ಸಾಸನಪಟ್ಠಾನವಿಭಾವನಾ

೮೯. ‘‘ತತ್ಥ ಕತಮಂ ನಯಸಮುಟ್ಠಾನ’’ನ್ತಿಆದಿನಾ ಆಚರಿಯೇನ ಸಬ್ಬಥಾ ನಯಸಮುಟ್ಠಾನಂ ಠಪಿತಂ, ಅಮ್ಹೇಹಿ ಚ ಞಾತಂ, ‘‘ಸೋಳಸಹಾರಪಞ್ಚನಯಅಟ್ಠಾರಸಮೂಲಪದೇಸು ಅಟ್ಠಾರಸ ಮೂಲಪದಾ ಕಥಂ ವಿಭತ್ತಾ, ಕುಹಿಂ ಅಮ್ಹೇಹಿ ದಟ್ಠಬ್ಬಾ’’ತಿ ವತ್ತಬ್ಬಭಾವತೋ ‘‘ತತ್ಥ ಅಟ್ಠಾರಸ ಮೂಲಪದಾ ಕುಹಿಂ ದಟ್ಠಬ್ಬಾ’’ತಿಆದಿ ವುತ್ತಂ. ತತ್ಥಾತಿ ತೇಸು ಸೋಳಸಹಾರಪಞ್ಚನಯಅಟ್ಠಾರಸಮೂಲಪದೇಸು ಅಟ್ಠಾರಸ ಮೂಲಪದಾ ಕೇನ ಪದೇನ ಆಚರಿಯೇನ ವಿಭತ್ತಾ, ಕುಹಿಂ ಅಮ್ಹೇಹಿ ವಿತ್ಥಾರತೋ ದಟ್ಠಬ್ಬಾತಿ ಪುಚ್ಛತಿ. ಅಟ್ಠಾರಸ ಮೂಲಪದಾ ಸಾಸನಪಟ್ಠಾನೇ ಮಯಾ ವಿಭತ್ತಾ, ತುಮ್ಹೇಹಿ ಚ ವಿತ್ಥಾರತೋ ಸಾಸನಪಟ್ಠಾನೇ ದಟ್ಠಬ್ಬಾತಿ ವಿಸ್ಸಜ್ಜೇತಿ. ವಿಭತ್ತಾಯೇವ ಹಿ ಅಟ್ಠಾರಸ ಮೂಲಪದಾ ದಟ್ಠಬ್ಬಾ ಭವನ್ತಿ. ಅಟ್ಠಕಥಾಯಂ (ನೇತ್ತಿ. ಅಟ್ಠ. ೮೯) ಪನ –

‘‘ಏವಂ ಸಬ್ಬಥಾ ನಯಸಮುಟ್ಠಾನಂ ವಿಭಜಿತ್ವಾ ಇದಾನಿ ಸಾಸನಪಟ್ಠಾನಂ ವಿಭಜನ್ತೋ ಯಸ್ಮಾ ಸಙ್ಗಹವಾರಾದೀಸು ಮೂಲಪದೇಹೇವ ಪಟ್ಠಾನಂ ಸಙ್ಗಹೇತ್ವಾ ಸರೂಪತೋ ನ ದಸ್ಸಿತಂ, ತಸ್ಮಾ ಯಥಾ ಮೂಲಪದೇಹಿ ಪಟ್ಠಾನಂ ನಿದ್ಧಾರೇತಬ್ಬಂ, ಏವಂ ಪಟ್ಠಾನತೋಪಿ ಮೂಲಪದಾನಿ ನಿದ್ಧಾರೇತಬ್ಬಾನೀತಿ ದಸ್ಸನತ್ಥಂ ‘ಅಟ್ಠಾರಸ ಮೂಲಪದಾ ಕುಹಿಂ ದಟ್ಠಬ್ಬಾ? ಸಾಸನಪಟ್ಠಾನೇ’ತಿ ಆಹಾ’’ತಿ –

ವುತ್ತಂ. ಸಾಸನಪಟ್ಠಾನೇ ಅಟ್ಠಾರಸ ಮೂಲಪದಾ ದಟ್ಠಬ್ಬಾತಿ ಆಚರಿಯೇನ ವುತ್ತಾ, ‘‘ಕತಮಂ ತಂ ಸಾಸನಪಟ್ಠಾನ’’ನ್ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮಂ ಸಾಸನಪಟ್ಠಾನ’’ನ್ತಿಆದಿ ವುತ್ತಂ. ತತ್ಥಾತಿ ತೇಸು ಅಟ್ಠಾರಸಮೂಲಪದಸಾಸನಪಟ್ಠಾನೇಸು ಕತಮಂ ತಂ ಸಾಸನಪಟ್ಠಾನನ್ತಿ ಇದಾನಿ ಮಯಾ ನಿದ್ಧಾರಿಯಮಾನಂ ಭಗವತಾ ದೇಸಿತಂ ಸಂಕಿಲೇಸಭಾಗಿಯಾದಿಸುತ್ತಂ ಸಾಸನಪಟ್ಠಾನಂ ನಾಮಾತಿ ವಿಸ್ಸಜ್ಜೇತಿ. ಸಾಸನನ್ತಿ ಪರಿಯತ್ತಿಸಾಸನಂ. ಪಟ್ಠಾನನ್ತಿ ತಸ್ಸ ಪರಿಯತ್ತಿಸಾಸನಸ್ಸ ಸಂಕಿಲೇಸಭಾಗಿಯತಾದೀಹಿ ಪಕಾರೇಹಿ ಠಾನಂ ಪವತ್ತನಂ ಪಟ್ಠಾನಂ, ತಂದೀಪನಸುತ್ತಂ ಪನ ಇಧ ಪಟ್ಠಾನಂ ನಾಮ. ತೇನ ವುತ್ತಂ – ‘‘ಸಂಕಿಲೇಸಭಾಗಿಯಂ ಸುತ್ತ’’ನ್ತಿಆದಿ. ಅಥ ವಾ ಸಾಸನನ್ತಿ ಅಧಿಸೀಲಅಧಿಚಿತ್ತಅಧಿಪಞ್ಞಾಸಿಕ್ಖತ್ತಯಂ ಸಾಸನಂ ನಾಮ, ತಂ ಸಿಕ್ಖತ್ತಯಂ ಪತಿಟ್ಠಹತಿ ಏತೇನ ಸಂಕಿಲೇಸಾದಿನಾತಿ ಪಟ್ಠಾನಂ, ಸಿಕ್ಖತ್ತಯಸ್ಸ ಸಾಸನಸ್ಸ ಪಟ್ಠಾನನ್ತಿ ಸಾಸನಪಟ್ಠಾನಂ. ತದಾಧಾರಭೂತಂ ಸುತ್ತಮ್ಪಿ ಠಾನ್ಯೂಪಚಾರತೋ ಸಾಸನಪಟ್ಠಾನಂ ನಾಮ. ತಂ ಸಾಸನಪಟ್ಠಾನಸುತ್ತಂ ಸರೂಪತೋ ದಸ್ಸೇತುಂ –

‘‘ಸಂಕಿಲೇಸಭಾಗಿಯಂ ಸುತ್ತಂ, ವಾಸನಾಭಾಗಿಯಂ ಸುತ್ತಂ, ನಿಬ್ಬೇಧಭಾಗಿಯಂ ಸುತ್ತಂ, ಅಸೇಕ್ಖಭಾಗಿಯಂ ಸುತ್ತಂ, ಸಂಕಿಲೇಸಭಾಗಿಯಞ್ಚ ವಾಸನಾಭಾಗಿಯಞ್ಚ ಸುತ್ತಂ, ಸಂಕಿಲೇಸಭಾಗಿಯಞ್ಚ ನಿಬ್ಬೇಧಭಾಗಿಯಞ್ಚ ಸುತ್ತಂ, ಸಂಕಿಲೇಸಭಾಗಿಯಞ್ಚ ಅಸೇಕ್ಖಭಾಗಿಯಞ್ಚ ಸುತ್ತಂ, ಸಂಕಿಲೇಸಭಾಗಿಯಞ್ಚ ನಿಬ್ಬೇಧಭಾಗಿಯಞ್ಚ ಅಸೇಕ್ಖಭಾಗಿಯಞ್ಚ ಸುತ್ತಂ, ಸಂಕಿಲೇಸಭಾಗಿಯಞ್ಚ ವಾಸನಾಭಾಗಿಯಞ್ಚ ನಿಬ್ಬೇಧಭಾಗಿಯಞ್ಚ ಸುತ್ತಂ, ವಾಸನಾಭಾಗಿಯಞ್ಚ ನಿಬ್ಬೇಧಭಾಗಿಯಞ್ಚ ಸುತ್ತಂ, ತಣ್ಹಾಸಂಕಿಲೇಸಭಾಗಿಯಂ ಸುತ್ತಂ, ದಿಟ್ಠಿಸಂಕಿಲೇಸಭಾಗಿಯಂ ಸುತ್ತಂ, ದುಚ್ಚರಿತಸಂಕಿಲೇಸಭಾಗಿಯಂ ಸುತ್ತಂ, ತಣ್ಹಾವೋದಾನಭಾಗಿಯಂ ಸುತ್ತಂ, ದಿಟ್ಠಿವೋದಾನಭಾಗಿಯಂ ಸುತ್ತಂ, ದುಚ್ಚರಿತವೋದಾನಭಾಗಿಯಂ ಸುತ್ತ’’ನ್ತಿ –

ವುತ್ತಂ. ‘‘ತೇಸು ಸುತ್ತೇಸು ಯೇ ಸಂಕಿಲೇಸಾದಯೋ ಭಗವತಾ ವುತ್ತಾ, ತೇಸು ಸಂಕಿಲೇಸಾದೀಸು ಸಂಕಿಲೇಸೋ ಕಿತ್ತಕೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಸಂಕಿಲೇಸೋ ತಿವಿಧೋ ತಣ್ಹಾಸಂಕಿಲೇಸೋ ದಿಟ್ಠಿಸಂಕಿಲೇಸೋ ದುಚ್ಚರಿತಸಂಕಿಲೇಸೋ’’ತಿ ವುತ್ತಂ. ತತ್ಥಾತಿ ತೇಸು ಸುತ್ತನ್ತೇಸು ಸಂಕಿಲೇಸಾದೀಸು ಧಮ್ಮೇಸು. ‘‘ತಿವಿಧೇ ತಸ್ಮಿಂ ಸಂಕಿಲೇಸೇ ತಣ್ಹಾಸಂಕಿಲೇಸೋ ಕತಮೇನ ಕುಸಲೇನ ವಿಸುಜ್ಝತೀ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ತಣ್ಹಾಸಂಕಿಲೇಸೋ ಸಮಥೇನ ವಿಸುಜ್ಝತೀ’’ತಿ ವುತ್ತಂ. ತತ್ಥಾತಿ ತಸ್ಮಿಂ ತಿವಿಧೇ ತಣ್ಹಾಸಂಕಿಲೇಸಾದಿಕೇ. ‘‘ಸೋ ಸಮಥೋ ಖನ್ಧೇಸು ಕತಮೋ ಖನ್ಧೋ’’ತಿ ಪುಚ್ಛಿತಬ್ಬತ್ತಾ ‘‘ಸೋ ಸಮಥೋ ಸಮಾಧಿಕ್ಖನ್ಧೋ’’ತಿ ವುತ್ತಂ. ‘‘ದಿಟ್ಠಿಸಂಕಿಲೇಸೋ ಕೇನ ವಿಸುಜ್ಝತೀ’’ತಿ ಪುಚ್ಛಿತಬ್ಬತ್ತಾ ‘‘ದಿಟ್ಠಿಸಂಕಿಲೇಸೋ ವಿಪಸ್ಸನಾಯ ವಿಸುಜ್ಝತೀ’’ತಿ ವುತ್ತಂ. ‘‘ಸಾ ವಿಪಸ್ಸನಾ ಕತಮೋ ಖನ್ಧೋ’’ತಿ ವತ್ತಬ್ಬತ್ತಾ ‘‘ಸಾ ವಿಪಸ್ಸನಾ ಪಞ್ಞಾಕ್ಖನ್ಧೋ’’ತಿ ವುತ್ತಂ. ‘‘ದುಚ್ಚರಿತಸಂಕಿಲೇಸೋ ಕೇನ ವಿಸುಜ್ಝತೀ’’ತಿ ವತ್ತಬ್ಬತ್ತಾ ‘‘ದುಚ್ಚರಿತಸಂಕಿಲೇಸೋ ಸುಚರಿತೇನ ವಿಸುಜ್ಝತೀ’’ತಿ ವುತ್ತಂ. ‘‘ತಂ ಸುಚರಿತಂ ಕತಮೋ ಖನ್ಧೋ’’ತಿ ವತ್ತಬ್ಬತ್ತಾ ‘‘ತಂ ಸುಚರಿತಂ ಸೀಲಕ್ಖನ್ಧೋ’’ತಿ ವುತ್ತಂ. ‘‘ತಸ್ಮಿಂ ಸೀಲೇ ಠಿತಸ್ಸ ಪುಗ್ಗಲಸ್ಸ ಕಿಂ ಭವತೀ’’ತಿ ವತ್ತಬ್ಬತ್ತಾ ‘‘ತಸ್ಸ ಸೀಲೇ ಪತಿಟ್ಠಿತಸ್ಸಾ’’ತಿಆದಿ ವುತ್ತಂ. ಸೀಲೇ ಸುಚರಿತಸಙ್ಖಾತೇ ಸೀಲಕ್ಖನ್ಧೇ ಪತಿಟ್ಠಿತಸ್ಸ ತಸ್ಸ ಸೀಲವನ್ತಸ್ಸ ಪುಗ್ಗಲಸ್ಸ ಭವೇಸು ಕಾಮಭವರೂಪಾರೂಪಭವೇಸು ಆಸತ್ತಿ ಭವಪತ್ಥನಾ ಯದಿ ಉಪ್ಪಜ್ಜತಿ, ಏವಂಸಾಯನ್ತಿ ಏವಂ ಅಸ್ಸ ಅಯನ್ತಿ ಪದಚ್ಛೇದೋ. ಏವಂ ಸತಿ ಅಸ್ಸ ಸೀಲೇ ಪತಿಟ್ಠಿತಸ್ಸ ಅಯಂ ಆಸತ್ತಿ ಭವಪತ್ಥನಾ ಸಮಥವಿಪಸ್ಸನಾಭಾವನಾಮಯಪುಞ್ಞಕಿರಿಯವತ್ಥು ಚ ಭವತಿ, ಚ-ಸದ್ದೇನ ದಾನಮಯಸೀಲಮಯಪುಞ್ಞಕಿರಿಯವತ್ಥು ಚ ಭವತೀತಿ ಅತ್ಥೋ ಸಙ್ಗಹಿತೋ. ತತ್ರಾತಿ ತೇಸು ಕಾಮಭವರೂಪಾರೂಪಭವೇಸು ಉಪಪತ್ತಿಯಾ ಸಂವತ್ತತೀತಿ.

‘‘ಸಂಕಿಲೇಸಾದಯೋ ಯೇಹಿ ಸುತ್ತೇಹಿ ದಸ್ಸಿತಾ, ತಾನಿ ಸುತ್ತಾನಿ ಕಿತ್ತಕಾನೀ’’ತಿ ವತ್ತಬ್ಬತ್ತಾ ‘‘ಇಮಾನಿ ಚತ್ತಾರಿ ಸುತ್ತಾನೀ’’ತಿಆದಿ ವುತ್ತಂ. ಅಸಾಧಾರಣಾನಿ ಸಂಕಿಲೇಸಭಾಗಿಯಸುತ್ತವಾಸನಾಭಾಗಿಯಸುತ್ತನಿಬ್ಬೇಧಭಾಗಿಯಸುತ್ತಅಸೇಕ್ಖಭಾಗಿಯಸುತ್ತಾನಿ ಚತ್ತಾರಿ ಸುತ್ತಾನಿ ಭವನ್ತಿ, ಸಾಧಾರಣಾನಿ ಸಂಕಿಲೇಸಭಾಗಿಯವಾಸನಾಭಾಗಿಯಸುತ್ತ, ಸಂಕಿಲೇಸಭಾಗಿಯನಿಬ್ಬೇಧಭಾಗಿಯಸುತ್ತ, ಸಂಕಿಲೇಸಭಾಗಿಯಅಸೇಕ್ಖಭಾಗಿಯಸುತ್ತ, ವಾಸನಾಭಾಗಿಯನಿಬ್ಬೇಧಭಾಗಿಯಸುತ್ತಾನಿ ಕತಾನಿ ಮಿಸ್ಸಿತಾನಿ ಚತ್ತಾರಿ ಭವನ್ತಿ. ಇತಿ ಅಟ್ಠ ಸುತ್ತಾನಿ ಭವನ್ತಿ. ತಾನಿಯೇವ ವುತ್ತಪ್ಪಕಾರಾನಿ ಅಟ್ಠ ಸುತ್ತಾನಿ ಭವನ್ತಿ. ಸಾಧಾರಣಾನಿ ವಾಸನಾಭಾಗಿಯಅಸೇಕ್ಖಭಾಗಿಯಸುತ್ತನಿಬ್ಬೇಧಭಾಗಿಯಅಸೇಕ್ಖಭಾಗಿಯಸುತ್ತ- ಸಂಕಿಲೇಸಭಾಗಿಯವಾಸನಾಭಾಗಿಯನಿಬ್ಬೇಧಭಾಗಿಯಸುತ್ತಸಂಕಿಲೇಸ- ಭಾಗಿಯವಾಸನಾಭಾಗಿಯಅಸೇಕ್ಖಭಾಗಿಯಸುತ್ತ- ಸಂಕಿಲೇಸಭಾಗಿಯನಿಬ್ಬೇಧಭಾಗಿಯಅಸೇಕ್ಖಭಾಗಿಯಸುತ್ತ- ವಾಸನಾಭಾಗಿಯನಿಬ್ಬೇಧಭಾಗಿಯಅಸೇಕ್ಖಭಾಗಿಯಸುತ್ತ- ಸಂಕಿಲೇಸಭಾಗಿಯವಾಸನಾಭಾಗಿಯನಿಬ್ಬೇಧಭಾಗಿಯಅಸೇಕ್ಖಭಾಗಿಯಸುತ್ತ- ನೇವಸಂಕಿಲೇಸಭಾಗಿಯನವಾಸನಾ- ಭಾಗಿಯನನಿಬ್ಬೇಧಭಾಗಿಯನಅಸೇಕ್ಖಭಾಗಿಯಸುತ್ತಾನಿ ಕತಾನಿ ಮಿಸ್ಸಿತಾನಿ ಅಟ್ಠ ಸುತ್ತಾನಿ ಭವನ್ತೀತಿ ಸೋಳಸ ಸುತ್ತಾನಿ ಭವನ್ತಿ. ತೇಸು ಸೋಳಸಸುತ್ತೇಸು ಚತ್ತಾರಿ ಏಕಕಾನಿ ಸುತ್ತಾನಿ ಚ ಚತ್ತಾರಿ ದುಕಾನಿ ಸುತ್ತಾನಿ ಚ ದ್ವೇ ತಿಕಾನಿ ಚ ಪಾಳಿಯಂ ಆಗತಾನಿ, ದ್ವೇ ದುಕಾನಿ ಸುತ್ತಾನಿ ಚ ದ್ವೇ ತಿಕಾನಿ ಚ ದ್ವೇ ಚತುಕ್ಕಾನಿ ಸುತ್ತಾನಿ ಚ ಅಟ್ಠಕಥಾಯಂ (ನೇತ್ತಿ. ಅಟ್ಠ. ೮೯) ಆಗತಾನಿ.

‘‘ಯದಿ ಪಟ್ಠಾನನಯೇನ ವುತ್ತಪ್ಪಕಾರಾನಿ ಸೋಳಸ ಸುತ್ತಾನಿಯೇವ ವಿಭತ್ತಾನಿ, ಏವಂ ಸತಿ ಸುತ್ತಗೇಯ್ಯಾದಿನವವಿಧಂ ಸಕಲಂ ಪರಿಯತ್ತಿಸಾಸನಂ ಪಟ್ಠಾನನಯೇನ ಅವಿಭತ್ತಂ ಭವೇಯ್ಯಾ’’ತಿ ವತ್ತಬ್ಬತ್ತಾ ‘‘ಇಮೇಹಿ ಸೋಳಸಹಿ ಸುತ್ತೇಹೀ’’ತಿಆದಿ ವುತ್ತಂ. ಪಟ್ಠಾನನಯೇನ ವಿಭತ್ತೇಹಿ ಸೋಳಸಹಿ ಇಮೇಹಿ ಸುತ್ತೇಹಿ ನವವಿಧಂ ಸಕಲಂ ಪರಿಯತ್ತಿಸುತ್ತಂ ಪಟ್ಠಾನನಯೇನ ವಿಭತ್ತಂಯೇವ ಹುತ್ವಾ ಭಿನ್ನಂ ಭವತಿ. ಸಂಕಿಲೇಸಭಾಗಿಯಾದಿಪಭೇದಾಯ ಗಾಥಾಯ ಗಾಥಾ ಅನುಮಿನಿತಬ್ಬಾ, ಸಂಕಿಲೇಸಭಾಗಿಯಾದಿಪಭೇದೇನ ವೇಯ್ಯಾಕರಣೇನ ವೇಯ್ಯಾಕರಣಂ ಅನುಮಿನಿತಬ್ಬಂ. ಸಂಕಿಲೇಸಭಾಗಿಯಾದಿಪಭೇದೇನ ಸುತ್ತೇನ ಸುತ್ತಂ ಅನುಮಿನಿತಬ್ಬಂ ಭವತಿಯೇವಾತಿ.

೯೦. ‘‘ತೇಸು ಸೋಳಸಸು ಸಂಕಿಲೇಸಭಾಗಿಯಾದೀಸು ಸುತ್ತೇಸು ಕತಮಂ ಸಂಕಿಲೇಸಭಾಗಿಯಂ ಸುತ್ತ’’ನ್ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮಂ ಸಂಕಿಲೇಸಭಾಗಿಯಂ ಸುತ್ತ’’ನ್ತಿಆದಿ ವುತ್ತಂ. ತತ್ಥಾತಿ ತೇಸು ಸೋಳಸಸು ಸಂಕಿಲೇಸಭಾಗಿಯಾದೀಸು ಸುತ್ತೇಸು ಕತಮಂ ಸುತ್ತಂ ಸಂಕಿಲೇಸಭಾಗಿಯಂ ಸುತ್ತಂ ನಾಮಾತಿ ಪುಚ್ಛತಿ.

‘‘ಕಾಮನ್ಧಾ ಜಾಲಸಞ್ಛನ್ನಾ, ತಣ್ಹಾಛದನಛಾದಿತಾ;

ಪಮತ್ತಬನ್ಧನಾಬದ್ಧಾ, ಮಚ್ಛಾವ ಕುಮಿನಾಮುಖೇ;

ಜರಾಮರಣಮನ್ವೇನ್ತಿ, ವಚ್ಛೋ ಖೀರಪಕೋವ ಮಾತರ’’ನ್ತಿ. –

ಇದಂ ಸುತ್ತಂ ಸಂಕಿಲೇಸಭಾಗೇ ವಾಚಕಞಾಪಕಭಾವೇನ ಪವತ್ತನತೋ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೇ ಸತ್ತಾ ಕಾಮನ್ಧಾ ಕಾಮೇನ ಅನ್ಧಾ ಜಾಲಸಞ್ಛನ್ನಾ ತಣ್ಹಾಛದನೇನ ಛಾದಿತಾ, ಪಮತ್ತಬನ್ಧನಾಯ ಬದ್ಧಾ ಬನ್ಧಿತಬ್ಬಾ, ತೇ ಸತ್ತೇ ಜರಾಮರಣಂ ಅನ್ವೇತಿ, ಯಥಾ ತಂ ಕುಮಿನಾಮುಖೇ ಯೇ ಮಚ್ಛಾ ಗಹಿತಾ, ತೇ ಮಚ್ಛೇ ಜರಾಮರಣಂ ಅನ್ವೇತಿ ಇವ, ಏವಂ ತೇ ಸತ್ತೇ ಜರಾಮರಣಂ ಅನ್ವೇತಿ. ಖೀರಪಕೋ ವಚ್ಛೋ ಮಾತರಂ ಅನ್ವೇತಿ ಇವ, ಏವಂ ತೇ ಸತ್ತೇ ಜರಾಮರಣಂ ಅನ್ವೇತೀತಿ ಯೋಜನಾ ಕಾತಬ್ಬಾ. ಅಥ ವಾ ಖೀರಪಕೋ ವಚ್ಛೋ ಮಾತರಂ ಅನ್ವೇತಿ ಇವ, ಕುಮಿನಾಮುಖೇ ಗಹಿತಾ ಮಚ್ಛಾ ಜರಾಮರಣಂ ಅನ್ವೇನ್ತಿ ಇವ ಚ, ಏವಂ ಯೇ ಸತ್ತಾ ಕಾಮನ್ಧಾ ಪಮತ್ತಬನ್ಧನಾಯ ಬನ್ಧಿತಬ್ಬಾ, ತೇ ಸತ್ತಾ ಜರಾಮರಣಂ ಅನ್ವೇನ್ತೀತಿ ಯೋಜನಾ.

‘‘ಇದಂ ಸುತ್ತಂಯೇವಾ’’ತಿ ವತ್ತಬ್ಬತ್ತಾ –

‘‘ಚತ್ತಾರಿಮಾನಿ, ಭಿಕ್ಖವೇ, ಅಗತಿಗಮನಾನಿ. ಕತಮಾನಿ ಚತ್ತಾರಿ? ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ, ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಅಗತಿಗಮನಾನಿ. ಇದಮವೋಚ ಭಗವಾ, ಇದಂ ವತ್ವಾನ ಸುಗತೋ, ಅಥಾಪರಂ ಏತದವೋಚ ಸತ್ಥಾ –

‘‘ಛನ್ದಾ ದೋಸಾ ಭಯಾ ಮೋಹಾ, ಯೋ ಧಮ್ಮಂ ಅತಿವತ್ತತಿ;

ನಿಹೀಯತಿ ತಸ್ಸ ಯಸೋ, ಕಾಳಪಕ್ಖೇವ ಚನ್ದಿಮಾ’’ತಿ. –

ಇದಂ ಸಂಕಿಲೇಸಭಾಗಿಯಂ ಸುತ್ತನ್ತಿ –

ವುತ್ತಂ. ಛನ್ದಾ ಛನ್ದಹೇತುನಾ ದೋಸಾ ದೋಸಹೇತುನಾ ಭಯಾ ಭಯಹೇತುನಾ ಮೋಹಾ ಮೋಹಹೇತುನಾ ಯೋ ರಾಜಾದಿಕೋ ಯೋ ವಿನಯಧರಾದಿಕೋ ವಾ ಧಮ್ಮಂ ಸಪ್ಪುರಿಸಧಮ್ಮಂ ಅತಿವತ್ತತಿ ಅತಿಕ್ಕಮಿತ್ವಾ ವತ್ತತಿ, ತಸ್ಸ ರಾಜಾದಿನೋ ವಾ ತಸ್ಸ ವಿನಯಧರಾದಿನೋ ವಾ ಯಸೋ ಕಿತ್ತಿ ಚ ಪರಿವಾರೋ ಚ ಭೋಗೋ ಚ ನಿಹೀಯತಿ. ಚನ್ದಿಮಾ ಕಾಳಪಕ್ಖೇ ಪಭಾಯ ನಿಹೀಯತಿ ಇವ, ಏವಂ ನಿಹೀಯತೀತಿ ಯೋಜನಾ.

‘‘ಏತ್ತಕಂಯೇವಾ’’ತಿ ವತ್ತಬ್ಬತ್ತಾ ‘‘ಮನೋಪುಬ್ಬಙ್ಗಮಾ ಧಮ್ಮಾ…ಪೇ… ಚಕ್ಕಂವ ವಹತೋ ಪದನ್ತಿ ಇದಂ ಸಂಕಿಲೇಸಭಾಗಿಯಂ ಸುತ್ತ’’ನ್ತಿ ವುತ್ತಂ. ಅತ್ಥೋ ಪಾಕಟೋ. ಅಟ್ಠಕಥಾಯಮ್ಪಿ ವಿಭತ್ತೋ.

‘‘ಮಿದ್ಧೀ ಯದಾ ಹೋತಿ ಮಹಗ್ಘಸೋ ಚ, ನಿದ್ದಾಯಿತಾ ಸಮ್ಪರಿವತ್ತಸಾಯೀ;

ಮಹಾವರಾಹೋವ ನಿವಾಪಪುಟ್ಠೋ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗೇ ವಿಸಯೇ ವಾಚಕಞಾಪಕಭಾವೇನ ಪವತ್ತನತೋ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ನಿವಾಪಪುಟ್ಠೋ ಮಹಾವರಾಹೋ ಗಾಮಸೂಕರೋ ನಿದ್ದಾಯಿತಾ ಸುಪನಸೀಲೋ ಸಮ್ಪರಿವತ್ತಸಾಯೀ ಹೋತಿ ಇವ, ಏವಂ ಯೋ ಮನ್ದೋ ಸತ್ತೋ ಯದಾ ಮಹಗ್ಘಸೋ ಹೋತಿ, ಸೋ ಮನ್ದೋ ಸತ್ತೋ ಮಿದ್ಧೀ ಥಿನಮಿದ್ಧಾಭಿಭೂತೋ ಹುತ್ವಾ ನಿದ್ದಾಯಿತಾ ಮುದುಫಸ್ಸಸಯನೇ ಮುದುಹತ್ಥೇಹಿ ಪರಾಮಸಿತೋ ಸಮ್ಪರಿವತ್ತಸಾಯೀ ಪುನಪ್ಪುನಂ ಗಬ್ಭಂ ಉಪೇತೀತಿ ಯೋಜನಾ.

‘‘ಅಯಸಾವ ಮಲಂ ಸಮುಟ್ಠಿತಂ, ತತುಟ್ಠಾಯ ತಮೇವ ಖಾದತಿ;

ಏವಂ ಅತಿಧೋನಚಾರಿನಂ, ಸಾನಿ ಕಮ್ಮಾನಿ ನಯನ್ತಿ ದುಗ್ಗತಿ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಅಯಸಾ ಅಯತೋ ಸಮುಟ್ಠಿತಂ ಜಾತಮಲಂ ತತುಟ್ಠಾಯ ತತೋ ಅಯತೋ ಉಟ್ಠಹಿತ್ವಾ ತಮೇವ ಅಯಂ ಖಾದತಿ ಇವ, ಏವಂ ಅತಿಧೋನಚಾರಿನಂ ಅತಿಕ್ಕಮಿತ್ವಾ ಧೋನಚಾರಿಪುಗ್ಗಲಂ ಸಾನಿ ಸಯಂ ಕತಾನಿ ಅಕುಸಲಕಮ್ಮಾನಿ ದುಗ್ಗತಿಂ ನಯನ್ತೀತಿ ಯೋಜನಾ.

‘‘ಚೋರೋ ಯಥಾ ಸನ್ಧಿಮುಖೇ ಗಹೀತೋ, ಸಕಮ್ಮುನಾ ಹಞ್ಞತಿ ಬಜ್ಝತೇ ಚ;

ಏವಂ ಅಯಂ ಪೇಚ್ಚ ಪಜಾ ಪರತ್ಥ, ಸಕಮ್ಮುನಾ ಹಞ್ಞತಿ ಬಜ್ಝತೇ ಚಾ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಸನ್ಧಿಮುಖೇ ರಾಜಪುರಿಸಾದೀಹಿ ಗಹಿತೋ ಚೋರೋ ಸಕಮ್ಮುನಾ ಅತ್ತನಾ ಕತೇನ ಚೋರಕಮ್ಮೇನ ಹಞ್ಞತಿ ಚ ಬಜ್ಝತೇ ಚ ಯಥಾ, ಏವಂ ಅಯಂ ಪಾಪಕಾರಿನೀ ಪಜಾ ಪರತ್ಥ ಪರಲೋಕೇ ಪೇಚ್ಚ ಸಕಮ್ಮುನಾ ಸಯಂ ಕತೇನ ಅಕುಸಲಕಮ್ಮುನಾ ಸತ್ಥಾದೀಹಿ ಹಞ್ಞತಿ ಚ ಅದ್ದುಬನ್ಧನಾದೀಹಿ ಬಜ್ಝತೇ ಚಾತಿ ಯೋಜನಾ.

‘‘ಸುಖಕಾಮಾನಿ ಭೂತಾನಿ, ಯೋ ದಣ್ಡೇನ ವಿಹಿಂಸತಿ;

ಅತ್ತನೋ ಸುಖಮೇಸಾನೋ, ಪೇಚ್ಚ ಸೋ ನ ಲಭತೇ ಸುಖ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಅತ್ತನೋ ಸುಖಂ ಏಸಾನೋ ಏಸಮಾನೋ ಯೋ ಸತ್ತೋ ಅಞ್ಞಾನಿ ಸುಖಕಾಮಾನಿ ಭೂತಾನಿ ದಣ್ಡೇನ ವಿಹಿಂಸತಿ, ಸೋ ಹಿಂಸಕೋ ಸತ್ತೋ ಪರಲೋಕೇ ಪೇಚ್ಚ ಸುಖಂ ನ ಲಭತೀತಿ ಯೋಜನಾ.

‘‘ಗುನ್ನಂ ಚೇ ತರಮಾನಾನಂ, ಜಿಮ್ಹಂ ಗಚ್ಛತಿ ಪುಙ್ಗವೋ;

ಸಬ್ಬಾ ತಾ ಜಿಮ್ಹಂ ಗಚ್ಛನ್ತಿ, ನೇತ್ತೇ ಜಿಮ್ಹಂ ಗತೇ ಸತಿ.

‘‘ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಚೇ ಅಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ದುಕ್ಖಂ ಸೇತಿ, ರಾಜಾ ಚೇ ಹೋತಿ ಅಧಮ್ಮಿಕೋ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ನದಿಂ ತರಮಾನಾನಂ ಗುನ್ನಂ ಪುಙ್ಗವೋ ಜಿಮ್ಹಂ ಚೇ ಗಚ್ಛತಿ, ಏವಂ ನೇತ್ತೇ ಜಿಮ್ಹಂ ಗತೇ ಸತಿ ಸಬ್ಬಾ ತಾ ಗಾವಿಯೋ ಜಿಮ್ಹಂ ಗಚ್ಛನ್ತಿ ಯಥಾ, ಏವಮೇವ ಮನುಸ್ಸೇಸು ಯೋ ರಾಜಾ ಸೇಟ್ಠಸಮ್ಮತೋ, ಸೋ ರಾಜಾ ಅಧಮ್ಮಂ ಚರತಿ, ಏವಂ ರಞ್ಞೇ ಅಧಮ್ಮಂ ಚರನ್ತೇ ಸತಿ ಇತರಾ ಪಜಾ ಪಗೇವ ಪಠಮಮೇವ ಅಧಮ್ಮಂ ಚರತಿ. ರಾಜಾ ಅಧಮ್ಮಿಕೋ ಚೇ ಹೋತಿ, ಏವಂ ರಞ್ಞೇ ಅಧಮ್ಮಿಕೇ ಸತಿ ಸಬ್ಬಂ ರಟ್ಠಂ ದುಕ್ಖಂ ಸೇತೀತಿ ಯೋಜನಾ.

‘‘ಸುಕಿಚ್ಛರೂಪಾ ವತಿಮೇ ಮನುಸ್ಸಾ, ಕರೋನ್ತಿ ಪಾಪಂ ಉಪಧೀಸು ರತ್ತಾ;

ಗಚ್ಛನ್ತಿ ತೇ ಬಹುಜನಸನ್ನಿವಾಸಂ, ನಿರಯಂ ಅವೀಚಿಂ ಕಟುಕಂ ಭಯಾನಕ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೇ ಮನುಸ್ಸಾ ಉಪಧೀಸು ಕಾಮಗುಣೂಪಧೀಸು ರತ್ತಾ ರಾಗಾಭಿಭೂತಾ ಹುತ್ವಾ ಪಾಪಂ ಅಕುಸಲಕಮ್ಮಂ ಕರೋನ್ತಿ, ಇಮೇ ಪಾಪಕಮ್ಮಕರಾ ಮನುಸ್ಸಾ ಸುಕಿಚ್ಛರೂಪಾ ವತ ಸುಟ್ಠು ಕಿಚ್ಛಾಪನ್ನರೂಪಾ ವತ ಭವನ್ತಿ, ತೇ ಪಾಪಕಮ್ಮಕರಾ ಮನುಸ್ಸಾ ಕಟುಕಂ ಭಯಾನಕಂ ಬಹುಜನಸನ್ನಿವಾಸಂ ನಿರಯಂ ಅವೀಚಿಂ ಗಚ್ಛನ್ತೀತಿ ಯೋಜನಾ.

‘‘ಫಲಂ ವೇ ಕದಲಿಂ ಹನ್ತಿ, ಫಲಂ ವೇಳುಂ ಫಲಂ ನಳಂ;

ಸಕ್ಕಾರೋ ಕಾಪುರಿಸಂ ಹನ್ತಿ, ಗಬ್ಭೋ ಅಸ್ಸತರಿಂ ಯಥಾ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಫಲಂ ಕದಲಿಯಾ ಫಲಂ ಕದಲಿಂ ವೇ ಏಕನ್ತೇನ ಹನ್ತಿ ಯಥಾ, ಫಲಂ ವೇಳುಂ ವೇ ಏಕನ್ತೇನ ಹನ್ತಿ ಯಥಾ, ಫಲಂ ನಳಂ ವೇ ಏಕನ್ತೇನ ಹನ್ತಿ ಯಥಾ, ಗಬ್ಭೋ ಅಸ್ಸತರಿಂ ಮಾತರಂ ವೇ ಏಕನ್ತೇನ ಹನ್ತಿ ಯಥಾ, ಏವಂ ಸಕ್ಕಾರೋ ಕಾಪುರಿಸಂ ವೇ ಏಕನ್ತೇನ ಹನ್ತೀತಿ ಯೋಜನಾ.

‘‘ಕೋಧಮಕ್ಖಗರು ಭಿಕ್ಖು, ಲಾಭಸಕ್ಕಾರಗಾರವೋ;

ಸುಖೇತ್ತೇ ಪೂತಿಬೀಜಂವ, ಸದ್ಧಮ್ಮೇ ನ ವಿರೂಹತೀ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಸುಖೇತ್ತೇ ಸುನ್ದರೇ ಖೇತ್ತೇಪಿ ಖಿತ್ತಂ ಪೂತಿಬೀಜಂ ನ ರುಹತಿ ಇವ, ಏವಂ ಯೋ ಭಿಕ್ಖು ಲಾಭಸಕ್ಕಾರಗಾರವೋ ಕೋಧಂ ಕುಜ್ಝನಲಕ್ಖಣಂ ಕೋಧಂ, ಮಕ್ಖಂ ಪರಗುಣಸೀಲಮಕ್ಖನಲಕ್ಖಣಂ ಮಕ್ಖಞ್ಚ ಗರುಂ ಕತ್ವಾ ಚರತಿ, ಸೋ ಚರನ್ತೋ ಭಿಕ್ಖು ಸದ್ಧಮ್ಮಸ್ಮಿಂ ನ ರುಹತೀತಿ ಯೋಜನಾ.

೯೧. ‘‘ಇಧಾಹಂ, ಭಿಕ್ಖವೇ, ಏಕಚ್ಚಂ ಪುಗ್ಗಲಂ ಪದುಟ್ಠಚಿತ್ತಂ ಏವಂ ಚೇತಸಾ ಚೇತೋ ಪರಿಚ್ಚ ಪಜಾನಾಮಿ…ಪೇ… ಇತಿ ಮೇ ಸುತ’’ನ್ತಿ ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಭಿಕ್ಖವೇ ಇಧ ಸಾಸನೇ, ಲೋಕೇ ವಾ ಅಹಂ ಏಕಚ್ಚಂ ಪುಗ್ಗಲಂ ಪದುಟ್ಠಚಿತ್ತಂ ಮಮ ಚೇತಸಾ ತಸ್ಸ ಚೇತೋ ಚಿತ್ತಂ ಪರಿಚ್ಚ ಪರಿಚ್ಛಿನ್ದಿತ್ವಾ ಬುದ್ಧಚಕ್ಖುನಾ ಏವಂ ಪಜಾನಾಮಿ. ‘‘ಕಥಂ ಪಜಾನಾಮೀ’’ತಿ ಚೇ ಪುಚ್ಛೇಯ್ಯ, ಯಞ್ಚ ಪಟಿಪದಂ ಪಟಿಪನ್ನೋ, ಯಞ್ಚ ಮಗ್ಗಂ ಸಮಾರುಳ್ಹೋ ಅಯಂ ಪುಗ್ಗಲೋ ಯಥಾ ಯಾಯ ದುಪ್ಪಟಿಪದಾಯ ಯೇನ ದುಮ್ಮಗ್ಗೇನ ಇರಿಯತಿ ಪವತ್ತತಿ, ತಾಯ ದುಪ್ಪಟಿಪದಾಯ ತೇನ ದುಮ್ಮಗ್ಗೇನ ಇಮಮ್ಹಿ ಇಮಸ್ಮಿಂ ಸಮಯೇ ದುಪ್ಪಟಿಪಜ್ಜನಕಾಲೇ ಅಯಂ ದುಪ್ಪಟಿಪನ್ನಂ ಪಟಿಪನ್ನೋ ದುಮ್ಮಗ್ಗಸಮಾರುಳ್ಹೋ ಪುಗ್ಗಲೋ ಚೇ ಕಾಲಂ ಕರೇಯ್ಯ, ಏವಂ ಸತಿ ಆಭತಂ ವತ್ಥು ನಿಕ್ಖಿತ್ತಂ ಯಥಾ, ಏವಂ ನಿರಯೇ ನಿಕ್ಖಿತ್ತೋ. ತಂ ಕಿಸ್ಸ ಹೇತು? ಭಿಕ್ಖವೇ ಅಸ್ಸ ಪುಗ್ಗಲಸ್ಸ ಚಿತ್ತಂ ಪದುಟ್ಠಂ ಪದೋಸಿತಂ ಹಿ ಯಸ್ಮಾ ಹೋತಿ, ತಸ್ಮಾ ನಿಕ್ಖಿತ್ತೋ. ಏವಂ ಇಧ ಸಾಸನೇ, ಲೋಕೇ ವಾ ಚೇತೋಪದೋಸಹೇತು ಚ ಪನ ಏಕಚ್ಚೇ ಸತ್ತಾ ಪುಗ್ಗಲಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ಉಪಪಜ್ಜನ್ತೀತಿ ಪಜಾನಾಮೀತಿ. ಏತಮತ್ಥಂ ಭಗವಾ ಅವೋಚ. ತತ್ಥ ತಸ್ಮಿಂ ಸುತ್ತೇ ಏತಂ ‘‘ಪದುಟ್ಠಚಿತ್ತಂ ಞತ್ವಾನ…ಪೇ… ನಿರಯಂ ಸೋ ಉಪಪಜ್ಜತೀ’’ತಿ ಗಾಥಾವಚನಂ ಇತಿ ಏವಂ ವುಚ್ಚತಿ.

ಸತ್ಥಾ ಇಧ ಸಾಸನೇ, ಲೋಕೇ ವಾ ಪದುಟ್ಠಚಿತ್ತಂ ಏಕಚ್ಚಂ ಪುಗ್ಗಲಂ ಞತ್ವಾನ ಭಿಕ್ಖೂನಂ ಸನ್ತಿಕೇ ಏತಮತ್ಥಂ ಬ್ಯಾಕಾಸಿ. ಇಮಮ್ಹಿ ಇಮಸ್ಮಿಂ ಸಮಯೇ ಅಯಂ ಪುಗ್ಗಲೋ ಚೇ ಕಾಲಂ ಕಯಿರಾಥ, ಏವಂ ಸತಿ ಪದುಟ್ಠಚಿತ್ತಸಮಙ್ಗೀ ಹಿ ನಿರಯಸ್ಮಿಂ ಉಪಪಜ್ಜೇಯ್ಯ, ಪುಗ್ಗಲಸ್ಸ ಚಿತ್ತಂ ಪದೂಸಿತಂ ಹಿ ಯಸ್ಮಾ ಹೋತಿ, ತಸ್ಮಾ ಉಪಪಜ್ಜೇಯ್ಯ, ಚೇತೋಪದೋಸಹೇತು ಸತ್ತಾ ದುಗ್ಗತಿಂ ಗಚ್ಛನ್ತಿ ಆಭತಂ ವತ್ಥುಂ ನಿಕ್ಖಿಪೇಯ್ಯ ಯಥಾ, ಏವಮೇವಂ ತಥಾವಿಧೋ ದುಪ್ಪಞ್ಞೋ ಸೋ ಪದೋಸಚಿತ್ತೋ ಪುಗ್ಗಲೋ ಕಾಯಸ್ಸ ಭೇದಾ ಪರಂ ಮರಣಾ ನಿರಯಂ ಉಪಪಜ್ಜತೀತಿ ಅಯಮ್ಪಿ ಅತ್ಥೋ ಭಗವತಾ ವುತ್ತೋ, ಇತಿ ಮೇ ಮಯಾ ಸುತನ್ತಿ ಯೋಜನಾ.

‘‘ಸಚೇ ಭಾಯಥ ದುಕ್ಖಸ್ಸ, ಸಚೇ ವೋ ದುಕ್ಖಮಪ್ಪಿಯಂ;

ಮಾಕತ್ಥ ಪಾಪಕಂ ಕಮ್ಮಂ, ಆವಿ ವಾ ಯದಿ ವಾ ರಹೋ.

‘‘ಸಚೇ ಚ ಪಾಪಕಂ ಕಮ್ಮಂ, ಕರಿಸ್ಸಥ ಕರೋಥ ವಾ;

ನ ವೋ ದುಕ್ಖಾ ಪಮುತ್ಯತ್ಥಿ, ಉಪೇಚ್ಚಪಿ ಪಲಾಯತ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಸಪ್ಪುರಿಸಾ ತುಮ್ಹೇ ದುಕ್ಖಸ್ಸ ಜಾತಿದುಕ್ಖಜರಾದುಕ್ಖಬ್ಯಾಧಿದುಕ್ಖಮರಣದುಕ್ಖಅಪಾಯದುಕ್ಖ- ಅತೀತವಟ್ಟಮೂಲಕದುಕ್ಖಅನಾಗತವಟ್ಟಮೂಲಕದುಕ್ಖಪಚ್ಚುಪ್ಪನ್ನಾಹಾರಮೂಲಕದುಕ್ಖಾತಿ ಅಟ್ಠವಿಧಸ್ಸ ದುಕ್ಖಸ್ಸ ಸಚೇ ಭಾಯಥ, ವೋ ತುಮ್ಹೇಹಿ ದುಕ್ಖಂ ತಥಾ ಅಟ್ಠವಿಧಂ ದುಕ್ಖಂ ಸಚೇ ಅಪ್ಪಿಯಂ, ಏವಂ ಸತಿ ಆವಿ ವಾ ಯದಿ ರಹೋ ವಾ ಪಾಪಕಂ ಕಮ್ಮಂ ಮಾಕತ್ಥ ಮಾ ಅಕತ್ಥ. ಸಪ್ಪುರಿಸಾ ತುಮ್ಹೇ ಆವಿ ವಾ ಯದಿ ರಹೋ ವಾ ಪಾಪಕಂ ಕಮ್ಮಂ ಸಚೇ ಕರಿಸ್ಸಥ ವಾ ಸಚೇ ಕರೋಥ ವಾ, ಏವಂ ಸತಿ ಉಪೇಚ್ಚಪಿ ಸಞ್ಚಿಚ್ಚಾಪಿ ಪಲಾಯತಂ ಪಲಾಯನ್ತಾನಂ ವೋ ತುಮ್ಹಾಕಂ ದುಕ್ಖಾ ಅಟ್ಠವಿಧಾ ದುಕ್ಖತೋ ಪಮುತ್ತಿ ಮುಚ್ಚನಂ ನತ್ಥೇವಾತಿ ಯೋಜನಾ.

‘‘ಅಧಮ್ಮೇನ ಧನಂ ಲದ್ಧಾ, ಮುಸಾವಾದೇನ ಚೂಭಯಂ;

ಮಮೇತಿ ಬಾಲಾ ಮಞ್ಞನ್ತಿ, ತಂ ಕಥಂ ನು ಭವಿಸ್ಸತಿ.

‘‘ಅನ್ತರಾಯಾ ಸು ಭವಿಸ್ಸನ್ತಿ, ಸಮ್ಭತಸ್ಸ ವಿನಸ್ಸತಿ;

ಮತಾ ಸಗ್ಗಂ ನ ಗಚ್ಛನ್ತಿ, ನನು ಏತ್ತಾವತಾ ಹತಾ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೇ ಬಾಲಾ ಅಧಮ್ಮೇನ ಚ ಮುಸಾವಾದೇನ ಚ ಧನಂ ಸವಿಞ್ಞಾಣಾವಿಞ್ಞಾಣಂ ಸಬ್ಬಂ ಲಭಿತಬ್ಬಂ ಧನಂ ಲದ್ಧಾ ಉಭಯಂ ಧನಂ ‘‘ಮಮ ಧನ’’ನ್ತಿ ಮಞ್ಞನ್ತಿ, ತೇಸಂ ಬಾಲಾನಂ ತಂ ಉಭಯಂ ಧನಂ ಕಥಂ ಕೇನ ನು ಪಕಾರೇನ ಭವಿಸ್ಸತಿ, ಅಧಮ್ಮೇನ ಸಮ್ಭತತ್ತಾ ಚಿರಟ್ಠಿತಿಕಂ ನ ಹೋತಿ. ಅನ್ತರಾಯಾ ರಾಜನ್ತರಾಯಾದಯೋ ಅನ್ತರಾಯಾ ತೇಸಂ ಬಾಲಾನಂ ಭವಿಸ್ಸನ್ತಿ. ಯೇನ ಅಧಮ್ಮವೋಹಾರಾದಿಕೇನ ಯಂ ಧನಂ ಸಮ್ಭತಂ, ಅಸ್ಸ ಅಧಮ್ಮವೋಹಾರಾದಿಕಸ್ಸ ತಂ ಸಮ್ಭತಂ ಧನಂ ವಿನಸ್ಸತಿ. ಮತಾ ಮರನ್ತಾ ತೇ ಬಾಲಾ ಸಗ್ಗಂ ಸುಗತಿಂ ನ ಗಚ್ಛನ್ತಿ. ಸುಗತಿ ಹಿ ಸೋಭನೇಹಿ ಭೋಗೇಹಿ ಅಗ್ಗೋತಿ ‘‘ಸಗ್ಗೋ’’ತಿ ಅಧಿಪ್ಪೇತಾ. ಏತ್ತಾವತಾ ಏತ್ತಕೇನ ದಿಟ್ಠಧಮ್ಮಿಕಸಮ್ಪರಾಯಿಕಾನಂ ಅತ್ತಹಿತಾನಂ ಹಾಯನೇನ ತೇ ಬಾಲಾ ಹತಾ ವಿನಟ್ಠಾ ಭವನ್ತಿ ನನೂತಿ ಯೋಜನಾ.

‘‘ಕಥಂ ಖಣತಿ ಅತ್ತಾನಂ, ಕಥಂ ಮಿತ್ತೇಹಿ ಜೀರತಿ;

ಕಥಂ ವಿವಟ್ಟತೇ ಧಮ್ಮಾ, ಕಥಂ ಸಗ್ಗಂ ನ ಗಚ್ಛತಿ’’.

‘‘ಲೋಭಾ ಖಣತಿ ಅತ್ತಾನಂ, ಲುದ್ಧೋ ಮಿತ್ತೇಹಿ ಜೀರತಿ;

ಲೋಭಾ ವಿವಟ್ಟತೇ ಧಮ್ಮಾ, ಲೋಭಾ ಸಗ್ಗಂ ನ ಗಚ್ಛತೀ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೋಜನತ್ಥೋ ಪಾಕಟೋ.

‘‘ಚರನ್ತಿ ಬಾಲಾ ದುಮ್ಮೇಧಾ, ಅಮಿತ್ತೇನೇವ ಅತ್ತನಾ;

ಕರೋನ್ತಾ ಪಾಪಕಂ ಕಮ್ಮಂ, ಯಂ ಹೋತಿ ಕಟುಕಪ್ಫಲಂ.

‘‘ನ ತಂ ಕಮ್ಮಂ ಕತಂ ಸಾಧು, ಯಂ ಕತ್ವಾ ಅನುತಪ್ಪತಿ;

ಯಸ್ಸ ಅಸ್ಸುಮುಖೋ ರೋದಂ, ವಿಪಾಕಂ ಪಟಿಸೇವತೀ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ದುಮ್ಮೇಧಾ ನಿಪ್ಪಞ್ಞಾ ಬಾಲಾ ಅಮಿತ್ತೇನ ಪಾಪಕಂ ಕಮ್ಮಂ ಕತಂ ಇವ, ಏವಂ ಅತ್ತನಾ ಕಟುಕಪ್ಫಲಂ ಯಂ ಕಮ್ಮಂ ಕತಂ ಹೋತಿ, ತಂ ಪಾಪಕಂ ಕತಂ ಕಮ್ಮಂ ಕರೋನ್ತಾ ಚರನ್ತಿ. ಯಂ ಕಮ್ಮಂ ಕತ್ವಾ ಕರೋನ್ತೋ ಪಚ್ಛಾ ಅನುತಪ್ಪತಿ, ತಂ ಕತಂ ಕಮ್ಮಂ ನ ಸಾಧು. ಯಸ್ಸ ಕಮ್ಮಸ್ಸ ವಿಪಾಕಂ ರೋದಂ ರುದನ್ತೋ ಅಸ್ಸುಮುಖೋ ಪಟಿಸೇವತಿ, ತಂ ಕತಂ ಕಮ್ಮಂ ನ ಸಾಧೂತಿ ಯೋಜನಾ.

‘‘ದುಕ್ಕರಂ ದುತ್ತಿತಿಕ್ಖಞ್ಚ…ಪೇ… ಅವೀತರಾಗೋ’’ತಿ ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಸುತ್ತತ್ಥೋ ಅಟ್ಠಕಥಾಯಂ ವಿತ್ಥಾರತೋ ವುತ್ತೋ.

‘‘ಅಪ್ಪಮೇಯ್ಯಂ ಪಮಿನನ್ತೋ, ಕೋಧ ವಿದ್ವಾ ವಿಕಪ್ಪಯೇ;

ಅಪ್ಪಮೇಯ್ಯಂ ಪಮಾಯಿನಂ, ನಿವುತಂ ತಂ ಮಞ್ಞೇ ಅಕಿಸ್ಸವ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಇಧ ಸಾಸನೇ ಅಪ್ಪಮೇಯ್ಯಂ ಅಪ್ಪಮೇಯ್ಯಗುಣಂ ಖೀಣಾಸವಂ ಪುಗ್ಗಲಂ ‘‘ಅಯಂ ಖೀಣಾಸವೋ ಪುಗ್ಗಲೋ ಏತ್ತಕಸೀಲೋ ಏತ್ತಕಸಮಾಧಿ ಏತ್ತಕಪಞ್ಞೋ’’ತಿ ಪಮಿನನ್ತೋ ಕೋ ಪುಥುಜ್ಜನೋ ವಿಕಪ್ಪಯೇ. ಅಪ್ಪಮೇಯ್ಯಂ ಖೀಣಾಸವಪುಗ್ಗಲಂ ಪಮಾಯಿನಂ ಪಮಾಯನ್ತಂ ತಂ ಪುಥುಜ್ಜನಂ ಅಯಂ ನಿವುತಂ ಅವಕುಜ್ಜಪಞ್ಞಂ ಅಕಿಸ್ಸವಂ ಅಪಞ್ಞನ್ತಿ ಮಞ್ಞೇ ಮಞ್ಞಾಮೀತಿ ಯೋಜನಾ.

‘‘ಪುರಿಸಸ್ಸ ಹಿ ಜಾತಸ್ಸ, ಕುಠಾರೀ ಜಾಯತೇ ಮುಖೇ;

ಯಾಯ ಛಿನ್ದತಿ ಅತ್ತಾನಂ, ಬಾಲೋ ದುಬ್ಭಾಸಿತಂ ಭಣಂ.

‘‘ನ ಹಿ ಸತ್ಥಂ ಸುನಿಸಿತಂ, ವಿಸಂ ಹಲಾಹಲಂ ಇವ;

ಏವಂ ವಿರದ್ಧಂ ಪಾತೇತಿ, ವಾಚಾ ದುಬ್ಭಾಸಿತಾ ಯಥಾ’’ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ದುಬ್ಭಾಸಿತಂ ಅರಿಯೂಪವಾದಸಙ್ಖಾತಂ ಫರುಸವಾಚಂ ಭಣಂ ಭಣನ್ತೋ ಬಾಲೋ ದುಟ್ಠೋ ಪುರಿಸೋ ಯಾಯ ಕುಠಾರೀಸದಿಸಿಯಾ ದುಬ್ಭಾಸಿತವಾಚಾಯ ಅತ್ತಾನಂ ಛಿನ್ದತಿ, ಸಾ ಕುಠಾರೀಸದಿಸೀ ದುಬ್ಭಾಸಿತವಾಚಾ ಜಾತಸ್ಸ ಪುರಿಸಸ್ಸ ಮುಖೇ ಜಾಯತೇ ಜಾಯತಿ, ಸಾ ದುಬ್ಭಾಸಿತವಾಚಾ ಮುಖೇ ಜಾಯತಿ ಇವ, ಏವಂ ಸುನಿಸಿತಂ ಸತ್ಥಂ ಮುಖೇ ನ ಜಾಯತಿ, ಯಥಾ ಹಲಾಹಲಂ ವಿಸಂ ಮುಖೇ ನ ಜಾಯತಿ, ದುಬ್ಭಾಸಿತಾ ವಾಚಾ ಅಪಾಯೇಸು ವಿರದ್ಧಂ ಪುಗ್ಗಲಂ ಪಾತೇತಿ ಯಥಾ, ಏವಂ ಸುನಿಸಿತಂ ಸತ್ಥಂ ಅಪಾಯೇಸು ನ ಪಾತೇತಿ, ಹಲಾಹಲಂ ವಿಸಂ ಅಪಾಯೇಸು ನ ಪಾತೇತೀತಿ ಯೋಜನಾ.

೯೨. ‘‘ಯೋ ನಿನ್ದಿಯಂ ಪಸಂಸತಿ, ತಂ ವಾ ನಿನ್ದತಿ ಯೋ ಪಸಂಸಿಯೋ;

ವಿಚಿನಾತಿ ಮುಖೇನ ಸೋ ಕಲಿಂ, ಕಲಿನಾ ತೇನ ಸುಖಂ ನ ವಿನ್ದತಿ.

‘‘ಅಪ್ಪಮತ್ತೋ ಅಯಂ ಕಲಿ, ಯೋ ಅಕ್ಖೇಸು ಧನಪರಾಜಯೋ;

ಸಬ್ಬಸ್ಸಾಪಿ ಸಹಾಪಿ ಅತ್ತನಾ, ಅಯಮೇವ ಮಹನ್ತತರೋ ಕಲಿ;

ಯೋ ಸುಗತೇಸು ಮನಂ ಪದೋಸಯೇ.

‘‘ಸತಂ ಸಹಸ್ಸಾನಂ ನಿರಬ್ಬುದಾನಂ, ಛತ್ತಿಂಸತೀ ಪಞ್ಚ ಚ ಅಬ್ಬುದಾನಿ;

ಯಮರಿಯಗರಹೀ ನಿರಯಂ ಉಪೇತಿ, ವಾಚಂ ಮನಞ್ಚ ಪಣಿಧಾಯ ಪಾಪಕ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೋ ಪುಗ್ಗಲೋ ನಿನ್ದಿಯಂ ದುಚ್ಚರಂ ದುಸ್ಸೀಲಂ ಪುಗ್ಗಲಂ ಪಸಂಸತಿ, ಸೋ ಪಸಂಸಕೋ ಪುಗ್ಗಲೋ ಮುಖೇನ ಕಲಿಂ ವಿಚಿನಾತಿ ಉಪಚಿನಾತಿ, ತೇನ ಕಲಿನಾ ಸುಖಂ ನ ವಿನ್ದತಿ. ಯೋ ಸುಚಾರೀ ಸೀಲವಾ ಪುಗ್ಗಲೋ ಪಸಂಸಿಯೋ ಹೋತಿ, ತಂ ವಾ ಸುಚಾರಿಂ ವಾ ಸೀಲವನ್ತಂ ಪುಗ್ಗಲಂ ಯೋ ಪುಗ್ಗಲೋ ನಿನ್ದತಿ, ಸೋ ನಿನ್ದನ್ತೋ ಪುಗ್ಗಲೋ ಮುಖೇನ ಕಲಿಂ ವಿಚಿನಾತಿ ಉಪಚಿನಾತಿ, ತೇನ ಕಲಿನಾ ಸುಖಂ ನ ವಿನ್ದತಿ.

ಅತ್ತನಾ ಸಹಾಪಿ ಸಬ್ಬಸ್ಸ ಧನಸ್ಸ ವಸೇನಪಿ ಅಕ್ಖೇಸು ಯೋ ಧನಪರಾಜಯೋ ಭವತಿ, ಅಯಂ ಕಲಿ ಅಯಂ ಧನಪರಾಜಯೋ ಅಪ್ಪಮತ್ತೋ ಹೋತಿ. ಯೋ ಪುಗ್ಗಲೋ ಸುಗತೇಸು ಮನಂ ಪದೋಸಯೇ, ತಸ್ಸ ಪುಗ್ಗಲಸ್ಸ ಯೋ ಕಲಿ ಭವತಿ, ಅಯಮೇವ ಕಲಿ ಮಹನ್ತತರೋ ಹೋತಿ.

ಕಸ್ಮಾ? ವಾಚಞ್ಚ ಮನಞ್ಚ ಪಣಿಧಾಯ ಅರಿಯಗರಹೀ ಪುಗ್ಗಲೋ ಯಂ ಕಾಲಂ ಪಾಪಕಂ ನಿರಯಂ ಉಪೇತಿ, ಸೋ ಕಾಲೋ ‘‘ಸತಂ ಸಹಸ್ಸಾನಂ ನಿರಬ್ಬುದಾನಞ್ಚ ಛತ್ತಿಂಸ ನಿರಬ್ಬುದಾನಿ ಚ ಪಞ್ಚ ಅಬ್ಬುದಾನಿ ಚ ಯಸ್ಮಿಂ ಕಾಲೇ ಗಣೀಯನ್ತೀ’’ತಿ ತೇನ ಕಾಲೇನ ಸಮೋ ಹೋತಿ, ತಸ್ಮಾ ಮಹನ್ತತರೋ ಹೋತೀತಿ ಯೋಜನಾ.

‘‘ಯೋ ಲೋಭಗುಣೇ ಅನುಯುತ್ತೋ…ಪೇ…

ಗಚ್ಛಸಿ ಖೋ ಪಪತಂ ಚಿರರತ್ತ’’ನ್ತಿ. –

ಇದಂ ಸುತ್ತಮ್ಪಿ ಸಂಕಿಲೇಸಭಾಗಿಯಂ ಸುತ್ತಂ ನಾಮ. ಯೋ ಪುಗ್ಗಲೋ ಲೋಭಗುಣೇ ಅನುಯುತ್ತೋ ಅನು ಪುನಪ್ಪುನಂ ಯುತ್ತೋ ಹೋತಿ, ಸೋ ಪುಗ್ಗಲೋ ಅಞ್ಞೇ ಪುಗ್ಗಲೇ ವಚಸಾ ಪರಿಭಾಸತಿ, ಅಸ್ಸದ್ಧೋ ಕದರಿಯೋ ಅವದಞ್ಞೂ ಬುದ್ಧಾನಂ ಓವಾದಞ್ಞೂ ನ ಹೋತಿ, ಮಚ್ಛರೀ ಪೇಸುಣಿಯಂ ಪೇಸುಣಿಯಸ್ಮಿಂ ಅನುಯುತ್ತೋ ಹೋತಿ.

ಮುಖದುಗ್ಗ ಮುಖವಿಸಮ ವಿಭೂತ ವಿಗತಭೂತ ಅನರಿಯ ಭೂನಹು ಬುದ್ಧಿವಿನಾಸಕ ಪಾಪಕ ದುಕ್ಕಟಕಾರಿ ಪುರಿಸನ್ತ ಪುರಿಸಲಾಮಕ ಕಲಿ ಅಲಕ್ಖಿ ಅವಜಾತಪುತ್ತ ತ್ವಂ ನೇರಯಿಕೋ ಅಸಿ. ಇಧ ಇದಾನಿ ಬಹುಭಾಣೀ ಮಾ ಹೋಹಿ.

ಅಹಿತಾಯ ರಜಂ ಅತ್ತನಿ ಮಾ ಆಕಿರಸಿ ಮಾ ಪಕ್ಖಿಪಸಿ. ಕಿಬ್ಬಿಸಕಾರಿ ತ್ವಂ ಸನ್ತೇ ಖೀಣಾಸವೇ ಪುಗ್ಗಲೇ ಗರಹಸಿ, ಬಹೂನಿ ದುಚ್ಚರಿತಾನಿ ಕಮ್ಮಾನಿ ಚರಸಿ, ಚರಿತ್ವಾ ತ್ವಂ ಚಿರರತ್ತಂ ರಚನವಿರಹಿತಂ ಪಪತಂ ನರಕಂ ನಿರಯಂ ಗಚ್ಛಸಿ ಖೋ ಏಕಂಸೇನಾತಿ ಯೋಜನಾ.

ನಾನಾವಿಧಂ ಸಂಕಿಲೇಸಭಾಗಿಯಂ ಸುತ್ತಂ ಆಚರಿಯೇನ ನಿದ್ಧಾರಿತಂ, ಅಮ್ಹೇಹಿ ಚ ಞಾತಂ, ‘‘ಕತಮಂ ವಾಸನಾಭಾಗಿಯಂ ಸುತ್ತ’’ನ್ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮಂ ವಾಸನಾಭಾಗಿಯಂ ಸುತ್ತ’’ನ್ತಿಆದಿ ವುತ್ತಂ. ತತ್ಥಾತಿ ತೇಸು ಸೋಳಸಸು ಸಂಕಿಲೇಸಭಾಗಿಯಾದೀಸು ಸುತ್ತೇಸು ಕತಮಂ ಸುತ್ತಂ ವಾಸನಾಭಾಗಿಯಂ ಸುತ್ತಂ ನಾಮಾತಿ ಪುಚ್ಛತಿ. ‘‘ಮನೋಪುಬ್ಬಙ್ಗಮಾ ಧಮ್ಮಾ…ಪೇ… ಛಾಯಾವ ಅನಪಾಯಿನೀ’’ತಿ ಇದಂ ವಾಸನಾಭಾಗೇ ಪುಞ್ಞಭಾಗೇ ವಿಸಯೇ ವಾಚಕಞಾಪಕಭಾವೇನ ಪವತ್ತನತೋ ವಾಸನಾಭಾಗಿಯಂ ಸುತ್ತಂ ನಾಮ. ಅತ್ಥೋ ಪಾಕಟೋ.

೯೩. ‘‘ಮಹಾನಾಮೋ ಸಕ್ಕೋ ಭಗವನ್ತಂ ಏತದವೋಚ…ಪೇ… ಅಪಾಪಿಕಾ ಕಾಲಙ್ಕಿರಿಯಾ’’ತಿ ಇದಂ ಸುತ್ತಮ್ಪಿ ವಾಸನಾಭಾಗೇ ಪುಞ್ಞಭಾಗೇ ವಿಸಯೇ ವಾಚಕಞಾಪಕಭಾವೇನ ಪವತ್ತನತೋ ವಾಸನಾಭಾಗಿಯಂ ಸುತ್ತಂ ನಾಮ. ಅತ್ಥೋ ಪಾಕಟೋ.

‘‘ಸುಖಕಾಮಾನಿ ಭೂತಾನಿ, ಯೋ ದಣ್ಡೇನ ನ ಹಿಂಸತಿ;

ಅತ್ತನೋ ಸುಖಮೇಸಾನೋ, ಪೇಚ್ಚ ಸೋ ಲಭತೇ ಸುಖ’’ನ್ತಿ. –

ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಅತ್ಥೋ ಪಾಕಟೋ.

‘‘ಗುನ್ನಂ ಚೇ ತರಮಾನಾನಂ…ಪೇ… ರಾಜಾ ಚೇ ಹೋತಿ ಧಮ್ಮಿಕೋ’’ತಿ ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಅತ್ಥೋ ಪಾಕಟೋ.

೯೪. ‘‘ಭಗವಾ ಸಾವತ್ಥಿಯಂ ವಿಹರತಿ…ಪೇ… ಏವಂ ಪಜಾನಾತೀ’’ತಿ ಇದಂ ಸುತ್ತಮ್ಪಿ ವಾಸನಾ…ಪೇ… ಸುತ್ತಂ ನಾಮ. ಅತ್ಥೋ ಪಾಕಟೋ.

‘‘ಕಸ್ಮಾ ಭಗವಾ ಜನಪದಚಾರಿಕಂ ಚರತೀ’’ತಿ ಪುಚ್ಛೇಯ್ಯ, ಸತ್ತಹಿ ಕಾರಣೇಹಿ ಬುದ್ಧಾ ಭಗವನ್ತೋ ಜನಪದಚಾರಿಕಂ ಚರನ್ತಿ. ಕತಮೇಹಿ ಸತ್ತಹಿ? ದೇಸನ್ತರಗತಾನಂ ವೇನೇಯ್ಯಾನಂ ವಿನಯನತ್ಥಂ, ತತ್ರ ಠಿತಾನಂ ಉಸ್ಸುಕ್ಕಸಮುಪ್ಪಾದನತ್ಥಂ, ಸಾವಕಾನಂ ಏಕಸ್ಮಿಂ ಠಾನೇ ನಿಬದ್ಧವಾಸನಿವಾರಣತ್ಥಂ, ಅತ್ತನೋ ಚ ತತ್ಥ ನಿಬದ್ಧವಾಸೇ ಅನಾಸಙ್ಗದಸ್ಸನತ್ಥಂ, ಸಮ್ಬುದ್ಧವಸಿತಟ್ಠಾನತಾಯ ದೇಸಾನಂ ಚೇತಿಯಭಾವಸಮ್ಪಾದನತ್ಥಂ, ಬಹೂನಂ ಸತ್ತಾನಂ ದಸ್ಸನೂಪಸಙ್ಕಮನಾದೀಹಿ ಪುಞ್ಞೋಘಪ್ಪಸವನತ್ಥಂ, ಅವುಟ್ಠಿಆದಿಉಪದ್ದವೂಪಸಮನತ್ಥಞ್ಚಾತಿ ಇಮೇಹಿ ಸತ್ತಹಿ ಕಾರಣೇಹಿ ಬುದ್ಧಾ ಭಗವನ್ತೋ ಜನಪದಚಾರಿಕಂ ಚರನ್ತೀತಿ ಜನಪದಚರಣಕಾರಣಂ ವೇದಿತಬ್ಬಂ.

‘‘ಏಕಪುಪ್ಫಂ ಚಜಿತ್ವಾನ, ಸಹಸ್ಸಂ ಕಪ್ಪಕೋಟಿಯೋ;

ದೇವೇ ಚೇವ ಮನುಸ್ಸೇ ಚ, ಸೇಸೇನ ಪರಿನಿಬ್ಬುತೋ’’ತಿ. –

ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಸಹಸ್ಸಂ ಕಪ್ಪಕೋಟಿಯೋತಿ ಸಹಸ್ಸಂ ಅತ್ತಭಾವತೋ ಕೋಟಿಯೋ.

‘‘ಅಸ್ಸತ್ಥೇ ಹರಿತೋಭಾಸೇ, ಸಂವಿರೂಳ್ಹಮ್ಹಿ ಪಾದಪೇ;

ಏಕಂ ಬುದ್ಧಗತಂ ಸಞ್ಞಂ, ಅಲಭಿಂಹಂ ಪತಿಸ್ಸತೋ.

‘‘ಅಜ್ಜ ತಿಂಸಂ ತತೋ ಕಪ್ಪಾ, ನಾಭಿಜಾನಾಮಿ ದುಗ್ಗತಿಂ;

ತಿಸ್ಸೋ ವಿಜ್ಜಾ ಸಚ್ಛಿಕತಾ, ತಸ್ಸಾ ಸಞ್ಞಾಯ ವಾಸನಾ’’ತಿ. –

ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಹರಿತೋಭಾಸೇತಿ ಹರಿತಓಭಾಸೇ. ಅಲಭಿಂಹನ್ತಿ ಅಹಂ ಅಲಭಿಂ.

‘‘ಪಿಣ್ಡಾಯ ಕೋಸಲಂ ಪುರಂ…ಪೇ… ವಿಪಾಕೋ ಹೋತಿ ಅಚಿನ್ತಿಯೋ’’ತಿ ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಅಗ್ಗಪುಗ್ಗಲೋ ಅನುಕಮ್ಪಕೋ ತಣ್ಹಾನಿಘಾತಕೋ ಮುನಿ ಸಮ್ಬುದ್ಧೋ ಪುರೇಭತ್ತಂ ಪಿಣ್ಡಾಯ ಪಿಣ್ಡಂ ಪಟಿಗ್ಗಣ್ಹಿತುಂ ಕೋಸಲಂ ಪುರಂ ಪಾವಿಸಿ.

ಯಸ್ಸ ಪುರಿಸಸ್ಸ ಹತ್ಥೇ ಸಬ್ಬಪುಪ್ಫೇಹಿ ಅಲಙ್ಕತೋ ವಟಂಸಕೋ ಪುಪ್ಫವಟಂಸಕೋವ ಅತ್ಥಿ, ಸೋ ಅಯಂ ಪುರಿಸೋ ರಾಜಮಗ್ಗೇನ ಕೋಸಲಪುರಂ ಪವಿಸನ್ತಂ ಭಿಕ್ಖುಸಙ್ಘಪುರಕ್ಖತಂ ದೇವಮಾನುಸಪೂಜಿತಂ ಸಮ್ಬುದ್ಧಂ ಅದ್ದಸ, ದಿಸ್ವಾ ಹಟ್ಠೋ ಚಿತ್ತಂ ಪಸಾದೇಸಿ; ಪಸಾದೇತ್ವಾ ಸಮ್ಬುದ್ಧಂ ಉಪಸಙ್ಕಮಿ.

ಉಪಸಙ್ಕಮಿತ್ವಾ ಸೋ ಅಯಂ ಪಸನ್ನೋ ಹುತ್ವಾ ಸುರಭಿಂ ವಣ್ಣವನ್ತಂ ಮನೋರಮಂ ತಂ ವಟಂಸಕಂ ಸಮ್ಬುದ್ಧಸ್ಸ ಸೇಹಿ ಪಾಣೀಭಿ ಉಪನಾಮೇಸಿ.

ತತೋ ಬುದ್ಧಸ್ಸ ಲಪನನ್ತರಾ ಲಪನಸ್ಸ ವದನಸ್ಸ ಅನ್ತರಾ ಅಗ್ಗಿಸಿಖಾ ವಣ್ಣಾ ಸಹಸ್ಸರಂಸಿ ಓಕ್ಕಾ ಪಭಾ ನಿಕ್ಖಮಿ, ಅಬ್ಭಾ ವಿಜ್ಜು ನಿಕ್ಖಮತಿ ಇವ, ಏವಂ ಆನನಾ ಸಹಸ್ಸರಂಸಿ ನಿಕ್ಖಮಿತ್ವಾ ಆದಿಚ್ಚಬನ್ಧುನೋ ಸೀಸೇ ತಿಕ್ಖತ್ತುಂ ಪದಕ್ಖಿಣಂ ಕರಿತ್ವಾನ ಪರಿವಟ್ಟೇತ್ವಾ ಮುದ್ಧನಿ ಅನ್ತರಧಾಯಥ.

ಆನನ್ದೋ ಅಚ್ಛರಿಯಂ ಅಬ್ಭುತಂ ಲೋಮಹಂಸನಂ ಇದಂ ಪಾಟಿಹಾರಿಯಂ ದಿಸ್ವಾ ಚೀವರಂ ಏಕಂಸಂ ಕರಿತ್ವಾ ಏತಂ ಅಬ್ರವಿ – ‘‘ಮಹಾಮುನಿ, ಸಿತಕಮ್ಮಸ್ಸ ಹೇತು ಕೋ? ತಂ ಹೇತುಂ ಬ್ಯಾಕರೋಹಿ, ಧಮ್ಮಾಲೋಕೋ ಭವಿಸ್ಸತೀ’’ತಿ.

ಯಸ್ಸ ಭಗವತೋ ಸಬ್ಬಧಮ್ಮೇಸು ಞಾಣಂ ಸದಾ ಪವತ್ತತಿ, ಕಙ್ಖಾವಿತರಣೋ ಮುನಿ ಸೋ ಭಗವಾ ಕಙ್ಖಿಂ ವೇಮತಿಕಂ ಆನನ್ದಂ ಥೇರಂ ಏತಂ ಅಬ್ರವಿ. ಆನನ್ದ, ಯೋ ಸೋಪುರಿಸೋ ಮಯಿ ಚಿತ್ತಂ ಪಸಾದಯಿ, ಸೋ ಪುರಿಸೋ ಚತುರಾಸೀತಿಕಪ್ಪಾನಿ ದುಗ್ಗತಿಂ ನ ಗಮಿಸ್ಸತಿ, ದೇವೇಸು ದೇವಸೋಭಗ್ಗಂ ದಿಬ್ಬಂ ರಜ್ಜಂ ಪಸಾಸಿತ್ವಾ ಮನುಜೇಸು ರಟ್ಠೇ ಸಕಲರಟ್ಠೇ ಮನುಜಿನ್ದೋ ರಾಜಾ ಭವಿಸ್ಸತಿ. ಸೋ ಪುರಿಸೋ ಚರಿಮಂ ಪಬ್ಬಜಿತ್ವಾ, ಧಮ್ಮತಂ ಸಚ್ಛಿಕತ್ವಾ ಚ ಧುತರಾಗೋ ವಟಂಸಕೋ ನಾಮ ಪಚ್ಚೇಕಬುದ್ಧೋ ಭವಿಸ್ಸತಿ.

ತಥಾಗತೇ ವಾ ಸಮ್ಮಾಸಮ್ಬುದ್ಧೇ ವಾ ಪಚ್ಚೇಕಸಮ್ಬುದ್ಧೇ ವಾ ತಸ್ಸ ತಥಾಗತಸ್ಸ ಸಾವಕೇ ವಾ ಚಿತ್ತೇ ಪಸನ್ನಮ್ಹಿ ದಕ್ಖಿಣಾ ಅಪ್ಪಕಾ ನಾಮ ನತ್ಥಿ.

ಬುದ್ಧಾ ಏವಂ ಏತ್ತಕಾತಿ ಅಚಿನ್ತಿಯಾ ಭವನ್ತಿ. ಬುದ್ಧಧಮ್ಮಾ ಬುದ್ಧಗುಣಾ ಏವಂ ಏತ್ತಕಾತಿ ಅಚಿನ್ತಿಯಾ ಭವನ್ತಿ, ಅಚಿನ್ತಿಯೇ ಪಸನ್ನಾನಂ ವಿಪಾಕೋ ಪುಞ್ಞವಿಪಾಕೋ ಏವಂ ಏತ್ತಕೋತಿ ಅಚಿನ್ತಿಯೋ ಹೋತೀತಿ ಏತಂ ಅಬ್ರವೀತಿ ಯೋಜನಾ.

೯೬. ‘‘ಇಧಾಹಂ, ಭಿಕ್ಖವೇ, ಏಕಚ್ಚಂ ಪುಗ್ಗಲಂ…ಪೇ… ಅಯಮ್ಪಿ ಅತ್ಥೋ ವುತ್ತೋ ಭಗವತಾ ಇತಿ ಮೇ ಸುತ’’ನ್ತಿ ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ಭಿಕ್ಖವೇ, ಇಧ ಇಮಸ್ಮಿಂ ಸಾಸನೇ ಅಹಂ ಏಕಚ್ಚಂ ಪುಗ್ಗಲಂ ಏವಂ ಮಮ ಚೇತಸಾ ಏಕಚ್ಚಸ್ಸ ಪುಗ್ಗಲಸ್ಸ ಚೇತೋ ಚಿತ್ತಂ ಪರಿಚ್ಚ ಬುದ್ಧಚಕ್ಖುನಾ ಏವಂ ಪಜಾನಾಮಿ, ಯಥಾ ಯೇನ ಪಕಾರೇನ ಅಯಂ ಪುಗ್ಗಲೋ ಯಞ್ಚ ದಾನಾದಿಪಟಿಪದಂ ಪಟಿಪನ್ನೋ, ಯಞ್ಚ ದಸ್ಸನಾದಿಮಗ್ಗಂ ಸಮಾರುಳ್ಹೋ ಹುತ್ವಾ ತಂ ಪಟಿಪದಂ, ಮಗ್ಗಞ್ಚ ಇರಿಯತಿ ಪವತ್ತೇತಿ, ಇಮಮ್ಹಿ ಇಮಸ್ಮಿಞ್ಚ ಸಮಯೇ ಅಯಂ ಪುಗ್ಗಲೋ ಚೇ ಕಾಲಂ ಕರೇಯ್ಯ, ಏವಂ ಸತಿ ಆಭತಂ ವತ್ಥುಂ ನಿಕ್ಖಿಪತಿ ಯಥಾ, ಏವಂ ತಾಯ ಪಟಿಪದಾಯ ತೇನ ಮಗ್ಗೇನ ಸಗ್ಗೇ ಅತ್ತನಿಕ್ಖಿತ್ತೋ ಭವೇ. ತಂ ಕಿಸ್ಸ ಹೇತು? ಭಿಕ್ಖವೇ, ಅಸ್ಸ ಪುಗ್ಗಲಸ್ಸ ಚಿತ್ತಂ ಹಿ ಯಸ್ಮಾ ಪಸನ್ನಂ ಪಸಾದಿತಂ, ತಸ್ಮಾ ನಿಕ್ಖಿತ್ತೋ ಭವೇ. ಇಧ ಸಾಸನೇ, ಲೋಕೇ ವಾ ಏಕಚ್ಚೇ ಸತ್ತಾ ಪುಗ್ಗಲಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಚೇತೋಪಸಾದಹೇತು ಖೋ ಪನ ಉಪಪಜ್ಜನ್ತೀತಿ ಏವಂ ಅಹಂ ಪಜಾನಾಮೀತಿ ಭಗವಾ ಏತಮತ್ಥಂ ಅವೋಚ. ತತ್ಥ ತಸ್ಮಿಂ ಅತ್ಥೇ ಸಙ್ಗಹವಸೇನ ಪವತ್ತಂ ಏತಂ ‘‘ಪಸನ್ನಚಿತ್ತಂ ಞತ್ವಾನ…ಪೇ… ಸಗ್ಗಂ ಸೋ ಉಪಪಜ್ಜತೀ’’ತಿ ಗಾಥಾವಚನಂ ವುಚ್ಚತಿ. ಅಯಮ್ಪಿ ಅತ್ಥೋ ಭಗವತಾ ವುತ್ತೋ, ಇತಿ ಮೇ ಮಯಾ ಸುತನ್ತಿ ಯೋಜನಾ.

‘‘ಸುವಣ್ಣಚ್ಛದನಂ ನಾವಂ…ಪೇ… ಏತಾದಿಸಂ ಕತಪುಞ್ಞಾ ಲಭಿ’’ನ್ತಿ ಇದಂ ಸುತ್ತಮ್ಪಿ ವಾಸನಾಭಾಗಿಯಂ ಸುತ್ತಂ ನಾಮ. ನಾರಿ ದೇವಧೀತಾ ಸುವಣ್ಣಚ್ಛದನಂ ಸುವಣ್ಣಾಲಙ್ಕಾರೇಹಿ ಛಾದಿತಂ ನಾವಂ ಆರುಯ್ಹ ತಿಟ್ಠಸಿ, ಪೋಕ್ಖರಣಿಂ ದೇವಪೋಕ್ಖರಣಿಂ ಓಗಾಹಸಿ, ಪದುಮಂ ಪಾಣಿನಾ ಛಿನ್ದಸಿ.

ದೇವತೇ ಕೇನ ಕಮ್ಮೇನ ತೇ ತವ ತಾದಿಸೋ ವಣ್ಣೋ ತಾದಿಸೋ ಆನುಭಾವೋ ತಾದಿಸೀ ಜುತಿ ಭವತಿ, ದೇವತೇ ತೇ ತವ ಯೇ ಕೇಚಿ ಭೋಗಾ ಮನಸಾ ಇಚ್ಛಿತಾ ಭವನ್ತಿ, ತೇ ಭೋಗಾ ಚ ಕೇನ ಕಮ್ಮೇನ ಉಪ್ಪಜ್ಜನ್ತಿ. ದೇವತೇ ಮೇ ಪುಚ್ಛಿತಾ ತ್ವಂ ಸಂಸ ಸಂಸಾಹಿ ಇದಂ ಸಬ್ಬಂ ಕಿಸ್ಸ ಕಮ್ಮಸ್ಸ ಚ ಫಲನ್ತಿ ಸಕ್ಕೋ ಪುಚ್ಛತಿ.

ದೇವರಾಜೇನ ಪುಚ್ಛಿತಾ ಸಾ ದೇವಧೀತಾ ಅತ್ತಮನಾ ಹುತ್ವಾ ಪಞ್ಹಂ ಪುಟ್ಠಾ ಸಕ್ಕಸ್ಸ ಬ್ಯಾಕಾಸಿ. ದೇವರಾಜಾ ಅದ್ಧಾನಂ ದೀಘಮಗ್ಗಂ ಪಟಿಪನ್ನಾ ಅಹಂ ಯಸಸ್ಸಿನೋ ಕಸ್ಸಪಸ್ಸ ಭಗವತೋ ಮನೋರಮಂ ಥೂಪಂ ಅದ್ದಸ್ಸಂ, ದಿಸ್ವಾ ತತ್ಥ ಥೂಪೇ ಚಿತ್ತಂ ಪಸಾದೇಸಿಂ. ಪಸನ್ನಾಹಂ ಸೇಹಿ ಪಾಣೀಹಿ ಪದುಮಪುಪ್ಫೇಹಿ ಪೂಜೇಸಿಂ. ತಸ್ಸೇವ ಕಮ್ಮಸ್ಸ ಇದಂ ಸಬ್ಬಂ ಫಲಂ ವಿಪಾಕೋ ಭವೇ. ಕತಪುಞ್ಞಾಹಂ ಏತಾದಿಸಂ ಫಲಂ ಅಲಭಿನ್ತಿ ಸಕ್ಕಸ್ಸ ಬ್ಯಾಕಾಸಿ. ಇತಿ ಮೇ ಸುತನ್ತಿ ಮಹಾಮೋಗ್ಗಲ್ಲಾನೋ ವದತೀತಿ ಯೋಜನಾ.

‘‘ಯಥಾನಿದ್ಧಾರಿತಸುತ್ತಾನಿಯೇವ ವಾಸನಾಭಾಗಿಯಸುತ್ತಾನಿ ಪರಿಪುಣ್ಣಾನೀ’’ತಿ ವತ್ತಬ್ಬತ್ತಾ ‘‘ದಾನಕಥಾ ಸೀಲಕಥಾ ಸಗ್ಗಕಥಾ ಪುಞ್ಞಕಥಾ ಪುಞ್ಞವಿಪಾಕಕಥಾತಿ ಇದಂ ವಾಸನಾಭಾಗಿಯ’’ನ್ತಿಆದಿ ವುತ್ತಂ. ತತ್ಥ ಯಾಯ ದೇಸನಾಯ ದಾನಞ್ಚ ದಾನಫಲಞ್ಚ ದಸ್ಸಿತಂ, ಸಾ ದೇಸನಾ ದಾನಕಥಾ ನಾಮ. ಯಾಯ ದೇಸನಾಯ ಸೀಲಞ್ಚ ಸೀಲಫಲಞ್ಚ ದಸ್ಸಿತಂ, ಸಾ ದೇಸನಾ ಸೀಲಕಥಾ ನಾಮ. ಯಾಯ ದೇಸನಾಯ ಸಗ್ಗಾ ಚ ಸಗ್ಗೇಸು ನಿಬ್ಬತ್ತಾಪಕಞ್ಚ ಕಮ್ಮಂ ದಸ್ಸಿತಂ, ಸಾ ಸಗ್ಗಕಥಾ ನಾಮ. ಯಾಯ ದೇಸನಾಯ ದಾನಸೀಲಭಾವನಾದಿವಸೇನ ದಸವಿಧಂ ಪುಞ್ಞಕಮ್ಮಂ ದಸ್ಸಿತಂ, ಸಾ ಪುಞ್ಞಕಥಾ ನಾಮ. ಯಾಯ ದೇಸನಾಯ ತಾದಿಸಸ್ಸ ಪುಞ್ಞಕಮ್ಮಸ್ಸ ವಿವಿಧೋ ಅಯಂ ವಿಪಾಕೋ ಇಮಸ್ಸ ಪುಞ್ಞಸ್ಸ ವಿಪಾಕೋತಿ ನಿಯಮೇತ್ವಾ ದಸ್ಸಿತೋ, ಸಾ ಪುಞ್ಞವಿಪಾಕಕಥಾ ನಾಮ.

ದಸಬಲಧರಾನಂ ಸಮ್ಮಾಸಮ್ಬುದ್ಧಾನಂ ಉದ್ದಿಸ್ಸಕತೇಸು ಸರೀರಧಾತುಂ ಅಬ್ಭನ್ತರೇ ಠಪೇತ್ವಾ ಪಂಸೂಹಿ ಕತೇಸು ಥೂಪೇಸು ಯೇ ನರಾ ಪಸನ್ನಾ, ತೇ ನರಾ ತತ್ಥ ಥೂಪೇ ಕಾರಂ ಪುಞ್ಞಂ ಕತ್ವಾ ಸಗ್ಗೇಸು ಉಪ್ಪಜ್ಜಿತ್ವಾ ಪಮೋದನ್ತೀತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

೯೭. ದೇವಪುತ್ತಸರೀರವಣ್ಣಾ ದೇವಪುತ್ತಸರೀರಸದಿಸವಣ್ಣಾ ಸುಭಗಸಣ್ಠಿತಿ ಸೋಭಗ್ಗಯುತ್ತಸಣ್ಠಾನಾ ಸಬ್ಬೇ ಜನಾ ಉದಕೇನ ಪಂಸುಂ ತೇಮೇತ್ವಾ ಥೂಪಂ ವಡ್ಢೇಥ, ಸೋ ಅಯಂ ಥೂಪೋ ಕಸ್ಸ ಪುಗ್ಗಲಸ್ಸ ಥೂಪೋತಿ ಪುಚ್ಛತಿ.

ಸುಗತ್ತೇ ಸುನ್ದರಗತ್ತೇ ದೇವತೇ ತಸ್ಮಿಂ ಥೂಪೇ ಪಸನ್ನಾ ಇಮೇ ದೇವಮನುಜಾ ಕಾರಂ ಪುಞ್ಞಂ ಕರೋನ್ತಾ ಹುತ್ವಾ ಜರಾಮರಣತೋ ಪಮುಚ್ಚರೇ. ಸೋ ಅಯಂ ಥೂಪೋ ಮಹೇಸಿನೋ ದಸಬಲಧಮ್ಮಧಾರಿನೋ ಸುಗತಸ್ಸ ಥೂಪೋತಿ ವೇದಿತಬ್ಬೋತಿ ಆಹಾತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

ಯಾಹಂ ಯಾ ಅಹಂ ಮಹೇಸಿನೋ ಥೂಪಂ ಚತ್ತಾರಿ ಉಪ್ಪಲಾನಿ ಚ ಮಾಲಞ್ಚ ಅಭಿರೋಪಯಿಂ, ತೇನ ಮಯಾ ಕತಂ ತಂ ಪುಞ್ಞಂ ಉಳಾರಂ ವತ ಆಸಿ ಅಹೋಸಿ. ತತೋ ಕಪ್ಪತೋ ಅಜ್ಜ ಕಪ್ಪಾ ತಿಂಸಂ ಧರನ್ತಿ ಸತ್ಥುನೋ ಥೂಪಂ ಪೂಜೇತ್ವಾ ತತ್ತಕಾನಿ ದುಗ್ಗತಿಂ ನ ಜಾನಾಮಿ, ವಿನಿಪಾತಂ ನ ಗಚ್ಛಾಮೀತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

ಅಹಂ ಬಾತ್ತಿಂಸಲಕ್ಖಣಧರಸ್ಸ ಬಾತ್ತಿಂಸಲಕ್ಖಣಧರೇನ ಸಮ್ಪನ್ನಸ್ಸ ವಿಜಿತವಿಜಯಸ್ಸ ಲೋಕನಾಥಸ್ಸ ಥೂಪಂ ಅಪೂಜೇಸಿಂ, ಪೂಜೇತ್ವಾ ಸತಸಹಸ್ಸಂ ಕಪ್ಪೇ ಆಯುಕಪ್ಪೇ ಪಮುದಿತೋ ಆಸಿಂ. ಮಯಾ ಯಂ ಪುಞ್ಞಂ ಪಸುತಂ, ತೇನ ಪುಞ್ಞೇನ ವಿನಿಪಾತಂ ಅನಾಗನ್ತುನ ಅನಾಗನ್ತ್ವಾ ದೇವಸೋಭಗ್ಗಂ ಸಮ್ಪತ್ತಿಂ ಚ ದೇವರಜ್ಜಾನಿ ಚ ತಾನಿ ಅಕಾರಿಂ. ಅಥ ವಾ ದೇವಸೋಭಗ್ಗಞ್ಚ ಮಯಾ ಕಾರಿತಂ, ರಜ್ಜಾನಿ ಚ ಮಯಾ ಕಾರಿತಾನಿ.

ಅದನ್ತದಮಕಸ್ಸ ಸಾಸನೇ ಯಂ ಚಕ್ಖು ಪಞ್ಞಾಚಕ್ಖು ಪಣಿಹಿತಂ, ತಥಾ ಚಿತ್ತಂ ಯಂ ವಿಮುತ್ತಚಿತ್ತಂ ಪಣಿಹಿತಂ, ತಂ ಸಬ್ಬಂ ಪಞ್ಞಾಚಕ್ಖು ವಿಮುತ್ತಚಿತ್ತಂ ಮೇ ಮಯಾ ಲದ್ಧಂ, ಅಹಂ ವಿಧುತಲತಾಸಙ್ಖಾತತಣ್ಹಾ ಹುತ್ವಾ ವಿಮುತ್ತಚಿತ್ತಾ ಫಲವಿಮುತ್ತಚಿತ್ತಸಮ್ಪನ್ನಾ ಅಮ್ಹೀತಿ ಅವೋಚಾತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

೯೮. ವಿಮುತ್ತಚಿತ್ತೇ ಫಲವಿಮುತ್ತಚಿತ್ತಸಮ್ಪನ್ನೇ ಅಖಿಲೇ ಪಞ್ಚಚೇತೋಖೀಲರಹಿತೇ ಅನಾಸವೇ ಅರಣವಿಹಾರಿಮ್ಹಿ ಅರಣವಿಹಾರಸೀಲೇ ಅಸಙ್ಗಮಾನಸೇ ಅಲಗ್ಗಮಾನಸೇ ಪಚ್ಚೇಕಬುದ್ಧಸ್ಮಿಂ ಸಾಮಾಕಪತ್ಥೋದನಮತ್ತಮೇವ ದಕ್ಖಿಣಂ ಅದಾಸಿಂ.

ತಸ್ಮಿಂ ಪಚ್ಚೇಕಬುದ್ಧೇ ಉತ್ತಮಂ ಧಮ್ಮಂ ಪಚ್ಚೇಕಬೋಧಿಧಮ್ಮಂ ಓಕಪ್ಪಯಿಂ ‘‘ಸೋ ಉತ್ತಮೋ ಧಮ್ಮೋ ಅತ್ಥೀ’’ತಿ ಸದ್ದಹಿಂ. ಏವಂ ಅರಿಯವಿಹಾರೇನ ವಿಹಾರೀಹಿ ಪಚ್ಚೇಕಬುದ್ಧೇಹಿ ಮೇ ಮಮ ಸಙ್ಗಮೋ ಕತೋ ಸಿಯಾ ಭವೇ, ಕುದಾಸುಪಿ ಚ ಅಹಂ ಅಪೇಕ್ಖವಾ ಮಾ ಭವೇಯ್ಯನ್ತಿ ಮಾನಸಂ ತಸ್ಮಿಞ್ಚ ಧಮ್ಮೇ ಪಣಿಧೇಸಿಂ ‘‘ಇಮಿನಾ ಪಚ್ಚೇಕಬುದ್ಧೇನ ಲದ್ಧಧಮ್ಮಂ ಅಹಮ್ಪಿ ಸಚ್ಛಿಕರೇಯ್ಯ’’ನ್ತಿ ಚಿತ್ತಂ ಪಣಿದಹಿಂ.

ತಸ್ಸೇವ ಪಚ್ಚೇಕಬುದ್ಧೇ ಕತಸ್ಸೇವ ಕಮ್ಮಸ್ಸ ವಿಪಾಕತೋ ಅಹಂ ದೀಘಾಯುಕೇಸು ಅಮಮೇಸು ‘‘ಮಮ ಪರಿಗ್ಗಹೋ’’ತಿ ಪರಿಗ್ಗಹಾಭಾವೇನ ಅಪರಿಗ್ಗಹೇಸು ವಿಸೇಸಗಾಮೀಸು ಅಹೀನಗಾಮೀಸು ಕುರೂಸು ಉತ್ತರಕುರೂಸು ಪಾಣೀಸು ಸತ್ತೇಸು ಸಹಸ್ಸಕ್ಖತ್ತುಂ ಉಪಪಜ್ಜಥ ಉಪಪಜ್ಜಿಂ.

ತಸ್ಸೇವ ಕಮ್ಮಸ್ಸ ವಿಪಾಕತೋ ವಿಚಿತ್ರಮಾಲಾಭರಣಾನುಲೇಪೀಸು ಯಸಸ್ಸೀಸು ಪರಿವಾರವನ್ತೇಸು ತಿದಸೋ ದೇವೋ ಅಹಂ ವಿಸಿಟ್ಠಕಾಯೂಪಗತೋ ಹುತ್ವಾ ಸಹಸ್ಸಕ್ಖತ್ತುಂ ಉಪಪಜ್ಜಥ.

ತಸ್ಸೇವ ಕಮ್ಮಸ್ಸ ವಿಪಾಕತೋ ಅಹಂ ವಿಮುತ್ತಚಿತ್ತೋ ಅಖೀಲೋ ಅನಾಸವೋ ಹುತ್ವಾ ಹಿತಾಹಿತಾಸೀಹಿ ಕುಸಲಾಕುಸಲವೀತಿವತ್ತೇಹಿ ಅನ್ತಿಮದೇಹಧಾರಿಭಿ ಇಮೇಹಿ ಪಚ್ಚೇಕಬುದ್ಧೇಹಿ, ಬುದ್ಧಸಾವಕೇಹಿ ವಾ ಮೇ ಮಮ ಸಮಾಗಮೋ ಆಸಿ.

‘‘ಸೀಲವತೋ ಯಂ ಇಚ್ಛಿತಂ, ತಂ ಸಮಿಜ್ಝತೇ’’ತಿ ಇಮಂ ವಚನಂ ತಥಾಗತೋ ಜಿನೋ ಪಚ್ಚಕ್ಖಂ ಕತ್ವಾ ಅವಚ ಖೋ, ಯಥಾ ಯಥಾ ಯೇನ ಯೇನ ಪಕಾರೇನ ಮೇ ಮನಸಾ ವಿಚಿನ್ತಿತಂ, ತಥಾ ತಥಾ ತೇನ ತೇನ ಪಕಾರೇನ ಸಮಿದ್ಧಂ ಭವತಿ. ಅಯಂ ಭವೋ ಅನ್ತಿಮೋ ಭವೋತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

ಏಕತಿಂಸಮ್ಹಿ ಕಪ್ಪಮ್ಹಿ ಜಿನೋ ಅನೇಜೋ ಅನನ್ತದಸ್ಸೀ ‘‘ಸಿಖೀ’’ತಿ ಇತಿನಾಮಕೋ ಉಪ್ಪಜ್ಜಿ. ತಸ್ಸಾಪಿ ಭಗವತೋ ರಾಜಾ ಭಾತಾ ಸಿಖಿದ್ಧೇ ಚ ಸಿಖೀ ಇತಿನಾಮಕೇ ಬುದ್ಧೇ ಚ ತಸ್ಸ ಭಗವತೋ ಧಮ್ಮೇ ಚ ಅಭಿಪ್ಪಸನ್ನೋ ಲೋಕವಿನಾಯಕಮ್ಹಿ ಪರಿನಿಬ್ಬುತೇ ಸತಿ ದೇವಾತಿದೇವಸ್ಸ ನರುತ್ತಮಸ್ಸ ಮಹೇಸಿನೋ ವಿಪುಲಂ ಮಹನ್ತಂ ಸಮನ್ತತೋ ಗಾವುತಿಕಂ ಥೂಪಂ ಅಕಾಸಿಂ.

ತಸ್ಮಿಂ ಥೂಪೇ ಬಲಿಂ ಪೂಜಾಬಲಿಂ ಅಭಿಹಾರೀ ಮನುಸ್ಸೋ ಜಾತಿಸುಮನಂ ಪಗ್ಗಯ್ಹ ಪಹಟ್ಠೋ ಪೂಜೇಸಿ. ಅಸ್ಸ ಮನುಸ್ಸಸ್ಸ ಏಕಂ ಪುಪ್ಫಂ ವಾತೇನ ಪಹರಿತಂ ಹುತ್ವಾ ಪತಿತಂ. ಅಹಂ ತಂ ಪತಿತಂ ಏಕಂ ಪುಪ್ಫಂ ಗಹೇತ್ವಾ ತಸ್ಸೇವ ಪುಪ್ಫಸಾಮಿಕಸ್ಸ ಅದಾಸಿಂ.

ಸೋ ಮನುಸ್ಸೋ ಪುಪ್ಫಸಾಮಿಕೋ ಅಭಿಪ್ಪಸನ್ನಚಿತ್ತೋ ಹುತ್ವಾ ಮಂ ‘‘ತ್ವಮೇವ ಏತಂ ಏಕಂ ಪುಪ್ಫಂ ಪೂಜಾ’’ತಿ ಅದಾಸಿ. ದದಾಸೀತಿ ಏತ್ಥ ದ-ಕಾರೋ ಆಗಮೋ. ಅಹಂ ತಂ ಏಕಂ ಪುಪ್ಫಂ ಗಹೇತ್ವಾ ಬುದ್ಧಂ ಬುದ್ಧಗುಣಂ ಪುನಪ್ಪುನಂ ಅನುಸ್ಸರನ್ತೋ ಯಸ್ಮಿಂ ಕಪ್ಪೇ ಅಭಿರೋಪಯಿಂ, ತತೋ ಕಪ್ಪತೋ ಅಜ್ಜ ಕಪ್ಪಾ ತಿಂಸಂ ಅಹೇಸುಂ. ತೇಸು ಕಪ್ಪೇಸು ದುಗ್ಗತಿಂ ನಾಭಿಜಾನಾಮಿ, ವಿನಿಪಾತಞ್ಚ ನ ಗಚ್ಛಾಮಿ, ಇದಂ ಫಲಂ ಥೂಪಪೂಜಾಯ ಫಲನ್ತಿ ಅವೋಚಾತಿ ಯೋಜನಾ. ಇದಂ ಸುತ್ತಂ ವಾ…ಪೇ… ಸುತ್ತಂ.

ಬ್ರಹ್ಮದತ್ತಸ್ಸ ಬ್ರಹ್ಮದತ್ತನಾಮಕಸ್ಸ ರಾಜಿನೋ ಕಪಿಲಂ ನಾಮ ನಗರಂ ಸುವಿಭತ್ತಂ ಭಾಗತೋ ಸುಟ್ಠು ವಿಭತ್ತಂ, ಮಹಾಪಥಂ ಮಹಾಪಥಸಮ್ಪನ್ನಂ ಆಕಿಣ್ಣಂ, ನಾನಾಜಾತಿಕೇಹಿ ಮನುಸ್ಸೇಹಿ ಪರಿಪುಣ್ಣಂ, ಇದ್ಧಂ ಫೀತಞ್ಚ ಆಸಿ.

ಪಞ್ಚಾಲಾನಂ ತತ್ಥ ಪುರುತ್ತಮೇ ಅಹಂ ಕುಮ್ಮಾಸಂ ವಿಕ್ಕಿಣಿಂ, ಸೋ ಅಹಂ ಯಸಸ್ಸಿನಂ ಉಪರಿಟ್ಠಂ ಉಪಸಮೀಪೇ ಠಿತಂ ಅರಿಟ್ಠಂ ನಾಮ ಸಮ್ಬುದ್ಧಂ ಪಚ್ಚೇಕಬುದ್ಧಂ ಅದ್ದಸಿಂ, ದಿಸ್ವಾ ಹಟ್ಠೋ ಚಿತ್ತಂ ಪಸಾದೇತ್ವಾ ನರುತ್ತಮಂ ಅರಿಟ್ಠಂ ಮೇ ಗೇಹಸ್ಮಿಂ ಯಂ ಧುವಭತ್ತಂ ವಿಜ್ಜಥ ವಿಜ್ಜಿ, ತೇನ ಧುವಭತ್ತೇನ ನಿಮನ್ತೇಸಿಂ.

ಯತೋ ಚ ಯಸ್ಮಿಂ ಕಾಲೇ ಚ ಕತ್ತಿಕೋ ಯಸ್ಸಂ ಪನ್ನರಸೀಪುಣ್ಣೋ, ಸಾ ಪುಣ್ಣಮಾಸೀ ಪನ್ನರಸೀ ಉಪಟ್ಠಿತಾ, ತತೋ ಚ ತಸ್ಮಿಂ ಕಾಲೇ ಚ ಅಹಂ ನವಂ ದುಸ್ಸಯುಗಂ ಗಯ್ಹ ಅರಿಟ್ಠಸ್ಸ ಅರಿಟ್ಠನಾಮಕಸ್ಸ ಪಚ್ಚೇಕಬುದ್ಧಸ್ಸ ಉಪನಾಮೇಸಿಂ.

ನರುತ್ತಮೋ ಅನುಕಮ್ಪಕೋ ಕಾರುಣಿಕೋ ತಣ್ಹಾನಿಘಾತಕೋ ಮುನಿ ಪಚ್ಚೇಕಬುದ್ಧೋ ಪಸನ್ನಚಿತ್ತಂ ಮಂ ಞತ್ವಾನ ಪಟಿಗ್ಗಣ್ಹಿ.

ಅಹಂ ಕಲ್ಯಾಣಂ ಬುದ್ಧವಣ್ಣಿತಂ ಕಮ್ಮಂ ಕರಿತ್ವಾನ ದೇವೇ ಚ ಮನುಸ್ಸೇ ಚ ಸನ್ಧಾವಿತ್ವಾ ತತೋ ಚುತೋ ಬಾರಾಣಸಿಯಂ ನಗರೇ ಅಡ್ಢೇ ಕುಲಸ್ಮಿಂ ಸೇಟ್ಠಿಸ್ಸ ಏಕಪುತ್ತಕೋ ಉಪ್ಪಜ್ಜಿಂ, ಪಾಣೇಹಿ ಚ ಪಿಯತರೋ ಆಸಿಂ.

ತತೋ ಚ ತಸ್ಮಿಂ ಕಾಲೇ ವಿಞ್ಞುತಂ ಪತ್ತೋ ಹುತ್ವಾ ದೇವಪುತ್ತೇನ ಚೋದಿತೋ ಅಹಂ ಪಾಸಾದಾ ಓರುಹಿತ್ವಾನ ಸಮ್ಬುದ್ಧಂ ಭಗವನ್ತಂ ಗೋತಮಂ ಉಪಸಙ್ಕಮಿಂ.

ಸೋ ಸಮ್ಬುದ್ಧೋ ಭಗವಾ ಗೋತಮೋ ಅನುಕಮ್ಪಾಯ ಮೇ ಧಮ್ಮಂ ಅದೇಸೇಸಿ. ದುಕ್ಖಂ ದುಕ್ಖಸಚ್ಚಞ್ಚ ದುಕ್ಖಸಮುಪ್ಪಾದಂ ಸಮುದಯಸಚ್ಚಞ್ಚ ದುಕ್ಖಸ್ಸ ಅತಿಕ್ಕಮಂ ನಿರೋಧಸಚ್ಚಞ್ಚ ಅರಿಯಂ ಅಟ್ಠಙ್ಗಿಕಂ ದುಕ್ಖೂಪಸಮಗಾಮಿನಂ ಮಗ್ಗಂ ಮಗ್ಗಸಚ್ಚಞ್ಚ ಇತಿ ಚತ್ತಾರಿ ಸಚ್ಚಾನಿ ದೇಸಿತಾನಿ, ತದುಪ್ಪಾದಕಂ ಧಮ್ಮಂ ಮುನಿ ಭಗವಾ ಗೋತಮೋ ಅದೇಸಯಿ.

ಅಹಂ ತಸ್ಸ ಭಗವತೋ ಗೋತಮಸ್ಸ ವಚನಂ ಸುತ್ವಾ ಸಾಸನೇ ರತೋ ಹುತ್ವಾ ವಿಹರಿಂ, ಅಹಂ ರತ್ತಿನ್ದಿವಂ ಅತನ್ದಿತೋ ಹುತ್ವಾ ಸಮಥಂ ಪಟಿವಿಜ್ಝಿಂ.

ಅಜ್ಝತ್ತಞ್ಚ ಯೇ ಆಸವಾ, ಬಹಿದ್ಧಾ ಚ ಯೇ ಆಸವಾ ಮಗ್ಗೇನ ಸಮುಚ್ಛಿನ್ನಾ ಆಸುಂ, ಸಬ್ಬೇ ತೇ ಆಸವಾ ಮೇ ಮಮ ವಿಜ್ಜಿಂಸು, ಪುನ ನ ಚ ಉಪ್ಪಜ್ಜರೇ.

ದುಕ್ಖಂ ‘‘ಪರಿಯನ್ತಕತಂ ಯಸ್ಸ ದುಕ್ಖಸ್ಸಾ’’ತಿ ಪರಿಯನ್ತಕತಂ ಆಸಿ, ಅಯಂ ಸಮುಸ್ಸಯೋ ಜಾತಿಮರಣಸಂಸಾರೋ ಚರಿಮೋ ಅನ್ತಿಮೋ ಆಸಿ, ಇದಾನಿ ಇಮಸ್ಸ ಅತ್ತಭಾವಸ್ಸ ಅನನ್ತರಂ ಪುನಬ್ಭವೋ ಮಮ ನತ್ಥೀತಿ ಅವೋಚಾತಿ ಯೋಜನಾ. ಯಂ ನಾನಾವಿಧಂ ವಾಸನಾಭಾಗಿಯಂ ಸುತ್ತಂ ಉದಾಹರಣವಸೇನ ನಿದ್ಧಾರಿತಂ, ಇದಂ ನಾನಾವಿಧಂ ಸುತ್ತಂ ವಾಸನಾಭಾಗೇ ಪುಞ್ಞಕೋಟ್ಠಾಸೇ ವಿಸಯೇ ವಾಚಕಞಾಪಕಭಾವೇನ ಪವತ್ತನತೋ ವಾಸನಾಭಾಗಿಯಂ ಸುತ್ತಂ ನಾಮ.

ನಾನಾವಿಧಂ ವಾಸನಾಭಾಗಿಯಂ ಸುತ್ತಂ ಆಚರಿಯೇನ ನಿದ್ಧಾರಿತಂ, ಅಮ್ಹೇಹಿ ಚ ಞಾತಂ, ‘‘ಕತಮಂ ನಿಬ್ಬೇಧಭಾಗಿಯಂ ಸುತ್ತ’’ನ್ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮಂ ನಿಬ್ಬೇಧಭಾಗಿಯಂ ಸುತ್ತ’’ನ್ತಿಆದಿ ವುತ್ತಂ. ತತ್ಥ ತೇಸು ಸೋಳಸಸು ಸಂಕಿಲೇಸಭಾಗಿಯಾದೀಸು ಸುತ್ತೇಸು ಕತಮಂ ಸುತ್ತಂ ನಿಬ್ಬೇಧಭಾಗಿಯಂ ಸುತ್ತಂ ನಾಮಾತಿ ಪುಚ್ಛತಿ.

ಉದ್ಧಂ ಬ್ರಹ್ಮಲೋಕೇ ಅಧೋ ಕಾಮಾವಚರೇ ಭವೇ ಸಬ್ಬಧಿ ಸಬ್ಬೇಸು ಭವೇಸು ವಿಪ್ಪಮುತ್ತೋ ಅರಹಾ ‘‘ಅಯಂ ನಾಮ ಧಮ್ಮೋ ಅಹಂ ಅಸ್ಮೀ’’ತಿ ಅನಾನುಪಸ್ಸೀ, ಏವಂ ವಿಮುತ್ತೋ ಅರಹಾ ಅತಿಣ್ಣಪುಬ್ಬಂ ಓಘಂ ಅಪುನಬ್ಭವಾಯ ಉದತಾರಿ ಉತ್ತಿಣ್ಣೋತಿ ಯೋಜನಾ. ಇದಂ ಸುತ್ತಂ ನಿಬ್ಬೇಧಭಾಗೇ ಸೇಕ್ಖಧಮ್ಮೇ ವಿಸಯೇ ವಾಚಕಞಾಪಕಭಾವೇನ ಪವತ್ತನತೋ ನಿಬ್ಬೇಧಭಾಗಿಯಂ ಸುತ್ತಂ ನಾಮ.

‘‘ಏತ್ತಕಮೇವಾ’’ತಿ ವತ್ತಬ್ಬತ್ತಾ ‘‘ಸೀಲವತೋ’’ತಿಆದಿ ವುತ್ತಂ. ಆನನ್ದ, ಸೀಲವತೋ ಪುಗ್ಗಲಸ್ಸ ‘‘ಕಿನ್ತಿ ಮೇ ಮಮ ಅವಿಪ್ಪಟಿಸಾರೋ ಜಾಯೇಯ್ಯ ಪವತ್ತೇಯ್ಯಾ’’ತಿ ಚೇತನಾ ನ ಕರಣೀಯಾ ನ ಕಾತಬ್ಬಾ. ಆನನ್ದ, ಸೀಲವತೋ ಅವಿಪ್ಪಟಿಸಾರೋ ಯಂ ಜಾಯೇಯ್ಯ ಪವತ್ತೇಯ್ಯ, ಏಸಾ ಅವಿಪ್ಪಟಿಸಾರಸ್ಸ ಜಾಯನಾ ಪವತ್ತನಾ ಧಮ್ಮತಾ ಭವತಿ. ಆನನ್ದ, ಅವಿಪ್ಪಟಿಸಾರಿನಾ ಪುಗ್ಗಲೇನ ‘‘ಕಿನ್ತಿ ಮೇ ಮಮ ಪಾಮೋಜ್ಜಂ ಜಾಯೇಯ್ಯ ಪವತ್ತೇಯ್ಯಾ’’ತಿ ಚೇತನಾ ನ ಕರಣೀಯಾ, ಆನನ್ದ, ಅವಿಪ್ಪಟಿಸಾರಿನೋ ಪುಗ್ಗಲಸ್ಸ ಪಾಮೋಜ್ಜಂ ಯಂ ಜಾಯೇಯ್ಯ ಪವತ್ತೇಯ್ಯ, ಏಸಾ ಪಾಮೋಜ್ಜಸ್ಸ ಜಾಯನಾ ಪವತ್ತನಾ ಧಮ್ಮತಾ. ಸೇಸೇಸುಪಿ ಇಮಸ್ಸ ಯೋಜನಾನಯಾನುಸಾರೇನ ಯೋಜನಾನಯೋ ಗಹೇತಬ್ಬೋ. ಇದಂ ಸುತ್ತಮ್ಪಿ ನಿಬ್ಬೇಧಭಾಗಿಯಂ ಸುತ್ತಂ ನಾಮ.