೧೦. ದಸಮಸಿಕ್ಖಾಪದಂ

೧೧೧೫. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇತಿ ನ ವೂಪಕಾಸಾಪೇತಿ. ಸಾಮಿಕೋ ಅಗ್ಗಹೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇಸ್ಸತಿ ನ ವೂಪಕಾಸಾಪೇಸ್ಸತಿ, ಸಾಮಿಕೋ ಅಗ್ಗಹೇಸಿ! ಸಚಾಯಂ ಭಿಕ್ಖುನೀ ಪಕ್ಕನ್ತಾ ಅಸ್ಸ, ನ ಚ ಸಾಮಿಕೋ ಗಣ್ಹೇಯ್ಯಾ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇತಿ ನ ವೂಪಕಾಸಾಪೇತಿ […ಸಿ (ಕ.)], ಸಾಮಿಕೋ ಅಗ್ಗಹೇಸೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇಸ್ಸತಿ ನ ವೂಪಕಾಸಾಪೇಸ್ಸತಿ, ಸಾಮಿಕೋ ಅಗ್ಗಹೇಸಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೧೧೬. ‘‘ಯಾ ಪನ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇಯ್ಯ ನ ವೂಪಕಾಸಾಪೇಯ್ಯ ಅನ್ತಮಸೋ ಛಪ್ಪಞ್ಚಯೋಜನಾನಿಪಿ, ಪಾಚಿತ್ತಿಯ’’ನ್ತಿ.

೧೧೧೭. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಹಜೀವಿನೀ ನಾಮ ಸದ್ಧಿವಿಹಾರಿನೀ ವುಚ್ಚತಿ. ವುಟ್ಠಾಪೇತ್ವಾತಿ ಉಪಸಮ್ಪಾದೇತ್ವಾ. ನೇವ ವೂಪಕಾಸೇಯ್ಯಾತಿ ನ ಸಯಂ ವೂಪಕಾಸೇಯ್ಯ. ನ ವೂಪಕಾಸಾಪೇಯ್ಯಾತಿ ನ ಅಞ್ಞಂ ಆಣಾಪೇಯ್ಯ. ‘‘ನೇವ ವೂಪಕಾಸೇಸ್ಸಾಮಿ ನ ವೂಪಕಾಸಾಪೇಸ್ಸಾಮಿ ಅನ್ತಮಸೋ ಛಪ್ಪಞ್ಚಯೋಜನಾನಿಪೀ’’ತಿ ಧುರಂ ನಿಕ್ಖಿತ್ತಮತ್ತೇ ಆಪತ್ತಿ ಪಾಚಿತ್ತಿಯಸ್ಸ.

೧೧೧೮. ಅನಾಪತ್ತಿ ಸತಿ ಅನ್ತರಾಯೇ, ಪರಿಯೇಸಿತ್ವಾ ದುತಿಯಿಕಂ ಭಿಕ್ಖುನಿಂ ನ ಲಭತಿ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ಗಬ್ಭಿನಿವಗ್ಗೋ ಸತ್ತಮೋ.