೬೫. ಚತ್ತಾರಿ ಅಕರಣೀಯಾನಿ

೧೨೯. ತೇನ ಖೋ ಪನ ಸಮಯೇನ ಭಿಕ್ಖೂ ಅಞ್ಞತರಂ ಭಿಕ್ಖುಂ ಉಪಸಮ್ಪಾದೇತ್ವಾ ಏಕಕಂ ಓಹಾಯ ಪಕ್ಕಮಿಂಸು. ಸೋ ಪಚ್ಛಾ ಏಕಕೋವ ಆಗಚ್ಛನ್ತೋ ಅನ್ತರಾಮಗ್ಗೇ ಪುರಾಣದುತಿಯಿಕಾಯ ಸಮಾಗಞ್ಛಿ. ಸಾ ಏವಮಾಹ – ‘‘ಕಿಂದಾನಿ ಪಬ್ಬಜಿತೋಸೀ’’ತಿ? ‘‘ಆಮ, ಪಬ್ಬಜಿತೋಮ್ಹೀ’’ತಿ. ‘‘ದುಲ್ಲಭೋ ಖೋ ಪಬ್ಬಜಿತಾನಂ ಮೇಥುನೋ ಧಮ್ಮೋ; ಏಹಿ, ಮೇಥುನಂ ಧಮ್ಮಂ ಪಟಿಸೇವಾ’’ತಿ. ಸೋ ತಸ್ಸಾ ಮೇಥುನಂ ಧಮ್ಮಂ ಪಟಿಸೇವಿತ್ವಾ ಚಿರೇನ ಅಗಮಾಸಿ. ಭಿಕ್ಖೂ ಏವಮಾಹಂಸು – ‘‘ಕಿಸ್ಸ ತ್ವಂ, ಆವುಸೋ, ಏವಂ ಚಿರಂ ಅಕಾಸೀ’’ತಿ? ಅಥ ಖೋ ಸೋ ಭಿಕ್ಖು ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಉಪಸಮ್ಪಾದೇತ್ವಾ ದುತಿಯಂ ದಾತುಂ, ಚತ್ತಾರಿ ಚ ಅಕರಣೀಯಾನಿ ಆಚಿಕ್ಖಿತುಂ –

‘‘ಉಪಸಮ್ಪನ್ನೇನ ಭಿಕ್ಖುನಾ ಮೇಥುನೋ ಧಮ್ಮೋ ನ ಪಟಿಸೇವಿತಬ್ಬೋ, ಅನ್ತಮಸೋ ತಿರಚ್ಛಾನಗತಾಯಪಿ. ಯೋ ಭಿಕ್ಖು ಮೇಥುನಂ ಧಮ್ಮಂ ಪಟಿಸೇವತಿ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ಸೇಯ್ಯಥಾಪಿ ನಾಮ ಪುರಿಸೋ ಸೀಸಚ್ಛಿನ್ನೋ ಅಭಬ್ಬೋ ತೇನ ಸರೀರಬನ್ಧನೇನ ಜೀವಿತುಂ, ಏವಮೇವ ಭಿಕ್ಖು ಮೇಥುನಂ ಧಮ್ಮಂ ಪಟಿಸೇವಿತ್ವಾ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ತಂ ತೇ ಯಾವಜೀವಂ ಅಕರಣೀಯಂ.

‘‘ಉಪಸಮ್ಪನ್ನೇನ ಭಿಕ್ಖುನಾ ಅದಿನ್ನಂ ಥೇಯ್ಯಸಙ್ಖಾತಂ ನ ಆದಾತಬ್ಬಂ, ಅನ್ತಮಸೋ ತಿಣಸಲಾಕಂ ಉಪಾದಾಯ. ಯೋ ಭಿಕ್ಖು ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ಸೇಯ್ಯಥಾಪಿ ನಾಮ ಪಣ್ಡುಪಲಾಸೋ ಬನ್ಧನಾ ಪಮುತ್ತೋ ಅಭಬ್ಬೋ ಹರಿತತ್ಥಾಯ, ಏವಮೇವ ಭಿಕ್ಖು ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯಿತ್ವಾ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ತಂ ತೇ ಯಾವಜೀವಂ ಅಕರಣೀಯಂ.

‘‘ಉಪಸಮ್ಪನ್ನೇನ ಭಿಕ್ಖುನಾ ಸಞ್ಚಿಚ್ಚ ಪಾಣೋ ಜೀವಿತಾ ನ ವೋರೋಪೇತಬ್ಬೋ, ಅನ್ತಮಸೋ ಕುನ್ಥಕಿಪಿಲ್ಲಿಕಂ ಉಪಾದಾಯ. ಯೋ ಭಿಕ್ಖು ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇತಿ, ಅನ್ತಮಸೋ ಗಬ್ಭಪಾತನಂ ಉಪಾದಾಯ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ಸೇಯ್ಯಥಾಪಿ ನಾಮ ಪುಥುಸಿಲಾ ದ್ವೇಧಾ ಭಿನ್ನಾ ಅಪ್ಪಟಿಸನ್ಧಿಕಾ ಹೋತಿ, ಏವಮೇವ ಭಿಕ್ಖು ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇತ್ವಾ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ತಂ ತೇ ಯಾವಜೀವಂ ಅಕರಣೀಯಂ.

‘‘ಉಪಸಮ್ಪನ್ನೇನ ಭಿಕ್ಖುನಾ ಉತ್ತರಿಮನುಸ್ಸಧಮ್ಮೋ ನ ಉಲ್ಲಪಿತಬ್ಬೋ, ಅನ್ತಮಸೋ ‘ಸುಞ್ಞಾಗಾರೇ ಅಭಿರಮಾಮೀ’ತಿ. ಯೋ ಭಿಕ್ಖು ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ ಝಾನಂ ವಾ ವಿಮೋಕ್ಖಂ ವಾ ಸಮಾಧಿಂ ವಾ ಸಮಾಪತ್ತಿಂ ವಾ ಮಗ್ಗಂ ವಾ ಫಲಂ ವಾ, ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ಸೇಯ್ಯಥಾಪಿ ನಾಮ ತಾಲೋ ಮತ್ಥಕಚ್ಛಿನ್ನೋ ಅಭಬ್ಬೋ ಪುನ ವಿರುಳ್ಹಿಯಾ, ಏವಮೇವ ಭಿಕ್ಖು ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪಿತ್ವಾ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ತಂ ತೇ ಯಾವಜೀವಂ ಅಕರಣೀಯ’’ನ್ತಿ.

ಚತ್ತಾರಿ ಅಕರಣೀಯಾನಿ ನಿಟ್ಠಿತಾನಿ.