೩. ತತಿಯಭಾಣವಾರೋ

೪೨೩. ತೇನ ಖೋ ಪನ ಸಮಯೇನ ಉಪಸಮ್ಪನ್ನಾಯೋ ದಿಸ್ಸನ್ತಿ – ಅನಿಮಿತ್ತಾಪಿ, ನಿಮಿತ್ತಮತ್ತಾಪಿ, ಅಲೋಹಿತಾಪಿ, ಧುವಲೋಹಿತಾಪಿ, ಧುವಚೋಳಾಪಿ, ಪಗ್ಘರನ್ತೀಪಿ, ಸಿಖರಿಣೀಪಿ, ಇತ್ಥಿಪಣ್ಡಕಾಪಿ, ವೇಪುರಿಸಿಕಾಪಿ, ಸಮ್ಭಿನ್ನಾಪಿ, ಉಭತೋಬ್ಯಞ್ಜನಾಪಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉಪಸಮ್ಪಾದೇನ್ತಿಯಾ ಚತುವೀಸತಿ ಅನ್ತರಾಯಿಕೇ ಧಮ್ಮೇ ಪುಚ್ಛಿತುಂ. ಏವಞ್ಚ ಪನ, ಭಿಕ್ಖವೇ, ಪುಚ್ಛಿತಬ್ಬಾ – ‘ನಸಿ ಅನಿಮಿತ್ತಾ, ನಸಿ ನಿಮಿತ್ತಮತ್ತಾ, ನಸಿ ಅಲೋಹಿತಾ, ನಸಿ ಧುವಲೋಹಿತಾ, ನಸಿ ಧುವಚೋಳಾ, ನಸಿ ಪಗ್ಘರನ್ತೀ, ನಸಿ ಸಿಖರಣೀ [ಸಿಖರಿಣೀ (ಸೀ. ಸ್ಯಾ.)], ನಸಿ ಇತ್ಥಿಪಣ್ಡಕಾ, ನಸಿ ವೇಪುರಿಸಿಕಾ, ನಸಿ ಸಮ್ಭಿನ್ನಾ, ನಸಿ ಉಭತೋಬ್ಯಞ್ಜನಾ? ಸನ್ತಿ ತೇ ಏವರೂಪಾ ಆಬಾಧಾ – ಕುಟ್ಠಂ, ಗಣ್ಡೋ, ಕಿಲಾಸೋ, ಸೋಸೋ, ಅಪಮಾರೋ? ಮನುಸ್ಸಾಸಿ, ಇತ್ಥೀಸಿ, ಭುಜಿಸ್ಸಾಸಿ, ಅಣಣಾಸಿ, ನಸಿ ರಾಜಭಟೀ? ಅನುಞ್ಞಾತಾಸಿ ಮಾತಾಪಿತೂಹಿ, ಸಾಮಿಕೇನ? ಪರಿಪುಣ್ಣವೀಸತಿವಸ್ಸಾಸಿ, ಪರಿಪುಣ್ಣಂ ತೇ ಪತ್ತಚೀವರಂ, ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀ’’ತಿ?

ತೇನ ಖೋ ಪನ ಸಮಯೇನ ಭಿಕ್ಖೂ ಭಿಕ್ಖುನೀನಂ ಅನ್ತರಾಯಿಕೇ ಧಮ್ಮೇ ಪುಚ್ಛನ್ತಿ. ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏಕತೋಉಪಸಮ್ಪನ್ನಾಯ ಭಿಕ್ಖುನಿಸಙ್ಘೇ ವಿಸುದ್ಧಾಯ ಭಿಕ್ಖುಸಙ್ಘೇ ಉಪಸಮ್ಪಾದೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅನನುಸಿಟ್ಠಾ ಉಪಸಮ್ಪದಾಪೇಕ್ಖಾಯೋ ಅನ್ತರಾಯಿಕೇ ಧಮ್ಮೇ ಪುಚ್ಛನ್ತಿ. ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಠಮಂ ಅನುಸಾಸಿತ್ವಾ ಪಚ್ಛಾ ಅನ್ತರಾಯಿಕೇ ಧಮ್ಮೇ ಪುಚ್ಛಿತು’’ನ್ತಿ.

ತತ್ಥೇವ ಸಙ್ಘಮಜ್ಝೇ ಅನುಸಾಸನ್ತಿ. ಉಪಸಮ್ಪದಾಪೇಕ್ಖಾಯೋ ತಥೇವ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏಕಮನ್ತಂ ಅನುಸಾಸಿತ್ವಾ ಸಙ್ಘಮಜ್ಝೇ ಅನ್ತರಾಯಿಕೇ ಧಮ್ಮೇ ಪುಚ್ಛಿತುಂ. ಏವಞ್ಚ ಪನ, ಭಿಕ್ಖವೇ, ಅನುಸಾಸಿತಬ್ಬಾ.

೪೨೪. ‘‘ಪಠಮಂ ಉಪಜ್ಝಂ ಗಾಹಾಪೇತಬ್ಬಾ. ಉಪಜ್ಝಂ ಗಾಹಾಪೇತ್ವಾ ಪತ್ತಚೀವರಂ ಆಚಿಕ್ಖಿತಬ್ಬಂ – ‘ಅಯಂ ತೇ ಪತ್ತೋ, ಅಯಂ ಸಙ್ಘಾಟಿ, ಅಯಂ ಉತ್ತರಾಸಙ್ಗೋ, ಅಯಂ ಅನ್ತರವಾಸಕೋ, ಇದಂ ಸಂಕಚ್ಚಿಕಂ [ಸಙ್ಕಚ್ಛಿಕಂ (ಸ್ಯಾ.)], ಅಯಂ ಉದಕಸಾಟಿಕಾ; ಗಚ್ಛ ಅಮುಮ್ಹಿ ಓಕಾಸೇ ತಿಟ್ಠಾಹೀ’’ತಿ.

ಬಾಲಾ ಅಬ್ಯತ್ತಾ ಅನುಸಾಸನ್ತಿ. ದುರನುಸಿಟ್ಠಾ ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಬಾಲಾಯ ಅಬ್ಯತ್ತಾಯ ಅನುಸಾಸಿತಬ್ಬಾ. ಯಾ ಅನುಸಾಸೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಅನುಸಾಸಿತು’’ನ್ತಿ.

ಅಸಮ್ಮತಾ ಅನುಸಾಸನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಸಮ್ಮತಾಯ ಅನುಸಾಸಿತಬ್ಬಾ. ಯಾ ಅನುಸಾಸೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಸಮ್ಮತಾಯ ಅನುಸಾಸಿತುಂ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ – ಅತ್ತನಾ ವಾ ಅತ್ತಾನಂ ಸಮ್ಮನ್ನಿತಬ್ಬಂ, ಪರಾಯ ವಾ ಪರಾ ಸಮ್ಮನ್ನಿತಬ್ಬಾ.

‘‘ಕಥಞ್ಚ ಅತ್ತನಾವ [ಅತ್ತನಾ ವಾ (ಕ.)] ಅತ್ತಾನಂ ಸಮ್ಮನ್ನಿತಬ್ಬಂ? ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಇತ್ಥನ್ನಾಮಾ ಇತ್ಥನ್ನಾಮಂ ಅನುಸಾಸೇಯ್ಯ’ನ್ತಿ. ಏವಂ ಅತ್ತನಾವ ಅತ್ತಾನಂ ಸಮ್ಮನ್ನಿತಬ್ಬಂ.

‘‘ಕಥಞ್ಚ ಪರಾಯ [ಪರಾಯ ವಾ (ಕ.)] ಪರಾ ಸಮ್ಮನ್ನಿತಬ್ಬಾ? ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಇತ್ಥನ್ನಾಮಾ ಇತ್ಥನ್ನಾಮಂ ಅನುಸಾಸೇಯ್ಯಾ’ತಿ. ಏವಂ ಪರಾಯ ಪರಾ ಸಮ್ಮನ್ನಿತಬ್ಬಾ.

‘‘ತಾಯ ಸಮ್ಮತಾಯ ಭಿಕ್ಖುನಿಯಾ ಉಪಸಮ್ಪದಾಪೇಕ್ಖಂ ಉಪಸಙ್ಕಮಿತ್ವಾ ಏವಮಸ್ಸ ವಚನೀಯಾ – ‘ಸುಣಸಿ ಇತ್ಥನ್ನಾಮೇ. ಅಯಂ ತೇ ಸಚ್ಚಕಾಲೋ, ಭೂತಕಾಲೋ. ಯಂ ಜಾತಂ ತಂ ಸಙ್ಘಮಜ್ಝೇ ಪುಚ್ಛನ್ತೇ ಸನ್ತಂ ಅತ್ಥೀತಿ ವತ್ತಬ್ಬಂ, ಅಸನ್ತಂ ನತ್ಥೀತಿ ವತ್ತಬ್ಬಂ. ಮಾ ಖೋ ವಿತ್ಥಾಯಿ [ವಿತ್ಥಾಸಿ (ಕ.)], ಮಾ ಖೋ ಮಙ್ಕು ಅಹೋಸಿ. ಏವಂ ತಂ ಪುಚ್ಛಿಸ್ಸನ್ತಿ – ನಸಿ ಅನಿಮಿತ್ತಾ, ನಸಿ ನಿಮಿತ್ತಮತ್ತಾ, ನಸಿ ಅಲೋಹಿತಾ, ನಸಿ ಧುವಲೋಹಿತಾ, ನಸಿ ಧುವಚೋಳಾ, ನಸಿ ಪಗ್ಘರನ್ತೀ, ನಸಿ ಸಿಖರಿಣೀ, ನಸಿ ಇತ್ಥಿಪಣ್ಡಕಾ, ನಸಿ ವೇಪುರಿಸಿಕಾ, ನಸಿ ಸಮ್ಭಿನ್ನಾ, ನಸಿ ಉಭತೋಬ್ಯಞ್ಜನಾ? ಸನ್ತಿ ತೇ ಏವರೂಪಾ ಆಬಾಧಾ – ಕುಟ್ಠಂ, ಗಣ್ಡೋ, ಕಿಲಾಸೋ, ಸೋಸೋ, ಅಪಮಾರೋ? ಮನುಸ್ಸಾಸಿ, ಇತ್ಥೀಸಿ, ಭುಜಿಸ್ಸಾಸಿ, ಅಣಣಾಸಿ, ನಸಿ ರಾಜಭಟೀ? ಅನುಞ್ಞಾತಾಸಿ ಮಾತಾಪಿತೂಹಿ, ಸಾಮಿಕೇನ? ಪರಿಪುಣ್ಣವೀಸತಿವಸ್ಸಾಸಿ, ಪರಿಪುಣ್ಣಂ ತೇ ಪತ್ತಚೀವರಂ, ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀ’ತಿ?

‘‘ಏಕತೋ ಆಗಚ್ಛನ್ತಿ. ನ ಏಕತೋ ಆಗನ್ತಬ್ಬಂ. ಅನುಸಾಸಿಕಾಯ ಪಠಮತರಂ ಆಗನ್ತ್ವಾ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಅನುಸಿಟ್ಠಾ ಸಾ ಮಯಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಇತ್ಥನ್ನಾಮಾ ಆಗಚ್ಛೇಯ್ಯಾ’ತಿ. ‘ಆಗಚ್ಛಾಹೀ’ತಿ ವತ್ತಬ್ಬಾ.

‘‘ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ ಭಿಕ್ಖುನೀನಂ ಪಾದೇ ವನ್ದಾಪೇತ್ವಾ ಉಕ್ಕುಟಿಕಂ ನಿಸೀದಾಪೇತ್ವಾ ಅಞ್ಜಲಿಂ ಪಗ್ಗಣ್ಹಾಪೇತ್ವಾ ಉಪಸಮ್ಪದಂ ಯಾಚಾಪೇತಬ್ಬಾ – ‘ಸಙ್ಘಂ, ಅಯ್ಯೇ, ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯ. ದುತಿಯಮ್ಪಿ, ಅಯ್ಯೇ, ಸಙ್ಘಂ ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯ. ತತಿಯಮ್ಪಿ, ಅಯ್ಯೇ, ಸಙ್ಘಂ ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ. ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಇತ್ಥನ್ನಾಮಂ ಅನ್ತರಾಯಿಕೇ ಧಮ್ಮೇ ಪುಚ್ಛೇಯ್ಯನ್ತಿ.

‘‘ಸುಣಸಿ ಇತ್ಥನ್ನಾಮೇ. ಅಯಂ ತೇ ಸಚ್ಚಕಾಲೋ, ಭೂತಕಾಲೋ. ಯಂ ಜಾತಂ ತಂ ಪುಚ್ಛಾಮಿ ಸನ್ತಂ ಅತ್ಥೀತಿ ವತ್ತಬ್ಬಂ, ಅಸನ್ತಂ ನತ್ಥೀತಿ ವತ್ತಬ್ಬಂ. ನಸಿ ಅನಿಮಿತ್ತಾ…ಪೇ… ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀತಿ. ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

೪೨೫. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಏಸಾ ಞತ್ತಿ.

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ.

‘‘ಉಪಸಮ್ಪನ್ನಾ ಸಙ್ಘೇನ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

‘‘ತಾವದೇವ ತಂ ಆದಾಯ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ ಭಿಕ್ಖೂನಂ ಪಾದೇ ವನ್ದಾಪೇತ್ವಾ ಉಕ್ಕುಟಿಕಂ ನಿಸೀದಾಪೇತ್ವಾ ಅಞ್ಜಲಿಂ ಪಗ್ಗಣ್ಹಾಪೇತ್ವಾ ಉಪಸಮ್ಪದಂ ಯಾಚಾಪೇತಬ್ಬಾ – ‘ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ; ಸಙ್ಘಂ, ಅಯ್ಯಾ, ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ. ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ದುತಿಯಮ್ಪಿ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ. ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ತತಿಯಮ್ಪಿ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚಾಮಿ. ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ, ಇತ್ಥನ್ನಾಮಾಯ ಪವತ್ತಿನಿಯಾ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಉಪಸಮ್ಪನ್ನಾ ಸಙ್ಘೇನ ಇತ್ಥನ್ನಾಮಾ ಇತ್ಥನ್ನಾಮಾಯ ಪವತ್ತಿನಿಯಾ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

‘‘ತಾವದೇವ ಛಾಯಾ ಮೇತಬ್ಬಾ, ಉತುಪ್ಪಮಾಣಂ ಆಚಿಕ್ಖಿತಬ್ಬಂ, ದಿವಸಭಾಗೋ ಆಚಿಕ್ಖಿತಬ್ಬೋ, ಸಙ್ಗೀತಿ ಆಚಿಕ್ಖಿತಬ್ಬಾ, ಭಿಕ್ಖುನಿಯೋ ವತ್ತಬ್ಬಾ – ಇಮಿಸ್ಸಾ ತಯೋ ಚ ನಿಸ್ಸಯೇ, ಅಟ್ಠ ಚ ಅಕರಣೀಯಾನಿ ಆಚಿಕ್ಖೇಯ್ಯಾಥಾ’’ತಿ.

೪೨೬. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭತ್ತಗ್ಗೇ ಆಸನಂ ಸಂಕಸಾಯನ್ತಿಯೋ ಕಾಲಂ ವೀತಿನಾಮೇಸುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ – ಭಗವತಾ ಅನುಞ್ಞಾತಂ ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕನ್ತಿ – ಸಬ್ಬತ್ಥ ಅಟ್ಠೇವ ಭಿಕ್ಖುನಿಯೋ ಯಥಾವುಡ್ಢಂ ಪಟಿಬಾಹನ್ತಿ, ಅವಸೇಸಾಯೋ ಯಥಾಗತಿಕಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭತ್ತಗ್ಗೇ ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕಂ; ಅಞ್ಞತ್ಥ ಸಬ್ಬತ್ಥ ಯಥಾವುಡ್ಢಂ [ಅಞ್ಞತ್ಥ ಯಥಾವುಡ್ಢಂ (ಸ್ಯಾ.)] ನ ಪಟಿಬಾಹಿತಬ್ಬಂ. ಯಾ ಪಟಿಬಾಹೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೪೨೭. [ಪಾಚಿ. ೧೦೫೦ ಆದಯೋ] ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ನ ಪವಾರೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ನ ಪವಾರೇತಬ್ಬಂ. ಯಾ ನ ಪವಾರೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅತ್ತನಾ ಪವಾರೇತ್ವಾ ಭಿಕ್ಖುಸಙ್ಘಂ ನ ಪವಾರೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅತ್ತನಾ ಪವಾರೇತ್ವಾ ಭಿಕ್ಖುಸಙ್ಘೋ ನ ಪವಾರೇತಬ್ಬೋ. ಯಾ ನ ಪವಾರೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖೂಹಿ ಸದ್ಧಿಂ ಏಕತೋ ಪವಾರೇನ್ತಿಯೋ ಕೋಲಾಹಲಂ ಅಕಂಸು. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖೂಹಿ ಸದ್ಧಿಂ ಏಕತೋ ಪವಾರೇತಬ್ಬಂ. ಯಾ ಪವಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರೇಭತ್ತಂ ಪವಾರೇನ್ತಿಯೋ ಕಾಲಂ ವೀತಿನಾಮೇಸುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಚ್ಛಾಭತ್ತಂ [ಭಿಕ್ಖವೇ ಭಿಕ್ಖುನಿಯಾ ಪಚ್ಛಾಭತ್ತಂ (ಸ್ಯಾ. ಕಂ.)] ಪವಾರೇತು’’ನ್ತಿ. ಪಚ್ಛಾಭತ್ತಂ ಪವಾರೇನ್ತಿಯೋ ವಿಕಾಲೇ [ವಿಕಾಲಂ (ಕ.)] ಅಹೇಸುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಅಜ್ಜತನಾ ಭಿಕ್ಖುನಿಸಙ್ಘಂ [ಅಜ್ಜತನಾ (ಸೀ.), ಅಜ್ಜತನಾಯ (ಕ.)] ಪವಾರೇತ್ವಾ ಅಪರಜ್ಜು ಭಿಕ್ಖುಸಙ್ಘಂ ಪವಾರೇತು’’ನ್ತಿ.

ತೇನ ಖೋ ಪನ ಸಮಯೇನ ಸಬ್ಬೋ ಭಿಕ್ಖುನಿಸಙ್ಘೋ ಪವಾರೇನ್ತೋ ಕೋಲಾಹಲಂ ಅಕಾಸಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಬ್ಯತ್ತಂ ಪಟಿಬಲಂ ಸಮ್ಮನ್ನಿತುಂ – ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ. ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನೇಯ್ಯ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ. ಏಸಾ ಞತ್ತಿ.

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನತಿ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮ್ಮುತಿ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ.

‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

‘‘ತಾಯ ಸಮ್ಮತಾಯ ಭಿಕ್ಖುನಿಯಾ ಭಿಕ್ಖುನಿಸಙ್ಘಂ ಆದಾಯ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಭಿಕ್ಖುನೀಸಙ್ಘೋ, ಅಯ್ಯಾ, ಭಿಕ್ಖುಸಙ್ಘಂ ಪವಾರೇತಿ – ದಿಟ್ಠೇನ ವಾ, ಸುತೇನ ವಾ ಪರಿಸಙ್ಕಾಯ ವಾ. ವದತು [ವದತು ಮಂ (ಕ.)], ಅಯ್ಯಾ, ಭಿಕ್ಖುಸಙ್ಘೋ ಭಿಕ್ಖುನಿಸಙ್ಘಂ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸತಿ. ದುತಿಯಮ್ಪಿ, ಅಯ್ಯಾ…ಪೇ… ತತಿಯಮ್ಪಿ, ಅಯ್ಯಾ, ಭಿಕ್ಖುನಿಸಙ್ಘೋ ಭಿಕ್ಖುಸಙ್ಘಂ ಪವಾರೇತಿ – ದಿಟ್ಠೇನ ವಾ, ಸುತೇನ ವಾ, ಪರಿಸಙ್ಕಾಯ ವಾ. ವದತು, ಅಯ್ಯಾ, ಭಿಕ್ಖುಸಙ್ಘೋ ಭಿಕ್ಖುನಿಸಙ್ಘಂ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸತೀ’’ತಿ.

೪೨೮. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖೂನಂ ಉಪೋಸಥಂ ಠಪೇನ್ತಿ, ಪವಾರಣಂ ಠಪೇನ್ತಿ, ಸವಚನೀಯಂ ಕರೋನ್ತಿ, ಅನುವಾದಂ ಪಟ್ಠಪೇನ್ತಿ, ಓಕಾಸಂ ಕಾರೇನ್ತಿ, ಚೋದೇನ್ತಿ, ಸಾರೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಸ್ಸ ಉಪೋಸಥೋ ಠಪೇತಬ್ಬೋ; ಠಪಿತೋಪಿ ಅಟ್ಠಪಿತೋ; ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಪವಾರಣಾ ಠಪೇತಬ್ಬಾ; ಠಪಿತಾಪಿ ಅಟ್ಠಪಿತಾ; ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಸವಚನೀಯಂ ಕಾತಬ್ಬಂ; ಕತಮ್ಪಿ ಅಕತಂ; ಕರೋನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಅನುವಾದೋ ಪಟ್ಠಪೇತಬ್ಬೋ; ಪಟ್ಠಪಿತೋಪಿ ಅಪ್ಪಟ್ಠಪಿತೋ; ಪಟ್ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಓಕಾಸೋ ಕಾರೇತಬ್ಬೋ; ಕಾರಿತೋಪಿ ಅಕಾರಿತೋ; ಕಾರೇನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಚೋದೇತಬ್ಬೋ; ಚೋದಿತೋಪಿ ಅಚೋದಿತೋ; ಚೋದೇನ್ತಿಯಾ ಆಪತ್ತಿ ದುಕ್ಕಟಸ್ಸ. ನ ಸಾರೇತಬ್ಬೋ; ಸಾರಿತೋಪಿ ಅಸಾರಿತೋ; ಸಾರೇನ್ತಿಯಾ ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಭಿಕ್ಖುನೀನಂ ಉಪೋಸಥಂ ಠಪೇನ್ತಿ, ಪವಾರಣಂ ಠಪೇನ್ತಿ, ಸವಚನೀಯಂ ಕರೋನ್ತಿ, ಅನುವಾದಂ ಪಟ್ಠಪೇನ್ತಿ, ಓಕಾಸಂ ಕಾರೇನ್ತಿ, ಚೋದೇನ್ತಿ, ಸಾರೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ ಭಿಕ್ಖುನಾ ಭಿಕ್ಖುನಿಯಾ ಉಪೋಸಥಂ ಠಪೇತುಂ; ಠಪಿತೋಪಿ ಸುಟ್ಠಪಿತೋ; ಠಪೇನ್ತಸ್ಸ ಅನಾಪತ್ತಿ. ಪವಾರಣಂ ಠಪೇತುಂ; ಠಪಿತಾಪಿ ಸುಟ್ಠಪಿತಾ; ಠಪೇನ್ತಸ್ಸ ಅನಾಪತ್ತಿ. ಸವಚನೀಯಂ ಕಾತುಂ; ಕತಮ್ಪಿ ಸುಕತಂ; ಕರೋನ್ತಸ್ಸ ಅನಾಪತ್ತಿ. ಅನುವಾದಂ ಪಟ್ಠಪೇತುಂ; ಪಟ್ಠಪಿತೋಪಿ ಸುಪ್ಪಟ್ಠಪಿತೋ; ಪಟ್ಠಪೇನ್ತಸ್ಸ ಅನಾಪತ್ತಿ. ಓಕಾಸಂ ಕಾರೇತುಂ; ಕಾರಿತೋಪಿ ಸುಕಾರಿತೋ; ಕಾರೇನ್ತಸ್ಸ ಅನಾಪತ್ತಿ. ಚೋದೇತುಂ; ಚೋದಿತಾಪಿ ಸುಚೋದಿತಾ; ಚೋದೇನ್ತಸ್ಸ ಅನಾಪತ್ತಿ. ಸಾರೇತುಂ; ಸಾರಿತಾಪಿ ಸುಸಾರಿತಾ; ಸಾರೇನ್ತಸ್ಸ ಅನಾಪತ್ತೀ’’ತಿ.

೪೨೯. [ಪಾಚಿ. ೧೧೮೪] ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯನ್ತಿ – ಇತ್ಥಿಯುತ್ತೇನಪಿ ಪುರಿಸನ್ತರೇನ, ಪುರಿಸಯುತ್ತೇನಪಿ ಇತ್ಥನ್ತರೇನ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ‘‘ಸೇಯ್ಯಥಾಪಿ ಗಙ್ಗಾಮಹಿಯಾಯಾ’’ತಿ [ಗಙ್ಗಾಮಹಿಯಾತಿ (ಸೀ.)]. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಯಾನೇನ ಯಾಯಿತಬ್ಬಂ. ಯಾ ಯಾಯೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ, ನ ಸಕ್ಕೋತಿ ಪದಸಾ ಗನ್ತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಾಯ ಯಾನ’’ನ್ತಿ. ಅಥ ಖೋ ಭಿಕ್ಖುನೀನಂ ಏತದಹೋಸಿ – ‘‘ಇತ್ಥಿಯುತ್ತಂ ನು ಖೋ, ಪುರಿಸಯುತ್ತಂ ನು ಖೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಇತ್ಥಿಯುತ್ತಂ ಪುರಿಸಯುತ್ತಂ ಹತ್ಥವಟ್ಟಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಿಸ್ಸಾ ಭಿಕ್ಖುನಿಯಾ ಯಾನುಗ್ಘಾತೇನ ಬಾಳ್ಹತರಂ ಅಫಾಸು ಅಹೋಸಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಿವಿಕಂ ಪಾಟಙ್ಕಿ’’ನ್ತಿ.

೪೩೦. ತೇನ ಖೋ ಪನ ಸಮಯೇನ ಅಡ್ಢಕಾಸೀ ಗಣಿಕಾ ಭಿಕ್ಖುನೀಸು ಪಬ್ಬಜಿತಾ ಹೋತಿ. ಸಾ ಚ ಸಾವತ್ಥಿಂ ಗನ್ತುಕಾಮಾ ಹೋತಿ – ‘ಭಗವತೋ ಸನ್ತಿಕೇ ಉಪಸಮ್ಪಜ್ಜಿಸ್ಸಾಮೀ’ತಿ. ಅಸ್ಸೋಸುಂ ಖೋ ಧುತ್ತಾ – ‘ಅಡ್ಢಕಾಸೀ ಕಿರ ಗಣಿಕಾ ಸಾವತ್ಥಿಂ ಗನ್ತುಕಾಮಾ’ತಿ. ತೇ ಮಗ್ಗೇ ಪರಿಯುಟ್ಠಿಂಸು. ಅಸ್ಸೋಸಿ ಖೋ ಅಡ್ಢಕಾಸೀ ಗಣಿಕಾ – ‘ಧುತ್ತಾ ಕಿರ ಮಗ್ಗೇ ಪರಿಯುಟ್ಠಿತಾ’ತಿ. ಭಗವತೋ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಞ್ಹಿ ಉಪಸಮ್ಪಜ್ಜಿತುಕಾಮಾ; ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ದೂತೇನಪಿ ಉಪಸಮ್ಪಾದೇತು’’ನ್ತಿ.

ಭಿಕ್ಖುದೂತೇನ ಉಪಸಮ್ಪಾದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುದೂತೇನ ಉಪಸಮ್ಪಾದೇತಬ್ಬಾ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ. ಸಿಕ್ಖಮಾನದೂತೇನ ಉಪಸಮ್ಪಾದೇನ್ತಿ…ಪೇ… ಸಾಮಣೇರದೂತೇನ ಉಪಸಮ್ಪಾದೇನ್ತಿ…ಪೇ… ಸಾಮಣೇರಿದೂತೇನ ಉಪಸಮ್ಪಾದೇನ್ತಿ…ಪೇ… ಬಾಲಾಯ ಅಬ್ಯತ್ತಾಯ ದೂತೇನ ಉಪಸಮ್ಪಾದೇನ್ತಿ. ‘‘ನ, ಭಿಕ್ಖವೇ, ಬಾಲಾಯ ಅಬ್ಯತ್ತಾಯ ದೂತೇನ ಉಪಸಮ್ಪಾದೇತಬ್ಬಾ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ದೂತೇನ ಉಪಸಮ್ಪಾದೇತುನ್ತಿ.

‘‘ತಾಯ ದೂತಾಯ ಭಿಕ್ಖುನಿಯಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ಇತ್ಥನ್ನಾಮಾ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚತಿ. ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ. ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ದುತಿಯಮ್ಪಿ, ಅಯ್ಯಾ, ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ. ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ. ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ತತಿಯಮ್ಪಿ, ಅಯ್ಯಾ, ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ. ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ ಇತ್ಥನ್ನಾಮಾಯ ಪವತ್ತಿನಿಯಾ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ. ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ. ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ. ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ. ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ. ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ತಾವದೇವ ಛಾಯಾ ಮೇತಬ್ಬಾ, ಉತುಪ್ಪಮಾಣಂ ಆಚಿಕ್ಖಿತಬ್ಬಂ, ದಿವಸಭಾಗೋ ಆಚಿಕ್ಖಿತಬ್ಬೋ, ಸಙ್ಗೀತಿ ಆಚಿಕ್ಖಿತಬ್ಬಾ, ಭಿಕ್ಖುನಿಯೋ ವತ್ತಬ್ಬಾ – ತಸ್ಸಾ ತಯೋ ಚ ನಿಸ್ಸಯೇ, ಅಟ್ಠ ಚ ಅಕರಣೀಯಾನಿ ಆಚಿಕ್ಖೇಯ್ಯಾಥಾ’’ತಿ.

೪೩೧. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅರಞ್ಞೇ ವಿಹರನ್ತಿ. ಧುತ್ತಾ ದೂಸೇನ್ತಿ. ಭಗವತೋ ಏತಮತ್ಥಂ, ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅರಞ್ಞೇ ವತ್ಥಬ್ಬಂ. ಯಾ ವಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೇನ ಉಪಾಸಕೇನ ಭಿಕ್ಖುನಿಸಙ್ಘಸ್ಸ ಉದ್ದೋಸಿತೋ ದಿನ್ನೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉದ್ದೋಸಿತ’’ನ್ತಿ. ಉದ್ದೋಸಿತೋ ನ ಸಮ್ಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉಪಸ್ಸಯ’’ನ್ತಿ. ಉಪಸ್ಸಯೋ ನ ಸಮ್ಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ನವಕಮ್ಮ’’ನ್ತಿ. ನವಕಮ್ಮಂ ನ ಸಮ್ಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪುಗ್ಗಲಿಕಮ್ಪಿ ಕಾತು’’ನ್ತಿ.

೪೩೨. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಸನ್ನಿಸಿನ್ನಗಬ್ಭಾ ಭಿಕ್ಖುನೀಸು ಪಬ್ಬಜಿತಾ ಹೋತಿ. ತಸ್ಸಾ ಪಬ್ಬಜಿತಾಯ ಗಬ್ಭೋ ವುಟ್ಠಾತಿ. ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಕಥಂ ನು ಖೋ ಮಯಾ ಇಮಸ್ಮಿಂ ದಾರಕೇ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪೋಸೇತುಂ, ಯಾವ ಸೋ ದಾರಕೋ ವಿಞ್ಞುತಂ ಪಾಪುಣಾತೀ’’ತಿ.

ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಮಯಾ ಚ ನ ಲಬ್ಭಾ ಏಕಿಕಾಯ ವತ್ಥುಂ, ಅಞ್ಞಾಯ ಚ ಭಿಕ್ಖುನಿಯಾ ನ ಲಬ್ಭಾ ದಾರಕೇನ ಸಹ ವತ್ಥುಂ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಸಮ್ಮನ್ನಿತ್ವಾ ತಸ್ಸಾ ಭಿಕ್ಖುನಿಯಾ ದುತಿಯಂ ದಾತುಂ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ. ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನೇಯ್ಯ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ. ಏಸಾ ಞತ್ತಿ.

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮ್ಮುತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ.

‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಅಥ ಖೋ ತಸ್ಸಾ ದುತಿಯಿಕಾಯ ಭಿಕ್ಖುನಿಯಾ ಏತದಹೋಸಿ – ‘‘ಕಥಂ ನು ಖೋ ಮಯಾ ಇಮಸ್ಮಿಂ ದಾರಕೇ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಸಾಗಾರಂ ಯಥಾ ಅಞ್ಞಸ್ಮಿಂ ಪುರಿಸೇ ಪಟಿಪಜ್ಜನ್ತಿ [ಪಟಿಪಜ್ಜತಿ (ಸ್ಯಾ.)] ಏವಂ ತಸ್ಮಿಂ ದಾರಕೇ ಪಟಿಪಜ್ಜಿತು’’ನ್ತಿ.

೪೩೩. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗರುಧಮ್ಮಂ ಅಜ್ಝಾಪನ್ನಾ ಹೋತಿ ಮಾನತ್ತಚಾರಿನೀ. ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಮಯಾ ಚ ನ ಲಬ್ಭಾ ಏಕಿಕಾಯ ವತ್ಥುಂ, ಅಞ್ಞಾಯ ಚ ಭಿಕ್ಖುನಿಯಾ ನ ಲಬ್ಭಾ ಸಹ ಮಯಾ ವತ್ಥುಂ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಸಮ್ಮನ್ನಿತ್ವಾ ತಸ್ಸಾ ಭಿಕ್ಖುನಿಯಾ ದುತಿಯಂ ದಾತುಂ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ. ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

೪೩೪. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಸಿಕ್ಖಂ ಪಚ್ಚಕ್ಖಾಯ ವಿಬ್ಭಮಿ. ಸಾ ಪುನ ಪಚ್ಚಾಗನ್ತ್ವಾ ಭಿಕ್ಖುನಿಯೋ ಉಪಸಮ್ಪದಂ ಯಾಚಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಸಿಕ್ಖಾಪಚ್ಚಕ್ಖಾನಂ; ಯದೇವ ಸಾ ವಿಬ್ಭನ್ತಾ ತದೇವ ಸಾ ಅಭಿಕ್ಖುನೀ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಸಕಾವಾಸಾ ತಿತ್ಥಾಯತನಂ ಸಙ್ಕಮಿ. ಸಾ ಪುನ ಪಚ್ಚಾಗನ್ತ್ವಾ ಭಿಕ್ಖುನಿಯೋ ಉಪಸಮ್ಪದಂ ಯಾಚಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಯಾ ಸಾ, ಭಿಕ್ಖವೇ, ಭಿಕ್ಖುನೀ ಸಕಾವಾಸಾ ತಿತ್ಥಾಯತನಂ ಸಙ್ಕನ್ತಾ, ಸಾ ಆಗತಾ ನ ಉಪಸಮ್ಪಾದೇತಬ್ಬಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರಿಸೇಹಿ ಅಭಿವಾದನಂ, ಕೇಸಚ್ಛೇದನಂ, ನಖಚ್ಛೇದನಂ, ವಣಪ್ಪಟಿಕಮ್ಮಂ, ಕುಕ್ಕುಚ್ಚಾಯನ್ತಾ ನ ಸಾದಿಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಾದಿತು’’ನ್ತಿ [ಸಾದಿಯಿತುಂ (ಕ.)].

೪೩೫. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪಲ್ಲಙ್ಕೇನ ನಿಸೀದನ್ತಿ ಪಣ್ಹೀಸಮ್ಫಸ್ಸಂ ಸಾದಿಯನ್ತೀ [ಸಾದಿಯನ್ತಾ (ಕ.)]. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪಲ್ಲಙ್ಕೇನ ನಿಸೀದಿತಬ್ಬಂ. ಯಾ ನಿಸೀದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ. ತಸ್ಸಾ ವಿನಾ ಪಲ್ಲಙ್ಕೇನ ನ ಫಾಸು ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಅಡ್ಢಪಲ್ಲಙ್ಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ವಚ್ಚಕುಟಿಯಾ ವಚ್ಚಂ ಕರೋನ್ತಿ. ಛಬ್ಬಗ್ಗಿಯಾ ಭಿಕ್ಖುನಿಯೋ ತತ್ಥೇವ ಗಬ್ಭಂ ಪಾತೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ವಚ್ಚಕುಟಿಯಾ ವಚ್ಚೋ ಕಾತಬ್ಬೋ. ಯಾ ಕರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಹೇಟ್ಠಾ ವಿವಟೇ ಉಪರಿಪಟಿಚ್ಛನ್ನೇ ವಚ್ಚಂ ಕಾತು’’ನ್ತಿ.

೪೩೬. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಚುಣ್ಣೇನ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಚುಣ್ಣೇನ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಕುಕ್ಕುಸಂ ಮತ್ತಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ವಾಸಿತಕಾಯ ಮತ್ತಿಕಾಯ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ವಾಸಿತಕಾಯ ಮತ್ತಿಕಾಯ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಪಕತಿಮತ್ತಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಜನ್ತಾಘರೇ ನಹಾಯನ್ತಿಯೋ ಕೋಲಾಹಲಂ ಅಕಂಸು. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಜನ್ತಾಘರೇ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪಟಿಸೋತೇ ನಹಾಯನ್ತಿ ಧಾರಾಸಮ್ಫಸ್ಸಂ ಸಾದಿಯನ್ತೀ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪಟಿಸೋತೇ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅತಿತ್ಥೇ ನಹಾಯನ್ತಿ. ಧುತ್ತಾ ದೂಸೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅತಿತ್ಥೇ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರಿಸತಿತ್ಥೇ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪುರಿಸತಿತ್ಥೇ ನಹಾಯಿತಬ್ಬಂ. ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಮಹಿಲಾತಿತ್ಥೇ ನಹಾಯಿತು’’ನ್ತಿ.

ತತಿಯಭಾಣವಾರೋ ನಿಟ್ಠಿತೋ.

ಭಿಕ್ಖುನಿಕ್ಖನ್ಧಕೋ ದಸಮೋ.

ಇಮಸ್ಮಿಂ ಖನ್ಧಕೇ ವತ್ಥೂ ಏಕಸತಂ.

ತಸ್ಸುದ್ದಾನಂ –

ಪಬ್ಬಜ್ಜಂ ಗೋತಮೀ ಯಾಚಿ, ನಾನುಞ್ಞಾಸಿ ತಥಾಗತೋ;

ಕಪಿಲವತ್ಥು ವೇಸಾಲಿಂ, ಅಗಮಾಸಿ ವಿನಾಯಕೋ.

ರಜೋಕಿಣ್ಣೇನ ಕೋಟ್ಠಕೇ, ಆನನ್ದಸ್ಸ ಪವೇದಯಿ;

ಭಬ್ಬೋತಿ ನಯತೋ ಯಾಚಿ, ಮಾತಾತಿ ಪೋಸಿಕಾತಿ ಚ.

ವಸ್ಸಸತಂ ತದಹು ಚ, ಅಭಿಕ್ಖುಪಚ್ಚಾಸೀಸನಾ;

ಪವಾರಣಾ ಗರುಧಮ್ಮಾ, ದ್ವೇ ವಸ್ಸಾ ಅನಕ್ಕೋಸನಾ.

ಓವಟೋ ಚ ಅಟ್ಠ ಧಮ್ಮಾ, ಯಾವಜೀವಾನುವತ್ತನಾ;

ಗರುಧಮ್ಮಪಟಿಗ್ಗಾಹೋ ಸಾವಸ್ಸಾ ಉಪಸಮ್ಪದಾ.

ವಸ್ಸಸಹಸ್ಸಂ ಪಞ್ಚೇವ, ಕುಮ್ಭಥೇನಕಸೇತಟ್ಟಿ;

ಮಞ್ಜಿಟ್ಠಿಕಉಪಮಾಹಿ, ಏವಂ ಸದ್ಧಮ್ಮಹಿಂಸನಾ.

ಆಳಿಂ ಬನ್ಧೇಯ್ಯ ಪಾಏವ, ಪುನ ಸದ್ಧಮ್ಮಸಣ್ಠಿತಿ;

ಉಪಸಮ್ಪಾದೇತುಂ ಅಯ್ಯಾ, ಯಥಾವುಡ್ಢಾಭಿವಾದನಾ.

ನ ಕರಿಸ್ಸನ್ತಿ ಕಿಮೇವ, ಸಾಧಾರಣಾಸಾಧಾರಣಂ;

ಓವಾದಂ ಪಾತಿಮೋಕ್ಖಞ್ಚ, ಕೇನ ನು ಖೋ ಉಪಸ್ಸಯಂ.

ನ ಜಾನನ್ತಿ ಚ ಆಚಿಕ್ಖಿ, ನ ಕರೋನ್ತಿ ಚ ಭಿಕ್ಖುಹಿ;

ಪಟಿಗ್ಗಹೇತುಂ ಭಿಕ್ಖೂಹಿ, ಭಿಕ್ಖುನೀಹಿ ಪಟಿಗ್ಗಹೋ.

ಆಚಿಕ್ಖಿ ಕಮ್ಮಂ ಭಿಕ್ಖೂಹಿ, ಉಜ್ಝಾಯನ್ತಿ ಭಿಕ್ಖುನೀಹಿ ವಾ;

ಆಚಿಕ್ಖಿತುಂ ಭಣ್ಡನಞ್ಚ, ರೋಪೇತ್ವಾ ಉಪ್ಪಲಾಯ ಚ.

ಸಾವತ್ಥಿಯಾ ಕದ್ದಮೋದ, ಅವನ್ದಿ ಕಾಯ ಊರು ಚ;

ಅಙ್ಗಜಾತಞ್ಚ ಓಭಾಸಂ, ಸಮ್ಪಯೋಜೇನ್ತಿ ವಗ್ಗಿಕಾ.

ಅವನ್ದಿಯೋ ದಣ್ಡಕಮ್ಮಂ, ಭಿಕ್ಖುನಿಯೋ ತಥಾ ಪುನ;

ಆವರಣಞ್ಚ ಓವಾದಂ, ಕಪ್ಪತಿ ನು ಖೋ ಪಕ್ಕಮಿ.

ಬಾಲಾ ವತ್ಥುವಿನಿಚ್ಛಯಾ, ಓವಾದಂ ಸಙ್ಘೋ ಪಞ್ಚಹಿ;

ದುವೇ ತಿಸ್ಸೋ ನ ಗಣ್ಹನ್ತಿ, ಬಾಲಾ ಗಿಲಾನಗಮಿಕಂ.

ಆರಞ್ಞಿಕೋ ನಾರೋಚೇನ್ತಿ, ನ ಪಚ್ಚಾಗಚ್ಛನ್ತಿ ಚ;

ದೀಘಂ ವಿಲೀವಚಮ್ಮಞ್ಚ, ದುಸ್ಸಾ ಚ ವೇಣಿವಟ್ಟಿ ಚ;

ಚೋಳವೇಣಿ ಚ ವಟ್ಟಿ ಚ, ಸುತ್ತವೇಣಿ ಚ ವಟ್ಟಿಕಾ.

ಅಟ್ಠಿಲ್ಲಂ ಗೋಹನುಕೇನ, ಹತ್ಥಕೋಚ್ಛಂ ಪಾದಂ ತಥಾ;

ಊರುಂ ಮುಖಂ ದನ್ತಮಂಸಂ, ಆಲಿಮ್ಪೋಮದ್ದಚುಣ್ಣನಾ.

ಲಞ್ಛೇನ್ತಿ ಅಙ್ಗರಾಗಞ್ಚ, ಮುಖರಾಗಂ ತಥಾ ದುವೇ;

ಅವಙ್ಗಂ ವಿಸೇಸೋಲೋಕೋ, ಸಾಲೋಕೇನ ನಚ್ಚೇನ ಚ [ಸಾಲೋಕೇ ಸನಚ್ಚೇನ ಚ (ಸೀ.), ಸಾಲೋಕೇನ ಸನಚ್ಚನಂ (ಸ್ಯಾ.)].

ವೇಸೀ ಪಾನಾಗಾರಂ ಸೂನಂ, ಆಪಣಂ ವಡ್ಢಿ ವಣಿಜ್ಜಾ;

ದಾಸಂ ದಾಸಿಂ ಕಮ್ಮಕರಂ, ಕಮ್ಮಕಾರಿಂ ಉಪಟ್ಠಯ್ಯುಂ.

ತಿರಚ್ಛಾನಹರೀತಕಿ, ಸನ್ಧಾರಯನ್ತಿ ನಮತಕಂ;

ನೀಲಂ ಪೀತಂ ಲೋಹಿತಕಂ, ಮಞ್ಜಿಟ್ಠಕಣ್ಹಚೀವರಾ.

ಮಹಾರಙ್ಗಮಹಾನಾಮಅಚ್ಛಿನ್ನಾ ದೀಘಮೇವ ಚ;

ಪುಪ್ಫಫಲಕಞ್ಚುಕಞ್ಚ, ತಿರೀಟಕಞ್ಚ ಧಾರಯುಂ.

ಭಿಕ್ಖುನೀ ಸಿಕ್ಖಮಾನಾಯ, ಸಾಮಣೇರಾಯ ಅಚ್ಚಯೇ;

ನಿಯ್ಯಾದಿತೇ ಪರಿಕ್ಖಾರೇ, ಭಿಕ್ಖುನಿಯೋವ ಇಸ್ಸರಾ.

ಭಿಕ್ಖುಸ್ಸ ಸಾಮಣೇರಸ್ಸ, ಉಪಾಸಕಸ್ಸುಪಾಸಿಕಾ;

ಅಞ್ಞೇಸಞ್ಚ ಪರಿಕ್ಖಾರೇ, ನಿಯ್ಯಾತೇ ಭಿಕ್ಖುಇಸ್ಸರಾ.

ಮಲ್ಲೀ ಗಬ್ಭಂ ಪತ್ತಮೂಲಂ, ಬ್ಯಞ್ಜನಂ ಆಮಿಸೇನ ಚ;

ಉಸ್ಸನ್ನಞ್ಚ ಬಾಳ್ಹತರಂ, ಸನ್ನಿಧಿಕತಮಾಮಿಸಂ.

ಭಿಕ್ಖೂನಂ ಯಾದಿಸಂ ಭೋಟ್ಠಂ [ಹೇಟ್ಠಾ (ಸೀ.), ಹೇಟ್ಠಂ (ಸ್ಯಾ.), ಭುತ್ತಿ (ಕ.)], ಭಿಕ್ಖುನೀನಂ ತಥಾ ಕರೇ;

ಸೇನಾಸನಂ ಉತುನಿಯೋ, ಮಕ್ಖೀಯತಿ ಪಟಾಣಿ ಚ.

ಛಿಜ್ಜನ್ತಿ ಸಬ್ಬಕಾಲಞ್ಚ, ಅನಿಮಿತ್ತಾಪಿ ದಿಸ್ಸರೇ;

ನಿಮಿತ್ತಾ ಲೋಹಿತಾ ಚೇವ, ತಥೇವ ಧುವಲೋಹಿತಾ.

ಧುವಚೋಳಪಗ್ಘರನ್ತೀ, ಸಿಖರಣಿತ್ಥಿಪಣ್ಡಕಾ;

ವೇಪುರಿಸೀ ಚ ಸಮ್ಭಿನ್ನಾ, ಉಭತೋಬ್ಯಞ್ಜನಾಪಿ ಚ.

ಅನಿಮಿತ್ತಾದಿತೋ ಕತ್ವಾ, ಯಾವ ಉಭತೋಬ್ಯಞ್ಜನಾ;

ಏತಂ ಪೇಯ್ಯಾಲತೋ ಹೇಟ್ಠಾ, ಕುಟ್ಠಂ ಗಣ್ಡೋ ಕಿಲಾಸೋ ಚ.

ಸೋಸಾಪಮಾರೋ ಮಾನುಸೀ, ಇತ್ಥೀಸಿ ಭುಜಿಸ್ಸಾಸಿ ಚ;

ಅಣಣಾ ನ ರಾಜಭಟೀ, ಅನುಞ್ಞಾತಾ ಚ ವೀಸತಿ.

ಪರಿಪುಣ್ಣಾ ಚ ಕಿನ್ನಾಮಾ, ಕಾನಾಮಾ ತೇ ಪವತ್ತಿನೀ;

ಚತುವೀಸನ್ತರಾಯಾನಂ, ಪುಚ್ಛಿತ್ವಾ ಉಪಸಮ್ಪದಾ.

ವಿತ್ಥಾಯನ್ತಿ ಅನನುಸಿಟ್ಠಾ, ಸಙ್ಘಮಜ್ಝೇ ತಥೇವ ಚ;

ಉಪಜ್ಝಾಗಾಹ ಸಙ್ಘಾಟಿ, ಉತ್ತರನ್ತರವಾಸಕೋ.

ಸಙ್ಕಚ್ಚುದಕಸಾಟಿ ಚ, ಆಚಿಕ್ಖಿತ್ವಾನ ಪೇಸಯೇ;

ಬಾಲಾ ಅಸಮ್ಮತೇಕತೋ, ಯಾಚೇ ಪುಚ್ಛನ್ತರಾಯಿಕಾ.

ಏಕತೋಉಪಸಮ್ಪನ್ನಾ, ಭಿಕ್ಖುಸಙ್ಘೇ ತಥಾ ಪುನ;

ಛಾಯಾ ಉತು ದಿವಸಾ ಚ, ಸಙ್ಗೀತಿ ತಯೋ ನಿಸ್ಸಯೇ.

ಅಟ್ಠ ಅಕರಣೀಯಾನಿ, ಕಾಲಂ ಸಬ್ಬತ್ಥ ಅಟ್ಠೇವ;

ನ ಪವಾರೇನ್ತಿ ಭಿಕ್ಖುನೀ, ಭಿಕ್ಖುಸಙ್ಘಂ ತಥೇವ ಚ.

ಕೋಲಾಹಲಂ ಪುರೇಭತ್ತಂ, ವಿಕಾಲೇ ಚ ಕೋಲಾಹಲಂ;

ಉಪೋಸಥಂ ಪವಾರಣಂ, ಸವಚನೀಯಾನುವಾದನಂ.

ಓಕಾಸಂ ಚೋದೇ ಸಾರೇನ್ತಿ, ಪಟಿಕ್ಖಿತ್ತಂ ಮಹೇಸಿನಾ;

ತಥೇವ ಭಿಕ್ಖು ಭಿಕ್ಖುನೀ, ಅನುಞ್ಞಾತಂ ಮಹೇಸಿನಾ.

ಯಾನಂ ಗಿಲಾನಯುತ್ತಞ್ಚ, ಯಾನುಗ್ಘಾತಡ್ಢಕಾಸಿಕಾ;

ಭಿಕ್ಖು ಸಿಕ್ಖಾ ಸಾಮಣೇರ, ಸಾಮಣೇರೀ ಚ ಬಾಲಾಯ.

ಅರಞ್ಞೇ ಉಪಾಸಕೇನ, ಉದ್ದೋಸಿತೋ ಉಪಸ್ಸಯಂ;

ನ ಸಮ್ಮತಿ ನವಕಮ್ಮಂ, ನಿಸಿನ್ನಗಬ್ಭಏಕಿಕಾ.

ಸಾಗಾರಞ್ಚ ಗರುಧಮ್ಮಂ, ಪಚ್ಚಕ್ಖಾಯ ಚ ಸಙ್ಕಮಿ;

ಅಭಿವಾದನಕೇಸಾ ಚ, ನಖಾ ಚ ವಣಕಮ್ಮನಾ.