೨೭. ರಾಜಭಟವತ್ಥು

೯೦. ತೇನ ಖೋ ಪನ ಸಮಯೇನ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಚ್ಚನ್ತೋ ಕುಪಿತೋ ಹೋತಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಸೇನಾನಾಯಕೇ ಮಹಾಮತ್ತೇ ಆಣಾಪೇಸಿ – ‘‘ಗಚ್ಛಥ, ಭಣೇ, ಪಚ್ಚನ್ತಂ ಉಚ್ಚಿನಥಾ’’ತಿ. ‘‘ಏವಂ, ದೇವಾ’’ತಿ ಖೋ ಸೇನಾನಾಯಕಾ ಮಹಾಮತ್ತಾ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಚ್ಚಸ್ಸೋಸುಂ. ಅಥ ಖೋ ಅಭಿಞ್ಞಾತಾನಂ ಅಭಿಞ್ಞಾತಾನಂ ಯೋಧಾನಂ ಏತದಹೋಸಿ – ‘‘ಮಯಂ ಖೋ ಯುದ್ಧಾಭಿನನ್ದಿನೋ ಗಚ್ಛನ್ತಾ ಪಾಪಞ್ಚ ಕರೋಮ, ಬಹುಞ್ಚ ಅಪುಞ್ಞಂ ಪಸವಾಮ. ಕೇನ ನು ಖೋ ಮಯಂ ಉಪಾಯೇನ ಪಾಪಾ ಚ ವಿರಮೇಯ್ಯಾಮ ಕಲ್ಯಾಣಞ್ಚ ಕರೇಯ್ಯಾಮಾ’’ತಿ? ಅಥ ಖೋ ತೇಸಂ ಯೋಧಾನಂ ಏತದಹೋಸಿ – ‘‘ಇಮೇ ಖೋ ಸಮಣಾ ಸಕ್ಯಪುತ್ತಿಯಾ ಧಮ್ಮಚಾರಿನೋ ಸಮಚಾರಿನೋ ಬ್ರಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ. ಸಚೇ ಖೋ ಮಯಂ ಸಮಣೇಸು ಸಕ್ಯಪುತ್ತಿಯೇಸು ಪಬ್ಬಜೇಯ್ಯಾಮ, ಏವಂ ಮಯಂ ಪಾಪಾ ಚ ವಿರಮೇಯ್ಯಾಮ ಕಲ್ಯಾಣಞ್ಚ ಕರೇಯ್ಯಾಮಾ’’ತಿ. ಅಥ ಖೋ ತೇ ಯೋಧಾ ಭಿಕ್ಖೂ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿಂಸು. ತೇ ಭಿಕ್ಖೂ ಪಬ್ಬಾಜೇಸುಂ, ಉಪಸಮ್ಪಾದೇಸುಂ. ಸೇನಾನಾಯಕಾ ಮಹಾಮತ್ತಾ ರಾಜಭಟೇ ಪುಚ್ಛಿಂಸು – ‘‘ಕಿಂ ನು ಖೋ, ಭಣೇ, ಇತ್ಥನ್ನಾಮೋ ಚ ಇತ್ಥನ್ನಾಮೋ ಚ ಯೋಧಾ ನ ದಿಸ್ಸನ್ತೀ’’ತಿ? ‘‘ಇತ್ಥನ್ನಾಮೋ ಚ ಇತ್ಥನ್ನಾಮೋ ಚ, ಸಾಮಿ, ಯೋಧಾ ಭಿಕ್ಖೂಸು ಪಬ್ಬಜಿತಾ’’ತಿ. ಸೇನಾನಾಯಕಾ ಮಹಾಮತ್ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ರಾಜಭಟಂ ಪಬ್ಬಾಜೇಸ್ಸನ್ತೀ’’ತಿ. ಸೇನಾನಾಯಕಾ ಮಹಾಮತ್ತಾ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಏತಮತ್ಥಂ ಆರೋಚೇಸುಂ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ವೋಹಾರಿಕೇ ಮಹಾಮತ್ತೇ ಪುಚ್ಛಿ – ‘‘ಯೋ, ಭಣೇ, ರಾಜಭಟಂ ಪಬ್ಬಾಜೇತಿ, ಕಿಂ ಸೋ ಪಸವತೀ’’ತಿ? ‘‘ಉಪಜ್ಝಾಯಸ್ಸ, ದೇವ, ಸೀಸಂ ಛೇತಬ್ಬಂ, ಅನುಸ್ಸಾವಕಸ್ಸ [ಅನುಸಾವಕಸ್ಸ (ಕ.)] ಜಿವ್ಹಾ ಉದ್ಧರಿತಬ್ಬಾ, ಗಣಸ್ಸ ಉಪಡ್ಢಫಾಸುಕಾ ಭಞ್ಜಿತಬ್ಬಾ’’ತಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಭಗವನ್ತಂ ಏತದವೋಚ – ‘‘ಸನ್ತಿ, ಭನ್ತೇ, ರಾಜಾನೋ ಅಸ್ಸದ್ಧಾ ಅಪ್ಪಸನ್ನಾ. ತೇ ಅಪ್ಪಮತ್ತಕೇನಪಿ ಭಿಕ್ಖೂ ವಿಹೇಠೇಯ್ಯುಂ. ಸಾಧು, ಭನ್ತೇ, ಅಯ್ಯಾ ರಾಜಭಟಂ ನ ಪಬ್ಬಾಜೇಯ್ಯು’’ನ್ತಿ. ಅಥ ಖೋ ಭಗವಾ ರಾಜಾನಂ ಮಾಗಧಂ ಸೇನಿಯಂ ಬಿಮ್ಬಿಸಾರಂ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಭಗವತಾ ಧಮ್ಮಿಯಾ ಕಥಾಯ ಸನ್ದಸ್ಸಿತೋ ಸಮಾದಪಿತೋ ಸಮುತ್ತೇಜಿತೋ ಸಮ್ಪಹಂಸಿತೋ ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ರಾಜಭಟೋ ಪಬ್ಬಾಜೇತಬ್ಬೋ. ಯೋ ಪಬ್ಬಾಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ರಾಜಭಟವತ್ಥು ನಿಟ್ಠಿತಂ.