೨೦೮. ಸಿವೇಯ್ಯಕದುಸ್ಸಯುಗಕಥಾ

೩೩೫. ತೇನ ಖೋ ಪನ ಸಮಯೇನ ರಞ್ಞೋ ಪಜ್ಜೋತಸ್ಸ ಸಿವೇಯ್ಯಕಂ ದುಸ್ಸಯುಗಂ ಉಪ್ಪನ್ನಂ ಹೋತಿ – ಬಹೂನಂ [ಬಹುನ್ನಂ (ಸೀ. ಸ್ಯಾ.)] ದುಸ್ಸಾನಂ ಬಹೂನಂ ದುಸ್ಸಯುಗಾನಂ ಬಹೂನಂ ದುಸ್ಸಯುಗಸತಾನಂ ಬಹೂನಂ ದುಸ್ಸಯುಗಸಹಸ್ಸಾನಂ ಬಹೂನಂ ದುಸ್ಸಯುಗಸತಸಹಸ್ಸಾನಂ ಅಗ್ಗಞ್ಚ ಸೇಟ್ಠಞ್ಚ ಮೋಕ್ಖಞ್ಚ ಉತ್ತಮಞ್ಚ ಪವರಞ್ಚ. ಅಥ ಖೋ ರಾಜಾ ಪಜ್ಜೋತೋ ತಂ ಸಿವೇಯ್ಯಕಂ ದುಸ್ಸಯುಗಂ ಜೀವಕಸ್ಸ ಕೋಮಾರಭಚ್ಚಸ್ಸ ಪಾಹೇಸಿ. ಅಥ ಖೋ ಜೀವಕಸ್ಸ ಕೋಮಾರಭಚ್ಚಸ್ಸ ಏತದಹೋಸಿ – ‘‘ಇದಂ ಖೋ ಮೇ ಸಿವೇಯ್ಯಕಂ ದುಸ್ಸಯುಗಂ ರಞ್ಞಾ ಪಜ್ಜೋತೇನ ಪಹಿತಂ – ಬಹೂನಂ ದುಸ್ಸಾನಂ ಬಹೂನಂ ದುಸ್ಸಯುಗಾನಂ ಬಹೂನಂ ದುಸ್ಸಯುಗಸತಾನಂ ಬಹೂನಂ ದುಸ್ಸಯುಗಸಹಸ್ಸಾನಂ ಬಹೂನಂ ದುಸ್ಸಯುಗಸತಸಹಸ್ಸಾನಂ ಅಗ್ಗಞ್ಚ ಸೇಟ್ಠಞ್ಚ ಮೋಕ್ಖಞ್ಚ ಉತ್ತಮಞ್ಚ ಪವರಞ್ಚ. ನಯಿದಂ ಅಞ್ಞೋ ಕೋಚಿ ಪಚ್ಚಾರಹತಿ ಅಞ್ಞತ್ರ ತೇನ ಭಗವತಾ ಅರಹತಾ ಸಮ್ಮಾಸಮ್ಬುದ್ಧೇನ, ರಞ್ಞಾ ವಾ ಮಾಗಧೇನ ಸೇನಿಯೇನ ಬಿಮ್ಬಿಸಾರೇನಾ’’ತಿ.

ಸಿವೇಯ್ಯಕದುಸ್ಸಯುಗಕಥಾ ನಿಟ್ಠಿತಾ.