೮೩. ಪಾತಿಮೋಕ್ಖುದ್ದೇಸಕಅಜ್ಝೇಸನಾದಿ

೧೫೫. ಅಥ ಖೋ ಭಗವಾ ರಾಜಗಹೇ ಯಥಾಭಿರನ್ತಂ ವಿಹರಿತ್ವಾ ಯೇನ ಚೋದನಾವತ್ಥು ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಚೋದನಾವತ್ಥು ತದವಸರಿ. ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ಸಮ್ಬಹುಲಾ ಭಿಕ್ಖೂ ವಿಹರನ್ತಿ. ತತ್ಥ ಥೇರೋ ಭಿಕ್ಖು ಬಾಲೋ ಹೋತಿ ಅಬ್ಯತ್ತೋ. ಸೋ ನ ಜಾನಾತಿ ಉಪೋಸಥಂ ವಾ ಉಪೋಸಥಕಮ್ಮಂ ವಾ, ಪಾತಿಮೋಕ್ಖಂ ವಾ ಪಾತಿಮೋಕ್ಖುದ್ದೇಸಂ ವಾ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ಥೇರಾಧಿಕಂ ಪಾತಿಮೋಕ್ಖ’ನ್ತಿ, ಅಯಞ್ಚ ಅಮ್ಹಾಕಂ ಥೇರೋ ಬಾಲೋ ಅಬ್ಯತ್ತೋ, ನ ಜಾನಾತಿ ಉಪೋಸಥಂ ವಾ ಉಪೋಸಥಕಮ್ಮಂ ವಾ, ಪಾತಿಮೋಕ್ಖಂ ವಾ ಪಾತಿಮೋಕ್ಖುದ್ದೇಸಂ ವಾ. ಕಥಂ ನು ಖೋ ಅಮ್ಹೇಹಿ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯೋ ತತ್ಥ ಭಿಕ್ಖು ಬ್ಯತ್ತೋ ಪಟಿಬಲೋ ತಸ್ಸಾಧೇಯ್ಯಂ ಪಾತಿಮೋಕ್ಖನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಭಿಕ್ಖೂ ವಿಹರನ್ತಿ ಬಾಲಾ ಅಬ್ಯತ್ತಾ. ತೇ ನ ಜಾನನ್ತಿ ಉಪೋಸಥಂ ವಾ ಉಪೋಸಥಕಮ್ಮಂ ವಾ, ಪಾತಿಮೋಕ್ಖಂ ವಾ ಪಾತಿಮೋಕ್ಖುದ್ದೇಸಂ ವಾ. ತೇ ಥೇರಂ ಅಜ್ಝೇಸಿಂಸು – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋ ಏವಮಾಹ – ‘‘ನ ಮೇ, ಆವುಸೋ, ವತ್ತತೀ’’ತಿ. ದುತಿಯಂ ಥೇರಂ ಅಜ್ಝೇಸಿಂಸು – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋಪಿ ಏವಮಾಹ – ‘‘ನ ಮೇ, ಆವುಸೋ, ವತ್ತತೀ’’ತಿ. ತತಿಯಂ ಥೇರಂ ಅಜ್ಝೇಸಿಂಸು – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋಪಿ ಏವಮಾಹ – ‘‘ನ ಮೇ, ಆವುಸೋ, ವತ್ತತೀ’’ತಿ. ಏತೇನೇವ ಉಪಾಯೇನ ಯಾವ ಸಙ್ಘನವಕಂ ಅಜ್ಝೇಸಿಂಸು – ‘‘ಉದ್ದಿಸತು ಆಯಸ್ಮಾ ಪಾತಿಮೋಕ್ಖ’’ನ್ತಿ. ಸೋಪಿ ಏವಮಾಹ – ‘‘ನ ಮೇ, ಭನ್ತೇ, ವತ್ತತೀ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಸಮ್ಬಹುಲಾ ಭಿಕ್ಖೂ ವಿಹರನ್ತಿ ಬಾಲಾ ಅಬ್ಯತ್ತಾ. ತೇ ನ ಜಾನನ್ತಿ ಉಪೋಸಥಂ ವಾ ಉಪೋಸಥಕಮ್ಮಂ ವಾ, ಪಾತಿಮೋಕ್ಖಂ ವಾ ಪಾತಿಮೋಕ್ಖುದ್ದೇಸಂ ವಾ. ತೇ ಥೇರಂ ಅಜ್ಝೇಸನ್ತಿ – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋ ಏವಂ ವದೇತಿ – ‘‘ನ ಮೇ, ಆವುಸೋ, ವತ್ತತೀ’’ತಿ. ದುತಿಯಂ ಥೇರಂ ಅಜ್ಝೇಸನ್ತಿ – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋಪಿ ಏವಂ ವದೇತಿ – ‘‘ನ ಮೇ, ಆವುಸೋ, ವತ್ತತೀ’’ತಿ. ತತಿಯಂ ಥೇರಂ ಅಜ್ಝೇಸನ್ತಿ – ‘‘ಉದ್ದಿಸತು, ಭನ್ತೇ, ಥೇರೋ ಪಾತಿಮೋಕ್ಖ’’ನ್ತಿ. ಸೋಪಿ ಏವಂ ವದೇತಿ – ‘‘ನ ಮೇ, ಆವುಸೋ, ವತ್ತತೀ’’ತಿ. ಏತೇನೇವ ಉಪಾಯೇನ ಯಾವ ಸಙ್ಘನವಕಂ ಅಜ್ಝೇಸನ್ತಿ – ‘‘ಉದ್ದಿಸತು ಆಯಸ್ಮಾ ಪಾತಿಮೋಕ್ಖ’’ನ್ತಿ. ಸೋಪಿ ಏವಂ ವದೇತಿ – ‘‘ನ ಮೇ, ಭನ್ತೇ, ವತ್ತತೀ’’ತಿ. ತೇಹಿ, ಭಿಕ್ಖವೇ, ಭಿಕ್ಖೂಹಿ ಏಕೋ ಭಿಕ್ಖು ಸಾಮನ್ತಾ ಆವಾಸಾ ಸಜ್ಜುಕಂ ಪಾಹೇತಬ್ಬೋ – ಗಚ್ಛಾವುಸೋ, ಸಂಖಿತ್ತೇನ ವಾ ವಿತ್ಥಾರೇನ ವಾ ಪಾತಿಮೋಕ್ಖಂ ಪರಿಯಾಪುಣಿತ್ವಾನ ಆಗಚ್ಛಾಹೀತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕೇನ ನು ಖೋ ಪಾಹೇತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಥೇರೇನ ಭಿಕ್ಖುನಾ ನವಂ ಭಿಕ್ಖುಂ ಆಣಾಪೇತುನ್ತಿ. ಥೇರೇನ ಆಣತ್ತಾ ನವಾ ಭಿಕ್ಖೂ ನ ಗಚ್ಛನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಥೇರೇನ ಆಣತ್ತೇನ ಅಗಿಲಾನೇನ ನ ಗನ್ತಬ್ಬಂ. ಯೋ ನ ಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.