೨. ದುತಿಯಸಿಕ್ಖಾಪದಂ

೧೦೭೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪಾಯನ್ತಿಂ ವುಟ್ಠಾಪೇನ್ತಿ. ಸಾ ಪಿಣ್ಡಾಯ ಚರತಿ. ಮನುಸ್ಸಾ ಏವಮಾಹಂಸು – ‘‘ದೇಥಾಯ್ಯಾಯ ಭಿಕ್ಖಂ, ಸದುತಿಯಿಕಾ ಅಯ್ಯಾ’’ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಪಾಯನ್ತಿಂ ವುಟ್ಠಾಪೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಪಾಯನ್ತಿಂ ವುಟ್ಠಾಪೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಪಾಯನ್ತಿಂ ವುಟ್ಠಾಪೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಪಾಯನ್ತಿಂ ವುಟ್ಠಾಪೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೭೩. ‘‘ಯಾ ಪನ ಭಿಕ್ಖುನೀ ಪಾಯನ್ತಿಂ ವುಟ್ಠಾಪೇಯ್ಯ, ಪಾಚಿತ್ತಿಯ’’ನ್ತಿ.

೧೦೭೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪಾಯನ್ತೀ ನಾಮ ಮಾತಾ ವಾ ಹೋತಿ [ಹೋತು (ಕ.)] ಧಾತಿ [ಧಾತೀ (ಸೀ. ಸ್ಯಾ.)] ವಾ.

ವುಟ್ಠಾಪೇಯ್ಯಾತಿ ಉಪಸಮ್ಪಾದೇಯ್ಯ.

‘‘ವುಟ್ಠಾಪೇಸ್ಸಾಮೀ’’ತಿ ಗಣಂ ವಾ ಆಚರಿನಿಂ ವಾ ಪತ್ತಂ ವಾ ಚೀವರಂ ವಾ ಪರಿಯೇಸತಿ, ಸೀಮಂ ವಾ ಸಮ್ಮನ್ನತಿ, ಆಪತ್ತಿ ದುಕ್ಕಟಸ್ಸ. ಞತ್ತಿಯಾ ದುಕ್ಕಟಂ. ದ್ವೀಹಿ ಕಮ್ಮವಾಚಾಹಿ ದುಕ್ಕಟಾ. ಕಮ್ಮವಾಚಾಪರಿಯೋಸಾನೇ ಉಪಜ್ಝಾಯಾಯ ಆಪತ್ತಿ ಪಾಚಿತ್ತಿಯಸ್ಸ. ಗಣಸ್ಸ ಚ ಆಚರಿನಿಯಾ ಚ ಆಪತ್ತಿ ದುಕ್ಕಟಸ್ಸ.

೧೦೭೫. ಪಾಯನ್ತಿಯಾ ಪಾಯನ್ತಿಸಞ್ಞಾ ವುಟ್ಠಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಪಾಯನ್ತಿಯಾ ವೇಮತಿಕಾ ವುಟ್ಠಾಪೇತಿ, ಆಪತ್ತಿ ದುಕ್ಕಟಸ್ಸ. ಪಾಯನ್ತಿಯಾ ಅಪಾಯನ್ತಿಸಞ್ಞಾ ವುಟ್ಠಾಪೇತಿ, ಅನಾಪತ್ತಿ. ಅಪಾಯನ್ತಿಯಾ ಪಾಯನ್ತಿಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಪಾಯನ್ತಿಯಾ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಪಾಯನ್ತಿಯಾ ಅಪಾಯನ್ತಿಸಞ್ಞಾ, ಅನಾಪತ್ತಿ.

೧೦೭೬. ಅನಾಪತ್ತಿ ಪಾಯನ್ತಿಂ ಅಪಾಯನ್ತಿಸಞ್ಞಾ ವುಟ್ಠಾಪೇತಿ, ಅಪಾಯನ್ತಿಂ ಅಪಾಯನ್ತಿಸಞ್ಞಾ ವುಟ್ಠಾಪೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.