೨೦. ಪಣಾಮನಾ ಖಮಾಪನಾ

೮೦. ತೇನ ಖೋ ಪನ ಸಮಯೇನ ಅನ್ತೇವಾಸಿಕಾ ಆಚರಿಯೇಸು ನ ಸಮ್ಮಾ ವತ್ತನ್ತಿ…ಪೇ… ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ನ, ಭಿಕ್ಖವೇ, ಅನ್ತೇವಾಸಿಕೇನ ಆಚರಿಯಮ್ಹಿ ನ ಸಮ್ಮಾ ವತ್ತಿತಬ್ಬಂ. ಯೋ ನ ಸಮ್ಮಾ ವತ್ತೇಯ್ಯ, ಆಪತ್ತಿ ದುಕ್ಕಟಸ್ಸಾತಿ. ನೇವ ಸಮ್ಮಾ ವತ್ತನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಅನುಜಾನಾಮಿ, ಭಿಕ್ಖವೇ, ಅಸಮ್ಮಾವತ್ತನ್ತಂ ಪಣಾಮೇತುಂ. ಏವಞ್ಚ ಪನ, ಭಿಕ್ಖವೇ, ಪಣಾಮೇತಬ್ಬೋ – ಪಣಾಮೇಮಿ ತನ್ತಿ ವಾ, ಮಾಯಿಧ ಪಟಿಕ್ಕಮೀತಿ ವಾ, ನೀಹರ ತೇ ಪತ್ತಚೀವರನ್ತಿ ವಾ, ನಾಹಂ ತಯಾ ಉಪಟ್ಠಾತಬ್ಬೋತಿ ವಾ. ಕಾಯೇನ ವಿಞ್ಞಾಪೇತಿ, ವಾಚಾಯ ವಿಞ್ಞಾಪೇತಿ, ಕಾಯೇನ ವಾಚಾಯ ವಿಞ್ಞಾಪೇತಿ, ಪಣಾಮಿತೋ ಹೋತಿ ಅನ್ತೇವಾಸಿಕೋ; ನ ಕಾಯೇನ ವಿಞ್ಞಾಪೇತಿ, ನ ವಾಚಾಯ ವಿಞ್ಞಾಪೇತಿ, ನ ಕಾಯೇನ ವಾಚಾಯ ವಿಞ್ಞಾಪೇತಿ, ನ ಪಣಾಮಿತೋ ಹೋತಿ ಅನ್ತೇವಾಸಿಕೋತಿ.

ತೇನ ಖೋ ಪನ ಸಮಯೇನ ಅನ್ತೇವಾಸಿಕಾ ಪಣಾಮಿತಾ ನ ಖಮಾಪೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಖಮಾಪೇತುನ್ತಿ. ನೇವ ಖಮಾಪೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಪಣಾಮಿತೇನ ನ ಖಮಾಪೇತಬ್ಬೋ. ಯೋ ನ ಖಮಾಪೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಆಚರಿಯಾ ಖಮಾಪಿಯಮಾನಾ ನ ಖಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಖಮಿತುನ್ತಿ. ನೇವ ಖಮನ್ತಿ. ಅನ್ತೇವಾಸಿಕಾ ಪಕ್ಕಮನ್ತಿಪಿ ವಿಬ್ಭಮನ್ತಿಪಿ ತಿತ್ಥಿಯೇಸುಪಿ ಸಙ್ಕಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಖಮಾಪಿಯಮಾನೇನ ನ ಖಮಿತಬ್ಬಂ. ಯೋ ನ ಖಮೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಆಚರಿಯಾ ಸಮ್ಮಾವತ್ತನ್ತಂ ಪಣಾಮೇನ್ತಿ, ಅಸಮ್ಮಾವತ್ತನ್ತಂ ನ ಪಣಾಮೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಸಮ್ಮಾವತ್ತನ್ತೋ ಪಣಾಮೇತಬ್ಬೋ. ಯೋ ಪಣಾಮೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಚ, ಭಿಕ್ಖವೇ, ಅಸಮ್ಮಾವತ್ತನ್ತೋ ನ ಪಣಾಮೇತಬ್ಬೋ. ಯೋ ನ ಪಣಾಮೇಯ್ಯ, ಆಪತ್ತಿ ದುಕ್ಕಟಸ್ಸ.

೮೧. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ಪಣಾಮೇತಬ್ಬೋ. ಆಚರಿಯಮ್ಹಿ ನಾಧಿಮತ್ತಂ ಪೇಮಂ ಹೋತಿ, ನಾಧಿಮತ್ತೋ ಪಸಾದೋ ಹೋತಿ, ನಾಧಿಮತ್ತಾ ಹಿರೀ ಹೋತಿ, ನಾಧಿಮತ್ತೋ ಗಾರವೋ ಹೋತಿ, ನಾಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ಪಣಾಮೇತಬ್ಬೋ.

‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ನ ಪಣಾಮೇತಬ್ಬೋ. ಆಚರಿಯಮ್ಹಿ ಅಧಿಮತ್ತಂ ಪೇಮಂ ಹೋತಿ, ಅಧಿಮತ್ತೋ ಪಸಾದೋ ಹೋತಿ, ಅಧಿಮತ್ತಾ ಹಿರೀ ಹೋತಿ, ಅಧಿಮತ್ತೋ ಗಾರವೋ ಹೋತಿ, ಅಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ನ ಪಣಾಮೇತಬ್ಬೋ.

‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ಅಲಂ ಪಣಾಮೇತುಂ. ಆಚರಿಯಮ್ಹಿ ನಾಧಿಮತ್ತಂ ಪೇಮಂ ಹೋತಿ, ನಾಧಿಮತ್ತೋ ಪಸಾದೋ ಹೋತಿ, ನಾಧಿಮತ್ತಾ ಹಿರೀ ಹೋತಿ, ನಾಧಿಮತ್ತೋ ಗಾರವೋ ಹೋತಿ, ನಾಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ಅಲಂ ಪಣಾಮೇತುಂ.

‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ನಾಲಂ ಪಣಾಮೇತುಂ. ಆಚರಿಯಮ್ಹಿ ಅಧಿಮತ್ತಂ ಪೇಮಂ ಹೋತಿ, ಅಧಿಮತ್ತೋ ಪಸಾದೋ ಹೋತಿ, ಅಧಿಮತ್ತಾ ಹಿರೀ ಹೋತಿ, ಅಧಿಮತ್ತೋ ಗಾರವೋ ಹೋತಿ, ಅಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತೋ ಅನ್ತೇವಾಸಿಕೋ ನಾಲಂ ಪಣಾಮೇತುಂ.

‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ ಅನ್ತೇವಾಸಿಕಂ ಅಪ್ಪಣಾಮೇನ್ತೋ ಆಚರಿಯೋ ಸಾತಿಸಾರೋ ಹೋತಿ, ಪಣಾಮೇನ್ತೋ ಅನತಿಸಾರೋ ಹೋತಿ. ಆಚರಿಯಮ್ಹಿ ನಾಧಿಮತ್ತಂ ಪೇಮಂ ಹೋತಿ, ನಾಧಿಮತ್ತೋ ಪಸಾದೋ ಹೋತಿ, ನಾಧಿಮತ್ತಾ ಹಿರೀ ಹೋತಿ, ನಾಧಿಮತ್ತೋ ಗಾರವೋ ಹೋತಿ, ನಾಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಅನ್ತೇವಾಸಿಕಂ ಅಪ್ಪಣಾಮೇನ್ತೋ ಆಚರಿಯೋ ಸಾತಿಸಾರೋ ಹೋತಿ, ಪಣಾಮೇನ್ತೋ ಅನತಿಸಾರೋ ಹೋತಿ.

‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ ಅನ್ತೇವಾಸಿಕಂ ಪಣಾಮೇನ್ತೋ ಆಚರಿಯೋ ಸಾತಿಸಾರೋ ಹೋತಿ, ಅಪ್ಪಣಾಮೇನ್ತೋ ಅನತಿಸಾರೋ ಹೋತಿ. ಆಚರಿಯಮ್ಹಿ ಅಧಿಮತ್ತಂ ಪೇಮಂ ಹೋತಿ, ಅಧಿಮತ್ತೋ ಪಸಾದೋ ಹೋತಿ, ಅಧಿಮತ್ತಾ ಹಿರೀ ಹೋತಿ, ಅಧಿಮತ್ತೋ ಗಾರವೋ ಹೋತಿ, ಅಧಿಮತ್ತಾ ಭಾವನಾ ಹೋತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಅನ್ತೇವಾಸಿಕಂ ಪಣಾಮೇನ್ತೋ ಆಚರಿಯೋ ಸಾತಿಸಾರೋ ಹೋತಿ, ಅಪ್ಪಣಾಮೇನ್ತೋ ಅನತಿಸಾರೋ ಹೋತೀ’’ತಿ.

ಪಣಾಮನಾ ಖಮಾಪನಾ ನಿಟ್ಠಿತಾ.