಲಿಕಾ ಸಙ್ಘಾಟಿಯೋ ಉಕ್ಖಿಪಿಂಸು. ಮನುಸ್ಸಾ ಉಕ್ಕುಟ್ಠಿಂ ಅಕಂಸು – ‘‘ಸುನ್ದರಾ ಅಯ್ಯಾಯ ಥನುದರಾ’’ತಿ. ಸಾ ಭಿಕ್ಖುನೀ ತೇಹಿ ಮನುಸ್ಸೇಹಿ ಉಪ್ಪಣ್ಡಿಯಮಾನಾ ಮಙ್ಕು ಅಹೋಸಿ. ಅಥ ಖೋ ಸಾ ಭಿಕ್ಖುನೀ ಉಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಅಸಙ್ಕಚ್ಚಿಕಾ ಗಾಮಂ ಪವಿಸಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಅಸಙ್ಕಚ್ಚಿಕಾ ಗಾಮಂ ಪಾವಿಸೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಅಸಙ್ಕಚ್ಚಿಕಾ ಗಾಮಂ ಪವಿಸಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೨೨೫. ‘‘ಯಾ ಪನ ಭಿಕ್ಖುನೀ ಅಸಙ್ಕಚ್ಚಿಕಾ [ಅಸಙ್ಕಚ್ಛಿಕಾ (ಸ್ಯಾ.)] ಗಾಮಂ ಪವಿಸೇಯ್ಯ, ಪಾಚಿತ್ತಿಯ’’ನ್ತಿ.

೧೨೨೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಸಙ್ಕಚ್ಚಿಕಾತಿ ವಿನಾ ಸಙ್ಕಚ್ಚಿಕಂ.

ಸಙ್ಕಚ್ಚಿಕಂ ನಾಮ ಅಧಕ್ಖಕಂ ಉಬ್ಭನಾಭಿ, ತಸ್ಸ ಪಟಿಚ್ಛಾದನತ್ಥಾಯ.

ಗಾಮಂ ಪವಿಸೇಯ್ಯಾತಿ ಪರಿಕ್ಖಿತ್ತಸ್ಸ ಗಾಮಸ್ಸ ಪರಿಕ್ಖೇಪಂ ಅತಿಕ್ಕಾಮೇನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ. ಅಪರಿಕ್ಖಿತ್ತಸ್ಸ ಗಾಮಸ್ಸ ಉಪಚಾರಂ ಓಕ್ಕಮನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ.

೧೨೨೭. ಅನಾಪತ್ತಿ ಅಚ್ಛಿನ್ನಚೀವರಿಕಾಯ, ನಟ್ಠಚೀವರಿಕಾಯ, ಗಿಲಾನಾಯ, ಅಸ್ಸತಿಯಾ, ಅಜಾನನ್ತಿಯಾ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತೇರಸಮಸಿಕ್ಖಾಪದಂ ನಿಟ್ಠಿತಂ.

ಛತ್ತುಪಾಹನವಗ್ಗೋ ನವಮೋ.

ಉದ್ದಿಟ್ಠಾ ಖೋ, ಅಯ್ಯಾಯೋ, ಛಸಟ್ಠಿಸತಾ ಪಾಚಿತ್ತಿಯಾ ಧಮ್ಮಾ. ತತ್ಥಾಯ್ಯಾಯೋ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ದುತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ತತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

ಖುದ್ದಕಂ ಸಮತ್ತಂ.

ಭಿಕ್ಖುನಿವಿಭಙ್ಗೇ ಪಾಚಿತ್ತಿಯಕಣ್ಡಂ ನಿಟ್ಠಿತಂ.