೮೪. ಪಕ್ಖಗಣನಾದಿಉಗ್ಗಹಣಾನುಜಾನನಾ

೧೫೬. ಅಥ ಖೋ ಭಗವಾ ಚೋದನಾವತ್ಥುಸ್ಮಿಂ ಯಥಾಭಿರನ್ತಂ ವಿಹರಿತ್ವಾ ಪುನದೇವ ರಾಜಗಹಂ ಪಚ್ಚಾಗಞ್ಛಿ.

ತೇನ ಖೋ ಪನ ಸಮಯೇನ ಮನುಸ್ಸಾ ಭಿಕ್ಖೂ ಪಿಣ್ಡಾಯ ಚರನ್ತೇ ಪುಚ್ಛನ್ತಿ – ‘‘ಕತಿಮೀ, ಭನ್ತೇ, ಪಕ್ಖಸ್ಸಾ’’ತಿ? ಭಿಕ್ಖೂ ಏವಮಾಹಂಸು – ‘‘ನ ಖೋ ಮಯಂ, ಆವುಸೋ, ಜಾನಾಮಾ’’ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಪಕ್ಖಗಣನಮತ್ತಮಮ್ಪಿಮೇ ಸಮಣಾ ಸಕ್ಯಪುತ್ತಿಯಾ ನ ಜಾನನ್ತಿ, ಕಿಂ ಪನಿಮೇ ಅಞ್ಞಂ ಕಿಞ್ಚಿ ಕಲ್ಯಾಣಂ ಜಾನಿಸ್ಸನ್ತೀ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಪಕ್ಖಗಣನಂ ಉಗ್ಗಹೇತುನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕೇನ ನು ಖೋ ಪಕ್ಖಗಣನಾ ಉಗ್ಗಹೇತಬ್ಬಾ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಸಬ್ಬೇಹೇವ ಪಕ್ಖಗಣನಂ ಉಗ್ಗಹೇತುನ್ತಿ.

೧೫೭. ತೇನ ಖೋ ಪನ ಸಮಯೇನ ಮನುಸ್ಸಾ ಭಿಕ್ಖೂ ಪಿಣ್ಡಾಯ ಚರನ್ತೇ ಪುಚ್ಛನ್ತಿ – ‘‘ಕೀವತಿಕಾ, ಭನ್ತೇ, ಭಿಕ್ಖೂ’’ತಿ? ಭಿಕ್ಖೂ ಏವಮಾಹಂಸು – ‘‘ನ ಖೋ ಮಯಂ, ಆವುಸೋ, ಜಾನಾಮಾ’’ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಅಞ್ಞಮಞ್ಞಮ್ಪಿಮೇ ಸಮಣಾ ಸಕ್ಯಪುತ್ತಿಯಾ ನ ಜಾನನ್ತಿ, ಕಿಂ ಪನಿಮೇ ಅಞ್ಞಂ ಕಿಞ್ಚಿ ಕಲ್ಯಾಣಂ ಜಾನಿಸ್ಸನ್ತೀ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಭಿಕ್ಖೂ ಗಣೇತುನ್ತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕದಾ ನು ಖೋ ಭಿಕ್ಖೂ ಗಣೇತಬ್ಬಾ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ತದಹುಪೋಸಥೇ ನಾಮಗ್ಗೇನ [ನಾಮಮತ್ತೇನ (ಸ್ಯಾ.), ಗಣಮಗ್ಗೇನ (ಕ.)] ಗಣೇತುಂ, ಸಲಾಕಂ ವಾ ಗಾಹೇತುನ್ತಿ.

೧೫೮. ತೇನ ಖೋ ಪನ ಸಮಯೇನ ಭಿಕ್ಖೂ ಅಜಾನನ್ತಾ ಅಜ್ಜುಪೋಸಥೋತಿ ದೂರಂ ಗಾಮಂ ಪಿಣ್ಡಾಯ ಚರನ್ತಿ. ತೇ ಉದ್ದಿಸ್ಸಮಾನೇಪಿ ಪಾತಿಮೋಕ್ಖೇ ಆಗಚ್ಛನ್ತಿ, ಉದ್ದಿಟ್ಠಮತ್ತೇಪಿ ಆಗಚ್ಛನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಆರೋಚೇತುಂ ‘ಅಜ್ಜುಪೋಸಥೋ’ತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕೇನ ನು ಖೋ ಆರೋಚೇತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಥೇರೇನ ಭಿಕ್ಖುನಾ ಕಾಲವತೋ ಆರೋಚೇತುನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಥೇರೋ ಕಾಲವತೋ ನಸ್ಸರತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಭತ್ತಕಾಲೇಪಿ ಆರೋಚೇತುನ್ತಿ.

ಭತ್ತಕಾಲೇಪಿ ನಸ್ಸರತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯಂ ಕಾಲಂ ಸರತಿ, ತಂ ಕಾಲಂ ಆರೋಚೇತುನ್ತಿ.