೫೮. ಅಲಜ್ಜೀನಿಸ್ಸಯವತ್ಥೂನಿ

೧೨೦. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅಲಜ್ಜೀನಂ ನಿಸ್ಸಯಂ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಲಜ್ಜೀನಂ ನಿಸ್ಸಯೋ ದಾತಬ್ಬೋ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಲಜ್ಜೀನಂ ನಿಸ್ಸಾಯ ವಸನ್ತಿ. ತೇಪಿ ನಚಿರಸ್ಸೇವ ಅಲಜ್ಜಿನೋ ಹೋನ್ತಿ ಪಾಪಕಾಭಿಕ್ಖೂ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಲಜ್ಜೀನಂ ನಿಸ್ಸಾಯ ವತ್ಥಬ್ಬಂ. ಯೋ ವಸೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಅಲಜ್ಜೀನಂ ನಿಸ್ಸಯೋ ದಾತಬ್ಬೋ, ನ ಅಲಜ್ಜೀನಂ ನಿಸ್ಸಾಯ ವತ್ಥಬ್ಬ’ನ್ತಿ. ಕಥಂ ನು ಖೋ ಮಯಂ ಜಾನೇಯ್ಯಾಮ ಲಜ್ಜಿಂ ವಾ ಅಲಜ್ಜಿಂ ವಾ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಚತೂಹಪಞ್ಚಾಹಂ ಆಗಮೇತುಂ ಯಾವ ಭಿಕ್ಖುಸಭಾಗತಂ ಜಾನಾಮೀತಿ.