೫. ಯೇಭುಯ್ಯಸಿಕಾ

೨೦೨. ತೇನ ಖೋ ಪನ ಸಮಯೇನ ಭಿಕ್ಖೂ ಸಙ್ಘಮಜ್ಝೇ ಭಣ್ಡನಜಾತಾ ಕಲಹಜಾತಾ ವಿವಾದಾಪನ್ನಾ ಅಞ್ಞಮಞ್ಞಂ ಮುಖಸತ್ತೀಹಿ ವಿತುದನ್ತಾ ವಿಹರನ್ತಿ, ನ ಸಕ್ಕೋನ್ತಿ ತಂ ಅಧಿಕರಣಂ ವೂಪಸಮೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏವರೂಪಂ ಅಧಿಕರಣಂ ಯೇಭುಯ್ಯಸಿಕಾಯ ವೂಪಸಮೇತುಂ. ಪಞ್ಚಹಙ್ಗೇಹಿ ಸಮನ್ನಾಗತೋ ಭಿಕ್ಖು ಸಲಾಕಗ್ಗಾಹಾಪಕೋ ಸಮ್ಮನ್ನಿತಬ್ಬೋ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ಗಹಿತಾಗಹಿತುಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ, ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೨೦೩. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಸಲಾಕಗ್ಗಾಹಾಪಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಸಲಾಕಗ್ಗಾಹಾಪಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಸಲಾಕಗ್ಗಾಹಾಪಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಸಲಾಕಗ್ಗಾಹಾಪಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೨೦೪. ‘‘ದಸಯಿಮೇ, ಭಿಕ್ಖವೇ, ಅಧಮ್ಮಿಕಾ ಸಲಾಕಗ್ಗಾಹಾ, ದಸ ಧಮ್ಮಿಕಾ [ದಸ ಧಮ್ಮಿಕಾ ಸಲಾಕಗ್ಗಾಹಾ (ಕ.)]. ಕತಮೇ ದಸ ಅಧಮ್ಮಿಕಾ ಸಲಾಕಗ್ಗಾಹಾ? ಓರಮತ್ತಕಞ್ಚ ಅಧಿಕರಣಂ ಹೋತಿ, ನ ಚ ಗತಿಗತಂ ಹೋತಿ, ನ ಚ ಸರಿತಸಾರಿತಂ ಹೋತಿ, ಜಾನಾತಿ ಅಧಮ್ಮವಾದೀ ಬಹುತರಾತಿ, ಅಪ್ಪೇವ ನಾಮ ಅಧಮ್ಮವಾದೀ ಬಹುತರಾ ಅಸ್ಸೂತಿ, ಜಾನಾತಿ ಸಙ್ಘೋ ಭಿಜ್ಜಿಸ್ಸತೀತಿ, ಅಪ್ಪೇವ ನಾಮ ಸಙ್ಘೋ ಭಿಜ್ಜೇಯ್ಯಾತಿ, ಅಧಮ್ಮೇನ ಗಣ್ಹನ್ತಿ, ವಗ್ಗಾ ಗಣ್ಹನ್ತಿ, ನ ಚ ಯಥಾದಿಟ್ಠಿಯಾ ಗಣ್ಹನ್ತಿ – ಇಮೇ ದಸ ಅಧಮ್ಮಿಕಾ ಸಲಾಕಗ್ಗಾಹಾ.

‘‘ಕತಮೇ ದಸ ಧಮ್ಮಿಕಾ ಸಲಾಕಗ್ಗಾಹಾ? ನ ಚ ಓರಮತ್ತಕಂ ಅಧಿಕರಣಂ ಹೋತಿ, ಗತಿಗತಞ್ಚ ಹೋತಿ, ಸರಿತಸಾರಿತಞ್ಚ ಹೋತಿ, ಜಾನಾತಿ ಧಮ್ಮವಾದೀ ಬಹುತರಾತಿ, ಅಪ್ಪೇವ ನಾಮ ಧಮ್ಮವಾದೀ ಬಹುತರಾ ಅಸ್ಸೂತಿ, ಜಾನಾತಿ ಸಙ್ಘೋ ನ ಭಿಜ್ಜಿಸ್ಸತೀತಿ, ಅಪ್ಪೇವ ನಾಮ ಸಙ್ಘೋ ನ ಭಿಜ್ಜೇಯ್ಯಾತಿ, ಧಮ್ಮೇನ ಗಣ್ಹನ್ತಿ, ಸಮಗ್ಗಾ ಗಣ್ಹನ್ತಿ, ಯಥಾದಿಟ್ಠಿಯಾ ಚ ಗಣ್ಹನ್ತಿ – ಇಮೇ ದಸ ಧಮ್ಮಿಕಾ ಸಲಾಕಗ್ಗಾಹಾ’’ತಿ.