೧೪೪. ಭಣ್ಡನಕಾರಕವತ್ಥು

೨೪೦. ತೇನ ಖೋ ಪನ ಸಮಯೇನ ಸಮ್ಬಹುಲಾ ಸನ್ದಿಟ್ಠಾ ಸಮ್ಭತ್ತಾ ಭಿಕ್ಖೂ ಕೋಸಲೇಸು ಜನಪದೇ ಅಞ್ಞತರಸ್ಮಿಂ ಆವಾಸೇ ವಸ್ಸಂ ಉಪಗಚ್ಛಿಂಸು. ತೇಸಂ ಸಾಮನ್ತಾ ಅಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ವಸ್ಸಂ ಉಪಗಚ್ಛಿಂಸು – ಮಯಂ ತೇಸಂ ಭಿಕ್ಖೂನಂ ವಸ್ಸಂವುಟ್ಠಾನಂ ಪವಾರಣಾಯ ಪವಾರಣಂ ಠಪೇಸ್ಸಾಮಾತಿ. ಅಸ್ಸೋಸುಂ ಖೋ ತೇ ಭಿಕ್ಖೂ – ‘‘ಅಮ್ಹಾಕಂ ಕಿರ ಸಾಮನ್ತಾ ಅಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ವಸ್ಸಂ ಉಪಗತಾ – ಮಯಂ ತೇಸಂ ಭಿಕ್ಖೂನಂ ವಸ್ಸಂವುಟ್ಠಾನಂ ಪವಾರಣಾಯ ಪವಾರಣಂ ಠಪೇಸ್ಸಾಮಾ’’ತಿ. ಕಥಂ ನು ಖೋ ಅಮ್ಹೇಹಿ ಪಟಿಪಜ್ಜಿತಬ್ಬನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ಸಮ್ಬಹುಲಾ ಸನ್ದಿಟ್ಠಾ ಸಮ್ಭತ್ತಾ ಭಿಕ್ಖೂ ಅಞ್ಞತರಸ್ಮಿಂ ಆವಾಸೇ ವಸ್ಸಂ ಉಪಗಚ್ಛನ್ತಿ. ತೇಸಂ ಸಾಮನ್ತಾ ಅಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ವಸ್ಸಂ ಉಪಗಚ್ಛನ್ತಿ – ಮಯಂ ತೇಸಂ ಭಿಕ್ಖೂನಂ ವಸ್ಸಂವುಟ್ಠಾನಂ ಪವಾರಣಾಯ ಪವಾರಣಂ ಠಪೇಸ್ಸಾಮಾತಿ. ಅನುಜಾನಾಮಿ, ಭಿಕ್ಖವೇ, ತೇಹಿ ಭಿಕ್ಖೂಹಿ ದ್ವೇ ತಯೋ ಉಪೋಸಥೇ ಚಾತುದ್ದಸಿಕೇ ಕಾತುಂ – ಕಥಂ ಮಯಂ ತೇಹಿ ಭಿಕ್ಖೂಹಿ ಪಠಮತರಂ ಪವಾರೇಯ್ಯಾಮಾತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತಂ ಆವಾಸಂ ಆಗಚ್ಛನ್ತಿ, ತೇಹಿ, ಭಿಕ್ಖವೇ, ಆವಾಸಿಕೇಹಿ ಭಿಕ್ಖೂಹಿ ಲಹುಂ ಲಹುಂ ಸನ್ನಿಪತಿತ್ವಾ ಪವಾರೇತಬ್ಬಂ, ಪವಾರೇತ್ವಾ ವತ್ತಬ್ಬಾ – ‘‘ಪವಾರಿತಾ ಖೋ ಮಯಂ, ಆವುಸೋ; ಯಥಾಯಸ್ಮನ್ತಾ ಮಞ್ಞನ್ತಿ ತಥಾ ಕರೋನ್ತೂ’’ತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ಅಸಂವಿಹಿತಾ ತಂ ಆವಾಸಂ ಆಗಚ್ಛನ್ತಿ, ತೇಹಿ, ಭಿಕ್ಖವೇ, ಆವಾಸಿಕೇಹಿ ಭಿಕ್ಖೂಹಿ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ, ಪಾನೀಯೇನ ಪರಿಪುಚ್ಛಿತಬ್ಬಾ; ತೇಸಂ ವಿಕ್ಖಿತ್ವಾ [ವಿಕ್ಖಿಪಾಪೇತ್ವಾ (ಪಟಿವಿಸೋಧಕಾನಂ ಮತಿ), ಆಚಿಕ್ಖಿತ್ವಾ (ಕ.)] ನಿಸ್ಸೀಮಂ ಗನ್ತ್ವಾ ಪವಾರೇತಬ್ಬಂ, ಪವಾರೇತ್ವಾ ವತ್ತಬ್ಬಾ – ‘‘ಪವಾರಿತಾ ಖೋ ಮಯಂ, ಆವುಸೋ; ಯಥಾಯಸ್ಮನ್ತಾ ಮಞ್ಞನ್ತಿ ತಥಾ ಕರೋನ್ತೂ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ಆವಾಸಿಕೇನ ಭಿಕ್ಖುನಾ ಬ್ಯತ್ತೇನ ಪಟಿಬಲೇನ ಆವಾಸಿಕಾ ಭಿಕ್ಖೂ ಞಾಪೇತಬ್ಬಾ –

‘‘ಸುಣನ್ತು ಮೇ, ಆಯಸ್ಮನ್ತೋ [ಆಯಸ್ಮನ್ತಾ (ಕ.)], ಆವಾಸಿಕಾ. ಯದಾಯಸ್ಮನ್ತಾನಂ ಪತ್ತಕಲ್ಲಂ, ಇದಾನಿ ಉಪೋಸಥಂ ಕರೇಯ್ಯಾಮ, ಪಾತಿಮೋಕ್ಖಂ ಉದ್ದಿಸೇಯ್ಯಾಮ, ಆಗಮೇ ಕಾಳೇ ಪವಾರೇಯ್ಯಾಮಾ’’ತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಭಿಕ್ಖೂ ಏವಂ ವದೇಯ್ಯುಂ – ‘‘ಸಾಧಾವುಸೋ, ಇದಾನೇವ ನೋ ಪವಾರೇಥಾ’’ತಿ, ತೇ ಏವಮಸ್ಸು ವಚನೀಯಾ – ‘‘ಅನಿಸ್ಸರಾ ಖೋ ತುಮ್ಹೇ, ಆವುಸೋ, ಅಮ್ಹಾಕಂ ಪವಾರಣಾಯ; ನ ತಾವ ಮಯಂ ಪವಾರೇಯ್ಯಾಮಾ’’ತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತಂ ಕಾಳಂ ಅನುವಸೇಯ್ಯುಂ, ಆವಾಸಿಕೇನ, ಭಿಕ್ಖವೇ, ಭಿಕ್ಖುನಾ ಬ್ಯತ್ತೇನ ಪಟಿಬಲೇನ ಆವಾಸಿಕಾ ಭಿಕ್ಖೂ ಞಾಪೇತಬ್ಬಾ –

‘‘ಸುಣನ್ತು ಮೇ, ಆಯಸ್ಮನ್ತೋ, ಆವಾಸಿಕಾ. ಯದಾಯಸ್ಮನ್ತಾನಂ ಪತ್ತಕಲ್ಲಂ, ಇದಾನಿ ಉಪೋಸಥಂ ಕರೇಯ್ಯಾಮ, ಪಾತಿಮೋಕ್ಖಂ ಉದ್ದಿಸೇಯ್ಯಾಮ, ಆಗಮೇ ಜುಣ್ಹೇ ಪವಾರೇಯ್ಯಾಮಾ’’ತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಭಿಕ್ಖೂ ಏವಂ ವದೇಯ್ಯುಂ – ‘‘ಸಾಧಾವುಸೋ, ಇದಾನೇವ ನೋ ಪವಾರೇಯ್ಯಾಥಾ’’ತಿ, ತೇ ಏವಮಸ್ಸು ವಚನೀಯಾ – ‘‘ಅನಿಸ್ಸರಾ ಖೋ ತುಮ್ಹೇ, ಆವುಸೋ, ಅಮ್ಹಾಕಂ ಪವಾರಣಾಯ, ನ ತಾವ ಮಯಂ ಪವಾರೇಯ್ಯಾಮಾ’’ತಿ. ತೇ ಚೇ, ಭಿಕ್ಖವೇ, ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತಮ್ಪಿ ಜುಣ್ಹಂ ಅನುವಸೇಯ್ಯುಂ, ತೇಹಿ, ಭಿಕ್ಖವೇ, ಭಿಕ್ಖೂಹಿ ಸಬ್ಬೇಹೇವ ಆಗಮೇ ಜುಣ್ಹೇ ಕೋಮುದಿಯಾ ಚಾತುಮಾಸಿನಿಯಾ ಅಕಾಮಾ ಪವಾರೇತಬ್ಬಂ.

ತೇಹಿ ಚೇ, ಭಿಕ್ಖವೇ, ಭಿಕ್ಖೂಹಿ ಪವಾರಿಯಮಾನೇ ಗಿಲಾನೋ ಅಗಿಲಾನಸ್ಸ ಪವಾರಣಂ ಠಪೇತಿ, ಸೋ ಏವಮಸ್ಸ ವಚನೀಯೋ – ‘‘ಆಯಸ್ಮಾ ಖೋ ಗಿಲಾನೋ. ಗಿಲಾನೋ ಚ ಅನನುಯೋಗಕ್ಖಮೋ ವುತ್ತೋ ಭಗವತಾ. ಆಗಮೇಹಿ, ಆವುಸೋ, ಯಾವ ಅರೋಗೋ ಹೋಸಿ. ಅರೋಗೋ ಆಕಙ್ಖಮಾನೋ ಚೋದೇಸ್ಸಸೀ’’ತಿ. ಏವಞ್ಚೇ ವುಚ್ಚಮಾನೋ ಚೋದೇತಿ, ಅನಾದರಿಯೇ ಪಾಚಿತ್ತಿಯಂ. ತೇಹಿ ಚೇ, ಭಿಕ್ಖವೇ, ಭಿಕ್ಖೂಹಿ ಪವಾರಿಯಮಾನೇ ಅಗಿಲಾನೋ ಗಿಲಾನಸ್ಸ ಪವಾರಣಂ ಠಪೇತಿ, ಸೋ ಏವಮಸ್ಸ ವಚನೀಯೋ – ‘‘ಅಯಂ ಖೋ, ಆವುಸೋ, ಭಿಕ್ಖು ಗಿಲಾನೋ. ಗಿಲಾನೋ ಚ ಅನನುಯೋಗಕ್ಖಮೋ ವುತ್ತೋ ಭಗವತಾ. ಆಗಮೇಹಿ, ಆವುಸೋ, ಯಾವಾಯಂ ಭಿಕ್ಖು ಅರೋಗೋ ಹೋತಿ. ಅರೋಗಂ ಆಕಙ್ಖಮಾನೋ ಚೋದೇಸ್ಸಸೀ’’ತಿ. ಏವಞ್ಚೇ ವುಚ್ಚಮಾನೋ ಚೋದೇತಿ, ಅನಾದರಿಯೇ ಪಾಚಿತ್ತಿಯಂ. ತೇಹಿ ಚೇ, ಭಿಕ್ಖವೇ, ಭಿಕ್ಖೂಹಿ ಪವಾರಿಯಮಾನೇ ಗಿಲಾನೋ ಗಿಲಾನಸ್ಸ ಪವಾರಣಂ ಠಪೇತಿ, ಸೋ ಏವಮಸ್ಸ ವಚನೀಯೋ – ‘‘ಆಯಸ್ಮನ್ತಾ ಖೋ ಗಿಲಾನಾ. ಗಿಲಾನೋ ಚ ಅನನುಯೋಗಕ್ಖಮೋ ವುತ್ತೋ ಭಗವತಾ. ಆಗಮೇಹಿ, ಆವುಸೋ, ಯಾವ ಅರೋಗಾ ಹೋಥ. ಅರೋಗೋ ಅರೋಗಂ ಆಕಙ್ಖಮಾನೋ ಚೋದೇಸ್ಸಸೀ’’ತಿ [ಯಾವ ಅರೋಗೋ ಹೋತಿ, ಅರೋಗಂ ಆಕಙ್ಖಮಾನೋ ಚೋದೇಸ್ಸಸೀತಿ (ಕ.)]. ಏವಞ್ಚೇ ವುಚ್ಚಮಾನೋ ಚೋದೇತಿ, ಅನಾದರಿಯೇ ಪಾಚಿತ್ತಿಯಂ. ತೇಹಿ ಚೇ, ಭಿಕ್ಖವೇ, ಭಿಕ್ಖೂಹಿ ಪವಾರಿಯಮಾನೇ ಅಗಿಲಾನೋ ಅಗಿಲಾನಸ್ಸ ಪವಾರಣಂ ಠಪೇತಿ, ಉಭೋ ಸಙ್ಘೇನ ಸಮನುಯುಞ್ಜಿತ್ವಾ ಸಮನುಗಾಹಿತ್ವಾ [ಸಮನುಭಾಸಿತ್ವಾ (ಸೀ.)] ಯಥಾಧಮ್ಮಂ ಕಾರಾಪೇತ್ವಾ ಸಙ್ಘೇನ ಪವಾರೇತಬ್ಬನ್ತಿ.

ಭಣ್ಡನಕಾರಕವತ್ಥು ನಿಟ್ಠಿತಂ.