೧೮೦. ಮೇಣ್ಡಕಗಹಪತಿವತ್ಥು

೨೯೬. ತೇನ ಖೋ ಪನ ಸಮಯೇನ ಭದ್ದಿಯನಗರೇ ಮೇಣ್ಡಕೋ ಗಹಪತಿ ಪಟಿವಸತಿ. ತಸ್ಸ ಏವರೂಪೋ ಇದ್ಧಾನುಭಾವೋ ಹೋತಿ – ಸೀಸಂ ನಹಾಯಿತ್ವಾ ಧಞ್ಞಾಗಾರಂ ಸಮ್ಮಜ್ಜಾಪೇತ್ವಾ ಬಹಿದ್ವಾರೇ ನಿಸೀದತಿ, ಅನ್ತಲಿಕ್ಖಾ ಧಞ್ಞಸ್ಸ ಧಾರಾ ಓಪತಿತ್ವಾ ಧಞ್ಞಾಗಾರಂ ಪೂರೇತಿ. ಭರಿಯಾಯ ಏವರೂಪೋ ಇದ್ಧಾನುಭಾವೋ ಹೋತಿ – ಏಕಂಯೇವ ಆಳ್ಹಕಥಾಲಿಕಂ ಉಪನಿಸೀದಿತ್ವಾ ಏಕಞ್ಚ ಸೂಪಭಿಞ್ಜನಕಂ [ಸೂಪಭಿಞ್ಜರಕಂ (ಸೀ.)] ದಾಸಕಮ್ಮಕರಪೋರಿಸಂ ಭತ್ತೇನ ಪರಿವಿಸತಿ, ನ ತಾವ ತಂ ಖಿಯ್ಯತಿ [ಖೀಯತಿ (ಸೀ. ಸ್ಯಾ.)] ಯಾವ ಸಾ ನ ವುಟ್ಠಾತಿ. ಪುತ್ತಸ್ಸ ಏವರೂಪೋ ಇದ್ಧಾನುಭಾವೋ ಹೋತಿ – ಏಕಂಯೇವ ಸಹಸ್ಸಥವಿಕಂ ಗಹೇತ್ವಾ ದಾಸಕಮ್ಮಕರಪೋರಿಸಸ್ಸ ಛಮಾಸಿಕಂ ವೇತನಂ ದೇತಿ, ನ ತಾವ ತಂ ಖಿಯ್ಯತಿ ಯಾವಸ್ಸ ಹತ್ಥಗತಾ. ಸುಣಿಸಾಯ ಏವರೂಪೋ ಇದ್ಧಾನುಭಾವೋ ಹೋತಿ – ಏಕಂಯೇವ ಚತುದೋಣಿಕಂ ಪಿಟಕಂ ಉಪನಿಸೀದಿತ್ವಾ ದಾಸಕಮ್ಮಕರಪೋರಿಸಸ್ಸ ಛಮಾಸಿಕಂ ಭತ್ತಂ ದೇತಿ, ನ ತಾವ ತಂ ಖಿಯ್ಯತಿ ಯಾವ ಸಾ ನ ವುಟ್ಠಾತಿ. ದಾಸಸ್ಸ ಏವರೂಪೋ ಇದ್ಧಾನುಭಾವೋ ಹೋತಿ – ಏಕೇನ ನಙ್ಗಲೇನ ಕಸನ್ತಸ್ಸ ಸತ್ತ ಸೀತಾಯೋ ಗಚ್ಛನ್ತಿ.

ಅಸ್ಸೋಸಿ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ – ‘‘ಅಮ್ಹಾಕಂ ಕಿರ ವಿಜಿತೇ ಭದ್ದಿಯನಗರೇ ಮೇಣ್ಡಕೋ ಗಹಪತಿ ಪಟಿವಸತಿ. ತಸ್ಸ ಏವರೂಪೋ ಇದ್ಧಾನುಭಾವೋ – ಸೀಸಂ ನಹಾಯಿತ್ವಾ ಧಞ್ಞಾಗಾರಂ ಸಮ್ಮಜ್ಜಾಪೇತ್ವಾ ಬಹಿದ್ವಾರೇ ನಿಸೀದತಿ, ಅನ್ತಲಿಕ್ಖಾ ಧಞ್ಞಸ್ಸ ಧಾರಾ ಓಪತಿತ್ವಾ ಧಞ್ಞಾಗಾರಂ ಪೂರೇತಿ. ಭರಿಯಾಯ ಏವರೂಪೋ ಇದ್ಧಾನುಭಾವೋ – ಏಕಂಯೇವ ಆಳ್ಹಕಥಾಲಿಕಂ ಉಪನಿಸೀದಿತ್ವಾ ಏಕಞ್ಚ ಸೂಪಭಿಞ್ಜನಕಂ ದಾಸಕಮ್ಮಕರಪೋರಿಸಂ ಭತ್ತೇನ ಪರಿವಿಸತಿ, ನ ತಾವ ತಂ ಖಿಯ್ಯತಿ ಯಾವ ಸಾ ನ ವುಟ್ಠಾತಿ. ಪುತ್ತಸ್ಸ ಏವರೂಪೋ ಇದ್ಧಾನುಭಾವೋ – ಏಕಂಯೇವ ಸಹಸ್ಸಥವಿಕಂ ಗಹೇತ್ವಾ ದಾಸಕಮ್ಮಕರಪೋರಿಸಸ್ಸ ಛಮಾಸಿಕಂ ವೇತನಂ ದೇತಿ, ನ ತಾವ ತಂ ಖಿಯ್ಯತಿ ಯಾವಸ್ಸ ಹತ್ಥಗತಾ. ಸುಣಿಸಾಯ ಏವರೂಪೋ ಇದ್ಧಾನುಭಾವೋ – ಏಕಂಯೇವ ಚತುದೋಣಿಕಂ ಪಿಟಕಂ ಉಪನಿಸೀದಿತ್ವಾ ದಾಸಕಮ್ಮಕರಪೋರಿಸಸ್ಸ ಛಮಾಸಿಕಂ ಭತ್ತಂ ದೇತಿ, ನ ತಾವ ತಂ ಖಿಯ್ಯತಿ ಯಾವ ಸಾ ನ ವುಟ್ಠಾತಿ. ದಾಸಸ್ಸ ಏವರೂಪೋ ಇದ್ಧಾನುಭಾವೋ – ಏಕೇನ ನಙ್ಗಲೇನ ಕಸನ್ತಸ್ಸ ಸತ್ತ ಸೀತಾಯೋ ಗಚ್ಛನ್ತೀ’’ತಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಅಞ್ಞತರಂ ಸಬ್ಬತ್ಥಕಂ ಮಹಾಮತ್ತಂ ಆಮನ್ತೇಸಿ – ‘‘ಅಮ್ಹಾಕಂ ಕಿರ, ಭಣೇ, ವಿಜಿತೇ ಭದ್ದಿಯನಗರೇ ಮೇಣ್ಡಕೋ ಗಹಪತಿ ಪಟಿವಸತಿ. ತಸ್ಸ ಏವರೂಪೋ ಇದ್ಧಾನುಭಾವೋ – ಸೀಸಂ ನಹಾಯಿತ್ವಾ ಧಞ್ಞಾಗಾರಂ ಸಮ್ಮಜ್ಜಾಪೇತ್ವಾ ಬಹಿದ್ವಾರೇ ನಿಸೀದತಿ, ಅನ್ತಲಿಕ್ಖಾ ಧಞ್ಞಸ್ಸ ಧಾರಾ ಓಪತಿತ್ವಾ ಧಞ್ಞಾಗಾರಂ ಪೂರೇತಿ. ಭರಿಯಾಯ…ಪೇ… ಪುತ್ತಸ್ಸ… ಸುಣಿಸಾಯ… ದಾಸಸ್ಸ ಏವರೂಪೋ ಇದ್ಧಾನುಭಾವೋ, ಏಕೇನ ನಙ್ಗಲೇನ ಕಸನ್ತಸ್ಸ ಸತ್ತ ಸೀತಾಯೋ ಗಚ್ಛನ್ತೀತಿ. ಗಚ್ಛ, ಭಣೇ, ಜಾನಾಹಿ. ಯಥಾ ಮಯಾ ಸಾಮಂ ದಿಟ್ಠೋ, ಏವಂ ತವ ದಿಟ್ಠೋ ಭವಿಸ್ಸತೀ’’ತಿ.

೨೯೭. ಏವಂ, ದೇವಾತಿ ಖೋ ಸೋ ಮಹಾಮತ್ತೋ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಟಿಸ್ಸುಣಿತ್ವಾ ಚತುರಙ್ಗಿನಿಯಾ ಸೇನಾಯ ಯೇನ ಭದ್ದಿಯಂ ತೇನ ಪಾಯಾಸಿ. ಅನುಪುಬ್ಬೇನ ಯೇನ ಭದ್ದಿಯಂ ಯೇನ ಮೇಣ್ಡಕೋ ಗಹಪತಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಮೇಣ್ಡಕಂ ಗಹಪತಿಂ ಏತದವೋಚ – ‘‘ಅಹಞ್ಹಿ, ಗಹಪತಿ, ರಞ್ಞಾ ಆಣತ್ತೋ ‘ಅಮ್ಹಾಕಂ ಕಿರ, ಭಣೇ, ವಿಜಿತೇ ಭದ್ದಿಯನಗರೇ ಮೇಣ್ಡಕೋ ಗಹಪತಿ ಪಟಿವಸತಿ, ತಸ್ಸ ಏವರೂಪೋ ಇದ್ಧಾನುಭಾವೋ, ಸೀಸಂ ನಹಾಯಿತ್ವಾ…ಪೇ… ಭರಿಯಾಯ… ಪುತ್ತಸ್ಸ… ಸುಣಿಸಾಯ… ದಾಸಸ್ಸ ಏವರೂಪೋ ಇದ್ಧಾನುಭಾವೋ, ಏಕೇನ ನಙ್ಗಲೇನ ಕಸನ್ತಸ್ಸ ಸತ್ತ ಸೀತಾಯೋ ಗಚ್ಛನ್ತೀ’ತಿ, ಗಚ್ಛ, ಭಣೇ, ಜಾನಾಹಿ. ಯಥಾ ಮಯಾ ಸಾಮಂ ದಿಟ್ಠೋ, ಏವಂ ತವ ದಿಟ್ಠೋ ಭವಿಸ್ಸತೀ’ತಿ. ಪಸ್ಸಾಮ ತೇ, ಗಹಪತಿ, ಇದ್ಧಾನುಭಾವ’’ನ್ತಿ. ಅಥ ಖೋ ಮೇಣ್ಡಕೋ ಗಹಪತಿ ಸೀಸಂ ನಹಾಯಿತ್ವಾ ಧಞ್ಞಾಗಾರಂ ಸಮ್ಮಜ್ಜಾಪೇತ್ವಾ ಬಹಿದ್ವಾರೇ ನಿಸೀದಿ, ಅನ್ತಲಿಕ್ಖಾ ಧಞ್ಞಸ್ಸ ಧಾರಾ ಓಪತಿತ್ವಾ ಧಞ್ಞಾಗಾರಂ ಪೂರೇಸಿ. ‘‘ದಿಟ್ಠೋ ತೇ, ಗಹಪತಿ, ಇದ್ಧಾನುಭಾವೋ. ಭರಿಯಾಯ ತೇ ಇದ್ಧಾನುಭಾವಂ ಪಸ್ಸಿಸ್ಸಾಮಾ’’ತಿ. ಅಥ ಖೋ ಮೇಣ್ಡಕೋ ಗಹಪತಿ ಭರಿಯಂ ಆಣಾಪೇಸಿ – ‘‘ತೇನ ಹಿ ಚತುರಙ್ಗಿನಿಂ ಸೇನಂ ಭತ್ತೇನ ಪರಿವಿಸಾ’’ತಿ. ಅಥ ಖೋ ಮೇಣ್ಡಕಸ್ಸ ಗಹಪತಿಸ್ಸ ಭರಿಯಾ ಏಕಂಯೇವ ಆಳ್ಹಕಥಾಲಿಕಂ ಉಪನಿಸೀದಿತ್ವಾ ಏಕಞ್ಚ ಸೂಪಭಿಞ್ಜನಕಂ ಚತುರಙ್ಗಿನಿಂ ಸೇನಂ ಭತ್ತೇನ ಪರಿವಿಸಿ, ನ ತಾವ ತಂ ಖಿಯ್ಯತಿ, ಯಾವ ಸಾ ನ ವುಟ್ಠಾತಿ. ‘‘ದಿಟ್ಠೋ ತೇ, ಗಹಪತಿ, ಭರಿಯಾಯಪಿ ಇದ್ಧಾನುಭಾವೋ. ಪುತ್ತಸ್ಸ ತೇ ಇದ್ಧಾನುಭಾವಂ ಪಸ್ಸಿಸ್ಸಾಮಾ’’ತಿ. ಅಥ ಖೋ ಮೇಣ್ಡಕೋ ಗಹಪತಿ ಪುತ್ತಂ ಆಣಾಪೇಸಿ – ‘‘ತೇನ ಹಿ ಚತುರಙ್ಗಿನಿಯಾ ಸೇನಾಯ ಛಮಾಸಿಕಂ ವೇತನಂ ದೇಹೀ’’ತಿ. ಅಥ ಖೋ ಮೇಣ್ಡಕಸ್ಸ ಗಹಪತಿಸ್ಸ ಪುತ್ತೋ ಏಕಂಯೇವ ಸಹಸ್ಸಥವಿಕಂ ಗಹೇತ್ವಾ ಚತುರಙ್ಗಿನಿಯಾ ಸೇನಾಯ ಛಮಾಸಿಕಂ ವೇತನಂ ಅದಾಸಿ, ನ ತಾವ ತಂ ಖಿಯ್ಯತಿ, ಯಾವಸ್ಸ ಹತ್ಥಗತಾ. ‘‘ದಿಟ್ಠೋ ತೇ, ಗಹಪತಿ, ಪುತ್ತಸ್ಸಪಿ ಇದ್ಧಾನುಭಾವೋ. ಸುಣಿಸಾಯ ತೇ ಇದ್ಧಾನುಭಾವಂ ಪಸ್ಸಿಸ್ಸಾಮಾ’’ತಿ. ಅಥ ಖೋ ಮೇಣ್ಡಕೋ ಗಹಪತಿ ಸುಣಿಸಂ ಆಣಾಪೇಸಿ – ‘‘ತೇನ ಹಿ ಚತುರಙ್ಗಿನಿಯಾ ಸೇನಾಯ ಛಮಾಸಿಕಂ ಭತ್ತಂ ದೇಹೀ’’ತಿ. ಅಥ ಖೋ ಮೇಣ್ಡಕಸ್ಸ ಗಹಪತಿಸ್ಸ ಸುಣಿಸಾ ಏಕಂಯೇವ ಚತುದೋಣಿಕಂ ಪಿಟಕಂ ಉಪನಿಸೀದಿತ್ವಾ ಚತುರಙ್ಗಿನಿಯಾ ಸೇನಾಯ ಛಮಾಸಿಕಂ ಭತ್ತಂ ಅದಾಸಿ, ನ ತಾವ ತಂ ಖಿಯ್ಯತಿ ಯಾವ ಸಾ ನ ವುಟ್ಠಾತಿ. ‘‘ದಿಟ್ಠೋ ತೇ, ಗಹಪತಿ, ಸುಣಿಸಾಯಪಿ ಇದ್ಧಾನುಭಾವೋ. ದಾಸಸ್ಸ ತೇ ಇದ್ಧಾನುಭಾವಂ ಪಸ್ಸಿಸ್ಸಾಮಾ’’ತಿ. ‘‘ಮಯ್ಹಂ ಖೋ, ಸಾಮಿ, ದಾಸಸ್ಸ ಇದ್ಧಾನುಭಾವೋ ಖೇತ್ತೇ ಪಸ್ಸಿತಬ್ಬೋ’’ತಿ. ‘‘ಅಲಂ, ಗಹಪತಿ, ದಿಟ್ಠೋ ತೇ ದಾಸಸ್ಸಪಿ ಇದ್ಧಾನುಭಾವೋ’’ತಿ. ಅಥ ಖೋ ಸೋ ಮಹಾಮತ್ತೋ ಚತುರಙ್ಗಿನಿಯಾ ಸೇನಾಯ ಪುನದೇವ ರಾಜಗಹಂ ಪಚ್ಚಾಗಞ್ಛಿ. ಯೇನ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಏತಮತ್ಥಂ ಆರೋಚೇಸಿ.

೨೯೮. ಅಥ ಖೋ ಭಗವಾ ವೇಸಾಲಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಭದ್ದಿಯಂ ತೇನ ಚಾರಿಕಂ ಪಕ್ಕಾಮಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಅಡ್ಢತೇಲಸೇಹಿ ಭಿಕ್ಖುಸತೇಹಿ. ಅಥ ಖೋ ಭಗವಾ ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಭದ್ದಿಯಂ ತದವಸರಿ. ತತ್ರ ಸುದಂ ಭಗವಾ ಭದ್ದಿಯೇ ವಿಹರತಿ ಜಾತಿಯಾ ವನೇ. ಅಸ್ಸೋಸಿ ಖೋ ಮೇಣ್ಡಕೋ ಗಹಪತಿ – ‘‘ಸಮಣೋ ಖಲು ಭೋ ಗೋತಮೋ ಸಕ್ಯಪುತ್ತೋ ಸಕ್ಯಕುಲಾ ಪಬ್ಬಜಿತೋ ಭದ್ದಿಯಂ ಅನುಪ್ಪತ್ತೋ ಭದ್ದಿಯೇ ವಿಹರತಿ ಜಾತಿಯಾ ವನೇ. ತಂ ಖೋ ಪನ ಭಗವನ್ತಂ ಗೋತಮಂ ಏವಂ ಕಲ್ಯಾಣೋ ಕಿತ್ತಿಸದ್ದೋ ಅಬ್ಭುಗ್ಗತೋ – ‘ಇತಿಪಿ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ ಸುಗತೋ ಲೋಕವಿದೂ ಅನುತ್ತರೋ ಪುರಿಸದಮ್ಮಸಾರಥಿ ಸತ್ಥಾ ದೇವಮನುಸ್ಸಾನಂ ಬುದ್ಧೋ ಭಗವಾ’ [ಭಗವಾತಿ (ಕ.)]. ಸೋ ಇಮಂ ಲೋಕಂ ಸದೇವಕಂ ಸಮಾರಕಂ ಸಬ್ರಹ್ಮಕಂ ಸಸ್ಸಮಣಬ್ರಾಹ್ಮಣಿಂ ಪಜಂ ಸದೇವಮನುಸ್ಸಂ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದೇತಿ. ಸೋ ಧಮ್ಮಂ ದೇಸೇತಿ ಆದಿಕಲ್ಯಾಣಂ ಮಜ್ಝೇಕಲ್ಯಾಣಂ ಪರಿಯೋಸಾನಕಲ್ಯಾಣಂ ಸಾತ್ಥಂ ಸಬ್ಯಞ್ಜನಂ ಕೇವಲಪರಿಪುಣ್ಣಂ ಪರಿಸುದ್ಧಂ ಬ್ರಹ್ಮಚರಿಯಂ ಪಕಾಸೇತಿ. ಸಾಧು ಖೋ ಪನ ತಥಾರೂಪಾನಂ ಅರಹತಂ ದಸ್ಸನಂ ಹೋತೀ’’ತಿ. ಅಥ ಖೋ ಮೇಣ್ಡಕೋ ಗಹಪತಿ ಭದ್ರಾನಿ ಭದ್ರಾನಿ ಯಾನಾನಿ ಯೋಜಾಪೇತ್ವಾ ಭದ್ರಂ ಭದ್ರಂ ಯಾನಂ ಅಭಿರುಹಿತ್ವಾ ಭದ್ರೇಹಿ ಭದ್ರೇಹಿ ಯಾನೇಹಿ ಭದ್ದಿಯಾ ನಿಯ್ಯಾಸಿ ಭಗವನ್ತಂ ದಸ್ಸನಾಯ. ಅದ್ದಸಂಸು ಖೋ ಸಮ್ಬಹುಲಾ ತಿತ್ಥಿಯಾ ಮೇಣ್ಡಕಂ ಗಹಪತಿಂ ದೂರತೋವ ಆಗಚ್ಛನ್ತಂ, ದಿಸ್ವಾನ ಮೇಣ್ಡಕಂ ಗಹಪತಿಂ ಏತದವೋಚುಂ – ‘‘ಕಹಂ ತ್ವಂ, ಗಹಪತಿ, ಗಚ್ಛಸೀ’’ತಿ? ‘‘ಗಚ್ಛಾಮಹಂ, ಭನ್ತೇ, ಭಗವನ್ತಂ [ಇದಂ ಪದಂ ಸೀ. ಸ್ಯಾ. ಪೋತ್ಥಕೇಸು ನತ್ಥಿ] ಸಮಣಂ ಗೋತಮಂ ದಸ್ಸನಾಯಾ’’ತಿ. ‘‘ಕಿಂ ಪನ ತ್ವಂ, ಗಹಪತಿ, ಕಿರಿಯವಾದೋ ಸಮಾನೋ ಅಕಿರಿಯವಾದಂ ಸಮಣಂ ಗೋತಮಂ ದಸ್ಸನಾಯ ಉಪಸಙ್ಕಮಿಸ್ಸಸಿ? ಸಮಣೋ ಹಿ, ಗಹಪತಿ, ಗೋತಮೋ ಅಕಿರಿಯವಾದೋ ಅಕಿರಿಯಾಯ ಧಮ್ಮಂ ದೇಸೇತಿ, ತೇನ ಚ ಸಾವಕೇ ವಿನೇತೀ’’ತಿ. ಅಥ ಖೋ ಮೇಣ್ಡಕಸ್ಸ ಗಹಪತಿಸ್ಸ ಏತದಹೋಸಿ – ‘‘ನಿಸ್ಸಂಸಯಂ, ಖೋ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ಭವಿಸ್ಸತಿ, ಯಥಯಿಮೇ ತಿತ್ಥಿಯಾ ಉಸೂಯನ್ತೀ’’ತಿ. ಯಾವತಿಕಾ ಯಾನಸ್ಸ ಭೂಮಿ, ಯಾನೇನ ಗನ್ತ್ವಾ ಯಾನಾ ಪಚ್ಚೋರೋಹಿತ್ವಾ ಪತ್ತಿಕೋವ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಸ್ಸ ಖೋ ಮೇಣ್ಡಕಸ್ಸ ಗಹಪತಿಸ್ಸ ಭಗವಾ ಅನುಪುಬ್ಬಿಂ ಕಥಂ ಕಥೇಸಿ, ಸೇಯ್ಯಥಿದಂ – ದಾನಕಥಂ…ಪೇ… ಅಪರಪ್ಪಚ್ಚಯೋ ಸತ್ಥುಸಾಸನೇ ಭಗವನ್ತಂ ಏತದವೋಚ – ‘‘ಅಭಿಕ್ಕನ್ತಂ, ಭನ್ತೇ…ಪೇ… ಉಪಾಸಕಂ ಮಂ ಭಗವಾ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತಂ. ಅಧಿವಾಸೇತು ಚ ಮೇ, ಭನ್ತೇ, ಭಗವಾ ಸ್ವಾತನಾಯ ಭತ್ತಂ ಸದ್ಧಿಂ ಭಿಕ್ಖುಸಙ್ಘೇನಾ’’ತಿ. ಅಧಿವಾಸೇಸಿ ಭಗವಾ ತುಣ್ಹೀಭಾವೇನ. ಅಥ ಖೋ ಮೇಣ್ಡಕೋ ಗಹಪತಿ ಭಗವತೋ ಅಧಿವಾಸನಂ ವಿದಿತ್ವಾ ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ.

ಅಥ ಖೋ ಮೇಣ್ಡಕೋ ಗಹಪತಿ ತಸ್ಸಾ ರತ್ತಿಯಾ ಅಚ್ಚಯೇನ ಪಣೀತಂ ಖಾದನೀಯಂ ಭೋಜನೀಯಂ ಪಟಿಯಾದಾಪೇತ್ವಾ ಭಗವತೋ ಕಾಲಂ ಆರೋಚಾಪೇಸಿ – ‘‘ಕಾಲೋ, ಭನ್ತೇ, ನಿಟ್ಠಿತಂ ಭತ್ತ’’ನ್ತಿ. ಅಥ ಖೋ ಭಗವಾ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ಮೇಣ್ಡಕಸ್ಸ ಗಹಪತಿಸ್ಸ ನಿವೇಸನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ ಸದ್ಧಿಂ ಭಿಕ್ಖುಸಙ್ಘೇನ. ಅಥ ಖೋ ಮೇಣ್ಡಕಸ್ಸ ಗಹಪತಿಸ್ಸ ಭರಿಯಾ ಚ ಪುತ್ತೋ ಚ ಸುಣಿಸಾ ಚ ದಾಸೋ ಚ ಯೇನ ಭಗವಾ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು. ತೇಸಂ ಭಗವಾ ಅನುಪುಬ್ಬಿಂ ಕಥಂ ಕಥೇಸಿ, ಸೇಯ್ಯಥಿದಂ – ದಾನಕಥಂ…ಪೇ… ಅಪರಪ್ಪಚ್ಚಯಾ ಸತ್ಥುಸಾಸನೇ ಭಗವನ್ತಂ ಏತದವೋಚುಂ – ‘‘ಅಭಿಕ್ಕನ್ತಂ, ಭನ್ತೇ…ಪೇ… ಏತೇ ಮಯಂ, ಭನ್ತೇ, ಭಗವನ್ತಂ ಸರಣಂ ಗಚ್ಛಾಮ ಧಮ್ಮಞ್ಚ ಭಿಕ್ಖುಸಙ್ಘಞ್ಚ. ಉಪಾಸಕೇ ನೋ ಭಗವಾ ಧಾರೇತು ಅಜ್ಜತಗ್ಗೇ ಪಾಣುಪೇತೇ ಸರಣಂ ಗತೇ’’ತಿ. ಅಥ ಖೋ ಮೇಣ್ಡಕೋ ಗಹಪತಿ ಬುದ್ಧಪ್ಪಮುಖಂ ಭಿಕ್ಖುಸಙ್ಘಂ ಪಣೀತೇನ ಖಾದನೀಯೇನ ಭೋಜನೀಯೇನ ಸಹತ್ಥಾ ಸನ್ತಪ್ಪೇತ್ವಾ ಸಮ್ಪವಾರೇತ್ವಾ ಭಗವನ್ತಂ ಭುತ್ತಾವಿಂ ಓನೀತಪತ್ತಪಾಣಿಂ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಮೇಣ್ಡಕೋ ಗಹಪತಿ ಭಗವನ್ತಂ ಏತದವೋಚ – ‘‘ಯಾವ, ಭನ್ತೇ, ಭಗವಾ ಭದ್ದಿಯೇ ವಿಹರತಿ ತಾವ ಅಹಂ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಧುವಭತ್ತೇನಾ’’ತಿ. ಅಥ ಖೋ ಭಗವಾ ಮೇಣ್ಡಕಂ ಗಹಪತಿಂ ಧಮ್ಮಿಯಾ ಕಥಾಯ ಸನ್ದಸ್ಸೇತ್ವಾ ಸಮಾದಪೇತ್ವಾ ಸಮುತ್ತೇಜೇತ್ವಾ ಸಮ್ಪಹಂಸೇತ್ವಾ ಉಟ್ಠಾಯಾಸನಾ ಪಕ್ಕಾಮಿ.

ಮೇಣ್ಡಕಗಹಪತಿವತ್ಥ ನಿಟ್ಠಿತಂ.