೨. ದುತಿಯಭಾಣವಾರೋ

೪೧೧. ಅಥ ಖೋ ಭಗವಾ ವೇಸಾಲಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಸಾವತ್ಥಿ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಸಾವತ್ಥಿ ತದವಸರಿ. ತತ್ರ ಸುದಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಭಿಕ್ಖುನಿಯೋ ಕದ್ದಮೋದಕೇನ ಓಸಿಞ್ಚನ್ತಿ – ಅಪ್ಪೇವ ನಾಮ ಅಮ್ಹೇಸು ಸಾರಜ್ಜೇಯ್ಯುನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಾ ಭಿಕ್ಖುನಿಯೋ ಕದ್ದಮೋದಕೇನ ಓಸಿಞ್ಚಿತಬ್ಬಾ. ಯೋ ಓಸಿಞ್ಚೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಸ್ಸ ಭಿಕ್ಖುನೋ ದಣ್ಡಕಮ್ಮಂ ಕಾತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ದಣ್ಡಕಮ್ಮಂ ಕಾತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅವನ್ದಿಯೋ ಸೋ, ಭಿಕ್ಖವೇ, ಭಿಕ್ಖು ಭಿಕ್ಖುನಿಸಙ್ಘೇನ ಕಾತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಕಾಯಂ ವಿವರಿತ್ವಾ ಭಿಕ್ಖುನೀನಂ ದಸ್ಸೇನ್ತಿ …ಪೇ… ಊರುಂ ವಿವರಿತ್ವಾ ಭಿಕ್ಖುನೀನಂ ದಸ್ಸೇನ್ತಿ, ಅಙ್ಗಜಾತಂ ವಿವರಿತ್ವಾ ಭಿಕ್ಖುನೀನಂ ದಸ್ಸೇನ್ತಿ, ಭಿಕ್ಖುನಿಯೋ ಓಭಾಸೇನ್ತಿ, ಭಿಕ್ಖುನೀಹಿ ಸದ್ಧಿಂ ಸಮ್ಪಯೋಜೇನ್ತಿ – ಅಪ್ಪೇವ ನಾಮ ಅಮ್ಹೇಸು ಸಾರಜ್ಜೇಯ್ಯುನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಾ ಕಾಯೋ ವಿವರಿತ್ವಾ ಭಿಕ್ಖುನೀನಂ ದಸ್ಸೇತಬ್ಬೋ, ನ ಊರು ವಿವರಿತ್ವಾ ಭಿಕ್ಖುನೀನಂ ದಸ್ಸೇತಬ್ಬೋ, ನ ಅಙ್ಗಜಾತಂ ವಿವರಿತ್ವಾ ಭಿಕ್ಖುನೀನಂ ದಸ್ಸೇತಬ್ಬಂ, ನ ಭಿಕ್ಖುನಿಯೋ ಓಭಾಸಿತಬ್ಬಾ, ನ ಭಿಕ್ಖುನೀಹಿ ಸದ್ಧಿಂ ಸಮ್ಪಯೋಜೇತಬ್ಬಂ. ಯೋ ಸಮ್ಪಯೋಜೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಸ್ಸ ಭಿಕ್ಖುನೋ ದಣ್ಡಕಮ್ಮಂ ಕಾತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ದಣ್ಡಕಮ್ಮಂ ಕಾತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅವನ್ದಿಯೋ ಸೋ, ಭಿಕ್ಖವೇ, ಭಿಕ್ಖು ಭಿಕ್ಖುನಿಸಙ್ಘೇನ ಕಾತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಭಿಕ್ಖುಂ ಕದ್ದಮೋದಕೇನ ಓಸಿಞ್ಚನ್ತಿ – ಅಪ್ಪೇವ ನಾಮ ಅಮ್ಹೇಸು ಸಾರಜ್ಜೇಯ್ಯುನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖು ಕದ್ದಮೋದಕೇನ ಓಸಿಞ್ಚಿತಬ್ಬೋ. ಯಾ ಓಸಿಞ್ಚೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಸ್ಸಾ ಭಿಕ್ಖುನಿಯಾ ದಣ್ಡಕಮ್ಮಂ ಕಾತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ದಣ್ಡಕಮ್ಮಂ ಕಾತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ ಭಿಕ್ಖವೇ, ಆವರಣಂ ಕಾತು’’ನ್ತಿ. ಆವರಣೇ ಕತೇ ನ ಆದಿಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಓವಾದಂ ಠಪೇತು’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಕಾಯಂ ವಿವರಿತ್ವಾ ಭಿಕ್ಖೂನಂ ದಸ್ಸೇನ್ತಿ, ಥನಂ ವಿವರಿತ್ವಾ ಭಿಕ್ಖೂನಂ ದಸ್ಸೇನ್ತಿ, ಊರುಂ ವಿವರಿತ್ವಾ ಭಿಕ್ಖೂನಂ ದಸ್ಸೇನ್ತಿ, ಅಙ್ಗಜಾತಂ ವಿವರಿತ್ವಾ ಭಿಕ್ಖೂನಂ ದಸ್ಸೇನ್ತಿ, ಭಿಕ್ಖೂ ಓಭಾಸೇನ್ತಿ, ಭಿಕ್ಖೂಹಿ ಸದ್ಧಿಂ ಸಮ್ಪಯೋಜೇನ್ತಿ – ಅಪ್ಪೇವ ನಾಮ ಅಮ್ಹೇಸು ಸಾರಜ್ಜೇಯ್ಯುನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಕಾಯೋ ವಿವರಿತ್ವಾ ಭಿಕ್ಖೂನಂ ದಸ್ಸೇತಬ್ಬೋ…ಪೇ… ನ ಥನೋ ವಿವರಿತ್ವಾ ಭಿಕ್ಖೂನಂ ದಸ್ಸೇತಬ್ಬೋ, ನ ಊರು ವಿವರಿತ್ವಾ ಭಿಕ್ಖೂನಂ ದಸ್ಸೇತಬ್ಬೋ, ನ ಅಙ್ಗಜಾತಂ ವಿವರಿತ್ವಾ ಭಿಕ್ಖೂನಂ ದಸ್ಸೇತಬ್ಬಂ, ನ ಭಿಕ್ಖೂ ಓಭಾಸಿತಬ್ಬಾ, ನ ಭಿಕ್ಖೂಹಿ ಸದ್ಧಿಂ ಸಮ್ಪಯೋಜೇತಬ್ಬಂ. ಯಾ ಸಮ್ಪಯೋಜೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಸ್ಸಾ ಭಿಕ್ಖುನಿಯಾ ದಣ್ಡಕಮ್ಮಂ ಕಾತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ದಣ್ಡಕಮ್ಮಂ ಕಾತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆವರಣಂ ಕಾತು’’ನ್ತಿ. ಆವರಣೇ ಕತೇ ನ ಆದಿಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಓವಾದಂ ಠಪೇತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಪ್ಪತಿ ನು ಖೋ ಓವಾದಟ್ಠಪಿತಾಯ [ಓವಾದಣ್ಠಪಿತಾಯ (ಸ್ಯಾ.), ಓವಾದಂಠಪಿತಾಯ (ಕ.)] ಭಿಕ್ಖುನಿಯಾ ಸದ್ಧಿಂ ಉಪೋಸಥಂ ಕಾತುಂ, ನ ನು ಖೋ ಕಪ್ಪತೀ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದಟ್ಠಪಿತಾಯ ಭಿಕ್ಖುನಿಯಾ ಸದ್ಧಿಂ ಉಪೋಸಥೋ ಕಾತಬ್ಬೋ, ಯಾವ ನ ತಂ ಅಧಿಕರಣಂ ವೂಪಸನ್ತಂ ಹೋತೀ’’ತಿ.

೪೧೨. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಓವಾದಂ ಠಪೇತ್ವಾ ಚಾರಿಕಂ ಪಕ್ಕಾಮಿ. ಭಿಕ್ಖುನಿಯೋ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯೋ ಉದಾಯೀ ಓವಾದಂ ಠಪೇತ್ವಾ ಚಾರಿಕಂ ಪಕ್ಕಮಿಸ್ಸತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದಂ ಠಪೇತ್ವಾ ಚಾರಿಕಾ ಪಕ್ಕಮಿತಬ್ಬಾ. ಯೋ ಪಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ [ತೇನ ಖೋ ಪನ ಸಮಯೇನ ಭಿಕ್ಖೂ (ಸ್ಯಾ. ಕಂ.)] ಬಾಲಾ ಅಬ್ಯತ್ತಾ ಓವಾದಂ ಠಪೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಬಾಲೇನ ಅಬ್ಯತ್ತೇನ ಓವಾದೋ ಠಪೇತಬ್ಬೋ. ಯೋ ಠಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅವತ್ಥುಸ್ಮಿಂ ಅಕಾರಣೇ ಓವಾದಂ ಠಪೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅವತ್ಥುಸ್ಮಿಂ ಅಕಾರಣೇ ಓವಾದೋ ಠಪೇತಬ್ಬೋ. ಯೋ ಠಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಓವಾದಂ ಠಪೇತ್ವಾ ವಿನಿಚ್ಛಯಂ ನ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದಂ ಠಪೇತ್ವಾ ವಿನಿಚ್ಛಯೋ ನ ದಾತಬ್ಬೋ. ಯೋ ನ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೧೩. [ಪಾಚಿ. ೧೦೫೪] ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಓವಾದಂ ನ ಗಚ್ಛನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಓವಾದೋ ನ ಗನ್ತಬ್ಬೋ. ಯಾ ನ ಗಚ್ಛೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಸಬ್ಬೋ ಭಿಕ್ಖುನಿಸಙ್ಘೋ ಓವಾದಂ ಗಚ್ಛತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಜಾಯಾಯೋ ಇಮಾ ಇಮೇಸಂ, ಜಾರಿಯೋ ಇಮಾ ಇಮೇಸಂ, ಇದಾನಿ ಇಮೇ ಇಮಾಹಿ ಸದ್ಧಿಂ ಅಭಿರಮಿಸ್ಸನ್ತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸಬ್ಬೇನ ಭಿಕ್ಖುನಿಸಙ್ಘೇನ ಓವಾದೋ ಗನ್ತಬ್ಬೋ. ಗಚ್ಛೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಚತೂಹಿ ಪಞ್ಚಹಿ ಭಿಕ್ಖುನೀಹಿ ಓವಾದಂ ಗನ್ತು’’ನ್ತಿ.

ತೇನ ಖೋ ಪನ ಸಮಯೇನ ಚತಸ್ಸೋ ಪಞ್ಚ ಭಿಕ್ಖುನಿಯೋ ಓವಾದಂ ಗಚ್ಛನ್ತಿ. ಮನುಸ್ಸಾ ತಥೇವ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಜಾಯಾಯೋ ಇಮಾ ಇಮೇಸಂ, ಜಾರಿಯೋ ಇಮಾ ಇಮೇಸಂ, ಇದಾನಿ ಇಮೇ ಇಮಾಹಿ ಸದ್ಧಿಂ ಅಭಿರಮಿಸ್ಸನ್ತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಚತೂಹಿ ಪಞ್ಚಹಿ ಭಿಕ್ಖುನೀಹಿ ಓವಾದೋ ಗನ್ತಬ್ಬೋ. ಗಚ್ಛೇಯ್ಯುಂ ಚೇ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ದ್ವೇ ತಿಸ್ಸೋ ಭಿಕ್ಖುನಿಯೋ [ಭಿಕ್ಖುನೀಹಿ (ಕ.)] ಓವಾದಂ ಗನ್ತುಂ. ಏಕಂ ಭಿಕ್ಖುಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಭಿಕ್ಖುನಿಸಙ್ಘೋ, ಅಯ್ಯ, ಭಿಕ್ಖುಸಙ್ಘಸ್ಸ ಪಾದೇ ವನ್ದತಿ, ಓವಾದೂಪಸಙ್ಕಮನಞ್ಚ ಯಾಚತಿ; ಲಭತು ಕಿರ, ಅಯ್ಯ, ಭಿಕ್ಖುನಿಸಙ್ಘೋ ಓವಾದೂಪಸಙ್ಕಮನ’ನ್ತಿ. ತೇನ ಭಿಕ್ಖುನಾ ಪಾತಿಮೋಕ್ಖುದ್ದೇಸಕೋ ಉಪಸಙ್ಕಮಿತ್ವಾ ಏವಮಸ್ಸ ವಚನೀಯೋ – ‘ಭಿಕ್ಖುನೀಸಙ್ಘೋ, ಭನ್ತೇ, ಭಿಕ್ಖುಸಙ್ಘಸ್ಸ ಪಾದೇ ವನ್ದತಿ, ಓವಾದೂಪಸಙ್ಕಮನಞ್ಚ ಯಾಚತಿ; ಲಭತು ಕಿರ, ಭನ್ತೇ, ಭಿಕ್ಖುನಿಸಙ್ಘೋ ಓವಾದೂಪಸಙ್ಕಮನ’ನ್ತಿ. ಪಾತಿಮೋಕ್ಖುದ್ದೇಸಕೇನ ವತ್ತಬ್ಬೋ – ‘ಅತ್ಥಿ ಕೋಚಿ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ’ತಿ? ಸಚೇ ಹೋತಿ ಕೋಚಿ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ, ಪಾತಿಮೋಕ್ಖುದ್ದೇಸಕೇನ ವತ್ತಬ್ಬೋ – ‘ಇತ್ಥನ್ನಾಮೋ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ, ತಂ ಭಿಕ್ಖುನಿಸಙ್ಘೋ ಉಪಸಙ್ಕಮತೂ’ತಿ. ಸಚೇ ನ ಹೋತಿ ಕೋಚಿ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ, ಪಾತಿಮೋಕ್ಖುದ್ದೇಸಕೇನ ವತ್ತಬ್ಬೋ – ‘ಕೋ ಆಯಸ್ಮಾ ಉಸ್ಸಹತಿ ಭಿಕ್ಖುನಿಯೋ ಓವದಿತು’ನ್ತಿ? ಸಚೇ ಕೋಚಿ ಉಸ್ಸಹತಿ ಭಿಕ್ಖುನಿಯೋ ಓವದಿತುಂ, ಸೋ ಚ ಹೋತಿ ಅಟ್ಠಹಙ್ಗೇಹಿ ಸಮನ್ನಾಗತೋ, ಸಮ್ಮನ್ನಿತ್ವಾ ವತ್ತಬ್ಬೋ – ‘ಇತ್ಥನ್ನಾಮೋ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ, ತಂ ಭಿಕ್ಖುನಿಸಙ್ಘೋ ಉಪಸಙ್ಕಮತೂ’ತಿ. ಸಚೇ ನ ಕೋಚಿ ಉಸ್ಸಹತಿ ಭಿಕ್ಖುನಿಯೋ ಓವದಿತುಂ, ಪಾತಿಮೋಕ್ಖುದ್ದೇಸಕೇನ ವತ್ತಬ್ಬೋ – ‘ನತ್ಥಿ ಕೋಚಿ ಭಿಕ್ಖು ಭಿಕ್ಖುನೋವಾದಕೋ ಸಮ್ಮತೋ, ಪಾಸಾದಿಕೇನ ಭಿಕ್ಖುನಿಸಙ್ಘೋ ಸಮ್ಪಾದೇತೂ’’ತಿ.

೪೧೪. ತೇನ ಖೋ ಪನ ಸಮಯೇನ ಭಿಕ್ಖೂ ಓವಾದಂ ನ ಗಣ್ಹನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದೋ ನ ಗಹೇತಬ್ಬೋ. ಯೋ ನ ಗಣ್ಹೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಬಾಲೋ ಹೋತಿ. ತಂ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚುಂ – ‘‘ಓವಾದಂ, ಅಯ್ಯ, ಗಣ್ಹಾಹೀ’’ತಿ. ‘‘ಅಹಞ್ಹಿ, ಭಗಿನೀ, ಬಾಲೋ; ಕಥಾಹಂ ಓವಾದಂ ಗಣ್ಹಾಮೀ’’ತಿ? ‘‘ಗಣ್ಹಾಹಯ್ಯ, ಓವಾದಂ; ಏವಞ್ಹಿ ಭಗವತಾ ಪಞ್ಞತ್ತಂ – ಭಿಕ್ಖೂಹಿ ಭಿಕ್ಖುನೀನಂ ಓವಾದೋ ಗಹೇತಬ್ಬೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಬಾಲಂ, ಅವಸೇಸೇಹಿ ಓವಾದಂ ಗಹೇತು’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ. ತಂ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚುಂ – ‘‘ಓವಾದಂ, ಅಯ್ಯ ಗಣ್ಹಾಹೀ’’ತಿ. ‘‘ಅಹಞ್ಹಿ, ಭಗಿನೀ, ಗಿಲಾನೋ; ಕಥಾಹಂ ಓವಾದಂ ಗಣ್ಹಾಮೀ’’ತಿ? ‘‘ಗಣ್ಹಾಹಯ್ಯ, ಓವಾದಂ; ಏವಞ್ಹಿ ಭಗವತಾ ಪಞ್ಞತ್ತಂ – ಠಪೇತ್ವಾ ಬಾಲಂ, ಅವಸೇಸೇಹಿ ಓವಾದೋ ಗಹೇತಬ್ಬೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಬಾಲಂ, ಠಪೇತ್ವಾ ಗಿಲಾನಂ, ಅವಸೇಸೇಹಿ ಓವಾದಂ ಗಹೇತು’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಮಿಕೋ ಹೋತಿ. ತಂ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚುಂ – ‘‘ಓವಾದಂ, ಅಯ್ಯ, ಗಣ್ಹಾಹೀ’’ತಿ. ‘‘ಅಹಞ್ಹಿ, ಭಗಿನೀ, ಗಮಿಕೋ; ಕಥಾಹಂ ಓವಾದಂ ಗಣ್ಹಾಮೀ’’ತಿ? ‘‘ಗಣ್ಹಾಹಯ್ಯ, ಓವಾದಂ; ಏವಞ್ಹಿ ಭಗವತಾ ಪಞ್ಞತ್ತಂ – ಠಪೇತ್ವಾ ಬಾಲಂ, ಠಪೇತ್ವಾ ಗಿಲಾನಂ, ಅವಸೇಸೇಹಿ ಓವಾದೋ ಗಹೇತಬ್ಬೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಬಾಲಂ, ಠಪೇತ್ವಾ ಗಿಲಾನಂ, ಠಪೇತ್ವಾ ಗಮಿಕಂ, ಅವಸೇಸೇಹಿ ಓವಾದಂ ಗಹೇತು’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅರಞ್ಞೇ ವಿಹರತಿ. ತಂ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚುಂ – ‘‘ಓವಾದಂ, ಅಯ್ಯ, ಗಣ್ಹಾಹೀ’’ತಿ. ‘‘ಅಹಞ್ಹಿ, ಭಗಿನೀ, ಅರಞ್ಞೇ ವಿಹರಾಮಿ; ಕಥಾಹಂ ಓವಾದಂ ಗಣ್ಹಾಮೀ’’ತಿ? ‘‘ಗಣ್ಹಾಹಯ್ಯ, ಓವಾದಂ; ಏವಞ್ಹಿ ಭಗವತಾ ಪಞ್ಞತ್ತಂ – ಠಪೇತ್ವಾ ಬಾಲಂ, ಠಪೇತ್ವಾ ಗಿಲಾನಂ, ಠಪೇತ್ವಾ ಗಮಿಕಂ, ಅವಸೇಸೇಹಿ ಓವಾದೋ ಗಹೇತಬ್ಬೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆರಞ್ಞಿಕೇನ ಭಿಕ್ಖುನಾ ಓವಾದಂ ಗಹೇತುಂ, ಸಙ್ಕೇತಞ್ಚ ಕಾತುಂ – ಅತ್ರ ಪತಿಹರಿಸ್ಸಾಮೀ’’ತಿ.

೪೧೫. ತೇನ ಖೋ ಪನ ಸಮಯೇನ ಭಿಕ್ಖೂ ಓವಾದಂ ಗಹೇತ್ವಾ ನ ಆರೋಚೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದೋ ನ ಆರೋಚೇತಬ್ಬೋ. ಯೋ ನ ಆರೋಚೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಓವಾದಂ ಗಹೇತ್ವಾ ನ ಪಚ್ಚಾಹರನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಓವಾದೋ ನ ಪಚ್ಚಾಹರಿತಬ್ಬೋ. ಯೋ ನ ಪಚ್ಚಾಹರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಸಙ್ಕೇತಂ ನ ಗಚ್ಛನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಸಙ್ಕೇತಂ ನ ಗನ್ತಬ್ಬಂ. ಯಾ ನ ಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೧೬. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ದೀಘಾನಿ ಕಾಯಬನ್ಧನಾನಿ ಧಾರೇನ್ತಿ, ತೇಹೇವ ಫಾಸುಕಾ ನಾಮೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ದೀಘಂ ಕಾಯಬನ್ಧನಂ ಧಾರೇತಬ್ಬಂ. ಯಾ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಏಕಪರಿಯಾಕತಂ [ಏಕಪರಿಯಾಯಕತಂ (ಸ್ಯಾ.)] ಕಾಯಬನ್ಧನಂ, ನ ಚ ತೇನ ಫಾಸುಕಾ ನಾಮೇತಬ್ಬಾ. ಯಾ ನಾಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ವಿಲೀವೇನ [ವಿಲಿವೇನ (ಕ.)] ಪಟ್ಟೇನ ಫಾಸುಕಾ ನಾಮೇನ್ತಿ…ಪೇ… ಚಮ್ಮಪಟ್ಟೇನ ಫಾಸುಕಾ ನಾಮೇನ್ತಿ. ದುಸ್ಸಪಟ್ಟೇನ ಫಾಸುಕಾ ನಾಮೇನ್ತಿ. ದುಸ್ಸವೇಣಿಯಾ ಫಾಸುಕಾ ನಾಮೇನ್ತಿ. ದುಸ್ಸವಟ್ಟಿಯಾ ಫಾಸುಕಾ ನಾಮೇನ್ತಿ. ಚೋಳಪಟ್ಟೇನ ಫಾಸುಕಾ ನಾಮೇನ್ತಿ. ಚೋಳವೇಣಿಯಾ ಫಾಸುಕಾ ನಾಮೇನ್ತಿ. ಚೋಳವಟ್ಟಿಯಾ ಫಾಸುಕಾ ನಾಮೇನ್ತಿ. ಸುತ್ತವೇಣಿಯಾ ಫಾಸುಕಾ ನಾಮೇನ್ತಿ. ಸುತ್ತವಟ್ಟಿಯಾ ಫಾಸುಕಾ ನಾಮೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ವಿಲೀವೇನ ಪಟ್ಟೇನ ಫಾಸುಕಾ ನಾಮೇತಬ್ಬಾ…ಪೇ… ನ ಸುತ್ತವಟ್ಟಿಯಾ ಫಾಸುಕಾ ನಾಮೇತಬ್ಬಾ. ಯಾ ನಾಮೇಯ್ಯ ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅಟ್ಠಿಲ್ಲೇನ ಜಘನಂ ಘಂಸಾಪೇನ್ತಿ…ಪೇ… ಗೋಹನುಕೇನ ಜಘನಂ ಕೋಟ್ಟಾಪೇನ್ತಿ, ಹತ್ಥಂ ಕೋಟ್ಟಾಪೇನ್ತಿ, ಹತ್ಥಕೋಚ್ಛಂ ಕೋಟ್ಟಾಪೇನ್ತಿ, ಪಾದಂ ಕೋಟ್ಟಾಪೇನ್ತಿ, ಪಾದಕೋಚ್ಛಂ ಕೋಟ್ಟಾಪೇನ್ತಿ, ಊರುಂ ಕೋಟ್ಟಾಪೇನ್ತಿ, ಮುಖಂ ಕೋಟ್ಟಾಪೇನ್ತಿ, ದನ್ತಮಂಸಂ ಕೋಟ್ಟಾಪೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅಟ್ಠಿಲ್ಲೇನ ಜಘನಂ ಘಂಸಾಪೇತಬ್ಬಂ…ಪೇ… ನ ದನ್ತಮಂಸಂ ಕೋಟ್ಟಾಪೇತಬ್ಬಂ. ಯಾ ಕೋಟ್ಟಾಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೧೭. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಮುಖಂ ಆಲಿಮ್ಪನ್ತಿ…ಪೇ… ಮುಖಂ ಉಮ್ಮದ್ದೇನ್ತಿ, ಮುಖಂ ಚುಣ್ಣೇನ್ತಿ, ಮನೋಸಿಲಿಕಾಯ ಮುಖಂ ಲಞ್ಛೇನ್ತಿ, ಅಙ್ಗರಾಗಂ ಕರೋನ್ತಿ, ಮುಖರಾಗಂ ಕರೋನ್ತಿ, ಅಙ್ಗರಾಗಮುಖರಾಗಂ ಕರೋನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಮುಖಂ ಆಲಿಮ್ಪಿತಬ್ಬಂ…ಪೇ… ನ ಮುಖಂ ಉಮ್ಮದ್ದಿತಬ್ಬಂ, ನ ಮುಖಂ ಚುಣ್ಣೇತಬ್ಬಂ, ನ ಮನೋಸಿಲಿಕಾಯ ಮುಖಂ ಲಞ್ಛಿತಬ್ಬಂ, ನ ಅಙ್ಗರಾಗೋ ಕಾತಬ್ಬೋ, ನ ಮುಖರಾಗೋ ಕಾತಬ್ಬೋ, ನ ಅಙ್ಗರಾಗಮುಖರಾಗೋ ಕಾತಬ್ಬೋ. ಯಾ ಕರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಅವಙ್ಗಂ [ಅಪಾಙ್ಗಂ (?)] ಕರೋನ್ತಿ…ಪೇ… ವಿಸೇಸಕಂ ಕರೋನ್ತಿ, ಓಲೋಕನಕೇನ ಓಲೋಕೇನ್ತಿ, ಸಾಲೋಕೇ ತಿಟ್ಠನ್ತಿ; ನಚ್ಚಂ [ಸನಚ್ಚಂ (ಸೀ. ಸ್ಯಾ.), ಸಮಜ್ಜಂ (ಕ.)] ಕಾರಾಪೇನ್ತಿ, ವೇಸಿಂ ವುಟ್ಠಾಪೇನ್ತಿ, ಪಾನಾಗಾರಂ ಠಪೇನ್ತಿ, ಸೂನಂ ಠಪೇನ್ತಿ, ಆಪಣಂ ಪಸಾರೇನ್ತಿ, ವಡ್ಢಿಂ ಪಯೋಜೇನ್ತಿ, ವಣಿಜ್ಜಂ ಪಯೋಜೇನ್ತಿ, ದಾಸಂ ಉಪಟ್ಠಾಪೇನ್ತಿ, ದಾಸಿಂ ಉಪಟ್ಠಾಪೇನ್ತಿ, ಕಮ್ಮಕಾರಂ ಉಪಟ್ಠಾಪೇನ್ತಿ, ಕಮ್ಮಕಾರಿಂ ಉಪಟ್ಠಾಪೇನ್ತಿ, ತಿರಚ್ಛಾನಗತಂ ಉಪಟ್ಠಾಪೇನ್ತಿ, ಹರೀತಕಪಕ್ಕಿಕಂ [ಹರೀತಕಪಣ್ಣಿಕಂ (ಕ.)] ಪಕಿಣನ್ತಿ, ನಮತಕಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅವಙ್ಗಂ ಕಾತಬ್ಬಂ…ಪೇ… ನ ವಿಸೇಸಕಂ ಕಾತಬ್ಬಂ, ನ ಓಲೋಕನಕೇನ ಓಲೋಕೇತಬ್ಬಂ, ನ ಸಾಲೋಕೇ ಠಾತಬ್ಬಂ, ನ ನಚ್ಚಂ ಕಾರಾಪೇತಬ್ಬಂ, ನ ವೇಸೀ ವುಟ್ಠಾಪೇತಬ್ಬಾ, ನ ಪಾನಾಗಾರಂ ಠಪೇತಬ್ಬಂ, ನ ಸೂನಾ ಠಪೇತಬ್ಬಾ, ನ ಆಪಣೋ ಪಸಾರೇತಬ್ಬೋ, ನ ವಡ್ಢಿ ಪಯೋಜೇತಬ್ಬಾ, ನ ವಣಿಜ್ಜಾ ಪಯೋಜೇತಬ್ಬಾ, ನ ದಾಸೋ ಉಪಟ್ಠಾಪೇತಬ್ಬೋ, ನ ದಾಸೀ ಉಪಟ್ಠಾಪೇತಬ್ಬಾ, ನ ಕಮ್ಮಕಾರೋ ಉಪಟ್ಠಾಪೇತಬ್ಬೋ, ನ ಕಮ್ಮಕಾರೀ ಉಪಟ್ಠಾಪೇತಬ್ಬಾ, ನ ತಿರಚ್ಛಾನಗತೋ ಉಪಟ್ಠಾಪೇತಬ್ಬೋ, ನ ಹರೀತಕಪಕ್ಕಿಕಂ ಪಕಿಣಿತಬ್ಬಂ, ನ ನಮತಕಂ ಧಾರೇತಬ್ಬಂ. ಯಾ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೧೮. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಸಬ್ಬನೀಲಕಾನಿ ಚೀವರಾನಿ ಧಾರೇನ್ತಿ…ಪೇ… ಸಬ್ಬಪೀತಕಾನಿ ಚೀವರಾನಿ ಧಾರೇನ್ತಿ, ಸಬ್ಬಲೋಹಿತಕಾನಿ ಚೀವರಾನಿ ಧಾರೇನ್ತಿ, ಸಬ್ಬಮಞ್ಜಿಟ್ಠಿಕಾನಿ ಚೀವರಾನಿ ಧಾರೇನ್ತಿ, ಸಬ್ಬಕಣ್ಹಾನಿ ಚೀವರಾನಿ ಧಾರೇನ್ತಿ, ಸಬ್ಬಮಹಾರಙ್ಗರತ್ತಾನಿ ಚೀವರಾನಿ ಧಾರೇನ್ತಿ, ಸಬ್ಬಮಹಾನಾಮರತ್ತಾನಿ ಚೀವರಾನಿ ಧಾರೇನ್ತಿ, ಅಚ್ಛಿನ್ನದಸಾನಿ ಚೀವರಾನಿ ಧಾರೇನ್ತಿ, ದೀಘದಸಾನಿ ಚೀವರಾನಿ ಧಾರೇನ್ತಿ, ಪುಪ್ಫದಸಾನಿ ಚೀವರಾನಿ ಧಾರೇನ್ತಿ, ಫಲದಸಾನಿ ಚೀವರಾನಿ ಧಾರೇನ್ತಿ, ಕಞ್ಚುಕಂ ಧಾರೇನ್ತಿ, ತಿರೀಟಕಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಸಬ್ಬನೀಲಕಾನಿ ಚೀವರಾನಿ ಧಾರೇತಬ್ಬಾನಿ…ಪೇ… ನ ತಿರೀಟಕಂ ಧಾರೇತಬ್ಬಂ. ಯಾ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೧೯. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಕಾಲಂ ಕರೋನ್ತೀ ಏವಮಾಹ – ‘‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಸಙ್ಘಸ್ಸ ಹೋತೂ’’ತಿ. ತತ್ಥ ಭಿಕ್ಖೂ ಚ ಭಿಕ್ಖುನಿಯೋ ಚ ವಿವದನ್ತಿ – ‘‘ಅಮ್ಹಾಕಂ ಹೋತಿ, ಅಮ್ಹಾಕಂ ಹೋತೀ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಭಿಕ್ಖುನೀ ಚೇ, ಭಿಕ್ಖವೇ, ಕಾಲಂ ಕರೋನ್ತೀ ಏವಂ ವದೇಯ್ಯ – ‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಸಙ್ಘಸ್ಸ ಹೋತೂ’ತಿ, ಅನಿಸ್ಸರೋ ತತ್ಥ ಭಿಕ್ಖುಸಙ್ಘೋ, ಭಿಕ್ಖುನಿಸಙ್ಘಸ್ಸೇವೇತಂ. ಸಿಕ್ಖಮಾನಾ ಚೇ, ಭಿಕ್ಖವೇ…ಪೇ… ಸಾಮಣೇರೀ ಚೇ, ಭಿಕ್ಖವೇ, ಕಾಲಂ ಕರೋನ್ತೀ ಏವಂ ವದೇಯ್ಯ – ‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಸಙ್ಘಸ್ಸ ಹೋತೂ’ತಿ, ಅನಿಸ್ಸರೋ ತತ್ಥ ಭಿಕ್ಖುಸಙ್ಘೋ, ಭಿಕ್ಖುನಿಸಙ್ಘಸ್ಸೇವೇತಂ. ಭಿಕ್ಖು ಚೇ, ಭಿಕ್ಖವೇ, ಕಾಲಂ ಕರೋನ್ತೋ ಏವಂ ವದೇಯ್ಯ – ‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಸಙ್ಘಸ್ಸ ಹೋತೂ’ತಿ, ಅನಿಸ್ಸರೋ ತತ್ಥ ಭಿಕ್ಖುನಿಸಙ್ಘೋ, ಭಿಕ್ಖುಸಙ್ಘಸ್ಸೇವೇತಂ. ಸಾಮಣೇರೋ ಚೇ, ಭಿಕ್ಖವೇ…ಪೇ… ಉಪಾಸಕೋ ಚೇ, ಭಿಕ್ಖವೇ…ಪೇ… ಉಪಾಸಿಕಾ ಚೇ, ಭಿಕ್ಖವೇ…ಪೇ… ಅಞ್ಞೋ ಚೇ, ಭಿಕ್ಖವೇ, ಕೋಚಿ ಕಾಲಂ ಕರೋನ್ತೋ ಏವಂ ವದೇಯ್ಯ – ‘ಮಮಚ್ಚಯೇನ ಮಯ್ಹಂ ಪರಿಕ್ಖಾರೋ ಸಙ್ಘಸ್ಸ ಹೋತೂ’ತಿ, ಅನಿಸ್ಸರೋ ತತ್ಥ ಭಿಕ್ಖುನಿಸಙ್ಘೋ, ಭಿಕ್ಖುಸಙ್ಘಸ್ಸೇವೇತ’’ನ್ತಿ.

೪೨೦. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಪುರಾಣಮಲ್ಲೀ ಭಿಕ್ಖುನೀಸು ಪಬ್ಬಜಿತಾ ಹೋತಿ. ಸಾ ರಥಿಕಾಯ ದುಬ್ಬಲಕಂ ಭಿಕ್ಖುಂ ಪಸ್ಸಿತ್ವಾ ಅಂಸಕೂಟೇನ ಪಹಾರಂ ದತ್ವಾ ಪಾತೇಸಿ [ಪವಟ್ಟೇಸಿ (ಸೀ.)]. ಭಿಕ್ಖೂ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ, ಭಿಕ್ಖುನೀ, ಭಿಕ್ಖುಸ್ಸ ಪಹಾರಂ ದಸ್ಸತೀ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಸ್ಸ ಪಹಾರೋ ದಾತಬ್ಬೋ. ಯಾ ದದೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಂ ಪಸ್ಸಿತ್ವಾ ದೂರತೋವ ಓಕ್ಕಮಿತ್ವಾ ಮಗ್ಗಂ ದಾತು’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಪವುತ್ಥಪತಿಕಾ ಜಾರೇನ ಗಬ್ಭಿನೀ ಹೋತಿ. ಸಾ ಗಬ್ಭಂ ಪಾತೇತ್ವಾ ಕುಲೂಪಿಕಂ ಭಿಕ್ಖುನಿಂ ಏತದವೋಚ – ‘‘ಹನ್ದಯ್ಯೇ, ಇಮಂ ಗಬ್ಭಂ ಪತ್ತೇನ ನೀಹರಾ’’ತಿ. ಅಥ ಖೋ ಸಾ ಭಿಕ್ಖುನೀ ತಂ ಗಬ್ಭಂ ಪತ್ತೇ ಪಕ್ಖಿಪಿತ್ವಾ ಸಙ್ಘಾಟಿಯಾ ಪಟಿಚ್ಛಾದೇತ್ವಾ ಅಗಮಾಸಿ. ತೇನ ಖೋ ಪನ ಸಮಯೇನ ಅಞ್ಞತರೇನ ಪಿಣ್ಡಚಾರಿಕೇನ ಭಿಕ್ಖುನಾ ಸಮಾದಾನಂ ಕತಂ ಹೋತಿ – ‘ಯಾಹಂ ಪಠಮಂ ಭಿಕ್ಖಂ ಲಭಿಸ್ಸಾಮಿ, ನ ತಂ ಅದತ್ವಾ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಪರಿಭುಞ್ಜಿಸ್ಸಾಮೀ’ತಿ. ಅಥ ಖೋ ಸೋ ಭಿಕ್ಖು ತಂ ಭಿಕ್ಖುನಿಂ ಪಸ್ಸಿತ್ವಾ ಏತದವೋಚ – ‘‘ಹನ್ದ, ಭಗಿನಿ, ಭಿಕ್ಖಂ ಪಟಿಗ್ಗಣ್ಹಾ’’ತಿ. ‘‘ಅಲಂ ಅಯ್ಯಾ’’ತಿ. ದುತಿಯಮ್ಪಿ ಖೋ…ಪೇ… ತತಿಯಮ್ಪಿ ಖೋ ಸೋ ಭಿಕ್ಖು ತಂ ಭಿಕ್ಖುನಿಂ ಏತದವೋಚ – ‘‘ಹನ್ದ, ಭಗಿನಿ, ಭಿಕ್ಖಂ ಪಟಿಗ್ಗಣ್ಹಾ’’ತಿ. ‘‘ಅಲಂ ಅಯ್ಯಾ’’ತಿ. ‘‘ಮಯಾ ಖೋ, ಭಗಿನಿ, ಸಮಾದಾನಂ ಕತಂ – ‘ಯಾಹಂ ಪಠಮಂ ಭಿಕ್ಖಂ ಲಭಿಸ್ಸಾಮಿ, ನ ತಂ ಅದತ್ವಾ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಪರಿಭುಞ್ಜಿಸ್ಸಾಮೀ’ತಿ. ಹನ್ದ, ಭಗಿನಿ, ಭಿಕ್ಖಂ ಪಟಿಗ್ಗಣ್ಹಾ’’ತಿ. ಅಥ ಖೋ ಸಾ ಭಿಕ್ಖುನೀ ತೇನ ಭಿಕ್ಖುನಾ ನಿಪ್ಪೀಳಿಯಮಾನಾ ನೀಹರಿತ್ವಾ ಪತ್ತಂ ದಸ್ಸೇಸಿ – ‘‘ಪಸ್ಸ, ಅಯ್ಯ, ಪತ್ತೇ ಗಬ್ಭಂ; ಮಾ ಚ ಕಸ್ಸಚಿ ಆರೋಚೇಸೀ’’ತಿ. ಅಥ ಖೋ ಸೋ ಭಿಕ್ಖು ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಪತ್ತೇನ ಗಬ್ಭಂ ನೀಹರಿಸ್ಸತೀ’’ತಿ! ಅಥ ಖೋ ಸೋ ಭಿಕ್ಖು ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಪತ್ತೇನ ಗಬ್ಭಂ ನೀಹರಿಸ್ಸತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪತ್ತೇನ ಗಬ್ಭೋ ನೀಹರಿತಬ್ಬೋ. ಯಾ ನೀಹರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಂ ಪಸ್ಸಿತ್ವಾ ನೀಹರಿತ್ವಾ ಪತ್ತಂ ದಸ್ಸೇತು’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಭಿಕ್ಖುಂ ಪಸ್ಸಿತ್ವಾ ಪರಿವತ್ತೇತ್ವಾ ಪತ್ತಮೂಲಂ ದಸ್ಸೇನ್ತಿ. ಭಿಕ್ಖೂ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಭಿಕ್ಖುಂ ಪಸ್ಸಿತ್ವಾ ಪರಿವತ್ತೇತ್ವಾ ಪತ್ತಮೂಲಂ ದಸ್ಸೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಂ ಪಸ್ಸಿತ್ವಾ ಪರಿವತ್ತೇತ್ವಾ ಪತ್ತಮೂಲಂ ದಸ್ಸೇತಬ್ಬಂ. ಯಾ ದಸ್ಸೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಂ ಪಸ್ಸಿತ್ವಾ ಉಕ್ಕುಜ್ಜಿತ್ವಾ ಪತ್ತಂ ದಸ್ಸೇತುಂ. ಯಞ್ಚ ಪತ್ತೇ ಆಮಿಸಂ ಹೋತಿ, ತೇನ ಚ ಭಿಕ್ಖು ನಿಮನ್ತೇತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಸಾವತ್ಥಿಯಂ ರಥಿಕಾಯ ಪುರಿಸಬ್ಯಞ್ಜನಂ ಛಡ್ಡಿತಂ ಹೋತಿ. ತಂ ಭಿಕ್ಖುನಿಯೋ ಸಕ್ಕಚ್ಚಂ ಉಪನಿಜ್ಝಾಯಿಂಸು. ಮನುಸ್ಸಾ ಉಕ್ಕುಟ್ಠಿಂ ಅಕಂಸು. ತಾ ಭಿಕ್ಖುನಿಯೋ ಮಙ್ಕೂ ಅಹೇಸುಂ. ಅಥ ಖೋ ತಾ ಭಿಕ್ಖುನಿಯೋ ಉಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಪುರಿಸಬ್ಯಞ್ಜನಂ ಉಪನಿಜ್ಝಾಯಿಸ್ಸನ್ತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪುರಿಸಬ್ಯಞ್ಜನಂ ಉಪನಿಜ್ಝಾಯಿತಬ್ಬಂ. ಯಾ ಉಪನಿಜ್ಝಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೨೧. ತೇನ ಖೋ ಪನ ಸಮಯೇನ ಮನುಸ್ಸಾ ಭಿಕ್ಖೂನಂ ಆಮಿಸಂ ದೇನ್ತಿ. ಭಿಕ್ಖೂ ಭಿಕ್ಖುನೀನಂ ದೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭದನ್ತಾ ಅತ್ತನೋ ಪರಿಭೋಗತ್ಥಾಯ ದಿನ್ನಂ ಅಞ್ಞೇಸಂ ದಸ್ಸನ್ತಿ! ಮಯಮ್ಪಿ ನ ಜಾನಾಮ ದಾನಂ ದಾತು’’ನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅತ್ತನೋ ಪರಿಭೋಗತ್ಥಾಯ ದಿನ್ನಂ ಅಞ್ಞೇಸಂ ದಾತಬ್ಬಂ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂನಂ ಆಮಿಸಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಙ್ಘಸ್ಸ ದಾತು’’ನ್ತಿ. ಬಾಳ್ಹತರಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪುಗ್ಗಲಿಕಮ್ಪಿ ದಾತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂನಂ ಸನ್ನಿಧಿಕತಂ ಆಮಿಸಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖೂನಂ ಸನ್ನಿಧಿಂ ಭಿಕ್ಖುನೀಹಿ [ಭಿಕ್ಖುನೀಹಿ ಭಿಕ್ಖೂಹಿ (ಸೀ.)] ಪಟಿಗ್ಗಾಹಾಪೇತ್ವಾ [ಪಟಿಗ್ಗಹಾಪೇತ್ವಾ (ಕ.)] ಪರಿಭುಞ್ಜಿತು’’ನ್ತಿ.

ತೇನ ಖೋ ಪನ ಸಮಯೇನ ಮನುಸ್ಸಾ ಭಿಕ್ಖುನೀನಂ ಆಮಿಸಂ ದೇನ್ತಿ. ಭಿಕ್ಖುನಿಯೋ ಭಿಕ್ಖೂನಂ ದೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಅತ್ತನೋ ಪರಿಭೋಗತ್ಥಾಯ ದಿನ್ನಂ ಅಞ್ಞೇಸಂ ದಸ್ಸನ್ತಿ! ಮಯಮ್ಪಿ ನ ಜಾನಾಮ ದಾನಂ ದಾತು’’ನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅತ್ತನೋ ಪರಿಭೋಗತ್ಥಾಯ ದಿನ್ನಂ ಅಞ್ಞೇಸಂ ದಾತಬ್ಬಂ. ಯಾ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನೀನಂ ಆಮಿಸಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಙ್ಘಸ್ಸ ದಾತು’’ನ್ತಿ. ಬಾಳ್ಹತರಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪುಗ್ಗಲಿಕಮ್ಪಿ ದಾತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನೀನಂ ಸನ್ನಿಧಿಕತಂ ಆಮಿಸಂ ಉಸ್ಸನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖುನೀನಂ ಸನ್ನಿಧಿಂ ಭಿಕ್ಖೂಹಿ ಭಿಕ್ಖುನೀಹಿ [ಭಿಕ್ಖೂಹಿ ಭಿಕ್ಖುನೀಹಿ (ಸೀ.)] ಪಟಿಗ್ಗಾಹಾಪೇತ್ವಾ ಪರಿಭುಞ್ಜಿತು’’ನ್ತಿ.

೪೨೨. ತೇನ ಖೋ ಪನ ಸಮಯೇನ ಭಿಕ್ಖೂನಂ ಸೇನಾಸನಂ ಉಸ್ಸನ್ನಂ ಹೋತಿ, ಭಿಕ್ಖುನೀನಂ [ಭಿಕ್ಖುನೀನಂ ಸೇನಾಸನಂ (ಸ್ಯಾ. ಕಂ.)] ನ ಹೋತಿ. ಭಿಕ್ಖುನಿಯೋ ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸುಂ – ‘ಸಾಧು, ಭನ್ತೇ, ಅಯ್ಯಾ ಅಮ್ಹಾಕಂ ಸೇನಾಸನಂ ದೇನ್ತು ತಾವಕಾಲಿಕ’ನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖುನೀನಂ ಸೇನಾಸನಂ ದಾತುಂ ತಾವಕಾಲಿಕ’’ನ್ತಿ.

ತೇನ ಖೋ ಪನ ಸಮಯೇನ ಉತುನಿಯೋ ಭಿಕ್ಖುನಿಯೋ ಓನದ್ಧಮಞ್ಚಂ ಓನದ್ಧಪೀಠಂ ಅಭಿನಿಸೀದನ್ತಿಪಿ ಅಭಿನಿಪಜ್ಜನ್ತಿಪಿ. ಸೇನಾಸನಂ ಲೋಹಿತೇನ ಮಕ್ಖಿಯ್ಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಓನದ್ಧಮಞ್ಚಂ ಓನದ್ಧಪೀಠಂ ಅಭಿನಿಸೀದಿತಬ್ಬಂ ಅಭಿನಿಪಜ್ಜಿತಬ್ಬಂ. ಯಾ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಆವಸಥಚೀವರ’’ನ್ತಿ. ಆವಸಥಚೀವರಂ ಲೋಹಿತೇನ ಮಕ್ಖಿಯ್ಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆಣಿಚೋಳಕ’’ನ್ತಿ. ಚೋಳಕಂ ನಿಪತತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸುತ್ತಕೇನ ಬನ್ಧಿತ್ವಾ ಊರುಯಾ ಬನ್ಧಿತು’’ನ್ತಿ. ಸುತ್ತಂ ಛಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಂವೇಲ್ಲಿಯಂ, ಕಟಿಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಸಬ್ಬಕಾಲಂ ಕಟಿಸುತ್ತಕಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಸಬ್ಬಕಾಲಂ ಕಟಿಸುತ್ತಕಂ ಧಾರೇತಬ್ಬಂ. ಯಾ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಉತುನಿಯಾ ಕಟಿಸುತ್ತಕ’’ನ್ತಿ.

ದುತಿಯಭಾಣವಾರೋ ನಿಟ್ಠಿತೋ.