೨. ಓಮಸವಾದಸಿಕ್ಖಾಪದಂ

೧೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಪೇಸಲೇಹಿ ಭಿಕ್ಖೂಹಿ ಸದ್ಧಿಂ ಭಣ್ಡನ್ತಾ [ಭಣ್ಡೇನ್ತಾ (ಇತಿಪಿ)] ಪೇಸಲೇ ಭಿಕ್ಖೂ ಓಮಸನ್ತಿ – ಜಾತಿಯಾಪಿ, ನಾಮೇನಪಿ, ಗೋತ್ತೇನಪಿ, ಕಮ್ಮೇನಪಿ, ಸಿಪ್ಪೇನಪಿ, ಆಬಾಧೇನಪಿ, ಲಿಙ್ಗೇನಪಿ, ಕಿಲೇಸೇನಪಿ, ಆಪತ್ತಿಯಾಪಿ; ಹೀನೇನಪಿ ಅಕ್ಕೋಸೇನ ಖುಂಸೇನ್ತಿ ವಮ್ಭೇನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಪೇಸಲೇಹಿ ಭಿಕ್ಖೂಹಿ ಸದ್ಧಿಂ ಭಣ್ಡನ್ತಾ ಪೇಸಲೇ ಭಿಕ್ಖೂ ಓಮಸಿಸ್ಸನ್ತಿ – ಜಾತಿಯಾಪಿ, ನಾಮೇನಪಿ, ಗೋತ್ತೇನಪಿ, ಕಮ್ಮೇನಪಿ, ಸಿಪ್ಪೇನಪಿ, ಆಬಾಧೇನಪಿ, ಲಿಙ್ಗೇನಪಿ, ಕಿಲೇಸೇನಪಿ, ಆಪತ್ತಿಯಾಪಿ; ಹೀನೇನಪಿ ಅಕ್ಕೋಸೇನ ಖುಂಸೇಸ್ಸನ್ತಿ ವಮ್ಭೇಸ್ಸನ್ತೀ’’ತಿ!

ಅಥ ಖೋ ತೇ ಭಿಕ್ಖೂ ಛಬ್ಬಗ್ಗಿಯೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಪೇಸಲೇಹಿ ಭಿಕ್ಖೂಹಿ ಸದ್ಧಿಂ ಭಣ್ಡನ್ತಾ ಪೇಸಲೇ ಭಿಕ್ಖೂ ಓಮಸಥ – ಜಾತಿಯಾಪಿ…ಪೇ… ಹೀನೇನಪಿ ಅಕ್ಕೋಸೇನ ಖುಂಸೇಥ ವಮ್ಭೇಥಾತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಪೇಸಲೇಹಿ ಭಿಕ್ಖೂಹಿ ಸದ್ಧಿಂ ಭಣ್ಡನ್ತಾ ಪೇಸಲೇ ಭಿಕ್ಖೂ ಓಮಸಿಸ್ಸಥ – ಜಾತಿಯಾಪಿ…ಪೇ… ಹೀನೇನಪಿ ಅಕ್ಕೋಸೇನ ಖುಂಸೇಸ್ಸಥ ವಮ್ಭೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೧೩. ‘‘ಭೂತಪುಬ್ಬಂ, ಭಿಕ್ಖವೇ, ತಕ್ಕಸಿಲಾಯಂ [ತಕ್ಕಸೀಲಾಯಂ (ಕ.)] ಅಞ್ಞತರಸ್ಸ ಬ್ರಾಹ್ಮಣಸ್ಸ ನನ್ದಿವಿಸಾಲೋ ನಾಮ ಬಲೀಬದ್ದೋ [ಬಲಿವದ್ದೋ (ಸೀ.), ಬಲಿಬದ್ದೋ (ಸ್ಯಾ.)] ಅಹೋಸಿ. ಅಥ ಖೋ, ಭಿಕ್ಖವೇ, ನನ್ದಿವಿಸಾಲೋ ಬಲೀಬದ್ದೋ ತಂ ಬ್ರಾಹ್ಮಣಂ ಏತದವೋಚ – ‘‘ಗಚ್ಛ ತ್ವಂ, ಬ್ರಾಹ್ಮಣ, ಸೇಟ್ಠಿನಾ ಸದ್ಧಿಂ ಸಹಸ್ಸೇನ ಅಬ್ಭುತಂ ಕರೋಹಿ – ಮಯ್ಹಂ ಬಲೀಬದ್ದೋ ಸಕಟಸತಂ ಅತಿಬದ್ಧಂ ಪವಟ್ಟೇಸ್ಸತೀ’’ತಿ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಸೇಟ್ಠಿನಾ ಸದ್ಧಿಂ ಸಹಸ್ಸೇನ ಅಬ್ಭುತಂ ಅಕಾಸಿ – ಮಯ್ಹಂ ಬಲೀಬದ್ದೋ ಸಕಟಸತಂ ಅತಿಬದ್ಧಂ ಪವಟ್ಟೇಸ್ಸತೀತಿ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಸಕಟಸತಂ ಅತಿಬನ್ಧಿತ್ವಾ ನನ್ದಿವಿಸಾಲಂ ಬಲೀಬದ್ದಂ ಯುಞ್ಜಿತ್ವಾ ಏತದವೋಚ – ‘‘ಗಚ್ಛ, ಕೂಟ [ಅಞ್ಛ ಕೂಟ (ಸೀ. ಸ್ಯಾ.)], ವಹಸ್ಸು, ಕೂಟಾ’ತಿ. ಅಥ ಖೋ, ಭಿಕ್ಖವೇ, ನನ್ದಿವಿಸಾಲೋ ಬಲೀಬದ್ದೋ ತತ್ಥೇವ ಅಟ್ಠಾಸಿ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಸಹಸ್ಸೇನ ಪರಾಜಿತೋ ಪಜ್ಝಾಯಿ. ಅಥ ಖೋ, ಭಿಕ್ಖವೇ, ನನ್ದಿವಿಸಾಲೋ ಬಲೀಬದ್ದೋ ತಂ ಬ್ರಾಹ್ಮಣಂ ಏತದವೋಚ – ‘‘ಕಿಸ್ಸ ತ್ವಂ, ಬ್ರಾಹ್ಮಣ, ಪಜ್ಝಾಯಸೀ’’ತಿ? ‘ತಥಾ ಹಿ ಪನಾಹಂ, ಭೋ, ತಯಾ ಸಹಸ್ಸೇನ ಪರಾಜಿತೋ’’ತಿ. ‘ಕಿಸ್ಸ ಪನ ಮಂ ತ್ವಂ, ಬ್ರಾಹ್ಮಣ, ಅಕೂಟಂ ಕೂಟವಾದೇನ ಪಾಪೇಸಿ? ಗಚ್ಛ ತ್ವಂ, ಬ್ರಾಹ್ಮಣ, ಸೇಟ್ಠಿನಾ ಸದ್ಧಿಂ ದ್ವೀಹಿ ಸಹಸ್ಸೇಹಿ ಅಬ್ಭುತಂ ಕರೋಹಿ – ‘‘ಮಯ್ಹಂ ಬಲೀಬದ್ದೋ ಸಕಟಸತಂ ಅತಿಬದ್ಧಂ ಪವಟ್ಟೇಸ್ಸತೀ’’ತಿ. ‘‘ಮಾ ಚ ಮಂ ಅಕೂಟಂ ಕೂಟವಾದೇನ ಪಾಪೇಸೀ’’ತಿ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಸೇಟ್ಠಿನಾ ಸದ್ಧಿಂ ದ್ವೀಹಿ ಸಹಸ್ಸೇಹಿ ಅಬ್ಭುತಂ ಅಕಾಸಿ – ‘‘ಮಯ್ಹಂ ಬಲೀಬದ್ದೋ ಸಕಟಸತಂ ಅತಿಬದ್ಧಂ ಪವಟ್ಟೇಸ್ಸತೀ’’ತಿ. ಅಥ ಖೋ, ಭಿಕ್ಖವೇ, ಸೋ ಬ್ರಾಹ್ಮಣೋ ಸಕಟಸತಂ ಅತಿಬನ್ಧಿತ್ವಾ ನನ್ದಿವಿಸಾಲಂ ಬಲೀಬದ್ದಂ ಯುಞ್ಜಿತ್ವಾ ಏತದವೋಚ – ‘‘ಅಚ್ಛ, ಭದ್ರ, ವಹಸ್ಸು, ಭದ್ರಾ’’ತಿ. ಅಥ ಖೋ, ಭಿಕ್ಖವೇ, ನನ್ದಿವಿಸಾಲೋ ಬಲೀಬದ್ದೋ ಸಕಟಸತಂ ಅತಿಬದ್ಧಂ ಪವಟ್ಟೇಸಿ.

[ಜಾ. ೧.೧.೨೮ ನನ್ದಿವಿಸಾಲಜಾತಕೇಪಿ, ತತ್ಥ ಪನ ಮನುಞ್ಞಸದ್ದೋ ದಿಸ್ಸತಿ] ‘‘ಮನಾಪಮೇವ ಭಾಸೇಯ್ಯ, ನಾ, ಮನಾಪಂ ಕುದಾಚನಂ;

ಮನಾಪಂ ಭಾಸಮಾನಸ್ಸ, ಗರುಂ ಭಾರಂ ಉದಬ್ಬಹಿ;

ಧನಞ್ಚ ನಂ ಅಲಾಭೇಸಿ, ತೇನ ಚ, ತ್ತಮನೋ ಅಹೂತಿ.

‘‘ತದಾಪಿ ಮೇ, ಭಿಕ್ಖವೇ, ಅಮನಾಪಾ ಖುಂಸನಾ ವಮ್ಭನಾ. ಕಿಮಙ್ಗಂ ಪನ ಏತರಹಿ ಮನಾಪಾ ಭವಿಸ್ಸತಿ ಖುಂಸನಾ ವಮ್ಭನಾ? ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ…. ‘‘ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೧೪. ‘‘ಓಮಸವಾದೇ ಪಾಚಿತ್ತಿಯ’’ನ್ತಿ.

೧೫. ಓಮಸವಾದೋ ನಾಮ ದಸಹಿ ಆಕಾರೇಹಿ ಓಮಸತಿ – ಜಾತಿಯಾಪಿ, ನಾಮೇನಪಿ, ಗೋತ್ತೇನಪಿ, ಕಮ್ಮೇನಪಿ, ಸಿಪ್ಪೇನಪಿ, ಆಬಾಧೇನಪಿ, ಲಿಙ್ಗೇನಪಿ, ಕಿಲೇಸೇನಪಿ, ಆಪತ್ತಿಯಾಪಿ, ಅಕ್ಕೋಸೇನಪಿ.

ಜಾತಿ ನಾಮ ದ್ವೇ ಜಾತಿಯೋ – ಹೀನಾ ಚ ಜಾತಿ ಉಕ್ಕಟ್ಠಾ ಚ ಜಾತಿ. ಹೀನಾ ನಾಮ ಜಾತಿ – ಚಣ್ಡಾಲಜಾತಿ, ವೇನಜಾತಿ, ನೇಸಾದಜಾತಿ, ರಥಕಾರಜಾತಿ, ಪುಕ್ಕುಸಜಾತಿ. ಏಸಾ ಹೀನಾ ನಾಮ ಜಾತಿ. ಉಕ್ಕಟ್ಠಾ ನಾಮ ಜಾತಿ – ಖತ್ತಿಯಜಾತಿ, ಬ್ರಾಹ್ಮಣಜಾತಿ. ಏಸಾ ಉಕ್ಕಟ್ಠಾ ನಾಮ ಜಾತಿ.

ನಾಮಂ ನಾಮ ದ್ವೇ ನಾಮಾನಿ – ಹೀನಞ್ಚ ನಾಮಂ ಉಕ್ಕಟ್ಠಞ್ಚ ನಾಮಂ. ಹೀನಂ ನಾಮ ನಾಮಂ – ಅವಕಣ್ಣಕಂ, ಜವಕಣ್ಣಕಂ, ಧನಿಟ್ಠಕಂ, ಸವಿಟ್ಠಕಂ, ಕುಲವಡ್ಢಕಂ, ತೇಸು ತೇಸು ವಾ ಪನ ಜನಪದೇಸು ಓಞ್ಞಾತಂ ಅವಞ್ಞಾತಂ ಹೀಳಿತಂ ಪರಿಭೂತಂ ಅಚಿತ್ತೀಕತಂ, ಏತಂ ಹೀನಂ ನಾಮ ನಾಮಂ. ಉಕ್ಕಟ್ಠಂ ನಾಮ ನಾಮಂ – ಬುದ್ಧಪ್ಪಟಿಸಂಯುತ್ತಂ, ಧಮ್ಮಪ್ಪಟಿಸಂಯುತ್ತಂ, ಸಙ್ಘಪ್ಪಟಿಸಂಯುತ್ತಂ, ತೇಸು ತೇಸು ವಾ ಪನ ಜನಪದೇಸು ಅನೋಞ್ಞಾತಂ ಅನವಞ್ಞಾತಂ ಅಹೀಳಿತಂ ಅಪರಿಭೂತಂ ಚಿತ್ತೀಕತಂ, ಏತಂ ಉಕ್ಕಟ್ಠಂ ನಾಮ ನಾಮಂ.

ಗೋತ್ತಂ ನಾಮ ದ್ವೇ ಗೋತ್ತಾನಿ – ಹೀನಞ್ಚ ಗೋತ್ತಂ ಉಕ್ಕಟ್ಠಞ್ಚ ಗೋತ್ತಂ. ಹೀನಂ ನಾಮ ಗೋತ್ತಂ – ಕೋಸಿಯಗೋತ್ತಂ, ಭಾರದ್ವಾಜಗೋತ್ತಂ, ತೇಸು ತೇಸು ವಾ ಪನ ಜನಪದೇಸು ಓಞ್ಞಾತಂ ಅವಞ್ಞಾತಂ ಹೀಳಿತಂ ಪರಿಭೂತಂ ಅಚಿತ್ತೀಕತಂ, ಏತಂ ಹೀನಂ ನಾಮ ಗೋತ್ತಂ. ಉಕ್ಕಟ್ಠಂ ನಾಮ ಗೋತ್ತಂ – ಗೋತಮಗೋತ್ತಂ, ಮೋಗ್ಗಲ್ಲಾನಗೋತ್ತಂ, ಕಚ್ಚಾನಗೋತ್ತಂ, ವಾಸಿಟ್ಠಗೋತ್ತಂ, ತೇಸು ತೇಸು ವಾ ಪನ ಜನಪದೇಸು ಅನೋಞ್ಞಾತಂ ಅನವಞ್ಞಾತಂ ಅಹೀಳಿತಂ ಅಪರಿಭೂತಂ ಚಿತ್ತೀಕತಂ, ಏತಂ ಉಕ್ಕಟ್ಠಂ ನಾಮ ಗೋತ್ತಂ.

ಕಮ್ಮಂ ನಾಮ ದ್ವೇ ಕಮ್ಮಾನಿ – ಹೀನಞ್ಚ ಕಮ್ಮಂ ಉಕ್ಕಟ್ಠಞ್ಚ ಕಮ್ಮಂ. ಹೀನಂ ನಾಮ ಕಮ್ಮಂ – ಕೋಟ್ಠಕಕಮ್ಮಂ, ಪುಪ್ಫಛಡ್ಡಕಕಮ್ಮಂ, ತೇಸು ತೇಸು ವಾ ಪನ ಜನಪದೇಸು ಓಞ್ಞಾತಂ ಅವಞ್ಞಾತಂ ಹೀಳಿತಂ ಪರಿಭೂತಂ ಅಚಿತ್ತೀಕತಂ, ಏತಂ ಹೀನಂ ನಾಮ ಕಮ್ಮಂ. ಉಕ್ಕಟ್ಠಂ ನಾಮ ಕಮ್ಮಂ – ಕಸಿ, ವಣಿಜ್ಜಾ, ಗೋರಕ್ಖಾ, ತೇಸು ತೇಸು ವಾ ಪನ ಜನಪದೇಸು ಅನೋಞ್ಞಾತಂ ಅನವಞ್ಞಾತಂ ಅಹೀಳಿತಂ ಅಪರಿಭೂತಂ ಚಿತ್ತೀಕತಂ. ಏತಂ ಉಕ್ಕಟ್ಠಂ ನಾಮ ಕಮ್ಮಂ.

ಸಿಪ್ಪಂ ನಾಮ ದ್ವೇ ಸಿಪ್ಪಾನಿ – ಹೀನಞ್ಚ ಸಿಪ್ಪಂ ಉಕ್ಕಟ್ಠಞ್ಚ ಸಿಪ್ಪಂ. ಹೀನಂ ನಾಮ ಸಿಪ್ಪಂ – ನಳಕಾರಸಿಪ್ಪಂ, ಕುಮ್ಭಕಾರಸಿಪ್ಪಂ, ಪೇಸಕಾರಸಿಪ್ಪಂ, ಚಮ್ಮಕಾರಸಿಪ್ಪಂ, ನಹಾಪಿತಸಿಪ್ಪಂ, ತೇಸು ತೇಸು ವಾ ಪನ ಜನಪದೇಸು ಓಞ್ಞಾತಂ ಅವಞ್ಞಾತಂ ಹೀಳಿತಂ ಪರಿಭೂತಂ ಅಚಿತ್ತೀಕತಂ. ಏತಂ ಹೀನಂ ನಾಮ ಸಿಪ್ಪಂ. ಉಕ್ಕಟ್ಠಂ ನಾಮ ಸಿಪ್ಪಂ – ಮುದ್ದಾ, ಗಣನಾ, ಲೇಖಾ, ತೇಸು ತೇಸು ವಾ ಪನ ಜನಪದೇಸು ಅನೋಞ್ಞಾತಂ ಅನವಞ್ಞಾತಂ ಅಹೀಳಿತಂ ಅಪರಿಭೂತಂ ಚಿತ್ತೀಕತಂ, ಏತಂ ಉಕ್ಕಟ್ಠಂ ನಾಮ ಸಿಪ್ಪಂ.

ಸಬ್ಬೇಪಿ ಆಬಾಧಾ ಹೀನಾ, ಅಪಿಚ ಮಧುಮೇಹೋ ಆಬಾಧೋ ಉಕ್ಕಟ್ಠೋ.

ಲಿಙ್ಗಂ ನಾಮ ದ್ವೇ ಲಿಙ್ಗಾನಿ – ಹೀನಞ್ಚ ಲಿಙ್ಗಂ ಉಕ್ಕಟ್ಠಞ್ಚ ಲಿಙ್ಗಂ. ಹೀನಂ ನಾಮ ಲಿಙ್ಗಂ – ಅತಿದೀಘಂ, ಅತಿರಸ್ಸಂ, ಅತಿಕಣ್ಹಂ, ಅಚ್ಚೋದಾತಂ, ಏತಂ ಹೀನಂ ನಾಮ ಲಿಙ್ಗಂ. ಉಕ್ಕಟ್ಠಂ ನಾಮ ಲಿಙ್ಗಂ – ನಾತಿದೀಘಂ, ನಾತಿರಸ್ಸಂ, ನಾತಿಕಣ್ಹಂ, ನಾಚ್ಚೋದಾತಂ. ಏತಂ ಉಕ್ಕಟ್ಠಂ ನಾಮ ಲಿಙ್ಗಂ.

ಸಬ್ಬೇಪಿ ಕಿಲೇಸಾ ಹೀನಾ.

ಸಬ್ಬಾಪಿ ಆಪತ್ತಿಯೋ ಹೀನಾ. ಅಪಿಚ, ಸೋತಾಪತ್ತಿಸಮಾಪತ್ತಿ ಉಕ್ಕಟ್ಠಾ.

ಅಕ್ಕೋಸೋ ನಾಮ ದ್ವೇ ಅಕ್ಕೋಸಾ – ಹೀನೋ ಚ ಅಕ್ಕೋಸೋ ಉಕ್ಕಟ್ಠೋ ಚ ಅಕ್ಕೋಸೋ. ಹೀನೋ ನಾಮ ಅಕ್ಕೋಸೋ – ಓಟ್ಠೋಸಿ, ಮೇಣ್ಡೋಸಿ, ಗೋಣೋಸಿ, ಗದ್ರಭೋಸಿ, ತಿರಚ್ಛಾನಗತೋಸಿ, ನೇರಯಿಕೋಸಿ; ನತ್ಥಿ ತುಯ್ಹಂ ಸುಗತಿ, ದುಗ್ಗತಿ ಯೇವ ತುಯ್ಹಂ ಪಾಟಿಕಙ್ಖಾತಿ, ಯಕಾರೇನ ವಾ ಭಕಾರೇನ ವಾ, ಕಾಟಕೋಟಚಿಕಾಯ ವಾ, ಏಸೋ ಹೀನೋ ನಾಮ ಅಕ್ಕೋಸೋ. ಉಕ್ಕಟ್ಠೋ ನಾಮ ಅಕ್ಕೋಸೋ – ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ, ಸುಗತಿಯೇವ ತುಯ್ಹಂ ಪಾಟಿಕಙ್ಖಾತಿ, ಏಸೋ ಉಕ್ಕಟ್ಠೋ ನಾಮ ಅಕ್ಕೋಸೋ.

೧೬. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಚಣ್ಡಾಲಂ ವೇನಂ ನೇಸಾದಂ ರಥಕಾರಂ ಪುಕ್ಕುಸಂ – ‘‘ಚಣ್ಡಾಲೋಸಿ, ವೇನೋಸಿ, ನೇಸಾದೋಸಿ, ರಥಕಾರೋಸಿ, ಪುಕ್ಕುಸೋಸೀ’’ತಿ ಭಣತಿ [ವದೇತೀತಿ ಉದ್ದೇಸೋ. ಭಣತೀತಿ ವಿತ್ಥಾರೋ (ವಜಿರಬುದ್ಧಿ)], ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಖತ್ತಿಯಂ ಬ್ರಾಹ್ಮಣಂ – ‘‘ಚಣ್ಡಾಲೋಸಿ, ವೇನೋಸಿ, ನೇಸಾದೋಸಿ, ರಥಕಾರೋಸಿ, ಪುಕ್ಕುಸೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಚಣ್ಡಾಲಂ ವೇನಂ ನೇಸಾದಂ ರಥಕಾರಂ ಪುಕ್ಕುಸಂ – ‘‘ಖತ್ತಿಯೋಸಿ, ಬ್ರಾಹ್ಮಣೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಖತ್ತಿಯಂ ಬ್ರಾಹ್ಮಣಂ – ‘‘ಖತ್ತಿಯೋಸಿ, ಬ್ರಾಹ್ಮಣೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೧೭. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಅವಕಣ್ಣಕಂ ಜವಕಣ್ಣಕಂ ಧನಿಟ್ಠಕಂ ಸವಿಟ್ಠಕಂ ಕುಲವಡ್ಢಕಂ – ‘‘ಅವಕಣ್ಣಕೋಸಿ, ಜವಕಣ್ಣಕೋಸಿ, ಧನಿಟ್ಠಕೋಸಿ, ಸವಿಟ್ಠಕೋಸಿ, ಕುಲವಡ್ಢಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಬುದ್ಧರಕ್ಖಿತಂ ಧಮ್ಮರಕ್ಖಿತಂ ಸಙ್ಘರಕ್ಖಿತಂ – ‘‘ಅವಕಣ್ಣಕೋಸಿ, ಜವಕಣ್ಣಕೋಸಿ, ಧನಿಟ್ಠಕೋಸಿ, ಸವಿಟ್ಠಕೋಸಿ, ಕುಲವಡ್ಢಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಅವಕಣ್ಣಕಂ ಜವಕಣ್ಣಕಂ ಧನಿಟ್ಠಕಂ ಸವಿಟ್ಠಕಂ ಕುಲವಡ್ಢಕಂ – ‘‘ಬುದ್ಧರಕ್ಖಿತೋಸಿ, ಧಮ್ಮರಕ್ಖಿತೋಸಿ, ಸಙ್ಘರಕ್ಖಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕಟ್ಠಂ ವದೇತಿ, ಬುದ್ಧರಕ್ಖಿತಂ ಧಮ್ಮರಕ್ಖಿತಂ ಸಙ್ಘರಕ್ಖಿತಂ – ‘‘ಬುದ್ಧರಕ್ಖಿತೋಸಿ, ಧಮ್ಮರಕ್ಖಿತೋಸಿ, ಸಙ್ಘರಕ್ಖಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೧೮. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಕೋಸಿಯಂ ಭಾರದ್ವಾಜಂ – ‘‘ಕೋಸಿಯೋಸಿ, ಭಾರದ್ವಾಜೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಗೋತಮಂ ಮೋಗ್ಗಲ್ಲಾನಂ ಕಚ್ಚಾನಂ ವಾಸಿಟ್ಠಂ – ‘‘ಕೋಸಿಯೋಸಿ, ಭಾರದ್ವಾಜೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಕೋಸಿಯಂ ಭಾರದ್ವಾಜಂ – ‘‘ಗೋತಮೋಸಿ, ಮೋಗ್ಗಲ್ಲಾನೋಸಿ, ಕಚ್ಚಾನೋಸಿ, ವಾಸಿಟ್ಠೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಗೋತಮಂ ಮೋಗ್ಗಲ್ಲಾನಂ ಕಚ್ಚಾನಂ ವಾಸಿಟ್ಠಂ – ‘‘ಗೋತಮೋಸಿ, ಮೋಗ್ಗಲ್ಲಾನೋಸಿ, ಕಚ್ಚಾನೋಸಿ, ವಾಸಿಟ್ಠೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೧೯. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಕೋಟ್ಠಕಂ ಪುಪ್ಫಛಡ್ಡಕಂ – ‘‘ಕೋಟ್ಠಕೋಸಿ, ಪುಪ್ಫಛಡ್ಡಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಕಸ್ಸಕಂ ವಾಣಿಜಂ ಗೋರಕ್ಖಂ – ‘‘ಕೋಟ್ಠಕೋಸಿ, ಪುಪ್ಫಛಡ್ಡಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಕೋಟ್ಠಕಂ ಪುಪ್ಫಛಡ್ಡಕಂ – ‘‘ಕಸ್ಸಕೋಸಿ, ವಾಣಿಜೋಸಿ, ಗೋರಕ್ಖೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಕಸ್ಸಕಂ ವಾಣಿಜಂ ಗೋರಕ್ಖಂ – ‘‘ಕಸ್ಸಕೋಸಿ, ವಾಣಿಜೋಸಿ, ಗೋರಕ್ಖೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೦. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ನಳಕಾರಂ ಕುಮ್ಭಕಾರಂ ಪೇಸಕಾರಂ ಚಮ್ಮಕಾರಂ ನಹಾಪಿತಂ – ‘‘ನಳಕಾರೋಸಿ, ಕುಮ್ಭಕಾರೋಸಿ, ಪೇಸಕಾರೋಸಿ, ಚಮ್ಮಕಾರೋಸಿ, ನಹಾಪಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಮುದ್ದಿಕಂ ಗಣಕಂ ಲೇಖಕಂ – ‘‘ನಳಕಾರೋಸಿ, ಕುಮ್ಭಕಾರೋಸಿ, ಪೇಸಕಾರೋಸಿ, ಚಮ್ಮಕಾರೋಸಿ, ನಹಾಪಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ನಳಕಾರಂ ಕುಮ್ಭಕಾರಂ ಪೇಸಕಾರಂ ಚಮ್ಮಕಾರಂ ನಹಾಪಿತಂ – ‘‘ಮುದ್ದಿಕೋಸಿ, ಗಣಕೋಸಿ, ಲೇಖಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಮುದ್ದಿಕಂ ಗಣಕಂ ಲೇಖಕಂ – ‘‘ಮುದ್ದಿಕೋಸಿ, ಗಣಕೋಸಿ, ಲೇಖಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೧. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಕುಟ್ಠಿಕಂ ಗಣ್ಡಿಕಂ ಕಿಲಾಸಿಕಂ ಸೋಸಿಕಂ ಅಪಮಾರಿಕಂ – ‘‘ಕುಟ್ಠಿಕೋಸಿ, ಗಣ್ಡಿಕೋಸಿ, ಕಿಲಾಸಿಕೋಸಿ, ಸೋಸಿಕೋಸಿ, ಅಪಮಾರಿಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಮಧುಮೇಹಿಕಂ – ‘‘ಕುಟ್ಠಿಕೋಸಿ, ಗಣ್ಡಿಕೋಸಿ, ಕಿಲಾಸಿಕೋಸಿ, ಸೋಸಿಕೋಸಿ, ಅಪಮಾರಿಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಕುಟ್ಠಿಕಂ ಗಣ್ಡಿಕಂ ಕಿಲಾಸಿಕಂ ಸೋಸಿಕಂ ಅಪಮಾರಿಕಂ – ‘‘ಮಧುಮೇಹಿಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಮಧುಮೇಹಿಕಂ – ‘‘ಮಧುಮೇಹಿಕೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೨. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಅತಿದೀಘಂ ಅತಿರಸ್ಸಂ ಅತಿಕಣ್ಹಂ ಅಚ್ಚೋದಾತಂ – ‘‘ಅತಿದೀಘೋಸಿ, ಅತಿರಸ್ಸೋಸಿ, ಅತಿಕಣ್ಹೋಸಿ, ಅಚ್ಚೋದಾತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ನಾತಿದೀಘಂ ನಾತಿರಸ್ಸಂ ನಾತಿಕಣ್ಹಂ ನಾಚ್ಚೋದಾತಂ – ‘‘ಅತಿದೀಘೋಸಿ, ಅತಿರಸ್ಸೋಸಿ, ಅತಿಕಣ್ಹೋಸಿ, ಅಚ್ಚೋದಾತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಅತಿದೀಘಂ ಅತಿರಸ್ಸಂ ಅತಿಕಣ್ಹಂ ಅಚ್ಚೋದಾತಂ – ‘‘ನಾತಿದೀಘೋಸಿ, ನಾತಿರಸ್ಸೋಸಿ, ನಾತಿಕಣ್ಹೋಸಿ, ನಾಚ್ಚೋದಾತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ನಾತಿದೀಘಂ ನಾತಿರಸ್ಸಂ ನಾತಿಕಣ್ಹಂ ನಾಚ್ಚೋದಾತಂ – ‘‘ನಾತಿದೀಘೋಸಿ, ನಾತಿರಸ್ಸೋಸಿ, ನಾತಿಕಣ್ಹೋಸಿ, ನಾಚ್ಚೋದಾತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೩. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ರಾಗಪರಿಯುಟ್ಠಿತಂ ದೋಸಪರಿಯುಟ್ಠಿತಂ ಮೋಹಪರಿಯುಟ್ಠಿತಂ – ‘‘ರಾಗಪರಿಯುಟ್ಠಿತೋಸಿ, ದೋಸಪರಿಯುಟ್ಠಿತೋಸಿ, ಮೋಹಪರಿಯುಟ್ಠಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ವೀತರಾಗಂ ವೀತದೋಸಂ ವೀತಮೋಹಂ – ‘‘ರಾಗಪರಿಯುಟ್ಠಿತೋಸಿ, ದೋಸಪರಿಯುಟ್ಠಿತೋಸಿ, ಮೋಹಪರಿಯುಟ್ಠಿತೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ರಾಗಪರಿಯುಟ್ಠಿತಂ ದೋಸಪರಿಯುಟ್ಠಿತಂ ಮೋಹಪರಿಯುಟ್ಠಿತಂ – ‘‘ವೀತರಾಗೋಸಿ, ವೀತದೋಸೋಸಿ, ವೀತಮೋಹೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ವೀತರಾಗಂ ವೀತದೋಸಂ ವೀತಮೋಹಂ – ‘‘ವೀತರಾಗೋಸಿ, ವೀತದೋಸೋಸಿ, ವೀತಮೋಹೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೪. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಪಾರಾಜಿಕಂ ಅಜ್ಝಾಪನ್ನಂ ಸಙ್ಘಾದಿಸೇಸಂ ಅಜ್ಝಾಪನ್ನಂ ಥುಲ್ಲಚ್ಚಯಂ ಅಜ್ಝಾಪನ್ನಂ ಪಾಚಿತ್ತಿಯಂ ಅಜ್ಝಾಪನ್ನಂ ಪಾಟಿದೇಸನೀಯಂ ಅಜ್ಝಾಪನ್ನಂ ದುಕ್ಕಟಂ ಅಜ್ಝಾಪನ್ನಂ ದುಬ್ಭಾಸಿತಂ ಅಜ್ಝಾಪನ್ನಂ – ‘‘ಪಾರಾಜಿಕಂ ಅಜ್ಝಾಪನ್ನೋಸಿ, ಸಙ್ಘಾದಿಸೇಸಂ ಅಜ್ಝಾಪನ್ನೋಸಿ, ಥುಲ್ಲಚ್ಚಯಂ ಅಜ್ಝಾಪನ್ನೋಸಿ, ಪಾಚಿತ್ತಿಯಂ ಅಜ್ಝಾಪನ್ನೋಸಿ, ಪಾಟಿದೇಸನೀಯಂ ಅಜ್ಝಾಪನ್ನೋಸಿ, ದುಕ್ಕಟಂ ಅಜ್ಝಾಪನ್ನೋಸಿ, ದುಬ್ಭಾಸಿತಂ ಅಜ್ಝಾಪನ್ನೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಸೋತಾಪನ್ನಂ – ‘‘ಪಾರಾಜಿಕಂ ಅಜ್ಝಾಪನ್ನೋಸಿ…ಪೇ… ದುಬ್ಭಾಸಿತಂ ಅಜ್ಝಾಪನ್ನೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಪಾರಾಜಿಕಂ ಅಜ್ಝಾಪನ್ನಂ…ಪೇ… ದುಬ್ಭಾಸಿತಂ ಅಜ್ಝಾಪನ್ನಂ – ‘‘ಸೋತಾಪನ್ನೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಸೋತಾಪನ್ನಂ – ‘‘ಸೋತಾಪನ್ನೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೫. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ, ಓಟ್ಠಂ ಮೇಣ್ಡಂ ಗೋಣಂ ಗದ್ರಭಂ ತಿರಚ್ಛಾನಗತಂ ನೇರಯಿಕಂ – ‘‘ಓಟ್ಠೋಸಿ, ಮೇಣ್ಡೋಸಿ, ಗೋಣೋಸಿ, ಗದ್ರಭೋಸಿ, ತಿರಚ್ಛಾನಗತೋಸಿ, ನೇರಯಿಕೋಸಿ, ನತ್ಥಿ ತುಯ್ಹಂ ಸುಗತಿ, ದುಗ್ಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಉಕ್ಕಟ್ಠಂ ವದೇತಿ, ಪಣ್ಡಿತಂ ಬ್ಯತ್ತಂ ಮೇಧಾವಿ ಬಹುಸ್ಸುತಂ ಧಮ್ಮಕಥಿಕಂ – ‘‘ಓಟ್ಠೋಸಿ, ಮೇಣ್ಡೋಸಿ, ಗೋಣೋಸಿ, ಗದ್ರಭೋಸಿ, ತಿರಚ್ಛಾನಗತೋಸಿ, ನೇರಯಿಕೋಸಿ; ನತ್ಥಿ ತುಯ್ಹಂ ಸುಗತಿ, ದುಗ್ಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಹೀನಂ ವದೇತಿ, ಓಟ್ಠಂ ಮೇಣ್ಡಂ ಗೋಣಂ ಗದ್ರಭಂ ತಿರಚ್ಛಾನಗತಂ ನೇರಯಿಕಂ – ‘‘ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ, ಸುಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಪಣ್ಡಿತಂ ಬ್ಯತ್ತಂ ಮೇಧಾವಿಂ ಬಹುಸ್ಸುತಂ ಧಮ್ಮಕಥಿಕಂ – ‘‘ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ, ಸುಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ಪಾಚಿತ್ತಿಯಸ್ಸ.

೨೬. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಖತ್ತಿಯಾ, ಬ್ರಾಹ್ಮಣಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೨೭. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಅವಕಣ್ಣಕಾ ಜವಕಣ್ಣಕಾ ಧನಿಟ್ಠಕಾ ಸವಿಟ್ಠಕಾ ಕುಲವಡ್ಢಕಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಬುದ್ಧರಕ್ಖಿತಾ ಧಮ್ಮರಕ್ಖಿತಾ ಸಙ್ಘರಕ್ಖಿತಾ’’ತಿ ಭಣತಿ …ಪೇ…. ‘‘ಸನ್ತಿ ಇಧೇಕಚ್ಚೇ ಕೋಸಿಯಾ ಭಾರದ್ವಾಜಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಗೋತಮಾ ಮೋಗ್ಗಲ್ಲಾನಾ ಕಚ್ಚಾನಾ ವಾಸಿಟ್ಠಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಕೋಟ್ಠಕಾ ಪುಪ್ಫಛಡ್ಡಕಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಕಸ್ಸಕಾ ವಾಣಿಜಾ ಗೋರಕ್ಖಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ನಳಕಾರಾ ಕುಮ್ಭಕಾರಾ ಪೇಸಕಾರಾ ಚಮ್ಮಕಾರಾ ನಹಾಪಿತಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಮುದ್ದಿಕಾ ಗಣಕಾ ಲೇಖಕಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಕುಟ್ಠಿಕಾ ಗಣ್ಡಿಕಾ ಕಿಲಾಸಿಕಾ ಸೋಸಿಕಾ ಅಪಮಾರಿಕಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಮಧುಮೇಹಿಕಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಅತಿದೀಘಾ ಅತಿರಸ್ಸಾ ಅತಿಕಣ್ಹಾ ಅಚ್ಚೋದಾತಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ನಾತಿದೀಘಾ ನಾತಿರಸ್ಸಾ ನಾತಿಕಣ್ಹಾ ನಾಚ್ಚೋದಾತಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ರಾಗಪರಿಯುಟ್ಠಿತಾ ದೋಸಪರಿಯುಟ್ಠಿತಾ ಮೋಹಪರಿಯುಟ್ಠಿತಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ವೀತರಾಗಾ ವೀತದೋಸಾ ವೀತಮೋಹಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಪಾರಾಜಿಕಂ ಅಜ್ಝಾಪನ್ನಾ…ಪೇ… ದುಬ್ಭಾಸಿತಂ ಅಜ್ಝಾಪನ್ನಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಸೋತಾಪನ್ನಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಓಟ್ಠಾ ಮೇಣ್ಡಾ ಗೋಣಾ ಗದ್ರಭಾ ತಿರಚ್ಛಾನಗತಾ ನೇರಯಿಕಾ, ನತ್ಥಿ ತೇಸಂ ಸುಗತಿ, ದುಗ್ಗತಿಯೇವ ತೇಸಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೨೮. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಪಣ್ಡಿತಾ ಬ್ಯತ್ತಾ, ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಿ ತೇಸಂ ದುಗ್ಗತಿ, ಸುಗತಿಯೇವ ತೇಸಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೨೯. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಯೇ ನೂನ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ…ಪೇ….

ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಯೇ ನೂನ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೩೦. ಉಪಸಮ್ಪನ್ನೋ ಉಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ನ ಮಯಂ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ನ ಮಯಂ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಮ್ಹಾಕಂ ದುಗ್ಗತಿ, ಸುಗತಿಯೇವ ಅಮ್ಹಾಕಂ ಪಾಟಿಕಙ್ಖಾ’’ತಿ ಭಣತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೩೧. ಉಪಸಮ್ಪನ್ನೋ ಅನುಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಹೀನೇನ ಹೀನಂ ವದೇತಿ,…ಪೇ… ಹೀನೇನ ಉಕ್ಕಟ್ಠಂ ವದೇತಿ…ಪೇ… ಉಕ್ಕಟ್ಠೇನ ಹೀನಂ ವದೇತಿ…ಪೇ… ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಪಣ್ಡಿತಂ ಬ್ಯತ್ತಂ ಮೇಧಾವಿಂ ಬಹುಸ್ಸುತಂ ಧಮ್ಮಕಥಿಕಂ – ‘‘ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ, ಸುಗತಿಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಿ ತೇಸಂ ದುಗ್ಗತಿ, ಸುಗತಿಯೇವ ತೇಸಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ಯೇ ನೂನ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಯೇ ನೂನ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ಖುಂಸೇತುಕಾಮೋ ವಮ್ಭೇತುಕಾಮೋ ಮಙ್ಕುಕತ್ತುಕಾಮೋ ಏವಂ ವದೇತಿ, ‘‘ನ ಮಯಂ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ನ ಮಯಂ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಮ್ಹಾಕಂ ದುಗ್ಗತಿ, ಸುಗತಿಯೇವ ಅಮ್ಹಾಕಂ ಪಾಟಿಕಙ್ಖಾ’’ತಿ ಭಣತಿ. ಆಪತ್ತಿ ವಾಚಾಯ, ವಾಚಾಯ ದುಕ್ಕಟಸ್ಸ.

೩೨. ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಹೀನೇನ ಹೀನಂ ವದೇತಿ, ಚಣ್ಡಾಲಂ ವೇನಂ ನೇಸಾದಂ ರಥಕಾರಂ ಪುಕ್ಕುಸಂ – ‘‘ಚಣ್ಡಾಲೋಸಿ, ವೇನೋಸಿ, ನೇಸಾದೋಸಿ, ರಥಕಾರೋಸಿ, ಪುಕ್ಕುಸೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಹೀನೇನ ಉಕ್ಕಟ್ಠಂ ವದೇತಿ, ಖತ್ತಿಯಂ ಬ್ರಾಹ್ಮಣಂ – ‘‘ಚಣ್ಡಾಲೋಸಿ, ವೇನೋಸಿ, ನೇಸಾದೋಸಿ, ರಥಕಾರೋಸಿ, ಪುಕ್ಕುಸೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಉಕ್ಕಟ್ಠೇನ ಹೀನಂ ವದೇತಿ, ಚಣ್ಡಾಲಂ ವೇನಂ ನೇಸಾದಂ ರಥಕಾರಂ ಪುಕ್ಕುಸಂ – ‘‘ಖತ್ತಿಯೋಸಿ, ಬ್ರಾಹ್ಮಣೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಖತ್ತಿಯಂ ಬ್ರಾಹ್ಮಣಂ – ‘‘ಖತ್ತಿಯೋಸಿ, ಬ್ರಾಹ್ಮಣೋಸೀ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಹೀನೇನ ಹೀನಂ ವದೇತಿ…ಪೇ… ಹೀನೇನ ಉಕ್ಕಟ್ಠಂ ವದೇತಿ…ಪೇ… ಉಕ್ಕಟ್ಠೇನ ಹೀನಂ ವದೇತಿ…ಪೇ… ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಪಣ್ಡಿತಂ ಬ್ಯತ್ತಂ ಮೇಧಾವಿಂ ಬಹುಸ್ಸುತಂ ಧಮ್ಮಕಥಿಕಂ – ‘‘ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ, ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ, ಸುಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

೩೩. ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಿ ತೇಸಂ ದುಗ್ಗತಿ, ಸುಗತಿ ಯೇವ ತೇಸಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ಯೇ ನೂನ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಯೇ ನೂನ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಉಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ನ ಮಯಂ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ನ ಮಯಂ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಮ್ಹಾಕಂ ದುಗ್ಗತಿ, ಸುಗತಿಯೇವ ಅಮ್ಹಾಕಂ ಪಾಟಿಕಙ್ಖಾ’’ತಿ ಭಣತಿ. ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

೩೪. ಉಪಸಮ್ಪನ್ನೋ ಅನುಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಹೀನೇನ ಹೀನಂ ವದೇತಿ…ಪೇ… ಹೀನೇನ ಉಕ್ಕಟ್ಠಂ ವದೇತಿ…ಪೇ… ಉಕ್ಕಟ್ಠೇನ ಹೀನಂ ವದೇತಿ…ಪೇ… ಉಕ್ಕಟ್ಠೇನ ಉಕ್ಕಟ್ಠಂ ವದೇತಿ, ಪಣ್ಡಿತಂ ಬ್ಯತ್ತಂ ಮೇಧಾವಿಂ ಬಹುಸ್ಸುತಂ ಧಮ್ಮಕಥಿಕಂ – ‘‘ಪಣ್ಡಿತೋಸಿ, ಬ್ಯತ್ತೋಸಿ, ಮೇಧಾವೀಸಿ, ಬಹುಸ್ಸುತೋಸಿ ಧಮ್ಮಕಥಿಕೋಸಿ, ನತ್ಥಿ ತುಯ್ಹಂ ದುಗ್ಗತಿ; ಸುಗತಿ ಯೇವ ತುಯ್ಹಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ಸನ್ತಿ ಇಧೇಕಚ್ಚೇ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಸನ್ತಿ ಇಧೇಕಚ್ಚೇ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಿ ತೇಸಂ ದುಗ್ಗತಿ, ಸುಗತಿ ಯೇವ ತೇಸಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ಯೇ ನೂನ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ಯೇ ನೂನ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

ಉಪಸಮ್ಪನ್ನೋ ಅನುಪಸಮ್ಪನ್ನಂ ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ, ದವಕಮ್ಯತಾ ಏವಂ ವದೇತಿ, ‘‘ನ ಮಯಂ ಚಣ್ಡಾಲಾ ವೇನಾ ನೇಸಾದಾ ರಥಕಾರಾ ಪುಕ್ಕುಸಾ’’ತಿ ಭಣತಿ…ಪೇ…. ‘‘ನ ಮಯಂ ಪಣ್ಡಿತಾ ಬ್ಯತ್ತಾ ಮೇಧಾವೀ ಬಹುಸ್ಸುತಾ ಧಮ್ಮಕಥಿಕಾ, ನತ್ಥಮ್ಹಾಕಂ ದುಗ್ಗತಿ, ಸುಗತಿ ಯೇವ ಅಮ್ಹಾಕಂ ಪಾಟಿಕಙ್ಖಾ’’ತಿ ಭಣತಿ, ಆಪತ್ತಿ ವಾಚಾಯ, ವಾಚಾಯ ದುಬ್ಭಾಸಿತಸ್ಸ.

೩೫. ಅನಾಪತ್ತಿ ಅತ್ಥಪುರೇಕ್ಖಾರಸ್ಸ, ಧಮ್ಮಪುರೇಕ್ಖಾರಸ್ಸ, ಅನುಸಾಸನಿಪುರೇಕ್ಖಾರಸ್ಸ, ಉಮ್ಮತ್ತಕಸ್ಸ, ಖಿತ್ತಚಿತ್ತಸ್ಸ, ವೇದನಾಟ್ಟಸ್ಸ, ಆದಿಕಮ್ಮಿಕಸ್ಸಾತಿ.

ಓಮಸವಾದಸಿಕ್ಖಾಪದಂ ನಿಟ್ಠಿತಂ ದುತಿಯಂ.