೩. ಪೇಸುಞ್ಞಸಿಕ್ಖಾಪದಂ

೩೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಭಿಕ್ಖೂನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಪೇಸುಞ್ಞಂ ಉಪಸಂಹರನ್ತಿ; ಇಮಸ್ಸ ಸುತ್ವಾ ಅಮುಸ್ಸ ಅಕ್ಖಾಯನ್ತಿ, ಇಮಸ್ಸ ಭೇದಾಯ; ಅಮುಸ್ಸ ಸುತ್ವಾ ಇಮಸ್ಸ ಅಕ್ಖಾಯನ್ತಿ, ಅಮುಸ್ಸ ಭೇದಾಯ. ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಭಿಕ್ಖೂನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಪೇಸುಞ್ಞಂ ಉಪಸಂಹರಿಸ್ಸನ್ತಿ, ಇಮಸ್ಸ ಸುತ್ವಾ ಅಮುಸ್ಸ ಅಕ್ಖಾಯಿಸ್ಸನ್ತಿ, ಇಮಸ್ಸ ಭೇದಾಯ; ಅಮುಸ್ಸ ಸುತ್ವಾ ಇಮಸ್ಸ ಅಕ್ಖಾಯಿಸ್ಸನ್ತಿ, ಅಮುಸ್ಸ ಭೇದಾಯ! ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ. ಅಥ ಖೋ ತೇ ಭಿಕ್ಖೂ ಛಬ್ಬಗ್ಗಿಯೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಭಿಕ್ಖೂನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಪೇಸುಞ್ಞಂ ಉಪಸಂಹರಥ, ಇಮಸ್ಸ ಸುತ್ವಾ ಅಮುಸ್ಸ ಅಕ್ಖಾಯಥ, ಇಮಸ್ಸ ಭೇದಾಯ, ಅಮುಸ್ಸ ಸುತ್ವಾ ಇಮಸ್ಸ ಅಕ್ಖಾಯಥ, ಅಮುಸ್ಸ ಭೇದಾಯ? ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಭಿಕ್ಖೂನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಪೇಸುಞ್ಞಂ ಉಪಸಂಹರಿಸ್ಸಥ! ಇಮಸ್ಸ ಸುತ್ವಾ ಅಮುಸ್ಸ ಅಕ್ಖಾಯಿಸ್ಸಥ, ಇಮಸ್ಸ ಭೇದಾಯ! ಅಮುಸ್ಸ ಸುತ್ವಾ ಇಮಸ್ಸ ಅಕ್ಖಾಯಿಸ್ಸಥ, ಅಮುಸ್ಸ ಭೇದಾಯ! ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ. ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ. ಪಸನ್ನಾನಂ ವಾ ಭಿಯ್ಯೋಭಾವಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೩೭. ‘‘ಭಿಕ್ಖುಪೇಸುಞ್ಞೇ ಪಾಚಿತ್ತಿಯ’’ನ್ತಿ.

೩೮. ಪೇಸುಞ್ಞಂ ನಾಮ ದ್ವೀಹಾಕಾರೇಹಿ ಪೇಸುಞ್ಞಂ ಹೋತಿ – ಪಿಯಕಮ್ಯಸ್ಸ ವಾ ಭೇದಾಧಿಪ್ಪಾಯಸ್ಸ ವಾ. ದಸಹಾಕಾರೇಹಿ ಪೇಸುಞ್ಞಂ ಉಪಸಂಹರತಿ – ಜಾತಿತೋಪಿ, ನಾಮತೋಪಿ, ಗೋತ್ತತೋಪಿ, ಕಮ್ಮತೋಪಿ, ಸಿಪ್ಪತೋಪಿ, ಆಬಾಧತೋಪಿ, ಲಿಙ್ಗತೋಪಿ, ಕಿಲೇಸತೋಪಿ, ಆಪತ್ತಿತೋಪಿ, ಅಕ್ಕೋಸತೋಪಿ.

ಜಾತಿ ನಾಮ ದ್ವೇ ಜಾತಿಯೋ – ಹೀನಾ ಚ ಜಾತಿ ಉಕ್ಕಟ್ಠಾ ಚ ಜಾತಿ. ಹೀನಾ ನಾಮ ಜಾತಿ – ಚಣ್ಡಾಲಜಾತಿ ವೇನಜಾತಿ ನೇಸಾದಜಾತಿ ರಥಕಾರಜಾತಿ ಪುಕ್ಕುಸಜಾತಿ. ಏಸಾ ಹೀನಾ ನಾಮ ಜಾತಿ. ಉಕ್ಕಟ್ಠಾ ನಾಮ ಜಾತಿ – ಖತ್ತಿಯಜಾತಿ ಬ್ರಾಹ್ಮಣಜಾತಿ. ಏಸಾ ಉಕ್ಕಟ್ಠಾ ನಾಮ ಜಾತಿ…ಪೇ….

ಅಕ್ಕೋಸೋ ನಾಮ ದ್ವೇ ಅಕ್ಕೋಸಾ – ಹೀನೋ ಚ ಅಕ್ಕೋಸೋ ಉಕ್ಕಟ್ಠೋ ಚ ಅಕ್ಕೋಸೋ. ಹೀನೋ ನಾಮ ಅಕ್ಕೋಸೋ – ಓಟ್ಠೋಸಿ, ಮೇಣ್ಡೋಸಿ, ಗೋಣೋಸಿ, ಗದ್ರಭೋಸಿ, ತಿರಚ್ಛಾನಗತೋಸಿ, ನೇರಯಿಕೋಸಿ; ನತ್ಥಿ ತುಯ್ಹಂ ಸುಗತಿ; ದುಗ್ಗತಿ ಯೇವ ತುಯ್ಹಂ ಪಾಟಿಕಙ್ಖಾತಿ, ಯಕಾರೇನ ವಾ ಭಕಾರೇನ ವಾ ಕಾಟಕೋಟಚಿಕಾಯ ವಾ. ಏಸೋ ಹೀನೋ ನಾಮ ಅಕ್ಕೋಸೋ. ಉಕ್ಕಟ್ಠೋ ನಾಮ ಅಕ್ಕೋಸೋ – ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ; ನತ್ಥಿ ತುಯ್ಹಂ ದುಗ್ಗತಿ; ಸುಗತಿ ಯೇವ ತುಯ್ಹಂ ಪಾಟಿಕಙ್ಖಾತಿ. ಏಸೋ ಉಕ್ಕಟ್ಠೋ ನಾಮ ಅಕ್ಕೋಸೋ.

೩೯. ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಚಣ್ಡಾಲೋ ವೇನೋ ನೇಸಾದೋ ರಥಕಾರೋ ಪುಕ್ಕುಸೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಖತ್ತಿಯೋ ಬ್ರಾಹ್ಮಣೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಅವಕಣ್ಣಕೋ ಜವಕಣ್ಣಕೋ ಧನಿಟ್ಠಕೋ ಸವಿಟ್ಠಕೋ ಕುಲವಡ್ಢಕೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಬುದ್ಧರಕ್ಖಿತೋ ಧಮ್ಮರಕ್ಖಿತೋ ಸಙ್ಘರಕ್ಖಿತೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಕೋಸಿಯೋ ಭಾರದ್ವಾಜೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಗೋತಮೋ ಮೋಗ್ಗಲ್ಲಾನೋ ಕಚ್ಚಾನೋ ವಾಸಿಟ್ಠೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಕೋಟ್ಠಕೋ ಪುಪ್ಫಛಡ್ಡಕೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಕಸ್ಸಕೋ ವಾಣಿಜೋ ಗೋರಕ್ಖೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ನಳಕಾರೋ ಕುಮ್ಭಕಾರೋ ಪೇಸಕಾರೋ ಚಮ್ಮಕಾರೋ ನಹಾಪಿತೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಮುದ್ದಿಕೋ ಗಣಕೋ ಲೇಖಕೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೪೦. ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಕುಟ್ಠಿಕೋ ಗಣ್ಡಿಕೋ ಕಿಲಾಸಿಕೋ ಸೋಸಿಕೋ ಅಪಮಾರಿಕೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಮಧುಮೇಹಿಕೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಅತಿದೀಘೋ ಅತಿರಸ್ಸೋ ಅತಿಕಣ್ಹೋ ಅಚ್ಚೋದಾತೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ನಾತಿದೀಘೋ ನಾತಿರಸ್ಸೋ ನಾತಿಕಣ್ಹೋ ನಾಚ್ಚೋದಾತೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ರಾಗಪರಿಯುಟ್ಠಿತೋ ದೋಸಪರಿಯುಟ್ಠಿತೋ ಮೋಹಪರಿಯುಟ್ಠಿತೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ವೀತರಾಗೋ ವೀತದೋಸೋ ವೀತಮೋಹೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಪಾರಾಜಿಕಂ ಅಜ್ಝಾಪನ್ನೋ, ಸಙ್ಘಾದಿಸೇಸಂ ಅಜ್ಝಾಪನ್ನೋ, ಥುಲ್ಲಚ್ಚಯಂ ಅಜ್ಝಾಪನ್ನೋ, ಪಾಚಿತ್ತಿಯಂ ಅಜ್ಝಾಪನ್ನೋ, ಪಾಟಿದೇಸನೀಯಂ ಅಜ್ಝಾಪನ್ನೋ, ದುಕ್ಕಟಂ ಅಜ್ಝಾಪನ್ನೋ, ದುಬ್ಭಾಸಿತಂ ಅಜ್ಝಾಪನ್ನೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಸೋತಾಪನ್ನೋ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಓಟ್ಠೋ ಮೇಣ್ಡೋ ಗೋಣೋ ಗದ್ರಭೋ ತಿರಚ್ಛಾನಗತೋ ನೇರಯಿಕೋ, ನತ್ಥಿ ತಸ್ಸ ಸುಗತಿ, ದುಗ್ಗತಿಯೇವ ತಸ್ಸ ಪಾಟಿಕಙ್ಖಾ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ತಂ ‘ಪಣ್ಡಿತೋ ಬ್ಯತ್ತೋ ಮೇಧಾವೀ ಬಹುಸ್ಸುತೋ ಧಮ್ಮಕಥಿಕೋ, ನತ್ಥಿ ತಸ್ಸ ದುಗ್ಗತಿ, ಸುಗತಿ ಯೇವ ತಸ್ಸ ಪಾಟಿಕಙ್ಖಾ’ತಿ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೪೧. ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ಸನ್ತಿ ಇಧೇಕಚ್ಚೇ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ, ಪುಕ್ಕುಸಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ಸನ್ತಿ ಇಧೇಕಚ್ಚೇ ಖತ್ತಿಯಾ ಬ್ರಾಹ್ಮಣಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ…ಪೇ….

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ಸನ್ತಿ ಇಧೇಕಚ್ಚೇ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಿ ತೇಸಂ ದುಗ್ಗತಿ, ಸುಗತಿ ಯೇವ ತೇಸಂ ಪಾಟಿಕಙ್ಖಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ಯೇ ನೂನ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ಯೇ ನೂನ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ನ ಮಯಂ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ – ‘‘ಇತ್ಥನ್ನಾಮೋ ‘ನ ಮಯಂ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಮ್ಹಾಕಂ ದುಗ್ಗತಿ, ಸುಗತಿ ಯೇವ ಅಮ್ಹಾಕಂ ಪಾಟಿಕಙ್ಖಾ’ತಿ ಭಣತಿ, ನ ಸೋ ಅಞ್ಞಂ ಭಣತಿ, ತಞ್ಞೇವ ಭಣತೀ’’ತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೪೨. ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ; ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಸ್ಸ ಸುತ್ವಾ ಅನುಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ, ಆಪತ್ತಿ ದುಕ್ಕಟಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಸ್ಸ ಸುತ್ವಾ ಉಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ, ಆಪತ್ತಿ ದುಕ್ಕಟಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಸ್ಸ ಸುತ್ವಾ ಅನುಪಸಮ್ಪನ್ನಸ್ಸ ಪೇಸುಞ್ಞಂ ಉಪಸಂಹರತಿ, ಆಪತ್ತಿ ದುಕ್ಕಟಸ್ಸ.

೪೩. ಅನಾಪತ್ತಿ ನಪಿಯಕಮ್ಯಸ್ಸ, ನಭೇದಾಧಿಪ್ಪಾಯಸ್ಸ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಪೇಸುಞ್ಞಸಿಕ್ಖಾಪದಂ ನಿಟ್ಠಿತಂ ತತಿಯಂ.