೧೮೪. ವುಡ್ಢಪಬ್ಬಜಿತವತ್ಥು

೩೦೩. ಅಥ ಖೋ ಭಗವಾ ಕುಸಿನಾರಾಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಆತುಮಾ ತೇನ ಚಾರಿಕಂ ಪಕ್ಕಾಮಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಅಡ್ಢತೇಲಸೇಹಿ ಭಿಕ್ಖುಸತೇಹಿ. ತೇನ ಖೋ ಪನ ಸಮಯೇನ ಅಞ್ಞತರೋ ವುಡ್ಢಪಬ್ಬಜಿತೋ ಆತುಮಾಯಂ ಪಟಿವಸತಿ ನಹಾಪಿತಪುಬ್ಬೋ. ತಸ್ಸ ದ್ವೇ ದಾರಕಾ ಹೋನ್ತಿ, ಮಞ್ಜುಕಾ ಪಟಿಭಾನೇಯ್ಯಕಾ, ದಕ್ಖಾ ಪರಿಯೋದಾತಸಿಪ್ಪಾ ಸಕೇ ಆಚರಿಯಕೇ ನಹಾಪಿತಕಮ್ಮೇ. ಅಸ್ಸೋಸಿ ಖೋ ಸೋ ವುಡ್ಢಪಬ್ಬಜಿತೋ – ‘‘ಭಗವಾ ಕಿರ ಆತುಮಂ ಆಗಚ್ಛತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಅಡ್ಢತೇಲಸೇಹಿ ಭಿಕ್ಖುಸತೇಹೀ’’ತಿ. ಅಥ ಖೋ ಸೋ ವುಡ್ಢಪಬ್ಬಜಿತೋ ತೇ ದಾರಕೇ ಏತದವೋಚ – ‘‘ಭಗವಾ ಕಿರ, ತಾತಾ, ಆತುಮಂ ಆಗಚ್ಛತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಅಡ್ಢತೇಲಸೇಹಿ ಭಿಕ್ಖುಸತೇಹಿ. ಗಚ್ಛಥ ತುಮ್ಹೇ, ತಾತಾ, ಖುರಭಣ್ಡಂ ಆದಾಯ ನಾಳಿಯಾವಾಪಕೇನ ಅನುಘರಕಂ ಅನುಘರಕಂ ಆಹಿಣ್ಡಥ, ಲೋಣಮ್ಪಿ, ತೇಲಮ್ಪಿ, ತಣ್ಡುಲಮ್ಪಿ, ಖಾದನೀಯಮ್ಪಿ ಸಂಹರಥ, ಭಗವತೋ ಆಗತಸ್ಸ ಯಾಗುಪಾನಂ ಕರಿಸ್ಸಾಮಾ’’ತಿ. ‘‘ಏವಂ, ತಾತಾ’’ತಿ ಖೋ ತೇ ದಾರಕಾ ತಸ್ಸ ವುಡ್ಢಪಬ್ಬಜಿತಸ್ಸ ಪಟಿಸ್ಸುಣಿತ್ವಾ ಖುರಭಣ್ಡಂ ಆದಾಯ ನಾಳಿಯಾವಾಪಕೇನ ಅನುಘರಕಂ ಅನುಘರಕಂ ಆಹಿಣ್ಡನ್ತಿ, ಲೋಣಮ್ಪಿ, ತೇಲಮ್ಪಿ, ತಣ್ಡುಲಮ್ಪಿ, ಖಾದನೀಯಮ್ಪಿ ಸಂಹರನ್ತಾ. ಮನುಸ್ಸಾ ತೇ ದಾರಕೇ ಮಞ್ಜುಕೇ ಪಟಿಭಾನೇಯ್ಯಕೇ ಪಸ್ಸಿತ್ವಾ ಯೇಪಿ ನ ಕಾರಾಪೇತುಕಾಮಾ ತೇಪಿ ಕಾರಾಪೇನ್ತಿ, ಕಾರಾಪೇತ್ವಾಪಿ ಬಹುಂ ದೇನ್ತಿ. ಅಥ ಖೋ ತೇ ದಾರಕಾ ಬಹುಂ ಲೋಣಮ್ಪಿ, ತೇಲಮ್ಪಿ, ತಣ್ಡುಲಮ್ಪಿ, ಖಾದನೀಯಮ್ಪಿ ಸಂಹರಿಂಸು.

ಅಥ ಖೋ ಭಗವಾ ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಆತುಮಾ ತದವಸರಿ. ತತ್ರ ಸುದಂ ಭಗವಾ ಆತುಮಾಯಂ ವಿಹರತಿ ಭುಸಾಗಾರೇ. ಅಥ ಖೋ ಸೋ ವುಡ್ಢಪಬ್ಬಜಿತೋ ತಸ್ಸಾ ರತ್ತಿಯಾ ಅಚ್ಚಯೇನ ಪಹೂತಂ ಯಾಗುಂ ಪಟಿಯಾದಾಪೇತ್ವಾ ಭಗವತೋ ಉಪನಾಮೇಸಿ – ‘‘ಪಟಿಗ್ಗಣ್ಹಾತು ಮೇ, ಭನ್ತೇ, ಭಗವಾ ಯಾಗು’’ನ್ತಿ. ಜಾನನ್ತಾಪಿ ತಥಾಗತಾ ಪುಚ್ಛನ್ತಿ…ಪೇ… ಸಾವಕಾನಂ ವಾ ಸಿಕ್ಖಾಪದಂ ಪಞ್ಞಪೇಸ್ಸಾಮಾತಿ. ಅಥ ಖೋ ಭಗವಾ ತಂ ವುಡ್ಢಪಬ್ಬಜಿತಂ ಏತದವೋಚ – ‘‘ಕುತಾಯಂ, ಭಿಕ್ಖು ಯಾಗೂ’’ತಿ? ಅಥ ಖೋ ಸೋ ವುಡ್ಢಪಬ್ಬಜಿತೋ ಭಗವತೋ ಏತಮತ್ಥಂ ಆರೋಚೇಸಿ. ವಿಗರಹಿ ಬುದ್ಧೋ ಭಗವಾ, ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಪಬ್ಬಜಿತೋ ಅಕಪ್ಪಿಯೇ ಸಮಾದಪೇಸ್ಸಸಿ [ಸಮಾದಪೇಸಿ (ಕ.)]. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ ‘ನ, ಭಿಕ್ಖವೇ, ಪಬ್ಬಜಿತೇನ ಅಕಪ್ಪಿಯೇ ಸಮಾದಪೇತಬ್ಬಂ, ಯೋ ಸಮಾದಪೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಚ, ಭಿಕ್ಖವೇ, ನಹಾಪಿತಪುಬ್ಬೇನ ಖುರಭಣ್ಡಂ ಪರಿಹರಿತಬ್ಬಂ. ಯೋ ಪರಿಹರೇಯ್ಯ, ಆಪತ್ತಿ ದುಕ್ಕಟಸ್ಸಾ’’’ತಿ.

ಅಥ ಖೋ ಭಗವಾ ಆತುಮಾಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಸಾವತ್ಥಿ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಸಾವತ್ಥಿ ತದವಸರಿ. ತತ್ರ ಸುದಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸಾವತ್ಥಿಯಂ ಬಹುಂ ಫಲಖಾದನೀಯಂ ಉಪ್ಪನ್ನಂ ಹೋತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ಭಗವತಾ ಫಲಖಾದನೀಯಂ ಅನುಞ್ಞಾತಂ, ಕಿಂ ಅನನುಞ್ಞಾತ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಬ್ಬಂ ಫಲಖಾದನೀಯ’’ನ್ತಿ.

೩೦೪. ತೇನ ಖೋ ಪನ ಸಮಯೇನ ಸಙ್ಘಿಕಾನಿ ಬೀಜಾನಿ ಪುಗ್ಗಲಿಕಾಯ ಭೂಮಿಯಾ ರೋಪಿಯನ್ತಿ, ಪುಗ್ಗಲಿಕಾನಿ ಬೀಜಾನಿ ಸಙ್ಘಿಕಾಯ ಭೂಮಿಯಾ ರೋಪಿಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಸಙ್ಘಿಕಾನಿ, ಭಿಕ್ಖವೇ, ಬೀಜಾನಿ ಪುಗ್ಗಲಿಕಾಯ ಭೂಮಿಯಾ ರೋಪಿತಾನಿ ಭಾಗಂ ದತ್ವಾ ಪರಿಭುಞ್ಜಿತಬ್ಬಾನಿ. ಪುಗ್ಗಲಿಕಾನಿ ಬೀಜಾನಿ ಸಙ್ಘಿಕಾಯ ಭೂಮಿಯಾ ರೋಪಿತಾನಿ ಭಾಗಂ ದತ್ವಾ ಪರಿಭುಞ್ಜಿತಬ್ಬಾನೀತಿ.

ವುಡ್ಢಪಬ್ಬಜಿತವತ್ಥು ನಿಟ್ಠಿತಂ.