೫೯. ಗಮಿಕಾದಿನಿಸ್ಸಯವತ್ಥೂನಿ

೧೨೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಕೋಸಲೇಸು ಜನಪದೇ ಅದ್ಧಾನಮಗ್ಗಪ್ಪಟಿಪನ್ನೋ ಹೋತಿ. ಅಥ ಖೋ ತಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಅನಿಸ್ಸಿತೇನ ವತ್ಥಬ್ಬ’ನ್ತಿ. ಅಹಞ್ಚಮ್ಹಿ ನಿಸ್ಸಯಕರಣೀಯೋ ಅದ್ಧಾನಮಗ್ಗಪ್ಪಟಿಪನ್ನೋ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಅದ್ಧಾನಮಗ್ಗಪ್ಪಟಿಪನ್ನೇನ ಭಿಕ್ಖುನಾ ನಿಸ್ಸಯಂ ಅಲಭಮಾನೇನ ಅನಿಸ್ಸಿತೇನ ವತ್ಥುನ್ತಿ.

ತೇನ ಖೋ ಪನ ಸಮಯೇನ ದ್ವೇ ಭಿಕ್ಖೂ ಕೋಸಲೇಸು ಜನಪದೇ ಅದ್ಧಾನಮಗ್ಗಪ್ಪಟಿಪನ್ನಾ ಹೋನ್ತಿ. ತೇ ಅಞ್ಞತರಂ ಆವಾಸಂ ಉಪಗಚ್ಛಿಂಸು. ತತ್ಥ ಏಕೋ ಭಿಕ್ಖು ಗಿಲಾನೋ ಹೋತಿ. ಅಥ ಖೋ ತಸ್ಸ ಗಿಲಾನಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಅನಿಸ್ಸಿತೇನ ವತ್ಥಬ್ಬ’ನ್ತಿ. ಅಹಞ್ಚಮ್ಹಿ ನಿಸ್ಸಯಕರಣೀಯೋ ಗಿಲಾನೋ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಗಿಲಾನೇನ ಭಿಕ್ಖುನಾ ನಿಸ್ಸಯಂ ಅಲಭಮಾನೇನ ಅನಿಸ್ಸಿತೇನ ವತ್ಥುನ್ತಿ.

ಅಥ ಖೋ ತಸ್ಸ ಗಿಲಾನುಪಟ್ಠಾಕಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಅನಿಸ್ಸಿತೇನ ವತ್ಥಬ್ಬ’ನ್ತಿ. ಅಹಞ್ಚಮ್ಹಿ ನಿಸ್ಸಯಕರಣೀಯೋ, ಅಯಞ್ಚ ಭಿಕ್ಖು ಗಿಲಾನೋ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಗಿಲಾನುಪಟ್ಠಾಕೇನ ಭಿಕ್ಖುನಾ ನಿಸ್ಸಯಂ ಅಲಭಮಾನೇನ ಯಾಚಿಯಮಾನೇನ ಅನಿಸ್ಸಿತೇನ ವತ್ಥುನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅರಞ್ಞೇ ವಿಹರತಿ. ತಸ್ಸ ಚ ತಸ್ಮಿಂ ಸೇನಾಸನೇ ಫಾಸು ಹೋತಿ. ಅಥ ಖೋ ತಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಅನಿಸ್ಸಿತೇನ ವತ್ಥಬ್ಬ’ನ್ತಿ. ಅಹಞ್ಚಮ್ಹಿ ನಿಸ್ಸಯಕರಣೀಯೋ ಅರಞ್ಞೇ ವಿಹರಾಮಿ, ಮಯ್ಹಞ್ಚ ಇಮಸ್ಮಿಂ ಸೇನಾಸನೇ ಫಾಸು ಹೋತಿ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಆರಞ್ಞಿಕೇನ ಭಿಕ್ಖುನಾ ಫಾಸುವಿಹಾರಂ ಸಲ್ಲಕ್ಖೇನ್ತೇನ ನಿಸ್ಸಯಂ ಅಲಭಮಾನೇನ ಅನಿಸ್ಸಿತೇನ ವತ್ಥುಂ – ಯದಾ ಪತಿರೂಪೋ ನಿಸ್ಸಯದಾಯಕೋ ಆಗಚ್ಛಿಸ್ಸತಿ, ತದಾ ತಸ್ಸ ನಿಸ್ಸಾಯ ವಸಿಸ್ಸಾಮೀತಿ.