೨೧. ಬಾಲಅಬ್ಯತ್ತವತ್ಥು

೮೨. ತೇನ ಖೋ ಪನ ಸಮಯೇನ ಭಿಕ್ಖೂ, ದಸವಸ್ಸಮ್ಹಾ ದಸವಸ್ಸಮ್ಹಾತಿ, ಬಾಲಾ ಅಬ್ಯತ್ತಾ ನಿಸ್ಸಯಂ ದೇನ್ತಿ. ದಿಸ್ಸನ್ತಿ ಆಚರಿಯಾ ಬಾಲಾ, ಅನ್ತೇವಾಸಿಕಾ ಪಣ್ಡಿತಾ. ದಿಸ್ಸನ್ತಿ ಆಚರಿಯಾ ಅಬ್ಯತ್ತಾ, ಅನ್ತೇವಾಸಿಕಾ ಬ್ಯತ್ತಾ. ದಿಸ್ಸನ್ತಿ ಆಚರಿಯಾ ಅಪ್ಪಸ್ಸುತಾ, ಅನ್ತೇವಾಸಿಕಾ ಬಹುಸ್ಸುತಾ. ದಿಸ್ಸನ್ತಿ ಆಚರಿಯಾ ದುಪ್ಪಞ್ಞಾ, ಅನ್ತೇವಾಸಿಕಾ ಪಞ್ಞವನ್ತೋ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖೂ, ದಸವಸ್ಸಮ್ಹಾ ದಸವಸ್ಸಮ್ಹಾತಿ, ಬಾಲಾ ಅಬ್ಯತ್ತಾ ನಿಸ್ಸಯಂ ದಸ್ಸನ್ತಿ. ದಿಸ್ಸನ್ತಿ ಆಚರಿಯಾ ಬಾಲಾ ಅನ್ತೇವಾಸಿಕಾ ಪಣ್ಡಿತಾ, ದಿಸ್ಸನ್ತಿ ಆಚರಿಯಾ ಅಬ್ಯತ್ತಾ ಅನ್ತೇವಾಸಿಕಾ ಬ್ಯತ್ತಾ, ದಿಸ್ಸನ್ತಿ ಆಚರಿಯಾ ಅಪ್ಪಸ್ಸುತಾ ಅನ್ತೇವಾಸಿಕಾ ಬಹುಸ್ಸುತಾ, ದಿಸ್ಸನ್ತಿ ಆಚರಿಯಾ ದುಪ್ಪಞ್ಞಾ ಅನ್ತೇವಾಸಿಕಾ ಪಞ್ಞವನ್ತೋ’’ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖೂ, ದಸವಸ್ಸಮ್ಹಾ ದಸವಸ್ಸಮ್ಹಾತಿ, ಬಾಲಾ ಅಬ್ಯತ್ತಾ ನಿಸ್ಸಯಂ ದೇನ್ತಿ…ಪೇ… ಸಚ್ಚಂ, ಭಗವಾತಿ. ವಿಗರಹಿ ಬುದ್ಧೋ ಭಗವಾ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಬಾಲೇನ ಅಬ್ಯತ್ತೇನ ನಿಸ್ಸಯೋ ದಾತಬ್ಬೋ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ದಸವಸ್ಸೇನ ವಾ ಅತಿರೇಕದಸವಸ್ಸೇನ ವಾ ನಿಸ್ಸಯಂ ದಾತು’’ನ್ತಿ.

ಬಾಲಅಬ್ಯತ್ತವತ್ಥು ನಿಟ್ಠಿತಂ.