೧೪೩. ವತ್ಥುಠಪನಾದಿ

೨೩೯. ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇದಂ ವತ್ಥು ಪಞ್ಞಾಯತಿ, ನ ಪುಗ್ಗಲೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ವತ್ಥುಂ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ. ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ವಿಸುದ್ಧಾನಂ ಪವಾರಣಾ ಪಞ್ಞತ್ತಾ. ಸಚೇ ವತ್ಥು ಪಞ್ಞಾಯತಿ, ನ ಪುಗ್ಗಲೋ, ಇದಾನೇವ ನಂ ವದೇಹೀ’’ತಿ.

ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಪುಗ್ಗಲೋ ಪಞ್ಞಾಯತಿ, ನ ವತ್ಥು. ಯದಿ ಸಙ್ಘಸ್ಸ ಪತ್ತಕಲ್ಲಂ, ಪುಗ್ಗಲಂ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ. ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ಸಮಗ್ಗಾನಂ ಪವಾರಣಾ ಪಞ್ಞತ್ತಾ. ಸಚೇ ಪುಗ್ಗಲೋ ಪಞ್ಞಾಯತಿ, ನ ವತ್ಥು, ಇದಾನೇವ ನಂ ವದೇಹೀ’’ತಿ.

ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇದಂ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ವತ್ಥುಞ್ಚ ಪುಗ್ಗಲಞ್ಚ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ. ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ವಿಸುದ್ಧಾನಞ್ಚ ಸಮಗ್ಗಾನಞ್ಚ ಪವಾರಣಾ ಪಞ್ಞತ್ತಾ. ಸಚೇ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ, ಇದಾನೇವ ನಂ ವದೇಹೀ’’ತಿ.

ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ವತ್ಥು ಪಞ್ಞಾಯತಿ, ಪಚ್ಛಾ ಪುಗ್ಗಲೋ, ಕಲ್ಲಂ ವಚನಾಯ. ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ಪುಗ್ಗಲೋ ಪಞ್ಞಾಯತಿ, ಪಚ್ಛಾ ವತ್ಥು, ಕಲ್ಲಂ ವಚನಾಯ. ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ, ತಂ ಚೇ ಕತಾಯ ಪವಾರಣಾಯ ಉಕ್ಕೋಟೇತಿ, ಉಕ್ಕೋಟನಕಂ ಪಾಚಿತ್ತಿಯನ್ತಿ.

ವತ್ಥುಠಪನಾದಿ ನಿಟ್ಠಿತಾ.