೫. ಚಿತ್ತಾಗಾರವಗ್ಗೋ

೧. ಪಠಮಸಿಕ್ಖಾಪದಂ

೯೭೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ಉಯ್ಯಾನೇ ಚಿತ್ತಾಗಾರೇ ಪಟಿಭಾನಚಿತ್ತಂ ಕತಂ ಹೋತಿ. ಬಹೂ ಮನುಸ್ಸಾ ಚಿತ್ತಾಗಾರಂ ದಸ್ಸನಾಯ ಗಚ್ಛನ್ತಿ. ಛಬ್ಬಗ್ಗಿಯಾಪಿ ಭಿಕ್ಖುನಿಯೋ ಚಿತ್ತಾಗಾರಂ ದಸ್ಸನಾಯ ಅಗಮಂಸು. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಚಿತ್ತಾಗಾರಂ ದಸ್ಸನಾಯ ಗಚ್ಛಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಚಿತ್ತಾಗಾರಂ ದಸ್ಸನಾಯ ಗಚ್ಛಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಚಿತ್ತಾಗಾರಂ ದಸ್ಸನಾಯ ಗಚ್ಛನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಚಿತ್ತಾಗಾರಂ ದಸ್ಸನಾಯ ಗಚ್ಛಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೭೮. ‘‘ಯಾ ಪನ ಭಿಕ್ಖುನೀ ರಾಜಾಗಾರಂ ವಾ ಚಿತ್ತಾಗಾರಂ ವಾ ಆರಾಮಂ ವಾ ಉಯ್ಯಾನಂ ವಾ ಪೋಕ್ಖರಣಿಂ ವಾ ದಸ್ಸನಾಯ ಗಚ್ಛೇಯ್ಯ, ಪಾಚಿತ್ತಿಯ’’ನ್ತಿ.

೯೭೯. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ರಾಜಾಗಾರಂ ನಾಮ ಯತ್ಥ ಕತ್ಥಚಿ ರಞ್ಞೋ ಕೀಳಿತುಂ ರಮಿತುಂ ಕತಂ ಹೋತಿ.

ಚಿತ್ತಾಗಾರಂ ನಾಮ ಯತ್ಥ ಕತ್ಥಚಿ ಮನುಸ್ಸಾನಂ ಕೀಳಿತುಂ ರಮಿತುಂ ಕತಂ ಹೋತಿ.

ಆರಾಮೋ ನಾಮ ಯತ್ಥ ಕತ್ಥಚಿ ಮನುಸ್ಸಾನಂ ಕೀಳಿತುಂ ರಮಿತುಂ ಕತೋ ಹೋತಿ.

ಉಯ್ಯಾನಂ ನಾಮ ಯತ್ಥ ಕತ್ಥಚಿ ಮನುಸ್ಸಾನಂ ಕೀಳಿತುಂ ರಮಿತುಂ ಕತಂ ಹೋತಿ.

ಪೋಕ್ಖರಣೀ ನಾಮ ಯತ್ಥ ಕತ್ಥಚಿ ಮನುಸ್ಸಾನಂ ಕೀಳಿತುಂ ರಮಿತುಂ ಕತಾ ಹೋತಿ.

೯೮೦. ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತಾ ಪಸ್ಸತಿ, ಆಪತ್ತಿ ಪಾಚಿತ್ತಿಯಸ್ಸ. ದಸ್ಸನೂಪಚಾರಂ ವಿಜಹಿತ್ವಾ ಪುನಪ್ಪುನಂ ಪಸ್ಸತಿ, ಆಪತ್ತಿ ಪಾಚಿತ್ತಿಯಸ್ಸ. ಏಕಮೇಕಂ ದಸ್ಸನಾಯ ಗಚ್ಛತಿ, ಆಪತ್ತಿ ದುಕ್ಕಟಸ್ಸ. ಯತ್ಥ ಠಿತಾ ಪಸ್ಸತಿ, ಆಪತ್ತಿ ಪಚಿತ್ತಿಯಸ್ಸ. ದಸ್ಸನೂಪಚಾರಂ ವಿಜಹಿತ್ವಾ ಪುನಪ್ಪುನಂ ಪಸ್ಸತಿ, ಆಪತ್ತಿ ಪಾಚಿತ್ತಿಯಸ್ಸ.

೯೮೧. ಅನಾಪತ್ತಿ ಆರಾಮೇ ಠಿತಾ ಪಸ್ಸತಿ, ಗಚ್ಛನ್ತೀ ವಾ ಆಗಚ್ಛನ್ತೀ ವಾ ಪಸ್ಸತಿ, ಸತಿ ಕರಣೀಯೇ ಗನ್ತ್ವಾ ಪಸ್ಸತಿ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಿಕ್ಖಾಪದಂ

೯೮೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಆಸನ್ದಿಮ್ಪಿ ಪಲ್ಲಙ್ಕಮ್ಪಿ ಪರಿಭುಞ್ಜನ್ತಿ. ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಆಸನ್ದಿಮ್ಪಿ ಪಲ್ಲಙ್ಕಮ್ಪಿ ಪರಿಭುಞ್ಜಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಆಸನ್ದಿಮ್ಪಿ ಪಲ್ಲಙ್ಕಮ್ಪಿ ಪರಿಭುಞ್ಜಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಆಸನ್ದಿಮ್ಪಿ ಪಲ್ಲಙ್ಕಮ್ಪಿ ಪರಿಭುಞ್ಜನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಆಸನ್ದಿಮ್ಪಿ ಪಲ್ಲಙ್ಕಮ್ಪಿ ಪರಿಭುಞ್ಜಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೮೩. ‘‘ಯಾ ಪನ ಭಿಕ್ಖುನೀ ಆಸನ್ದಿಂ ವಾ ಪಲ್ಲಙ್ಕಂ ವಾ ಪರಿಭುಞ್ಜೇಯ್ಯ, ಪಾಚಿತ್ತಿಯ’’ನ್ತಿ.

೯೮೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಆಸನ್ದೀ ನಾಮ ಅತಿಕ್ಕನ್ತಪ್ಪಮಾಣಾ ವುಚ್ಚತಿ.

ಪಲ್ಲಙ್ಕೋ ನಾಮ ಆಹರಿಮೇಹಿ [‘‘ಅಸಂಹಾರಿಮೇಹಿ’’ ಇತಿ ಕಙ್ಖಾವಿತರಣಿಯಾ ಸಮೇತಿ] ವಾಳೇಹಿ ಕತೋ ಹೋತಿ.

ಪರಿಭುಞ್ಜೇಯ್ಯಾತಿ ತಸ್ಮಿಂ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

೯೮೫. ಅನಾಪತ್ತಿ ಆಸನ್ದಿಯಾ ಪಾದೇ ಛಿನ್ದಿತ್ವಾ ಪರಿಭುಞ್ಜತಿ, ಪಲ್ಲಙ್ಕಸ್ಸ ವಾಳೇ ಭಿನ್ದಿತ್ವಾ ಪರಿಭುಞ್ಜತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಿಕ್ಖಾಪದಂ

೯೮೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಸುತ್ತಂ ಕನ್ತನ್ತಿ. ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಸುತ್ತಂ ಕನ್ತಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ …ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಸುತ್ತಂ ಕನ್ತಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಸುತ್ತಂ ಕನ್ತನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಸುತ್ತಂ ಕನ್ತಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೮೭. ‘‘ಯಾ ಪನ ಭಿಕ್ಖುನೀ ಸುತ್ತಂ ಕನ್ತೇಯ್ಯ, ಪಾಚಿತ್ತಿಯ’’ನ್ತಿ.

೯೮೮. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸುತ್ತಂ ನಾಮ ಛ ಸುತ್ತಾನಿ – ಖೋಮಂ, ಕಪ್ಪಾಸಿಕಂ, ಕೋಸೇಯ್ಯಂ, ಕಮ್ಬಲಂ, ಸಾಣಂ, ಭಙ್ಗಂ.

ಕನ್ತೇಯ್ಯಾತಿ ಸಯಂ ಕನ್ತತಿ, ಪಯೋಗೇ ದುಕ್ಕಟಂ. ಉಜ್ಜವುಜ್ಜವೇ ಆಪತ್ತಿ ಪಾಚಿತ್ತಿಯಸ್ಸ.

೯೮೯. ಅನಾಪತ್ತಿ ಕನ್ತಿತಸುತ್ತಂ ಕನ್ತತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಿಕ್ಖಾಪದಂ

೯೯೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಗಿಹಿವೇಯ್ಯಾವಚ್ಚಂ ಕರೋನ್ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಗಿಹಿವೇಯ್ಯಾವಚ್ಚಂ ಕರಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಗಿಹಿವೇಯ್ಯಾವಚ್ಚಂ ಕರೋನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಗಿಹಿವೇಯ್ಯಾವಚ್ಚಂ ಕರಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೯೧. ‘‘ಯಾ ಪನ ಭಿಕ್ಖುನೀ ಗಿಹಿವೇಯ್ಯಾವಚ್ಚಂ ಕರೇಯ್ಯ, ಪಾಚಿತ್ತಿಯ’’ನ್ತಿ.

೯೯೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಗಿಹಿವೇಯ್ಯಾವಚ್ಚಂ ನಾಮ ಅಗಾರಿಕಸ್ಸ ಯಾಗುಂ ವಾ ಭತ್ತಂ ವಾ ಖಾದನೀಯಂ ವಾ ಪಚತಿ, ಸಾಟಕಂ ವಾ ವೇಠನಂ ವಾ ಧೋವತಿ, ಆಪತ್ತಿ ಪಾಚಿತ್ತಿಯಸ್ಸ.

೯೯೩. ಅನಾಪತ್ತಿ ಯಾಗುಪಾನೇ, ಸಙ್ಘಭತ್ತೇ, ಚೇತಿಯಪೂಜಾಯ, ಅತ್ತನೋ ವೇಯ್ಯಾವಚ್ಚಕರಸ್ಸ ಯಾಗುಂ ವಾ ಭತ್ತಂ ವಾ ಖಾದನೀಯಂ ವಾ ಪಚತಿ, ಸಾಟಕಂ ವಾ ವೇಠನಂ ವಾ ಧೋವತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಿಕ್ಖಾಪದಂ

೯೯೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಥುಲ್ಲನನ್ದಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಏತದವೋಚ – ‘‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’’ತಿ. ಥುಲ್ಲನನ್ದಾ ಭಿಕ್ಖುನೀ ‘ಸಾಧೂ’ತಿ ಪಟಿಸ್ಸುಣಿತ್ವಾ ನೇವ ವೂಪಸಮೇತಿ ನ ವೂಪಸಮಾಯ ಉಸ್ಸುಕ್ಕಂ ಕರೋತಿ. ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಭಿಕ್ಖುನಿಯಾ – ‘ಏಹಾಯ್ಯೇ’, ಇಮಂ ಅಧಿಕರಣಂ ವೂಪಸಮೇಹೀ’ತಿ ವುಚ್ಚಮಾನಾ – ‘ಸಾಧೂ’ತಿ ಪಟಿಸ್ಸುಣಿತ್ವಾ, ನೇವ ವೂಪಸಮೇಸ್ಸತಿ ನ ವೂಪಸಮಾಯ ಉಸ್ಸುಕ್ಕಂ ಕರಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ – ‘‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’’ತಿ ವುಚ್ಚಮಾನಾ – ‘‘ಸಾಧೂ’’ತಿ ಪಟಿಸ್ಸುಣಿತ್ವಾ, ನೇವ ವೂಪಸಮೇತಿ ನ ವೂಪಸಮಾಯ ಉಸ್ಸುಕ್ಕಂ ಕರೋತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ – ‘‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’’ತಿ ವುಚ್ಚಮಾನಾ – ‘‘ಸಾಧೂ’’ತಿ ಪಟಿಸ್ಸುಣಿತ್ವಾ, ನೇವ ವೂಪಸಮೇಸ್ಸತಿ ನ ವೂಪಸಮಾಯ ಉಸ್ಸುಕ್ಕಂ ಕರಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೯೫. ‘‘ಯಾ ಪನ ಭಿಕ್ಖುನೀ ಭಿಕ್ಖುನಿಯಾ – ‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’ತಿ ವುಚ್ಚಮಾನಾ – ‘ಸಾಧೂ’ತಿ ಪಟಿಸ್ಸುಣಿತ್ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ವೂಪಸಮೇಯ್ಯ ನ ವೂಪಸಮಾಯ ಉಸ್ಸುಕ್ಕಂ ಕರೇಯ್ಯ, ಪಾಚಿತ್ತಿಯ’’ನ್ತಿ.

೯೯೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಭಿಕ್ಖುನಿಯಾತಿ ಅಞ್ಞಾಯ ಭಿಕ್ಖುನಿಯಾ.

ಅಧಿಕರಣಂ ನಾಮ ಚತ್ತಾರಿ ಅಧಿಕರಣಾನಿ – ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ.

ಏಹಾಯ್ಯೇ ಇಮಂ ಅಧಿಕರಣಂ ವೂಪಸಮೇಹೀತಿ ಏಹಾಯ್ಯೇ ಇಮಂ ಅಧಿಕರಣಂ ವಿನಿಚ್ಛೇಹಿ.

ಸಾ ಪಚ್ಛಾ ಅನನ್ತರಾಯಿಕಿನೀತಿ ಅಸತಿ ಅನ್ತರಾಯೇ.

ನೇವ ವೂಪಸಮೇಯ್ಯಾತಿ ನ ಸಯಂ ವೂಪಸಮೇಯ್ಯ.

ನ ವೂಪಸಮಾಯ ಉಸ್ಸುಕ್ಕಂ ಕರೇಯ್ಯಾತಿ ನ ಅಞ್ಞಂ ಆಣಾಪೇಯ್ಯ. ‘‘ನೇವ ವೂಪಸಮೇಸ್ಸಾಮಿ ನ ವೂಪಸಮಾಯ ಉಸ್ಸುಕ್ಕಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿತ್ತಮತ್ತೇ, ಆಪತ್ತಿ ಪಾಚಿತ್ತಿಯಸ್ಸ.

೯೯೭. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ ಅಧಿಕರಣಂ ನೇವ ವೂಪಸಮೇತಿ ನ ವೂಪಸಮಾಯ ಉಸ್ಸುಕ್ಕಂ ಕರೋತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ವೇಮತಿಕಾ ಅಧಿಕರಣಂ ನೇವ ವೂಪಸಮೇತಿ, ನ ವೂಪಸಮಾಯ ಉಸ್ಸುಕ್ಕಂ ಕರೋತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ ಅಧಿಕರಣಂ ನೇವ ವೂಪಸಮೇತಿ, ನ ವೂಪಸಮಾಯ ಉಸ್ಸುಕ್ಕಂ ಕರೋತಿ, ಆಪತ್ತಿ ಪಾಚಿತ್ತಿಯಸ್ಸ.

ಅನುಪಸಮ್ಪನ್ನಾಯ ಅಧಿಕರಣಂ ನೇವ ವೂಪಸಮೇತಿ, ನ ವೂಪಸಮಾಯ ಉಸ್ಸುಕ್ಕಂ ಕರೋತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೯೯೮. ಅನಾಪತ್ತಿ ಸತಿ ಅನ್ತರಾಯೇ, ಪರಿಯೇಸಿತ್ವಾ ನ ಲಭತಿ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಿಕ್ಖಾಪದಂ

೯೯೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ನಟಾನಮ್ಪಿ ನಟಕಾನಮ್ಪಿ ಲಙ್ಘಕಾನಮ್ಪಿ ಸೋಕಜ್ಝಾಯಿಕಾನಮ್ಪಿ ಕುಮ್ಭಥೂಣಿಕಾನಮ್ಪಿ ಸಹತ್ಥಾ ಖಾದನೀಯಂ ಭೋಜನೀಯಂ ದೇತಿ – ‘‘ಮಯ್ಹಂ ಪರಿಸತಿ ವಣ್ಣಂ ಭಾಸಥಾ’’ತಿ. ನಟಾಪಿ ನಟಕಾಪಿ ಲಙ್ಘಕಾಪಿ ಸೋಕಜ್ಝಾಯಿಕಾಪಿ ಕುಮ್ಭಥೂಣಿಕಾಪಿ ಥುಲ್ಲನನ್ದಾಯ ಭಿಕ್ಖುನಿಯಾ ಪರಿಸತಿ ವಣ್ಣಂ ಭಾಸನ್ತಿ – ‘‘ಅಯ್ಯಾ ಥುಲ್ಲನನ್ದಾ ಬಹುಸ್ಸುತಾ ಭಾಣಿಕಾ ವಿಸಾರದಾ ಪಟ್ಟಾ ಧಮ್ಮಿಂ ಕಥಂ ಕಾತುಂ; ದೇಥ ಅಯ್ಯಾಯ, ಕರೋಥ ಅಯ್ಯಾಯಾ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಅಗಾರಿಕಸ್ಸ ಸಹತ್ಥಾ ಖಾದನೀಯಂ ಭೋಜನೀಯಂ ದಸ್ಸತೀತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅಗಾರಿಕಸ್ಸ ಸಹತ್ಥಾ ಖಾದನೀಯಂ ಭೋಜನೀಯಂ ದೇತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅಗಾರಿಕಸ್ಸ ಸಹತ್ಥಾ ಖಾದನೀಯಂ ಭೋಜನೀಯಂ ದಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೦೦. ‘‘ಯಾ ಪನ ಭಿಕ್ಖುನೀ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಂ ವಾ ಭೋಜನೀಯಂ ವಾ ದದೇಯ್ಯ, ಪಾಚಿತ್ತಿಯ’’ನ್ತಿ.

೧೦೦೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಗಾರಿಕೋ ನಾಮ ಯೋ ಕೋಚಿ ಅಗಾರಂ ಅಜ್ಝಾವಸತಿ.

ಪರಿಬ್ಬಾಜಕೋ ನಾಮ ಭಿಕ್ಖುಞ್ಚ ಸಾಮಣೇರಞ್ಚ ಠಪೇತ್ವಾ ಯೋ ಕೋಚಿ ಪರಿಬ್ಬಾಜಕಸಮಾಪನ್ನೋ.

ಪರಿಬ್ಬಾಜಿಕಾ ನಾಮ ಭಿಕ್ಖುನಿಞ್ಚ ಸಿಕ್ಖಮಾನಞ್ಚ ಸಾಮಣೇರಿಞ್ಚ ಠಪೇತ್ವಾ ಯಾ ಕಾಚಿ ಪರಿಬ್ಬಾಜಿಕಸಮಾಪನ್ನಾ.

ಖಾದನೀಯಂ ನಾಮ ಪಞ್ಚ ಭೋಜನಾನಿ – ಉದಕದನ್ತಪೋನಂ ಠಪೇತ್ವಾ ಅವಸೇಸಂ ಖಾದನೀಯಂ ನಾಮ.

ಭೋಜನೀಯಂ ನಾಮ ಪಞ್ಚ ಭೋಜನಾನಿ – ಓದನೋ, ಕುಮ್ಮಾಸೋ, ಸತ್ತು, ಮಚ್ಛೋ, ಮಂಸಂ.

ದದೇಯ್ಯಾತಿ ಕಾಯೇನ ವಾ ಕಾಯಪಟಿಬದ್ಧೇನ ವಾ ನಿಸ್ಸಗ್ಗಿಯೇನ ವಾ ದೇತಿ, ಆಪತ್ತಿ ಪಾಚಿತ್ತಿಯಸ್ಸ. ಉದಕದನ್ತಪೋನಂ ದೇತಿ, ಆಪತ್ತಿ ದುಕ್ಕಟಸ್ಸ.

೧೦೦೨. ಅನಾಪತ್ತಿ ದಾಪೇತಿ ನ ದೇತಿ, ಉಪನಿಕ್ಖಿಪಿತ್ವಾ ದೇತಿ, ಬಾಹಿರಾಲೇಪಂ ದೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಿಕ್ಖಾಪದಂ

೧೦೦೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜತಿ. ಅಞ್ಞಾ ಉತುನಿಯೋ ಭಿಕ್ಖುನಿಯೋ ನ ಲಭನ್ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೦೪. ‘‘ಯಾ ಪನ ಭಿಕ್ಖುನೀ ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜೇಯ್ಯ, ಪಾಚಿತ್ತಿಯ’’ನ್ತಿ.

೧೦೦೫. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಆವಸಥಚೀವರಂ ನಾಮ ‘‘ಉತುನಿಯೋ ಭಿಕ್ಖುನಿಯೋ ಪರಿಭುಞ್ಜನ್ತೂ’’ತಿ ದಿನ್ನಂ ಹೋತಿ.

ಅನಿಸ್ಸಜ್ಜಿತ್ವಾ ಪರಿಭುಞ್ಜೇಯ್ಯಾತಿ ದ್ವೇತಿಸ್ಸೋ ರತ್ತಿಯೋ ಪರಿಭುಞ್ಜಿತ್ವಾ ಚತುತ್ಥದಿವಸೇ ಧೋವಿತ್ವಾ ಭಿಕ್ಖುನಿಯಾ ವಾ ಸಿಕ್ಖಮಾನಾಯ ವಾ ಸಾಮಣೇರಿಯಾ ವಾ ಅನಿಸ್ಸಜ್ಜಿತ್ವಾ ಪರಿಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ.

೧೦೦೬. ಅನಿಸ್ಸಜ್ಜಿತೇ ಅನಿಸ್ಸಜ್ಜಿತಸಞ್ಞಾ ಪರಿಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಿಸ್ಸಜ್ಜಿತೇ ವೇಮತಿಕಾ ಪರಿಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಿಸ್ಸಜ್ಜಿತೇ ನಿಸ್ಸಜ್ಜಿತಸಞ್ಞಾ ಪರಿಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ.

ನಿಸ್ಸಜ್ಜಿತೇ ಅನಿಸ್ಸಜ್ಜಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ನಿಸ್ಸಜ್ಜಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ನಿಸ್ಸಜ್ಜಿತೇ ನಿಸ್ಸಜ್ಜಿತಸಞ್ಞಾ ಅನಾಪತ್ತಿ.

೧೦೦೭. ಅನಾಪತ್ತಿ ನಿಸ್ಸಜ್ಜಿತ್ವಾ ಪರಿಭುಞ್ಜತಿ, ಪುನ ಪರಿಯಾಯೇನ ಪರಿಭುಞ್ಜತಿ, ಅಞ್ಞಾ ಉತುನಿಯೋ ಭಿಕ್ಖುನಿಯೋ ನ ಹೋನ್ತಿ, ಅಚ್ಛಿನ್ನಚೀವರಿಕಾಯ, ನಟ್ಠಚೀವರಿಕಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೮. ಅಟ್ಠಮಸಿಕ್ಖಾಪದಂ

೧೦೦೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಾಮಿ. ತೇನ ಖೋ ಪನ ಸಮಯೇನ ಥುಲ್ಲನನ್ದಾಯ ಭಿಕ್ಖುನಿಯಾ ಆವಸಥೋ ಡಯ್ಹತಿ. ಭಿಕ್ಖುನಿಯೋ ಏವಮಾಹಂಸು – ‘‘ಹನ್ದಾಯ್ಯೇ, ಭಣ್ಡಕಂ ನೀಹರಾಮಾ’’ತಿ. ಏಕಚ್ಚಾ ಏವಮಾಹಂಸು – ‘‘ನ ಮಯಂ, ಅಯ್ಯೇ, ನೀಹರಿಸ್ಸಾಮ. ಯಂ ಕಿಞ್ಚಿ ನಟ್ಠಂ ಸಬ್ಬಂ ಅಮ್ಹೇ ಅಭಿಯುಞ್ಜಿಸ್ಸತೀ’’ತಿ. ಥುಲ್ಲನನ್ದಾ ಭಿಕ್ಖುನೀ ಪುನದೇವ ತಂ ಆವಸಥಂ ಪಚ್ಚಾಗನ್ತ್ವಾ ಭಿಕ್ಖುನಿಯೋ ಪುಚ್ಛಿ – ‘‘ಅಪಾಯ್ಯೇ, ಭಣ್ಡಕಂ ನೀಹರಿತ್ಥಾ’’ತಿ? ‘‘ನ ಮಯಂ, ಅಯ್ಯೇ, ನೀಹರಿಮ್ಹಾ’’ತಿ. ಥುಲ್ಲನನ್ದಾ ಭಿಕ್ಖುನೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಆವಸಥೇ ಡಯ್ಹಮಾನೇ ಭಣ್ಡಕಂ ನ ನೀಹರಿಸ್ಸನ್ತೀ’’ತಿ! ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮತೀತಿ [ಪಕ್ಕಮೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೦೯. ‘‘ಯಾ ಪನ ಭಿಕ್ಖುನೀ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮೇಯ್ಯ, ಪಾಚಿತ್ತಿಯ’’ನ್ತಿ.

೧೦೧೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಆವಸಥೋ ನಾಮ ಕವಾಟಬದ್ಧೋ ವುಚ್ಚತಿ.

ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮೇಯ್ಯಾತಿ ಭಿಕ್ಖುನಿಯಾ ವಾ ಸಿಕ್ಖಮಾನಾಯ ವಾ ಸಾಮಣೇರಿಯಾ ವಾ ಅನಿಸ್ಸಜ್ಜಿತ್ವಾ ಪರಿಕ್ಖಿತ್ತಸ್ಸ ಆವಸಥಸ್ಸ ಪರಿಕ್ಖೇಪಂ ಅತಿಕ್ಕಾಮೇನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ. ಅಪರಿಕ್ಖಿತ್ತಸ್ಸ ಆವಸಥಸ್ಸ ಉಪಚಾರಂ ಅತಿಕ್ಕಾಮೇನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ.

೧೦೧೧. ಅನಿಸ್ಸಜ್ಜಿತೇ ಅನಿಸ್ಸಜ್ಜಿತಸಞ್ಞಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಿಸ್ಸಜ್ಜಿತೇ ವೇಮತಿಕಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಿಸ್ಸಜ್ಜಿತೇ ನಿಸ್ಸಜ್ಜಿತಸಞ್ಞಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ.

ಅಕವಾಟಬದ್ಧಂ ಅನಿಸ್ಸಜ್ಜಿತ್ವಾ ಪಕ್ಕಮತಿ, ಆಪತ್ತಿ ದುಕ್ಕಟಸ್ಸ. ನಿಸ್ಸಜ್ಜಿತೇ ಅನಿಸ್ಸಜ್ಜಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ನಿಸ್ಸಜ್ಜಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ನಿಸ್ಸಜ್ಜಿತೇ ನಿಸ್ಸಜ್ಜಿತಸಞ್ಞಾ, ಅನಾಪತ್ತಿ.

೧೦೧೨. ಅನಾಪತ್ತಿ ನಿಸ್ಸಜ್ಜಿತ್ವಾ ಪಕ್ಕಮತಿ, ಸತಿ ಅನ್ತರಾಯೇ, ಪರಿಯೇಸಿತ್ವಾ ನ ಲಭತಿ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಅಟ್ಠಮಸಿಕ್ಖಾಪದಂ ನಿಟ್ಠಿತಂ.

೯. ನವಮಸಿಕ್ಖಾಪದಂ

೧೦೧೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣಿಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೧೪. ‘‘ಯಾ ಪನ ಭಿಕ್ಖುನೀ ತಿರಚ್ಛಾನವಿಜ್ಜಂ ಪರಿಯಾಪುಣೇಯ್ಯ, ಪಾಚಿತ್ತಿಯ’’ನ್ತಿ.

೧೦೧೫. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ತಿರಚ್ಛಾನವಿಜ್ಜಾ [ತಿರಚ್ಛಾನವಿಜ್ಜಂ (ಕ.)] ನಾಮ ಯಂ ಕಿಞ್ಚಿ ಬಾಹಿರಕಂ ಅನತ್ಥಸಂಹಿತಂ.

ಪರಿಯಾಪುಣೇಯ್ಯಾತಿ ಪದೇನ ಪರಿಯಾಪುಣಾತಿ, ಪದೇ ಪದೇ ಆಪತ್ತಿ ಪಾಚಿತ್ತಿಯಸ್ಸ. ಅಕ್ಖರಾಯ ಪರಿಯಾಪುಣಾತಿ, ಅಕ್ಖರಕ್ಖರಾಯ ಆಪತ್ತಿ ಪಾಚಿತ್ತಿಯಸ್ಸ.

೧೦೧೬. ಅನಾಪತ್ತಿ ಲೇಖಂ ಪರಿಯಾಪುಣಾತಿ, ಧಾರಣಂ ಪರಿಯಾಪುಣಾತಿ, ಗುತ್ತತ್ಥಾಯ ಪರಿತ್ತಂ ಪರಿಯಾಪುಣಾತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ನವಮಸಿಕ್ಖಾಪದಂ ನಿಟ್ಠಿತಂ.

೧೦. ದಸಮಸಿಕ್ಖಾಪದಂ

೧೦೧೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ವಾಚೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ವಾಚೇಸ್ಸನ್ತಿ, ಸೇಯ್ಯಥಾಪಿ ಗಿಹಿನಿಯೋ ಕಾಮಭೋಗಿನಿಯೋ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ವಾಚೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ವಾಚೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ವಾಚೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೧೦೧೮. ‘‘ಯಾ ಪನ ಭಿಕ್ಖುನೀ ತಿರಚ್ಛಾನವಿಜ್ಜಂ ವಾಚೇಯ್ಯ, ಪಾಚಿತ್ತಿಯ’’ನ್ತಿ.

೧೦೧೯. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ತಿರಚ್ಛಾನವಿಜ್ಜಾ [ತಿರಚ್ಛಾನವಿಜ್ಜಂ (ಕ.)] ನಾಮ ಯಂ ಕಿಞ್ಚಿ ಬಾಹಿರಕಂ ಅನತ್ಥಸಂಹಿತಂ.

ವಾಚೇಯ್ಯಾತಿ ಪದೇನ ವಾಚೇತಿ, ಪದೇ ಪದೇ ಆಪತ್ತಿ ಪಾಚಿತ್ತಿಯಸ್ಸ. ಅಕ್ಖರಾಯ ವಾಚೇತಿ, ಅಕ್ಖರಕ್ಖರಾಯ ಆಪತ್ತಿ ಪಾಚಿತ್ತಿಯಸ್ಸ.

೧೦೨೦. ಅನಾಪತ್ತಿ ಲೇಖಂ ವಾಚೇತಿ, ಧಾರಣಂ ವಾಚೇತಿ, ಗುತ್ತತ್ಥಾಯ ಪರಿತ್ತಂ ವಾಚೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ಚಿತ್ತಾಗಾರವಗ್ಗೋ ಪಞ್ಚಮೋ.