೯. ದುಟ್ಠುಲ್ಲಾರೋಚನಸಿಕ್ಖಾಪದಂ

೭೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಛಬ್ಬಗ್ಗಿಯೇಹಿ ಭಿಕ್ಖೂಹಿ ಸದ್ಧಿಂ ಭಣ್ಡನಕತೋ ಹೋತಿ. ಸೋ ಸಞ್ಚೇತನಿಕಂ ಸುಕ್ಕವಿಸ್ಸಟ್ಠಿಂ ಆಪತ್ತಿಂ ಆಪಜ್ಜಿತ್ವಾ ಸಙ್ಘಂ ತಸ್ಸಾ ಆಪತ್ತಿಯಾ ಪರಿವಾಸಂ ಯಾಚಿ. ತಸ್ಸ ಸಙ್ಘೋ ತಸ್ಸಾ ಆಪತ್ತಿಯಾ ಪರಿವಾಸಂ ಅದಾಸಿ. ತೇನ ಖೋ ಪನ ಸಮಯೇನ ಸಾವತ್ಥಿಯಂ ಅಞ್ಞತರಸ್ಸ ಪೂಗಸ್ಸ ಸಙ್ಘಭತ್ತಂ ಹೋತಿ. ಸೋ ಪರಿವಸನ್ತೋ ಭತ್ತಗ್ಗೇ ಆಸನಪರಿಯನ್ತೇ ನಿಸೀದಿ. ಛಬ್ಬಗ್ಗಿಯಾ ಭಿಕ್ಖೂ ತೇ ಉಪಾಸಕೇ ಏತದವೋಚುಂ – ‘‘ಏಸೋ, ಆವುಸೋ, ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ತುಮ್ಹಾಕಂ ಸಮ್ಭಾವಿತೋ ಕುಲೂಪಕೋ; ಯೇನೇವ ಹತ್ಥೇನ ಸದ್ಧಾದೇಯ್ಯಂ ಭುಞ್ಜತಿ ತೇನೇವ ಹತ್ಥೇನ ಉಪಕ್ಕಮಿತ್ವಾ ಅಸುಚಿಂ ಮೋಚೇಸಿ. ಸೋ ಸಞ್ಚೇತನಿಕಂ ಸುಕ್ಕವಿಸ್ಸಟ್ಠಿಂ ಆಪತ್ತಿಂ ಆಪಜ್ಜಿತ್ವಾ ಸಙ್ಘಂ ತಸ್ಸಾ ಆಪತ್ತಿಯಾ ಪರಿವಾಸಂ ಯಾಚಿ. ತಸ್ಸ ಸಙ್ಘೋ ತಸ್ಸಾ ಆಪತ್ತಿಯಾ ಪರಿವಾಸಂ ಅದಾಸಿ. ಸೋ ಪರಿವಸನ್ತೋ ಆಸನಪರಿಯನ್ತೇ ನಿಸಿನ್ನೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಭಿಕ್ಖುಸ್ಸ ದುಟ್ಠುಲ್ಲಂ ಆಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇಸ್ಸನ್ತೀ’’ತಿ…ಪೇ… ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಭಿಕ್ಖುಸ್ಸ ದುಟ್ಠುಲ್ಲಂ ಆಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇಥಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಭಿಕ್ಖುಸ್ಸ ದುಟ್ಠುಲ್ಲಂ ಆಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೭೯. ‘‘ಯೋ ಪನ ಭಿಕ್ಖು ಭಿಕ್ಖುಸ್ಸ ದುಟ್ಠುಲ್ಲಂ ಆಪತ್ತಿಂ ಅನುಪಸಮ್ಪನ್ನಸ್ಸ ಆರೋಚೇಯ್ಯ, ಅಞ್ಞತ್ರ ಭಿಕ್ಖುಸಮ್ಮುತಿಯಾ [ಭಿಕ್ಖುಸಮ್ಮತಿಯಾ (ಸ್ಯಾ.)], ಪಾಚಿತ್ತಿಯ’’ನ್ತಿ.

೮೦. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಭಿಕ್ಖುಸ್ಸಾತಿ ಅಞ್ಞಸ್ಸ ಭಿಕ್ಖುಸ್ಸ.

ದುಟ್ಠುಲ್ಲಾ ನಾಮ ಆಪತ್ತಿ – ಚತ್ತಾರಿ ಚ ಪಾರಾಜಿಕಾನಿ, ತೇರಸ ಚ ಸಙ್ಘಾದಿಸೇಸಾ.

ಅನುಪಸಮ್ಪನ್ನೋ ನಾಮ ಭಿಕ್ಖುಞ್ಚ ಭಿಕ್ಖುನಿಞ್ಚ ಠಪೇತ್ವಾ ಅವಸೇಸೋ ಅನುಪಸಮ್ಪನ್ನೋ ನಾಮ.

ಆರೋಚೇಯ್ಯಾತಿ ಆರೋಚೇಯ್ಯ ಇತ್ಥಿಯಾ ವಾ ಪುರಿಸಸ್ಸ ವಾ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ.

ಅಞ್ಞತ್ರ ಭಿಕ್ಖುಸಮ್ಮುತಿಯಾತಿ ಠಪೇತ್ವಾ ಭಿಕ್ಖುಸಮ್ಮುತಿಂ.

ಅತ್ಥಿ ಭಿಕ್ಖುಸಮ್ಮುತಿ ಆಪತ್ತಿಪರಿಯನ್ತಾ, ನ ಕುಲಪರಿಯನ್ತಾ. ಅತ್ಥಿ ಭಿಕ್ಖುಸಮ್ಮುತಿ ಕುಲಪರಿಯನ್ತಾ, ನ ಆಪತ್ತಿಪರಿಯನ್ತಾ, ಅತ್ಥಿ ಭಿಕ್ಖುಸಮ್ಮುತಿ ಆಪತ್ತಿಪರಿಯನ್ತಾ ಚ ಕುಲಪರಿಯನ್ತಾ ಚ, ಅತ್ಥಿ ಭಿಕ್ಖುಸಮ್ಮುತಿ ನೇವ ಆಪತ್ತಿಪರಿಯನ್ತಾ ನ ಕುಲಪರಿಯನ್ತಾ.

ಆಪತ್ತಿಪರಿಯನ್ತಾ ನಾಮ ಆಪತ್ತಿಯೋ ಪರಿಗ್ಗಹಿತಾಯೋ ಹೋನ್ತಿ – ‘‘ಏತ್ತಕಾಹಿ ಆಪತ್ತೀಹಿ ಆರೋಚೇತಬ್ಬೋ’’ತಿ.

ಕುಲಪರಿಯನ್ತಾ ನಾಮ ಕುಲಾನಿ ಪರಿಗ್ಗಹಿತಾನಿ ಹೋನ್ತಿ – ‘‘ಏತ್ತಕೇಸು ಕುಲೇಸು ಆರೋಚೇತಬ್ಬೋ’’ತಿ. ಆಪತ್ತಿಪರಿಯನ್ತಾ ಚ ಕುಲಪರಿಯನ್ತಾ ಚ ನಾಮ ಆಪತ್ತಿಯೋ ಚ ಪರಿಗ್ಗಹಿತಾಯೋ ಹೋನ್ತಿ, ಕುಲಾನಿ ಚ ಪರಿಗ್ಗಹಿತಾನಿ ಹೋನ್ತಿ – ‘‘ಏತ್ತಕಾಹಿ ಆಪತ್ತೀಹಿ ಏತ್ತಕೇಸು ಕುಲೇಸು ಆರೋಚೇತಬ್ಬೋ’’ತಿ. ನೇವ ಆಪತ್ತಿಪರಿಯನ್ತಾ ನ ಕುಲಪರಿಯನ್ತಾ ನಾಮ ಆಪತ್ತಿಯೋ ಚ ಅಪರಿಗ್ಗಹಿತಾಯೋ ಹೋನ್ತಿ, ಕುಲಾನಿ ಚ ಅಪರಿಗ್ಗಹಿತಾನಿ ಹೋನ್ತಿ – ‘‘ಏತ್ತಕಾಹಿ ಆಪತ್ತೀಹಿ ಏತ್ತಕೇಸು ಕುಲೇಸು ಆರೋಚೇತಬ್ಬೋ’’ತಿ.

೮೧. ಆಪತ್ತಿಪರಿಯನ್ತೇ ಯಾ ಆಪತ್ತಿಯೋ ಪರಿಗ್ಗಹಿತಾಯೋ ಹೋನ್ತಿ, ತಾ ಆಪತ್ತಿಯೋ ಠಪೇತ್ವಾ ಅಞ್ಞಾಹಿ ಆಪತ್ತೀಹಿ ಆರೋಚೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಕುಲಪರಿಯನ್ತೇ ಯಾನಿ ಕುಲಾನಿ ಪರಿಗ್ಗಹಿತಾನಿ ಹೋನ್ತಿ, ತಾನಿ ಕುಲಾನಿ ಠಪೇತ್ವಾ ಅಞ್ಞೇಸು ಕುಲೇಸು ಆರೋಚೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಆಪತ್ತಿಪರಿಯನ್ತೇ ಚ ಕುಲಪರಿಯನ್ತೇ ಚ ಯಾ ಆಪತ್ತಿಯೋ ಪರಿಗ್ಗಹಿತಾಯೋ ಹೋನ್ತಿ, ತಾ ಆಪತ್ತಿಯೋ ಠಪೇತ್ವಾ ಯಾನಿ ಕುಲಾನಿ ಪರಿಗ್ಗಹಿತಾನಿ ಹೋನ್ತಿ, ತಾನಿ ಕುಲಾನಿ ಠಪೇತ್ವಾ ಅಞ್ಞಾಹಿ ಆಪತ್ತೀಹಿ ಅಞ್ಞೇಸು ಕುಲೇಸು ಆರೋಚೇತಿ, ಆಪತ್ತಿ ಪಾಚಿತ್ತಿಯಸ್ಸ.

ನೇವ ಆಪತ್ತಿಪರಿಯನ್ತೇ ನ ಕುಲಪರಿಯನ್ತೇ, ಅನಾಪತ್ತಿ.

೮೨. ದುಟ್ಠುಲ್ಲಾಯ ಆಪತ್ತಿಯಾ ದುಟ್ಠುಲ್ಲಾಪತ್ತಿಸಞ್ಞೀ ಅನುಪಸಮ್ಪನ್ನಸ್ಸ ಆರೋಚೇತಿ, ಅಞ್ಞತ್ರ ಭಿಕ್ಖುಸಮ್ಮುತಿಯಾ, ಆಪತ್ತಿ ಪಾಚಿತ್ತಿಯಸ್ಸ.

ದುಟ್ಠುಲ್ಲಾಯ ಆಪತ್ತಿಯಾ ವೇಮತಿಕೋ ಅನುಪಸಮ್ಪನ್ನಸ್ಸ ಆರೋಚೇತಿ, ಅಞ್ಞತ್ರ ಭಿಕ್ಖುಸಮ್ಮುತಿಯಾ, ಆಪತ್ತಿ ಪಾಚಿತ್ತಿಯಸ್ಸ.

ದುಟ್ಠುಲ್ಲಾಯ ಆಪತ್ತಿಯಾ ಅದುಟ್ಠುಲ್ಲಾಪತ್ತಿಸಞ್ಞೀ ಅನುಪಸಮ್ಪನ್ನಸ್ಸ ಆರೋಚೇತಿ, ಅಞ್ಞತ್ರ ಭಿಕ್ಖುಸಮ್ಮುತಿಯಾ, ಆಪತ್ತಿ ಪಾಚಿತ್ತಿಯಸ್ಸ.

ಅದುಟ್ಠುಲ್ಲಂ ಆಪತ್ತಿಂ ಆರೋಚೇತಿ, ಆಪತ್ತಿ ದುಕ್ಕಟಸ್ಸ.

ಅನುಪಸಮ್ಪನ್ನಸ್ಸ ದುಟ್ಠುಲ್ಲಂ ವಾ ಅದುಟ್ಠುಲ್ಲಂ ವಾ ಅಜ್ಝಾಚಾರಂ ಆರೋಚೇತಿ, ಆಪತ್ತಿ ದುಕ್ಕಟಸ್ಸ.

ಅದುಟ್ಠುಲ್ಲಾಯ ಆಪತ್ತಿಯಾ ದುಟ್ಠುಲ್ಲಾಪತ್ತಿಸಞ್ಞೀ, ಆಪತ್ತಿ ದುಕ್ಕಟಸ್ಸ.

ಅದುಟ್ಠುಲ್ಲಾಯ ಆಪತ್ತಿಯಾ ವೇಮತಿಕೋ, ಆಪತ್ತಿ ದುಕ್ಕಟಸ್ಸ.

ಅದುಟ್ಠುಲ್ಲಾಯ ಆಪತ್ತಿಯಾ ಅದುಟ್ಠುಲ್ಲಾಪತ್ತಿಸಞ್ಞೀ, ಆಪತ್ತಿ ದುಕ್ಕಟಸ್ಸ.

೮೩. ಅನಾಪತ್ತಿ ವತ್ಥುಂ ಆರೋಚೇತಿ ನೋ ಆಪತ್ತಿಂ, ಆಪತ್ತಿಂ ಆರೋಚೇತಿ ನೋ ವತ್ಥುಂ, ಭಿಕ್ಖುಸಮ್ಮುತಿಯಾ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ದುಟ್ಠುಲ್ಲಾರೋಚನಸಿಕ್ಖಾಪದಂ ನಿಟ್ಠಿತಂ ನವಮಂ.