೬೬. ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕವತ್ಥೂನಿ

೧೩೦. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ವಿಬ್ಭಮಿ. ಸೋ ಪುನ ಪಚ್ಚಾಗನ್ತ್ವಾ ಭಿಕ್ಖೂ ಉಪಸಮ್ಪದಂ ಯಾಚಿ. ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ಭಿಕ್ಖು ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ವಿಬ್ಭಮತಿ. ಸೋ ಪುನ ಪಚ್ಚಾಗನ್ತ್ವಾ ಭಿಕ್ಖೂ ಉಪಸಮ್ಪದಂ ಯಾಚತಿ. ಸೋ ಏವಮಸ್ಸ ವಚನೀಯೋ – ‘‘ಪಸ್ಸಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಸ್ಸಿಸ್ಸಾಮೀತಿ, ಪಬ್ಬಾಜೇತಬ್ಬೋ. ಸಚಾಹಂ ನ ಪಸ್ಸಿಸ್ಸಾಮೀತಿ, ನ ಪಬ್ಬಾಜೇತಬ್ಬೋ. ಪಬ್ಬಾಜೇತ್ವಾ ವತ್ತಬ್ಬೋ – ‘‘ಪಸ್ಸಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಸ್ಸಿಸ್ಸಾಮೀತಿ, ಉಪಸಮ್ಪಾದೇತಬ್ಬೋ. ಸಚಾಹಂ ನ ಪಸ್ಸಿಸ್ಸಾಮೀತಿ, ನ ಉಪಸಮ್ಪಾದೇತಬ್ಬೋ. ಉಪಸಮ್ಪಾದೇತ್ವಾ ವತ್ತಬ್ಬೋ – ‘‘ಪಸ್ಸಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಸ್ಸಿಸ್ಸಾಮೀತಿ, ಓಸಾರೇತಬ್ಬೋ. ಸಚಾಹಂ ನ ಪಸ್ಸಿಸ್ಸಾಮೀತಿ, ನ ಓಸಾರೇತಬ್ಬೋ. ಓಸಾರೇತ್ವಾ ವತ್ತಬ್ಬೋ – ‘‘ಪಸ್ಸಸಿ [ಪಸ್ಸಾಹಿ (ಸೀ.)] ತಂ ಆಪತ್ತಿ’’ನ್ತಿ? ಸಚೇ ಪಸ್ಸತಿ, ಇಚ್ಚೇತಂ ಕುಸಲಂ. ನೋ ಚೇ ಪಸ್ಸತಿ, ಲಬ್ಭಮಾನಾಯ ಸಾಮಗ್ಗಿಯಾ ಪುನ ಉಕ್ಖಿಪಿತಬ್ಬೋ. ಅಲಬ್ಭಮಾನಾಯ ಸಾಮಗ್ಗಿಯಾ ಅನಾಪತ್ತಿ ಸಮ್ಭೋಗೇ ಸಂವಾಸೇ.

ಇಧ ಪನ, ಭಿಕ್ಖವೇ, ಭಿಕ್ಖು ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ವಿಬ್ಭಮತಿ. ಸೋ ಪುನ ಪಚ್ಚಾಗನ್ತ್ವಾ ಭಿಕ್ಖೂ ಉಪಸಮ್ಪದಂ ಯಾಚತಿ. ಸೋ ಏವಮಸ್ಸ ವಚನೀಯೋ – ‘‘ಪಟಿಕರಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಟಿಕರಿಸ್ಸಾಮೀತಿ, ಪಬ್ಬಾಜೇತಬ್ಬೋ. ಸಚಾಹಂ ನ ಪಟಿಕರಿಸ್ಸಾಮೀತಿ, ನ ಪಬ್ಬಾಜೇತಬ್ಬೋ. ಪಬ್ಬಾಜೇತ್ವಾ ವತ್ತಬ್ಬೋ – ‘‘ಪಟಿಕರಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಟಿಕರಿಸ್ಸಾಮೀತಿ, ಉಪಸಮ್ಪಾದೇತಬ್ಬೋ. ಸಚಾಹಂ ನ ಪಟಿಕರಿಸ್ಸಾಮೀತಿ, ನ ಉಪಸಮ್ಪಾದೇತಬ್ಬೋ. ಉಪಸಮ್ಪಾದೇತ್ವಾ ವತ್ತಬ್ಬೋ – ‘‘ಪಟಿಕರಿಸ್ಸಸಿ ತಂ ಆಪತ್ತಿ’’ನ್ತಿ? ಸಚಾಹಂ ಪಟಿಕರಿಸ್ಸಾಮೀತಿ, ಓಸಾರೇತಬ್ಬೋ. ಸಚಾಹಂ ನ ಪಟಿಕರಿಸ್ಸಾಮೀತಿ, ನ ಓಸಾರೇತಬ್ಬೋ. ಓಸಾರೇತ್ವಾ ವತ್ತಬ್ಬೋ – ‘‘ಪಟಿಕರೋಹಿ ತಂ ಆಪತ್ತಿ’’ನ್ತಿ. ಸಚೇ ಪಟಿಕರೋತಿ, ಇಚ್ಚೇತಂ ಕುಸಲಂ. ನೋ ಚೇ ಪಟಿಕರೋತಿ ಲಬ್ಭಮಾನಾಯ ಸಾಮಗ್ಗಿಯಾ ಪುನ ಉಕ್ಖಿಪಿತಬ್ಬೋ. ಅಲಬ್ಭಮಾನಾಯ ಸಾಮಗ್ಗಿಯಾ ಅನಾಪತ್ತಿ ಸಮ್ಭೋಗೇ ಸಂವಾಸೇ.

ಇಧ ಪನ, ಭಿಕ್ಖವೇ, ಭಿಕ್ಖು ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ವಿಬ್ಭಮತಿ. ಸೋ ಪುನ ಪಚ್ಚಾಗನ್ತ್ವಾ ಭಿಕ್ಖೂ ಉಪಸಮ್ಪದಂ ಯಾಚತಿ. ಸೋ ಏವಮಸ್ಸ ವಚನೀಯೋ – ‘‘ಪಟಿನಿಸ್ಸಜ್ಜಿಸ್ಸಸಿ ತಂ ಪಾಪಿಕಂ ದಿಟ್ಠಿ’’ನ್ತಿ? ಸಚಾಹಂ ಪಟಿನಿಸ್ಸಜ್ಜಿಸ್ಸಾಮೀತಿ, ಪಬ್ಬಾಜೇತಬ್ಬೋ. ಸಚಾಹಂ ನ ಪಟಿನಿಸ್ಸಜ್ಜಿಸ್ಸಾಮೀತಿ, ನ ಪಬ್ಬಾಜೇತಬ್ಬೋ. ಪಬ್ಬಾಜೇತ್ವಾ ವತ್ತಬ್ಬೋ – ‘‘ಪಟಿನಿಸ್ಸಜ್ಜಿಸ್ಸಸಿ ತಂ ಪಾಪಿಕಂ ದಿಟ್ಠಿ’’ನ್ತಿ? ಸಚಾಹಂ ಪಟಿನಿಸ್ಸಜ್ಜಿಸ್ಸಾಮೀತಿ, ಉಪಸಮ್ಪಾದೇತಬ್ಬೋ. ಸಚಾಹಂ ನ ಪಟಿನಿಸ್ಸಜ್ಜಿಸ್ಸಾಮೀತಿ, ನ ಉಪಸಮ್ಪಾದೇತಬ್ಬೋ. ಉಪಸಮ್ಪಾದೇತ್ವಾ ವತ್ತಬ್ಬೋ – ‘‘ಪಟಿನಿಸ್ಸಜ್ಜಿಸ್ಸಸಿ ತಂ ಪಾಪಿಕಂ ದಿಟ್ಠಿ’’ನ್ತಿ? ಸಚಾಹಂ ಪಟಿನಿಸ್ಸಜ್ಜಿಸ್ಸಾಮೀತಿ, ಓಸಾರೇತಬ್ಬೋ. ಸಚಾಹಂ ನ ಪಟಿನಿಸ್ಸಜ್ಜಿಸ್ಸಾಮೀತಿ, ನ ಓಸಾರೇತಬ್ಬೋ. ಓಸಾರೇತ್ವಾ ವತ್ತಬ್ಬೋ – ‘‘ಪಟಿನಿಸ್ಸಜ್ಜೇಹಿ ತಂ ಪಾಪಿಕಂ ದಿಟ್ಠಿ’’ನ್ತಿ. ಸಚೇ ಪಟಿನಿಸ್ಸಜ್ಜತಿ, ಇಚ್ಚೇತಂ ಕುಸಲಂ. ನೋ ಚೇ ಪಟಿನಿಸ್ಸಜ್ಜತಿ, ಲಬ್ಭಮಾನಾಯ ಸಾಮಗ್ಗಿಯಾ ಪುನ ಉಕ್ಖಿಪಿತಬ್ಬೋ. ಅಲಬ್ಭಮಾನಾಯ ಸಾಮಗ್ಗಿಯಾ ಅನಾಪತ್ತಿ ಸಮ್ಭೋಗೇ ಸಂವಾಸೇತಿ.

ಮಹಾಖನ್ಧಕೋ ಪಠಮೋ.