೪. ಪಟಿಞ್ಞಾತಕರಣಂ

೨೦೦. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಕರೋನ್ತಿ – ತಜ್ಜನೀಯಮ್ಪಿ, ನಿಯಸ್ಸಮ್ಪಿ, ಪಬ್ಬಾಜನೀಯಮ್ಪಿ, ಪಟಿಸಾರಣೀಯಮ್ಪಿ, ಉಕ್ಖೇಪನೀಯಮ್ಪಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಕರಿಸ್ಸನ್ತಿ – ತಜ್ಜನೀಯಮ್ಪಿ, ನಿಯಸ್ಸಮ್ಪಿ, ಪಬ್ಬಾಜನೀಯಮ್ಪಿ, ಪಟಿಸಾರಣೀಯಮ್ಪಿ, ಉಕ್ಖೇಪನೀಯಮ್ಪೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಂ ಕಾತಬ್ಬಂ – ತಜ್ಜನೀಯಂ ವಾ, ನಿಯಸ್ಸಂ ವಾ, ಪಬ್ಬಾಜನೀಯಂ ವಾ, ಪಟಿಸಾರಣೀಯಂ ವಾ, ಉಕ್ಖೇಪನೀಯಂ ವಾ. ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸ.

೨೦೧. ‘‘ಏವಂ ಖೋ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ, ಏವಂ ಧಮ್ಮಿಕಂ. ಕಥಞ್ಚ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ?

‘‘ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ, ಸಙ್ಘಾದಿಸೇಸಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ಸಙ್ಘಾದಿಸೇಸೇನ ಕಾರೇತಿ. ಅಧಮ್ಮಿಕಂ ಪಟಿಞ್ಞಾತಕರಣಂ.

‘‘ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ, ಥುಲ್ಲಚ್ಚಯಂ…ಪೇ… ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ…ಪೇ… ದುಕ್ಕಟಂ…ಪೇ… ದುಬ್ಭಾಸಿತಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ದುಬ್ಭಾಸಿತೇನ ಕಾರೇತಿ. ಅಧಮ್ಮಿಕಂ ಪಟಿಞ್ಞಾತಕರಣಂ.

‘‘ಭಿಕ್ಖು ಸಙ್ಘಾದಿಸೇಸಂ…ಪೇ… ಥುಲ್ಲಚ್ಚಯಂ…ಪೇ… ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ…ಪೇ… ದುಕ್ಕಟಂ…ಪೇ… ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ, ಪಾರಾಜಿಕಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ಪಾರಾಜಿಕೇನ ಕಾರೇತಿ. ಅಧಮ್ಮಿಕಂ ಪಟಿಞ್ಞಾತಕರಣಂ.

‘‘ಭಿಕ್ಖು ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ, ಸಙ್ಘಾದಿಸೇಸಂ…ಪೇ… ಥುಲ್ಲಚ್ಚಯಂ…ಪೇ… ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ…ಪೇ… ದುಕ್ಕಟಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ದುಕ್ಕಟೇನ ಕಾರೇತಿ. ಅಧಮ್ಮಿಕಂ ಪಟಿಞ್ಞಾತಕರಣಂ. ‘‘ಏವಂ ಖೋ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

‘‘ಕಥಞ್ಚ, ಭಿಕ್ಖವೇ, ಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ? ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ಆಮ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ಪಾರಾಜಿಕೇನ ಕಾರೇತಿ. ಧಮ್ಮಿಕಂ ಪಟಿಞ್ಞಾತಕರಣಂ.

‘‘ಭಿಕ್ಖು ಸಙ್ಘಾದಿಸೇಸಂ…ಪೇ… ಥುಲ್ಲಚ್ಚಯಂ…ಪೇ… ಪಾಚಿತ್ತಿಯಂ…ಪೇ… ಪಾಟಿದೇಸನೀಯಂ…ಪೇ… ದುಕ್ಕಟಂ…ಪೇ… ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ. ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ಆಮ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ’ತಿ. ತಂ ಸಙ್ಘೋ ದುಬ್ಭಾಸಿತೇನ ಕಾರೇತಿ. ಧಮ್ಮಿಕಂ ಪಟಿಞ್ಞಾತಕರಣಂ. ಏವಂ ಖೋ, ಭಿಕ್ಖವೇ, ಧಮ್ಮಿಕಂ ಹೋತಿ ಪಟಿಞ್ಞಾತಕರಣ’’ನ್ತಿ.