೩. ಪಬ್ಬಾಜನೀಯಕಮ್ಮಂ

೨೧. [ಇದಂ ವತ್ಥು ಪಾರಾ. ೪೩೧ ಆದಯೋ] ತೇನ ಖೋ ಪನ ಸಮಯೇನ ಅಸ್ಸಜಿಪುನಬ್ಬಸುಕಾ ನಾಮ [ನಾಮ ಭಿಕ್ಖೂ (ಕ.)] ಕೀಟಾಗಿರಿಸ್ಮಿಂ ಆವಾಸಿಕಾ ಹೋನ್ತಿ ಅಲಜ್ಜಿನೋ ಪಾಪಭಿಕ್ಖೂ. ತೇ [ಚೂಳವ. ೨೯೨ ಆದಯೋ] ಏವರೂಪಂ ಅನಾಚಾರಂ ಆಚರನ್ತಿ – ಮಾಲಾವಚ್ಛಂ ರೋಪೇನ್ತಿಪಿ ರೋಪಾಪೇನ್ತಿಪಿ, ಸಿಞ್ಚನ್ತಿಪಿ ಸಿಞ್ಚಾಪೇನ್ತಿಪಿ, ಓಚಿನನ್ತಿಪಿ ಓಚಿನಾಪೇನ್ತಿಪಿ, ಗನ್ಥೇನ್ತಿಪಿ ಗನ್ಥಾಪೇನ್ತಿಪಿ, ಏಕತೋವಣ್ಟಿಕಮಾಲಂ ಕರೋನ್ತಿಪಿ ಕಾರಾಪೇನ್ತಿಪಿ, ಉಭತೋವಣ್ಟಿಕಮಾಲಂ ಕರೋನ್ತಿಪಿ ಕಾರಾಪೇನ್ತಿಪಿ, ಮಞ್ಜರಿಕಂ ಕರೋನ್ತಿಪಿ ಕಾರಾಪೇನ್ತಿಪಿ, ವಿಧೂತಿಕಂ [ವಿಧುತಿಕಂ (ಸ್ಯಾ.)] ಕರೋನ್ತಿಪಿ ಕಾರಾಪೇನ್ತಿಪಿ, ವಟಂಸಕಂ ಕರೋನ್ತಿಪಿ ಕಾರಾಪೇನ್ತಿಪಿ, ಆವೇಳಂ ಕರೋನ್ತಿಪಿ ಕಾರಾಪೇನ್ತಿಪಿ, ಉರಚ್ಛದಂ ಕರೋನ್ತಿಪಿ ಕಾರಾಪೇನ್ತಿಪಿ. ತೇ ಕುಲಿತ್ಥೀನಂ ಕುಲಧೀತಾನಂ ಕುಲಕುಮಾರೀನಂ ಕುಲಸುಣ್ಹಾನಂ ಕುಲದಾಸೀನಂ ಏಕತೋವಣ್ಟಿಕಮಾಲಂ ಹರನ್ತಿಪಿ ಹರಾಪೇನ್ತಿಪಿ, ಉಭತೋವಣ್ಟಿಕಮಾಲಂ ಹರನ್ತಿಪಿ ಹರಾಪೇನ್ತಿಪಿ, ಮಞ್ಜರಿಕಂ ಹರನ್ತಿಪಿ ಹರಾಪೇನ್ತಿಪಿ, ವಿಧೂತಿಕಂ ಹರನ್ತಿಪಿ ಹರಾಪೇನ್ತಿಪಿ, ವಟಂಸಕಂ ಹರನ್ತಿಪಿ ಹರಾಪೇನ್ತಿಪಿ, ಆವೇಳಂ ಹರನ್ತಿಪಿ ಹರಾಪೇನ್ತಿಪಿ, ಉರಚ್ಛದಂ ಹರನ್ತಿಪಿ ಹರಾಪೇನ್ತಿಪಿ. ತೇ ಕುಲಿತ್ಥೀಹಿ ಕುಲಧೀತಾಹಿ ಕುಲಕುಮಾರೀಹಿ ಕುಲಸುಣ್ಹಾಹಿ ಕುಲದಾಸೀಹಿ ಸದ್ಧಿಂ ಏಕಭಾಜನೇಪಿ ಭುಞ್ಜನ್ತಿ, ಏಕಥಾಲಕೇಪಿ ಪಿವನ್ತಿ, ಏಕಾಸನೇಪಿ ನಿಸೀದನ್ತಿ, ಏಕಮಞ್ಚೇಪಿ ತುವಟ್ಟೇನ್ತಿ, ಏಕತ್ಥರಣಾಪಿ ತುವಟ್ಟೇನ್ತಿ, ಏಕಪಾವುರಣಾಪಿ ತುವಟ್ಟೇನ್ತಿ, ಏಕತ್ಥರಣಪಾವುರಣಾಪಿ ತುವಟ್ಟೇನ್ತಿ, ವಿಕಾಲೇಪಿ ಭುಞ್ಜನ್ತಿ, ಮಜ್ಜಮ್ಪಿ ಪಿವನ್ತಿ, ಮಾಲಾಗನ್ಧವಿಲೇಪನಮ್ಪಿ ಧಾರೇನ್ತಿ, ನಚ್ಚನ್ತಿಪಿ, ಗಾಯನ್ತಿಪಿ, ವಾದೇನ್ತಿಪಿ, ಲಾಸೇನ್ತಿಪಿ; ನಚ್ಚನ್ತಿಯಾಪಿ ನಚ್ಚನ್ತಿ, ನಚ್ಚನ್ತಿಯಾಪಿ ಗಾಯನ್ತಿ, ನಚ್ಚನ್ತಿಯಾಪಿ ವಾದೇನ್ತಿ, ನಚ್ಚನ್ತಿಯಾಪಿ ಲಾಸೇನ್ತಿ; ಗಾಯನ್ತಿಯಾಪಿ ನಚ್ಚನ್ತಿ, ಗಾಯನ್ತಿಯಾಪಿ ಗಾಯನ್ತಿ, ಗಾಯನ್ತಿಯಾಪಿ ವಾದೇನ್ತಿ, ಗಾಯನ್ತಿಯಾಪಿ ಲಾಸೇನ್ತಿ; ವಾದೇನ್ತಿಯಾಪಿ ನಚ್ಚನ್ತಿ, ವಾದೇನ್ತಿಯಾಪಿ ಗಾಯನ್ತಿ, ವಾದೇನ್ತಿಯಾಪಿ ವಾದೇನ್ತಿ, ವಾದೇನ್ತಿಯಾಪಿ ಲಾಸೇನ್ತಿ; ಲಾಸೇನ್ತಿಯಾಪಿ ನಚ್ಚನ್ತಿ, ಲಾಸೇನ್ತಿಯಾಪಿ ಗಾಯನ್ತಿ, ಲಾಸೇನ್ತಿಯಾಪಿ ವಾದೇನ್ತಿ, ಲಾಸೇನ್ತಿಯಾಪಿ ಲಾಸೇನ್ತಿ; ಅಟ್ಠಪದೇಪಿ ಕೀಳನ್ತಿ, ದಸಪದೇಪಿ ಕೀಳನ್ತಿ, ಆಕಾಸೇಪಿ ಕೀಳನ್ತಿ, ಪರಿಹಾರಪಥೇಪಿ ಕೀಳನ್ತಿ, ಸನ್ತಿಕಾಯಪಿ ಕೀಳನ್ತಿ, ಖಲಿಕಾಯಪಿ ಕೀಳನ್ತಿ, ಘಟಿಕಾಯಪಿ ಕೀಳನ್ತಿ, ಸಲಾಕಹತ್ಥೇನಪಿ ಕೀಳನ್ತಿ, ಅಕ್ಖೇನಪಿ ಕೀಳನ್ತಿ, ಪಙ್ಗಚೀರೇನಪಿ ಕೀಳನ್ತಿ, ವಙ್ಕಕೇನಪಿ ಕೀಳನ್ತಿ, ಮೋಕ್ಖಚಿಕಾಯಪಿ ಕೀಳನ್ತಿ, ಚಿಙ್ಗುಲಕೇನಪಿ ಕೀಳನ್ತಿ, ಪತ್ತಾಳ್ಹಕೇನಪಿ ಕೀಳನ್ತಿ, ರಥಕೇನಪಿ ಕೀಳನ್ತಿ, ಧನುಕೇನಪಿ ಕೀಳನ್ತಿ, ಅಕ್ಖರಿಕಾಯಪಿ ಕೀಳನ್ತಿ, ಮನೇಸಿಕಾಯಪಿ ಕೀಳನ್ತಿ, ಯಥಾವಜ್ಜೇನಪಿ ಕೀಳನ್ತಿ; ಹತ್ಥಿಸ್ಮಿಮ್ಪಿ ಸಿಕ್ಖನ್ತಿ, ಅಸ್ಸಸ್ಮಿಮ್ಪಿ ಸಿಕ್ಖನ್ತಿ, ರಥಸ್ಮಿಮ್ಪಿ ಸಿಕ್ಖನ್ತಿ, ಧನುಸ್ಮಿಮ್ಪಿ ಸಿಕ್ಖನ್ತಿ, ಥರುಸ್ಮಿಮ್ಪಿ ಸಿಕ್ಖನ್ತಿ; ಹತ್ಥಿಸ್ಸಪಿ ಪುರತೋ ಧಾವನ್ತಿ, ಅಸ್ಸಸ್ಸಪಿ ಪುರತೋ ಧಾವನ್ತಿ, ರಥಸ್ಸಪಿ ಪುರತೋ [ಪುರತೋ ಧಾವನ್ತಿ (ಸ್ಯಾ.)] ಧಾವನ್ತಿಪಿ ಆಧಾವನ್ತಿಪಿ; ಉಸ್ಸೇಳೇನ್ತಿಪಿ, ಅಪ್ಫೋಟೇನ್ತಿಪಿ, ನಿಬ್ಬುಜ್ಝನ್ತಿಪಿ, ಮುಟ್ಠೀಹಿಪಿ ಯುಜ್ಝನ್ತಿ; ರಙ್ಗಮಜ್ಝೇಪಿ ಸಙ್ಘಾಟಿಂ ಪತ್ಥರಿತ್ವಾ ನಚ್ಚಕಿಂ [ನಚ್ಚನ್ತಿಂ (ಸೀ. ಸ್ಯಾ.)] ಏವಂ ವದನ್ತಿ – ‘‘ಇಧ, ಭಗಿನಿ, ನಚ್ಚಸ್ಸೂ’’ತಿ; ನಲಾಟಿಕಮ್ಪಿ ದೇನ್ತಿ; ವಿವಿಧಮ್ಪಿ ಅನಾಚಾರಂ ಆಚರನ್ತಿ.

೨೨. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಕಾಸೀಸು ವಸ್ಸಂವುಟ್ಠೋ [ವಸ್ಸಂವುತ್ಥೋ (ಸೀ. ಸ್ಯಾ.)] ಸಾವತ್ಥಿಂ ಗಚ್ಛನ್ತೋ ಭಗವನ್ತಂ ದಸ್ಸನಾಯ ಯೇನ ಕೀಟಾಗಿರಿ ತದವಸರಿ. ಅಥ ಖೋ ಸೋ ಭಿಕ್ಖು ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಕೀಟಾಗಿರಿಂ ಪಿಣ್ಡಾಯ ಪಾವಿಸಿ ಪಾಸಾದಿಕೇನ ಅಭಿಕ್ಕನ್ತೇನ ಪಟಿಕ್ಕನ್ತೇನ ಆಲೋಕಿತೇನ ವಿಲೋಕಿತೇನ ಸಮಿಞ್ಜಿತೇನ [ಸಮ್ಮಿಞ್ಜಿತೇನ (ಸೀ. ಸ್ಯಾ. ಕಂ.)] ಪಸಾರಿತೇನ, ಓಕ್ಖಿತ್ತಚಕ್ಖು ಇರಿಯಾಪಥಸಮ್ಪನ್ನೋ. ಮನುಸ್ಸಾ ತಂ ಭಿಕ್ಖುಂ ಪಸ್ಸಿತ್ವಾ ಏವಮಾಹಂಸು – ‘‘ಕ್ವಾಯಂ ಅಬಲಬಲೋ ವಿಯ ಮನ್ದಮನ್ದೋ ವಿಯ ಭಾಕುಟಿಕಭಾಕುಟಿಕೋ ವಿಯ? ಕೋ ಇಮಸ್ಸ ಉಪಗತಸ್ಸ ಪಿಣ್ಡಕಮ್ಪಿ ದಸ್ಸತಿ? ಅಮ್ಹಾಕಂ ಪನ ಅಯ್ಯಾ ಅಸ್ಸಜಿಪುನಬ್ಬಸುಕಾ ಸಣ್ಹಾ ಸಖಿಲಾ ಸುಖಸಮ್ಭಾಸಾ ಮಿಹಿತಪುಬ್ಬಙ್ಗಮಾ ಏಹಿಸ್ವಾಗತವಾದಿನೋ ಅಬ್ಭಾಕುಟಿಕಾ ಉತ್ತಾನಮುಖಾ ಪುಬ್ಬಭಾಸಿನೋ. ತೇಸಂ ಖೋ ನಾಮ ಪಿಣ್ಡೋ ದಾತಬ್ಬೋ’’ತಿ.

ಅದ್ದಸಾ ಖೋ ಅಞ್ಞತರೋ ಉಪಾಸಕೋ ತಂ ಭಿಕ್ಖುಂ ಕೀಟಾಗಿರಿಸ್ಮಿಂ ಪಿಣ್ಡಾಯ ಚರನ್ತಂ; ದಿಸ್ವಾನ ಯೇನ ಸೋ ಭಿಕ್ಖು ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ತಂ ಭಿಕ್ಖುಂ ಅಭಿವಾದೇತ್ವಾ ಏತದವೋಚ – ‘‘ಅಪಿ, ಭನ್ತೇ, ಪಿಣ್ಡೋ ಲಬ್ಭತೀ’’ತಿ? ‘‘ನ ಖೋ, ಆವುಸೋ, ಪಿಣ್ಡೋ ಲಬ್ಭತೀ’’ತಿ. ‘‘ಏಹಿ, ಭನ್ತೇ, ಘರಂ ಗಮಿಸ್ಸಾಮಾ’’ತಿ. ಅಥ ಖೋ ಸೋ ಉಪಾಸಕೋ ತಂ ಭಿಕ್ಖುಂ ಘರಂ ನೇತ್ವಾ ಭೋಜೇತ್ವಾ ಏತದವೋಚ – ‘‘ಕಹಂ, ಭನ್ತೇ, ಅಯ್ಯೋ ಗಮಿಸ್ಸತೀ’’ತಿ? ‘‘ಸಾವತ್ಥಿಂ ಖೋ ಅಹಂ, ಆವುಸೋ, ಗಮಿಸ್ಸಾಮಿ ಭಗವನ್ತಂ ದಸ್ಸನಾಯಾ’’ತಿ. ‘‘ತೇನ ಹಿ, ಭನ್ತೇ, ಮಮ ವಚನೇನ ಭಗವತೋ ಪಾದೇ ಸಿರಸಾ ವನ್ದ, ಏವಞ್ಚ ವದೇಹಿ – ‘ದುಟ್ಠೋ, ಭನ್ತೇ, ಕೀಟಾಗಿರಿಸ್ಮಿಂ ಆವಾಸೋ. ಅಸ್ಸಜಿಪುನಬ್ಬಸುಕಾ ನಾಮ ಕೀಟಾಗಿರಿಸ್ಮಿಂ ಆವಾಸಿಕಾ ಅಲಜ್ಜಿನೋ ಪಾಪಭಿಕ್ಖೂ. ತೇ ಏವರೂಪಂ ಅನಾಚಾರಂ ಆಚರನ್ತಿ – ಮಾಲಾವಚ್ಛಂ ರೋಪೇನ್ತಿಪಿ ರೋಪಾಪೇನ್ತಿಪಿ, ಸಿಞ್ಚನ್ತಿಪಿ ಸಿಞ್ಚಾಪೇನ್ತಿಪಿ, ಓಚಿನನ್ತಿಪಿ, ಓಚಿನಾಪೇನ್ತಿಪಿ, ಗನ್ಥೇನ್ತಿಪಿ ಗನ್ಥಾಪೇನ್ತಿಪಿ, ಏಕತೋವಣ್ಟಿಕಮಾಲಂ ಕರೋನ್ತಿಪಿ ಕಾರಾಪೇನ್ತಿಪಿ, ಉಭತೋವಣ್ಟಿಕಮಾಲಂ ಕರೋನ್ತಿಪಿ ಕಾರಾಪೇನ್ತಿಪಿ, ಮಞ್ಜರಿಕಂ ಕರೋನ್ತಿಪಿ ಕಾರಾಪೇನ್ತಿಪಿ, ವಿಧೂತಿಕಂ ಕರೋನ್ತಿಪಿ ಕಾರಾಪೇನ್ತಿಪಿ, ವಟಂಸಕಂ ಕರೋನ್ತಿಪಿ ಕಾರಾಪೇನ್ತಿಪಿ, ಆವೇಳಂ ಕರೋನ್ತಿಪಿ ಕಾರಾಪೇನ್ತಿಪಿ, ಉರಚ್ಛದಂ ಕರೋನ್ತಿಪಿ ಕಾರಾಪೇನ್ತಿಪಿ. ತೇ ಕುಲಿತ್ಥೀನಂ ಕುಲಧೀತಾನಂ ಕುಲಕುಮಾರೀನಂ ಕುಲಸುಣ್ಹಾನಂ ಕುಲದಾಸೀನಂ ಏಕತೋವಣ್ಟಿಕಮಾಲಂ ಹರನ್ತಿಪಿ ಹರಾಪೇನ್ತಿಪಿ, ಉಭತೋವಣ್ಟಿಕಮಾಲಂ ಹರನ್ತಿಪಿ ಹರಾಪೇನ್ತಿಪಿ, ಮಞ್ಜರಿಕಂ ಹರನ್ತಿಪಿ ಹರಾಪೇನ್ತಿಪಿ, ವಿಧೂತಿಕಂ ಹರನ್ತಿಪಿ ಹರಾಪೇನ್ತಿಪಿ, ವಟಂಸಕಂ ಹರನ್ತಿಪಿ ಹರಾಪೇನ್ತಿಪಿ, ಆವೇಳಂ ಹರನ್ತಿಪಿ ಹರಾಪೇನ್ತಿಪಿ, ಉರಚ್ಛದಂ ಹರನ್ತಿಪಿ ಹರಾಪೇನ್ತಿಪಿ. ತೇ ಕುಲಿತ್ಥೀಹಿ ಕುಲಧೀತಾಹಿ ಕುಲಕುಮಾರೀಹಿ ಕುಲಸುಣ್ಹಾಹಿ ಕುಲದಾಸೀಹಿ ಸದ್ಧಿಂ ಏಕಭಾಜನೇಪಿ ಭುಞ್ಜನ್ತಿ, ಏಕಥಾಲಕೇಪಿ ಪಿವನ್ತಿ, ಏಕಾಸನೇಪಿ ನಿಸೀದನ್ತಿ, ಏಕಮಞ್ಚೇಪಿ ತುವಟ್ಟೇನ್ತಿ, ಏಕತ್ಥರಣಾಪಿ ತುವಟ್ಟೇನ್ತಿ, ಏಕಪಾವುರಣಾಪಿ ತುವಟ್ಟೇನ್ತಿ, ಏಕತ್ಥರಣಪಾವುರಣಾಪಿ ತುವಟ್ಟೇನ್ತಿ, ವಿಕಾಲೇಪಿ ಭುಞ್ಜನ್ತಿ, ಮಜ್ಜಮ್ಪಿ ಪಿವನ್ತಿ, ಮಾಲಾಗನ್ಧವಿಲೇಪನಮ್ಪಿ ಧಾರೇನ್ತಿ, ನಚ್ಚನ್ತಿಪಿ, ಗಾಯನ್ತಿಪಿ, ವಾದೇನ್ತಿಪಿ, ಲಾಸೇನ್ತಿಪಿ; ನಚ್ಚನ್ತಿಯಾಪಿ ನಚ್ಚನ್ತಿ, ನಚ್ಚನ್ತಿಯಾಪಿ ಗಾಯನ್ತಿ, ನಚ್ಚನ್ತಿಯಾಪಿ ವಾದೇನ್ತಿ, ನಚ್ಚನ್ತಿಯಾಪಿ ಲಾಸೇನ್ತಿ…ಪೇ… (ಚಕ್ಕಂ ಕಾತಬ್ಬಂ). ಲಾಸೇನ್ತಿಯಾಪಿ ನಚ್ಚನ್ತಿ, ಲಾಸೇನ್ತಿಯಾಪಿ ಗಾಯನ್ತಿ, ಲಾಸೇನ್ತಿಯಾಪಿ ವಾದೇನ್ತಿ, ಲಾಸೇನ್ತಿಯಾಪಿ ಲಾಸೇನ್ತಿ; ಅಟ್ಠಪದೇಪಿ ಕೀಳನ್ತಿ, ದಸಪದೇಪಿ ಕೀಳನ್ತಿ, ಆಕಾಸೇಪಿ ಕೀಳನ್ತಿ, ಪರಿಹಾರಪಥೇಪಿ ಕೀಳನ್ತಿ, ಸನ್ತಿಕಾಯಪಿ ಕೀಳನ್ತಿ, ಖಲಿಕಾಯಪಿ ಕೀಳನ್ತಿ, ಘಟಿಕಾಯಪಿ ಕೀಳನ್ತಿ, ಸಲಾಕಹತ್ಥೇನಪಿ ಕೀಳನ್ತಿ, ಅಕ್ಖೇನಪಿ ಕೀಳನ್ತಿ, ಪಙ್ಗಚೀರೇನಪಿ ಕೀಳನ್ತಿ, ವಙ್ಕಕೇನಪಿ ಕೀಳನ್ತಿ, ಮೋಕ್ಖಚಿಕಾಯಪಿ ಕೀಳನ್ತಿ, ಚಿಙ್ಗುಲಕೇನಪಿ ಕೀಳನ್ತಿ, ಪತ್ತಾಳ್ಹಕೇನಪಿ ಕೀಳನ್ತಿ, ರಥಕೇನಪಿ ಕೀಳನ್ತಿ, ಧನುಕೇನಪಿ ಕೀಳನ್ತಿ, ಅಕ್ಖರಿಕಾಯಪಿ ಕೀಳನ್ತಿ, ಮನೇಸಿಕಾಯಪಿ ಕೀಳನ್ತಿ, ಯಥಾವಜ್ಜೇನಪಿ ಕೀಳನ್ತಿ; ಹತ್ಥಿಸ್ಮಿಮ್ಪಿ ಸಿಕ್ಖನ್ತಿ, ಅಸ್ಸಸ್ಮಿಮ್ಪಿ ಸಿಕ್ಖನ್ತಿ, ರಥಸ್ಮಿಮ್ಪಿ ಸಿಕ್ಖನ್ತಿ, ಧನುಸ್ಮಿಮ್ಪಿ ಸಿಕ್ಖನ್ತಿ, ಥರುಸ್ಮಿಮ್ಪಿ ಸಿಕ್ಖನ್ತಿ; ಹತ್ಥಿಸ್ಸಪಿ ಪುರತೋ ಧಾವನ್ತಿ, ಅಸ್ಸಸ್ಸಪಿ ಪುರತೋ ಧಾವನ್ತಿ, ರಥಸ್ಸಪಿ ಪುರತೋ ಧಾವನ್ತಿಪಿ ಆಧಾವನ್ತಿಪಿ; ಉಸ್ಸೇಳೇನ್ತಿಪಿ, ಅಪ್ಫೋಟೇನ್ತಿಪಿ, ನಿಬ್ಬುಜ್ಝನ್ತಿಪಿ, ಮುಟ್ಠೀಹಿಪಿ ಯುಜ್ಝನ್ತಿ; ರಙ್ಗಮಜ್ಝೇಪಿ ಸಙ್ಘಾಟಿಂ ಪತ್ಥರಿತ್ವಾ ನಚ್ಚಕಿಂ ಏವಂ ವದನ್ತಿ – ‘ಇಧ, ಭಗಿನಿ, ನಚ್ಚಸ್ಸೂ’ತಿ; ನಲಾಟಿಕಮ್ಪಿ ದೇನ್ತಿ; ವಿವಿಧಮ್ಪಿ ಅನಾಚಾರಂ ಆಚರನ್ತಿ. ಯೇಪಿ ತೇ, ಭನ್ತೇ, ಮನುಸ್ಸಾ ಪುಬ್ಬೇ ಸದ್ಧಾ ಅಹೇಸುಂ ಪಸನ್ನಾ ತೇಪಿ ಏತರಹಿ ಅಸ್ಸದ್ಧಾ ಅಪ್ಪಸನ್ನಾ. ಯಾನಿಪಿ ತಾನಿ ಸಙ್ಘಸ್ಸ ಪುಬ್ಬೇ ದಾನಪಥಾನಿ ತಾನಿಪಿ ಏತರಹಿ ಉಪಚ್ಛಿನ್ನಾನಿ. ರಿಞ್ಚನ್ತಿ ಪೇಸಲಾ ಭಿಕ್ಖೂ, ನಿವಸನ್ತಿ ಪಾಪಭಿಕ್ಖೂ. ಸಾಧು, ಭನ್ತೇ, ಭಗವಾ ಕೀಟಾಗಿರಿಂ ಭಿಕ್ಖೂ ಪಹಿಣೇಯ್ಯ, ಯಥಾಯಂ ಕೀಟಾಗಿರಿಸ್ಮಿಂ ಆವಾಸೋ ಸಣ್ಠಹೇಯ್ಯಾ’’ತಿ.

‘‘ಏವಮಾವುಸೋ’’ತಿ ಖೋ ಸೋ ಭಿಕ್ಖು ತಸ್ಸ ಉಪಾಸಕಸ್ಸ ಪಟಿಸ್ಸುಣಿತ್ವಾ ಉಟ್ಠಾಯಾಸನಾ ಯೇನ ಸಾವತ್ಥಿ ತೇನ ಪಕ್ಕಾಮಿ. ಅನುಪುಬ್ಬೇನ ಯೇನ ಸಾವತ್ಥಿ ಜೇತವನಂ ಅನಾಥಪಿಣ್ಡಿಕಸ್ಸ ಆರಾಮೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಆಚಿಣ್ಣಂ ಖೋ ಪನೇತಂ ಬುದ್ಧಾನಂ ಭಗವನ್ತಾನಂ ಆಗನ್ತುಕೇಹಿ ಭಿಕ್ಖೂಹಿ ಸದ್ಧಿಂ ಪಟಿಸಮ್ಮೋದಿತುಂ. ಅಥ ಖೋ ಭಗವಾ ತಂ ಭಿಕ್ಖುಂ ಏತದವೋಚ – ‘‘ಕಚ್ಚಿ, ಭಿಕ್ಖು, ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿಸಿ ಅಪ್ಪಕಿಲಮಥೇನ ಅದ್ಧಾನಂ ಆಗತೋ, ಕುತೋ ಚ ತ್ವಂ ಭಿಕ್ಖು ಆಗಚ್ಛಸೀ’’ತಿ? ‘‘ಖಮನೀಯಂ, ಭಗವಾ, ಯಾಪನೀಯಂ ಭಗವಾ; ಅಪ್ಪಕಿಲಮಥೇನ ಚ ಅಹಂ, ಭನ್ತೇ, ಅದ್ಧಾನಂ ಆಗತೋ. ಇಧಾಹಂ, ಭನ್ತೇ, ಕಾಸೀಸು ವಸ್ಸಂವುಟ್ಠೋ ಸಾವತ್ಥಿಂ ಆಗಚ್ಛನ್ತೋ ಭಗವನ್ತಂ ದಸ್ಸನಾಯ ಯೇನ ಕೀಟಾಗಿರಿ ತದವಸರಿಂ. ಅಥ ಖ್ವಾಹಂ, ಭನ್ತೇ, ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಕೀಟಾಗಿರಿಂ ಪಿಣ್ಡಾಯ ಪಾವಿಸಿಂ. ಅದ್ದಸಾ ಖೋ ಮಂ, ಭನ್ತೇ, ಅಞ್ಞತರೋ ಉಪಾಸಕೋ ಕೀಟಾಗಿರಿಸ್ಮಿಂ ಪಿಣ್ಡಾಯ ಚರನ್ತಂ; ದಿಸ್ವಾನ ಯೇನಾಹಂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಮಂ ಅಭಿವಾದೇತ್ವಾ ಏತದವೋಚ – ‘ಅಪಿ, ಭನ್ತೇ, ಪಿಣ್ಡೋ ಲಬ್ಭತೀ’ತಿ. ‘ನ ಖೋ, ಆವುಸೋ, ಪಿಣ್ಡೋ ಲಬ್ಭತೀ’ತಿ. ‘ಏಹಿ, ಭನ್ತೇ, ಘರಂ ಗಮಿಸ್ಸಾಮಾ’ತಿ. ಅಥ ಖೋ, ಭನ್ತೇ, ಸೋ ಉಪಾಸಕೋ ಮಂ ಘರಂ ನೇತ್ವಾ ಭೋಜೇತ್ವಾ ಏತದವೋಚ – ‘ಕಹಂ, ಭನ್ತೇ, ಅಯ್ಯೋ ಗಮಿಸ್ಸತೀ’ತಿ? ‘ಸಾವತ್ಥಿಂ ಖೋ ಅಹಂ, ಆವುಸೋ, ಗಮಿಸ್ಸಾಮಿ ಭಗವನ್ತಂ ದಸ್ಸನಾಯಾ’ತಿ. ‘ತೇನ ಹಿ, ಭನ್ತೇ, ಮಮ ವಚನೇನ ಭಗವತೋ ಪಾದೇ ಸಿರಸಾ ವನ್ದ, ಏವಞ್ಚ ವದೇಹಿ – ದುಟ್ಠೋ, ಭನ್ತೇ, ಕೀಟಾಗಿರಿಸ್ಮಿಂ ಆವಾಸೋ. ಅಸ್ಸಜಿಪುನಬ್ಬಸುಕಾ ನಾಮ ಕೀಟಾಗಿರಿಸ್ಮಿಂ ಆವಾಸಿಕಾ ಅಲಜ್ಜಿನೋ ಪಾಪಭಿಕ್ಖೂ. ತೇ ಏವರೂಪಂ ಅನಾಚಾರಂ ಆಚರನ್ತಿ – ಮಾಲಾವಚ್ಛಂ ರೋಪೇನ್ತಿಪಿ ರೋಪಾಪೇನ್ತಿಪಿ…ಪೇ… ವಿವಿಧಮ್ಪಿ ಅನಾಚಾರಂ ಆಚರನ್ತಿ. ಯೇಪಿ ತೇ, ಭನ್ತೇ, ಮನುಸ್ಸಾ ಪುಬ್ಬೇ ಸದ್ಧಾ ಅಹೇಸುಂ ಪಸನ್ನಾ ತೇಪಿ ಏತರಹಿ ಅಸ್ಸದ್ಧಾ ಅಪ್ಪಸನ್ನಾ. ಯಾನಿಪಿ ತಾನಿ ಸಙ್ಘಸ್ಸ ಪುಬ್ಬೇ ದಾನಪಥಾನಿ ತಾನಿಪಿ ಏತರಹಿ ಉಪಚ್ಛಿನ್ನಾನಿ. ರಿಞ್ಚನ್ತಿ ಪೇಸಲಾ ಭಿಕ್ಖೂ, ನಿವಸನ್ತಿ ಪಾಪಭಿಕ್ಖೂ. ಸಾಧು, ಭನ್ತೇ, ಭಗವಾ ಕೀಟಾಗಿರಿಂ ಭಿಕ್ಖೂ ಪಹಿಣೇಯ್ಯ, ಯಥಾಯಂ ಕೀಟಾಗಿರಿಸ್ಮಿಂ ಆವಾಸೋ ಸಣ್ಠಹೇಯ್ಯಾ’ತಿ. ತತೋ ಅಹಂ ಭಗವಾ ಆಗಚ್ಛಾಮೀ’’ತಿ.

೨೩. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಅಸ್ಸಜಿಪುನಬ್ಬಸುಕಾ ನಾಮ ಕೀಟಾಗಿರಿಸ್ಮಿಂ ಆವಾಸಿಕಾ ಅಲಜ್ಜಿನೋ ಪಾಪಭಿಕ್ಖೂ? ತೇ ಏವರೂಪಂ ಅನಾಚಾರಂ ಆಚರನ್ತಿ – ಮಾಲಾವಚ್ಛಂ ರೋಪೇನ್ತಿಪಿ…ಪೇ… ವಿವಿಧಮ್ಪಿ ಅನಾಚಾರಂ ಆಚರನ್ತಿ? ಯೇಪಿ ತೇ ಮನುಸ್ಸಾ ಪುಬ್ಬೇ ಸದ್ಧಾ ಅಹೇಸುಂ ಪಸನ್ನಾ ತೇಪಿ ಏತರಹಿ ಅಸ್ಸದ್ಧಾ ಅಪ್ಪಸನ್ನಾ? ಯಾನಿಪಿ ತಾನಿ ಸಙ್ಘಸ್ಸ ಪುಬ್ಬೇ ದಾನಪಥಾನಿ ತಾನಿಪಿ ಏತರಹಿ ಉಪಚ್ಛಿನ್ನಾನಿ? ರಿಞ್ಚನ್ತಿ ಪೇಸಲಾ ಭಿಕ್ಖೂ ನಿವಸನ್ತಿ ಪಾಪಭಿಕ್ಖೂ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ…ಪೇ… ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ಏವರೂಪಂ ಅನಾಚಾರಂ ಆಚರಿಸ್ಸನ್ತಿ – ಮಾಲಾವಚ್ಛಂ ರೋಪೇಸ್ಸನ್ತಿಪಿ ರೋಪಾಪೇಸ್ಸನ್ತಿಪಿ, ಸಿಞ್ಚಿಸ್ಸನ್ತಿಪಿ ಸಿಞ್ಚಾಪೇಸ್ಸನ್ತಿಪಿ, ಓಚಿನಿಸ್ಸನ್ತಿಪಿ ಓಚಿನಾಪೇಸ್ಸನ್ತಿಪಿ, ಗನ್ಥೇಸ್ಸನ್ತಿಪಿ ಗನ್ಥಾಪೇಸ್ಸನ್ತಿಪಿ, ಏಕತೋವಣ್ಟಿಕಮಾಲಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ಉಭತೋವಣ್ಟಿಕಮಾಲಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ಮಞ್ಜರಿಕಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ವಿಧೂತಿಕಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ವಟಂಸಕಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ಆವೇಳಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ, ಉರಚ್ಛದಂ ಕರಿಸ್ಸನ್ತಿಪಿ ಕಾರಾಪೇಸ್ಸನ್ತಿಪಿ. ತೇ ಕುಲಿತ್ಥೀನಂ ಕುಲಧೀತಾನಂ ಕುಲಕುಮಾರೀನಂ ಕುಲಸುಣ್ಹಾನಂ ಕುಲದಾಸೀನಂ ಏಕತೋವಣ್ಟಿಕಮಾಲಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ಉಭತೋವಣ್ಟಿಕಮಾಲಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ಮಞ್ಜರಿಕಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ವಿಧೂತಿಕಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ವಟಂಸಕಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ಆವೇಳಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ, ಉರಚ್ಛದಂ ಹರಿಸ್ಸನ್ತಿಪಿ ಹರಾಪೇಸ್ಸನ್ತಿಪಿ. ತೇ ಕುಲಿತ್ಥೀಹಿ ಕುಲಧೀತಾಹಿ ಕುಲಕುಮಾರೀಹಿ ಕುಲಸುಣ್ಹಾಹಿ ಕುಲದಾಸೀಹಿ ಸದ್ಧಿಂ ಏಕಭಾಜನೇಪಿ ಭುಞ್ಜಿಸ್ಸನ್ತಿ, ಏಕಥಾಲಕೇಪಿ ಪಿವಿಸ್ಸನ್ತಿ, ಏಕಾಸನೇಪಿ ನಿಸೀದಿಸ್ಸನ್ತಿ, ಏಕಮಞ್ಚೇಪಿ ತುವಟ್ಟಿಸ್ಸನ್ತಿ, ಏಕತ್ಥರಣಾಪಿ ತುವಟ್ಟಿಸ್ಸನ್ತಿ, ಏಕಪಾವುರಣಾಪಿ ತುವಟ್ಟಿಸ್ಸನ್ತಿ, ಏಕತ್ಥರಣಪಾವುರಣಾಪಿ ತುವಟ್ಟಿಸ್ಸನ್ತಿ, ವಿಕಾಲೇಪಿ ಭುಞ್ಜಿಸ್ಸನ್ತಿ, ಮಜ್ಜಮ್ಪಿ ಪಿವಿಸ್ಸನ್ತಿ, ಮಾಲಾಗನ್ಧವಿಲೇಪನಮ್ಪಿ ಧಾರೇಸ್ಸನ್ತಿ, ನಚ್ಚಿಸ್ಸನ್ತಿಪಿ, ಗಾಯಿಸ್ಸನ್ತಿಪಿ, ವಾದೇಸ್ಸನ್ತಿಪಿ, ಲಾಸೇಸ್ಸನ್ತಿಪಿ; ನಚ್ಚನ್ತಿಯಾಪಿ ನಚ್ಚಿಸ್ಸನ್ತಿ, ನಚ್ಚನ್ತಿಯಾಪಿ ಗಾಯಿಸ್ಸನ್ತಿ, ನಚ್ಚನ್ತಿಯಾಪಿ ವಾದೇಸ್ಸನ್ತಿ, ನಚ್ಚನ್ತಿಯಾಪಿ ಲಾಸೇಸ್ಸನ್ತಿ; ಗಾಯನ್ತಿಯಾಪಿ ನಚ್ಚಿಸ್ಸನ್ತಿ, ಗಾಯನ್ತಿಯಾಪಿ ಗಾಯಿಸ್ಸನ್ತಿ, ಗಾಯನ್ತಿಯಾಪಿ ವಾದೇಸ್ಸನ್ತಿ, ಗಾಯನ್ತಿಯಾಪಿ ಲಾಸೇಸ್ಸನ್ತಿ; ವಾದೇನ್ತಿಯಾಪಿ ನಚ್ಚಿಸ್ಸನ್ತಿ, ವಾದೇನ್ತಿಯಾಪಿ ಗಾಯಿಸ್ಸನ್ತಿ, ವಾದೇನ್ತಿಯಾಪಿ ವಾದೇಸ್ಸನ್ತಿ, ವಾದೇನ್ತಿಯಾಪಿ ಲಾಸೇಸ್ಸನ್ತಿ; ಲಾಸೇನ್ತಿಯಾಪಿ ನಚ್ಚಿಸ್ಸನ್ತಿ, ಲಾಸೇನ್ತಿಯಾಪಿ ಗಾಯಿಸ್ಸನ್ತಿ, ಲಾಸೇನ್ತಿಯಾಪಿ ವಾದೇಸ್ಸನ್ತಿ; ಲಾಸೇನ್ತಿಯಾಪಿ ಲಾಸೇಸ್ಸನ್ತಿ; ಅಟ್ಠಪದೇಪಿ ಕೀಳಿಸ್ಸನ್ತಿ, ದಸಪದೇಪಿ ಕೀಳಿಸ್ಸನ್ತಿ, ಆಕಾಸೇಪಿ ಕೀಳಿಸ್ಸನ್ತಿ, ಪರಿಹಾರಪಥೇಪಿ ಕೀಳಿಸ್ಸನ್ತಿ, ಸನ್ತಿಕಾಯಪಿ ಕೀಳಿಸ್ಸನ್ತಿ, ಖಲಿಕಾಯಪಿ ಕೀಳಿಸ್ಸನ್ತಿ, ಘಟಿಕಾಯಪಿ ಕೀಳಿಸ್ಸನ್ತಿ, ಸಲಾಕಹತ್ಥೇನಪಿ ಕೀಳಿಸ್ಸನ್ತಿ, ಅಕ್ಖೇನಪಿ ಕೀಳಿಸ್ಸನ್ತಿ, ಪಙ್ಗಚೀರೇನಪಿ ಕೀಳಿಸ್ಸನ್ತಿ, ವಙ್ಕಕೇನಪಿ ಕೀಳಿಸ್ಸನ್ತಿ ಮೋಕ್ಖಚಿಕಾಯಪಿ ಕೀಳಿಸ್ಸನ್ತಿ, ಚಿಙ್ಗುಲಕೇನಪಿ ಕೀಳಿಸ್ಸನ್ತಿ, ಪತ್ತಾಳ್ಹಕೇನಪಿ ಕೀಳಿಸ್ಸನ್ತಿ, ರಥಕೇನಪಿ ಕೀಳಿಸ್ಸನ್ತಿ, ಧನುಕೇನಪಿ ಕೀಳಿಸ್ಸನ್ತಿ, ಅಕ್ಖರಿಕಾಯಪಿ ಕೀಳಿಸ್ಸನ್ತಿ, ಮನೇಸಿಕಾಯಪಿ ಕೀಳಿಸ್ಸನ್ತಿ, ಯಥಾವಜ್ಜೇನಪಿ ಕೀಳಿಸ್ಸನ್ತಿ; ಹತ್ಥಿಸ್ಮಿಮ್ಪಿ ಸಿಕ್ಖಿಸ್ಸನ್ತಿ, ಅಸ್ಸಸ್ಮಿಮ್ಪಿ ಸಿಕ್ಖಿಸ್ಸನ್ತಿ, ರಥಸ್ಮಿಮ್ಪಿ ಸಿಕ್ಖಿಸ್ಸನ್ತಿ, ಧನುಸ್ಮಿಮ್ಪಿ ಸಿಕ್ಖಿಸ್ಸನ್ತಿ, ಥರುಸ್ಮಿಮ್ಪಿ ಸಿಕ್ಖಿಸ್ಸನ್ತಿ; ಹತ್ಥಿಸ್ಸಪಿ ಪುರತೋ ಧಾವಿಸ್ಸನ್ತಿ, ಅಸ್ಸಸ್ಸಪಿ ಪುರತೋ ಧಾವಿಸ್ಸನ್ತಿ, ರಥಸ್ಸಪಿ ಪುರತೋ [ಪುರತೋ ಧಾವಿಸ್ಸನ್ತಿ (ಸ್ಯಾ.)] ಧಾವಿಸ್ಸನ್ತಿಪಿ ಆಧಾವಿಸ್ಸನ್ತಿಪಿ; ಉಸ್ಸೇಳೇಸ್ಸನ್ತಿಪಿ, ಅಪ್ಫೋಟೇಸ್ಸನ್ತಿಪಿ, ನಿಬ್ಬುಜ್ಝಿಸ್ಸನ್ತಿಪಿ, ಮುಟ್ಠೀಹಿಪಿ ಯುಜ್ಝಿಸ್ಸನ್ತಿ; ರಙ್ಗಮಜ್ಝೇಪಿ ಸಙ್ಘಾಟಿಂ ಪತ್ಥರಿತ್ವಾ ನಚ್ಚಕಿಂ ಏವಂ ವಕ್ಖನ್ತಿ [ವದಿಸ್ಸನ್ತಿ (ಕ.)] – ‘ಇಧ, ಭಗಿನಿ, ನಚ್ಚಸ್ಸೂ’ತಿ; ನಲಾಟಿಕಮ್ಪಿ ದಸ್ಸನ್ತಿ; ವಿವಿಧಮ್ಪಿ ಅನಾಚಾರಂ ಆಚರಿಸ್ಸನ್ತಿ. ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಸಾರಿಪುತ್ತಮೋಗ್ಗಲ್ಲಾನೇ ಆಮನ್ತೇಸಿ – ‘‘ಗಚ್ಛಥ ತುಮ್ಹೇ, ಸಾರಿಪುತ್ತಾ, ಕೀಟಾಗಿರಿಂ ಗನ್ತ್ವಾ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಕರೋಥ, ತುಮ್ಹಾಕಂ ಏತೇ ಸದ್ಧಿವಿಹಾರಿನೋ’’ತಿ.

‘‘ಕಥಂ ಮಯಂ, ಭನ್ತೇ, ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಕರೋಮ, ಚಣ್ಡಾ ತೇ ಭಿಕ್ಖೂ ಫರುಸಾ’’ತಿ? ‘‘ತೇನ ಹಿ ತುಮ್ಹೇ, ಸಾರಿಪುತ್ತಾ, ಬಹುಕೇಹಿ ಭಿಕ್ಖೂಹಿ ಸದ್ಧಿಂ ಗಚ್ಛಥಾ’’ತಿ. ‘‘ಏವಂ, ಭನ್ತೇ’’ತಿ ಖೋ ಸಾರಿಪುತ್ತಮೋಗ್ಗಲ್ಲಾನಾ ಭಗವತೋ ಪಚ್ಚಸ್ಸೋಸುಂ. ಏವಞ್ಚ ಪನ, ಭಿಕ್ಖವೇ, ಕಾತಬ್ಬಂ – ಪಠಮಂ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಚೋದೇತಬ್ಬಾ, ಚೋದೇತ್ವಾ ಸಾರೇತಬ್ಬಾ, ಸಾರೇತ್ವಾ ಆಪತ್ತಿಂ ಆರೋಪೇತಬ್ಬಾ, ಆಪತ್ತಿಂ ಆರೋಪೇತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೨೪. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಕುಲದೂಸಕಾ ಪಾಪಸಮಾಚಾರಾ. ಇಮೇಸಂ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಕುಲಾನಿ ಚ ಇಮೇಹಿ ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಕರೇಯ್ಯ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಕುಲದೂಸಕಾ ಪಾಪಸಮಾಚಾರಾ. ಇಮೇಸಂ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಕುಲಾನಿ ಚ ಇಮೇಹಿ ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಸಙ್ಘೋ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಕರೋತಿ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ. ಯಸ್ಸಾಯಸ್ಮತೋ ಖಮತಿ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಸ್ಸ ಕಮ್ಮಸ್ಸ ಕರಣಂ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ. ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಕುಲದೂಸಕಾ ಪಾಪಸಮಾಚಾರಾ. ಇಮೇಸಂ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಕುಲಾನಿ ಚ ಇಮೇಹಿ ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ಸಙ್ಘೋ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಕರೋತಿ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ. ಯಸ್ಸಾಯಸ್ಮತೋ ಖಮತಿ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಸ್ಸ ಕಮ್ಮಸ್ಸ ಕರಣಂ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಕತಂ ಸಙ್ಘೇನ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಅಧಮ್ಮಕಮ್ಮದ್ವಾದಸಕಂ

೨೫. ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ. ಅಸಮ್ಮುಖಾ ಕತಂ ಹೋತಿ, ಅಪ್ಪಟಿಪುಚ್ಛಾ ಕತಂ ಹೋತಿ, ಅಪ್ಪಟಿಞ್ಞಾಯ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ. ಅನಾಪತ್ತಿಯಾ ಕತಂ ಹೋತಿ, ಅದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ದೇಸಿತಾಯ ಆಪತ್ತಿಯಾ ಕತಂ ಹೋತಿ…ಪೇ… ಅಚೋದೇತ್ವಾ ಕತಂ ಹೋತಿ, ಅಸಾರೇತ್ವಾ ಕತಂ ಹೋತಿ, ಆಪತ್ತಿಂ ಅನಾರೋಪೇತ್ವಾ ಕತಂ ಹೋತಿ…ಪೇ… ಅಸಮ್ಮುಖಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಪ್ಪಟಿಪುಚ್ಛಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಪ್ಪಟಿಞ್ಞಾಯ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅನಾಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ದೇಸಿತಾಯ ಆಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಚೋದೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ …ಪೇ… ಅಸಾರೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಆಪತ್ತಿಂ ಅನಾರೋಪೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ.

ಅಧಮ್ಮಕಮ್ಮದ್ವಾದಸಕಂ ನಿಟ್ಠಿತಂ.

ಧಮ್ಮಕಮ್ಮದ್ವಾದಸಕಂ

೨೬. ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ. ಸಮ್ಮುಖಾ ಕತಂ ಹೋತಿ, ಪಟಿಪುಚ್ಛಾ ಕತಂ ಹೋತಿ, ಪಟಿಞ್ಞಾಯ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ. ಆಪತ್ತಿಯಾ ಕತಂ ಹೋತಿ ದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ ಅದೇಸಿತಾಯ ಆಪತ್ತಿಯಾ ಕತಂ ಹೋತಿ…ಪೇ… ಚೋದೇತ್ವಾ ಕತಂ ಹೋತಿ, ಸಾರೇತ್ವಾ ಕತಂ ಹೋತಿ, ಆಪತ್ತಿಂ ಆರೋಪೇತ್ವಾ ಕತಂ ಹೋತಿ…ಪೇ… ಸಮ್ಮುಖಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಪಟಿಪುಚ್ಛಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಪಟಿಞ್ಞಾಯ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಅದೇಸಿತಾಯ ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಚೋದೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಸಾರೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಆಪತ್ತಿಂ ಆರೋಪೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ ಪಬ್ಬಾಜನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ.

ಧಮ್ಮಕಮ್ಮದ್ವಾದಸಕಂ ನಿಟ್ಠಿತಂ.

ಆಕಙ್ಖಮಾನಚುದ್ದಸಕಂ

೨೭. [ಪರಿ. ೩೨೩] ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ; ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ; ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಅಧಿಸೀಲೇ ಸೀಲವಿಪನ್ನೋ ಹೋತಿ, ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಬುದ್ಧಸ್ಸ ಅವಣ್ಣಂ ಭಾಸತಿ, ಧಮ್ಮಸ್ಸ ಅವಣ್ಣಂ ಭಾಸತಿ, ಸಙ್ಘಸ್ಸ ಅವಣ್ಣಂ ಭಾಸತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಕಾಯಿಕೇನ ದವೇನ ಸಮನ್ನಾಗತೋ ಹೋತಿ, ವಾಚಸಿಕೇನ ದವೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ದವೇನ ಸಮನ್ನಾಗತೋ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಕಾಯಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಕಾಯಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಕಾಯಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ – ಇಮೇಹಿ, ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ತಿಣ್ಣಂ, ಭಿಕ್ಖವೇ, ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ; ಏಕೋ ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ; ಏಕೋ ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಅಧಿಸೀಲೇ ಸೀಲವಿಪನ್ನೋ ಹೋತಿ, ಏಕೋ ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ಏಕೋ ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಬುದ್ಧಸ್ಸ ಅವಣ್ಣಂ ಭಾಸತಿ, ಏಕೋ ಧಮ್ಮಸ್ಸ ಅವಣ್ಣಂ ಭಾಸತಿ, ಏಕೋ ಸಙ್ಘಸ್ಸ ಅವಣ್ಣಂ ಭಾಸತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಕಾಯಿಕೇನ ದವೇನ ಸಮನ್ನಾಗತೋ ಹೋತಿ, ಏಕೋ ವಾಚಸಿಕೇನ ದವೇನ ಸಮನ್ನಾಗತೋ ಹೋತಿ, ಏಕೋ ಕಾಯಿಕವಾಚಸಿಕೇನ ದವೇನ ಸಮನ್ನಾಗತೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಕಾಯಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ಏಕೋ ವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ಏಕೋ ಕಾಯಿಕವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಕಾಯಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ಏಕೋ ವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ಏಕೋ ಕಾಯಿಕವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ. ಏಕೋ ಕಾಯಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ಏಕೋ ವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ಏಕೋ ಕಾಯಿಕವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಪಬ್ಬಾಜನೀಯಕಮ್ಮಂ ಕರೇಯ್ಯ.

ಆಕಙ್ಖಮಾನಚುದ್ದಸಕಂ ನಿಟ್ಠಿತಂ.

ಅಟ್ಠಾರಸವತ್ತಂ

೨೮. ‘‘ಪಬ್ಬಾಜನೀಯಕಮ್ಮಕತೇನ, ಭಿಕ್ಖವೇ, ಭಿಕ್ಖುನಾ ಸಮ್ಮಾ ವತ್ತಿತಬ್ಬಂ. ತತ್ರಾಯಂ ಸಮ್ಮಾವತ್ತನಾ – ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಪಿ ಭಿಕ್ಖುನಿಯೋ ನ ಓವದಿತಬ್ಬಾ. ಯಾಯ ಆಪತ್ತಿಯಾ ಸಙ್ಘೇನ ಪಬ್ಬಾಜನೀಯಕಮ್ಮಂ ಕತಂ ಹೋತಿ ಸಾ ಆಪತ್ತಿ ನ ಆಪಜ್ಜಿತಬ್ಬಾ, ಅಞ್ಞಾ ವಾ ತಾದಿಸಿಕಾ, ತತೋ ವಾ ಪಾಪಿಟ್ಠತರಾ; ಕಮ್ಮಂ ನ ಗರಹಿತಬ್ಬಂ, ಕಮ್ಮಿಕಾ ನ ಗರಹಿತಬ್ಬಾ. ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥೋ ಠಪೇತಬ್ಬೋ, ನ ಪವಾರಣಾ ಠಪೇತಬ್ಬಾ, ನ ಸವಚನೀಯಂ ಕಾತಬ್ಬಂ, ನ ಅನುವಾದೋ ಪಟ್ಠಪೇತಬ್ಬೋ, ನ ಓಕಾಸೋ ಕಾರೇತಬ್ಬೋ, ನ ಚೋದೇತಬ್ಬೋ, ನ ಸಾರೇತಬ್ಬೋ, ನ ಭಿಕ್ಖೂಹಿ ಸಮ್ಪಯೋಜೇತಬ್ಬ’’ನ್ತಿ.

ಪಬ್ಬಾಜನೀಯಕಮ್ಮೇ ಅಟ್ಠಾರಸವತ್ತಂ ನಿಟ್ಠಿತಂ.

೨೯. ಅಥ ಖೋ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೋ ಭಿಕ್ಖುಸಙ್ಘೋ ಕೀಟಾಗಿರಿಂ ಗನ್ತ್ವಾ ಅಸ್ಸಜಿಪುನಬ್ಬಸುಕಾನಂ ಭಿಕ್ಖೂನಂ ಕೀಟಾಗಿರಿಸ್ಮಾ ಪಬ್ಬಾಜನೀಯಕಮ್ಮಂ ಅಕಾಸಿ – ನ ಅಸ್ಸಜಿಪುನಬ್ಬಸುಕೇಹಿ ಭಿಕ್ಖೂಹಿ ಕೀಟಾಗಿರಿಸ್ಮಿಂ ವತ್ಥಬ್ಬನ್ತಿ. ತೇ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ನ ಸಮ್ಮಾ ವತ್ತನ್ತಿ, ನ ಲೋಮಂ ಪಾತೇನ್ತಿ, ನ ನೇತ್ಥಾರಂ ವತ್ತನ್ತಿ; ನ ಭಿಕ್ಖೂ ಖಮಾಪೇನ್ತಿ, ಅಕ್ಕೋಸನ್ತಿ, ಪರಿಭಾಸನ್ತಿ; ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇನ್ತಿ; ಪಕ್ಕಮನ್ತಿಪಿ, ವಿಬ್ಭಮನ್ತಿಪಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ನ ಸಮ್ಮಾ ವತ್ತಿಸ್ಸನ್ತಿ, ನ ಲೋಮಂ ಪಾತೇಸ್ಸನ್ತಿ, ನ ನೇತ್ಥಾರಂ ವತ್ತಿಸ್ಸನ್ತಿ; ನ ಭಿಕ್ಖೂ ಖಮಾಪೇಸ್ಸನ್ತಿ, ಅಕ್ಕೋಸಿಸ್ಸನ್ತಿ, ಪರಿಭಾಸಿಸ್ಸನ್ತಿ; ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇಸ್ಸನ್ತಿ; ಪಕ್ಕಮಿಸ್ಸನ್ತಿಪಿ, ವಿಬ್ಭಮಿಸ್ಸನ್ತಿಪೀ’’ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ.

ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ನ ಸಮ್ಮಾ ವತ್ತನ್ತಿ, ನ ಲೋಮಂ ಪಾತೇನ್ತಿ, ನ ನೇತ್ಥಾರಂ ವತ್ತನ್ತಿ; ನ ಭಿಕ್ಖೂ ಖಮಾಪೇನ್ತಿ, ಅಕ್ಕೋಸನ್ತಿ, ಪರಿಭಾಸನ್ತಿ; ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇನ್ತಿ; ಪಕ್ಕಮನ್ತಿಪಿ, ವಿಬ್ಭಮನ್ತಿಪೀ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ …ಪೇ… ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ನ ಸಮ್ಮಾ ವತ್ತಿಸ್ಸನ್ತಿ, ನ ಲೋಮಂ ಪಾತೇಸ್ಸನ್ತಿ, ನ ನೇತ್ಥಾರಂ ವತ್ತಿಸ್ಸನ್ತಿ; ನ ಭಿಕ್ಖೂ ಖಮಾಪೇಸ್ಸನ್ತಿ, ಅಕ್ಕೋಸಿಸ್ಸನ್ತಿ, ಪರಿಭಾಸಿಸ್ಸನ್ತಿ; ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇಸ್ಸನ್ತಿ; ಪಕ್ಕಮಿಸ್ಸನ್ತಿಪಿ, ವಿಬ್ಭಮಿಸ್ಸನ್ತಿಪಿ. ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಸಙ್ಘೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತು.

ನಪ್ಪಟಿಪ್ಪಸ್ಸಮ್ಭೇತಬ್ಬಅಟ್ಠಾರಸಕಂ

೩೦. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಉಪಸಮ್ಪಾದೇತಿ, ನಿಸ್ಸಯಂ ದೇತಿ, ಸಾಮಣೇರಂ ಉಪಟ್ಠಾಪೇತಿ, ಭಿಕ್ಖುನೋವಾದಕಸಮ್ಮುತಿಂ ಸಾದಿಯತಿ, ಸಮ್ಮತೋಪಿ ಭಿಕ್ಖುನಿಯೋ ಓವದತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

[ಪರಿ. ೪೨೦] ‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಯಾಯ ಆಪತ್ತಿಯಾ ಸಙ್ಘೇನ ಪಬ್ಬಾಜನೀಯಕಮ್ಮಂ ಕತಂ ಹೋತಿ ತಂ ಆಪತ್ತಿಂ ಆಪಜ್ಜತಿ, ಅಞ್ಞಂ ವಾ ತಾದಿಸಿಕಂ, ತತೋ ವಾ ಪಾಪಿಟ್ಠತರಂ; ಕಮ್ಮಂ ಗರಹತಿ, ಕಮ್ಮಿಕೇ ಗರಹತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತಸ್ಸ ಭಿಕ್ಖುನೋ ಉಪೋಸಥಂ ಠಪೇತಿ, ಪವಾರಣಂ ಠಪೇತಿ, ಸವಚನೀಯಂ ಕರೋತಿ, ಅನುವಾದಂ ಪಟ್ಠಪೇತಿ, ಓಕಾಸಂ ಕಾರೇತಿ, ಚೋದೇತಿ, ಸಾರೇತಿ, ಭಿಕ್ಖೂಹಿ ಸಮ್ಪಯೋಜೇತಿ – ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

ಪಬ್ಬಾಜನೀಯಕಮ್ಮೇ ನಪ್ಪಟಿಪ್ಪಸ್ಸಮ್ಭೇತಬ್ಬಅಟ್ಠಾರಸಕಂ ನಿಟ್ಠಿತಂ.

ಪಟಿಪ್ಪಸ್ಸಮ್ಭೇತಬ್ಬಅಟ್ಠಾರಸಕಂ

೩೧. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಉಪಸಮ್ಪಾದೇತಿ, ನ ನಿಸ್ಸಯಂ ದೇತಿ, ನ ಸಾಮಣೇರಂ ಉಪಟ್ಠಾಪೇತಿ, ನ ಭಿಕ್ಖುನೋವಾದಕಸಮ್ಮುತಿಂ ಸಾದಿಯತಿ, ಸಮ್ಮತೋಪಿ ಭಿಕ್ಖುನಿಯೋ ನ ಓವದತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ಯಾಯ ಆಪತ್ತಿಯಾ ಸಙ್ಘೇನ ಪಬ್ಬಾಜನೀಯಕಮ್ಮಂ ಕತಂ ಹೋತಿ ತಂ ಆಪತ್ತಿಂ ನ ಆಪಜ್ಜತಿ, ಅಞ್ಞಂ ವಾ ತಾದಿಸಿಕಂ, ತತೋ ವಾ ಪಾಪಿಟ್ಠತರಂ; ಕಮ್ಮಂ ನ ಗರಹತಿ, ಕಮ್ಮಿಕೇ ನ ಗರಹತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥಂ ಠಪೇತಿ, ನ ಪವಾರಣಂ ಠಪೇತಿ, ನ ಸವಚನೀಯಂ ಕರೋತಿ, ನ ಅನುವಾದಂ ಪಟ್ಠಪೇತಿ, ನ ಓಕಾಸಂ ಕಾರೇತಿ, ನ ಚೋದೇತಿ, ನ ಸಾರೇತಿ, ನ ಭಿಕ್ಖೂಹಿ ಸಮ್ಪಯೋಜೇತಿ – ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

ಪಬ್ಬಾಜನೀಯಕಮ್ಮೇ ಪಟಿಪ್ಪಸ್ಸಮ್ಭೇತಬ್ಬಅಟ್ಠಾರಸಕಂ ನಿಟ್ಠಿತಂ.

೩೨. ‘‘ಏವಞ್ಚ ಪನ, ಭಿಕ್ಖವೇ, ಪಟಿಪ್ಪಸ್ಸಮ್ಭೇತಬ್ಬಂ. ತೇನ, ಭಿಕ್ಖವೇ, ಪಬ್ಬಾಜನೀಯಕಮ್ಮಕತೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಅಹಂ, ಭನ್ತೇ, ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತಾಮಿ, ಲೋಮಂ ಪಾತೇಮಿ, ನೇತ್ಥಾರಂ ವತ್ತಾಮಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ. ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಪಟಿಪ್ಪಸ್ಸದ್ಧಂ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ಪಬ್ಬಾಜನೀಯಕಮ್ಮಂ. ಖಮತಿ ಸಙ್ಘಸ್ಸ, ತಸ್ಮಾ

ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಪಬ್ಬಾಜನೀಯಕಮ್ಮಂ ನಿಟ್ಠಿತಂ ತತಿಯಂ.