೪. ಪದಟ್ಠಾನಹಾರಸಮ್ಪಾತವಿಭಾವನಾ

೬೬. ಯೇನ ಯೇನ ಯುತ್ತಿಹಾರಸಮ್ಪಾತೇನ ಸುತ್ತಪ್ಪದೇಸತ್ಥಾನಂ ಯುತ್ತಿಭಾವೋ ಆಚರಿಯೇನ ವಿಭಾವಿತೋ, ಅಮ್ಹೇಹಿ ಚ ಞಾತೋ, ಸೋ ಯುತ್ತಿಹಾರಸಮ್ಪಾತೋ ಪರಿಪುಣ್ಣೋ, ‘‘ಕತಮೋ ಪದಟ್ಠಾನಹಾರಸಮ್ಪಾತೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮೋ ಪದಟ್ಠಾನೋ ಹಾರಸಮ್ಪಾತೋ’’ತಿ ಪುಚ್ಛತಿ.

ಪುಚ್ಛಿತ್ವಾ ಯಸ್ಮಿಂ ಸುತ್ತಪ್ಪದೇಸೇ ವುತ್ತಾನಿ ಪದಟ್ಠಾನಾನಿ ನೀಹರಿತಾನಿ, ತಂ ಸುತ್ತಪ್ಪದೇಸಂ ನೀಹರಿತುಂ ‘‘ತಸ್ಮಾ ರಕ್ಖಿತಚಿತ್ತಸ್ಸ, ಸಮ್ಮಾಸಙ್ಕಪ್ಪಗೋಚರೋತಿ ಗಾಥಾ’’ತಿ ವುತ್ತಾ. ಗಾಥಾತ್ಥೋ ವುತ್ತೋವ. ‘‘ಕತಮೇ ಗಾಥಾತ್ಥಾ ಕತಮೇಸಂ ಧಮ್ಮಾನಂ ಪದಟ್ಠಾನಾನೀ’’ತಿ ಪುಚ್ಛಿತಬ್ಬತ್ತಾ ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿಆದಿ ವುತ್ತಂ. ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿ ಸುತ್ತಪ್ಪದೇಸಸ್ಸ ಅತ್ಥಭೂತಾ ಇನ್ದ್ರಿಯೇಸು ಗುತ್ತದ್ವಾರತಾ ತಿಣ್ಣಂ ಸುಚರಿತಾನಂ ಪದಟ್ಠಾನಂ ನಾಮ ಸುಚರಿತಪಾರಿಪೂರಿಯಾ ಆಸನ್ನಕಾರಣತ್ತಾ. ‘‘ಸಮ್ಮಾಸಙ್ಕಪ್ಪಗೋಚರೋ’’ತಿ ಸುತ್ತಪ್ಪದೇಸಸ್ಸ ಅತ್ಥಭೂತಾ ನೇಕ್ಖಮ್ಮಸಙ್ಕಪ್ಪಾದಯೋ ಸಮ್ಮಾಸಙ್ಕಪ್ಪಾ ಸಮಥಸ್ಸ ಪದಟ್ಠಾನಂ ನಾಮ ಕಾಮಚ್ಛನ್ದಆದಿನೀವರಣವಿಕ್ಖಮ್ಭನಸ್ಸ ಆಸನ್ನಕಾರಣತ್ತಾ. ‘‘ಸಮ್ಮಾದಿಟ್ಠಿಪುರೇಕ್ಖಾರೋ’’ತಿ ಸುತ್ತಪ್ಪದೇಸಸ್ಸ ಅತ್ಥಭೂತಾ ಕಮ್ಮಸ್ಸಕತಾಸಮ್ಮಾದಿಟ್ಠಿ ಚ ಸಪ್ಪಚ್ಚಯನಾಮರೂಪದಸ್ಸನಸಮ್ಮಾದಿಟ್ಠಿ ಚ ವಿಪಸ್ಸನಾಯ ಪದಟ್ಠಾನಂ ನಾಮ ಅನಿಚ್ಚಾನುಪಸ್ಸನಾದೀನಂ ವಿಸೇಸಕಾರಣತ್ತಾ. ‘‘ಞತ್ವಾನ ಉದಯಬ್ಬಯ’’ನ್ತಿ ಸುತ್ತಪ್ಪದೇಸಸ್ಸ ಅತ್ಥಭೂತಾ ಉದಯಬ್ಬಯಾನುಪಸ್ಸನಾಪಞ್ಞಾ ದಸ್ಸನಭೂಮಿಯಾ ಪದಟ್ಠಾನಂ ನಾಮ ಪಠಮಮಗ್ಗಾಧಿಗಮಸ್ಸ ಆಸನ್ನಕಾರಣತ್ತಾ. ‘‘ಥಿನಮಿದ್ಧಾಭಿಭೂ ಭಿಕ್ಖೂ’’ತಿ ಸುತ್ತಪ್ಪದೇಸಸ್ಸ ಅತ್ಥಭೂತಂ ಥಿನಮಿದ್ಧಾಭಿಭವನಂ ವೀರಿಯಸ್ಸ ಪದಟ್ಠಾನಂ ನಾಮ ಆಸನ್ನಕಾರಣತ್ತಾ. ‘‘ಸಬ್ಬಾ ದುಗ್ಗತಿಯೋ ಜಹೇ’’ತಿ ಸುತ್ತಪ್ಪದೇಸಸ್ಸ ಅತ್ಥಭೂತಾ ಪಹಾತಬ್ಬಜಹನಭಾವನಾಯ ಅರಿಯಮಗ್ಗಭಾವನಾಯ ಪದಟ್ಠಾನಂ ನಾಮ ಪಹಾತಬ್ಬಪ್ಪಹಾನೇನ ಅರಿಯಮಗ್ಗಭಾವನಾಪಾರಿಪೂರಿಸಮ್ಭವತೋ.

‘‘ಏತ್ತಕೋವ ಪದಟ್ಠಾನಹಾರಸಮ್ಪಾತೋ ಪರಿಪುಣ್ಣೋ’’ತಿ ವತ್ತಬ್ಬತ್ತಾ ‘‘ನಿಯುತ್ತೋ ಪದಟ್ಠಾನೋ ಹಾರಸಮ್ಪಾತೋ’’ತಿ ವುತ್ತಂ. ಯೇನ ಯೇನ ಸಂವಣ್ಣನಾವಿಸೇಸಭೂತೇನ ಪದಟ್ಠಾನಹಾರಸಮ್ಪಾತಭೂತೇನ ಸುತ್ತಪ್ಪದೇಸತ್ಥಾನಿ ಪದಟ್ಠಾನಾನಿ ನೀಹರಿತಾನಿ, ಸೋ ಸೋ ಸಂವಣ್ಣನಾವಿಸೇಸಭೂತೋ ಪದಟ್ಠಾನಹಾರಸಮ್ಪಾತೋ ನಿಯುತ್ತೋ ಯಥಾರಹಂ ನಿದ್ಧಾರೇತ್ವಾ ಯುಜ್ಜಿತಬ್ಬೋತಿ ಅತ್ಥೋ ಗಹೇತಬ್ಬೋತಿ.

ಇತಿ ಪದಟ್ಠಾನಹಾರಸಮ್ಪಾತೇ ಸತ್ತಿಬಲಾನುರೂಪಾ ರಚಿತಾ

ವಿಭಾವನಾ ನಿಟ್ಠಿತಾ.

ಪಣ್ಡಿತೇಹಿ ಪನ…ಪೇ… ಗಹೇತಬ್ಬೋತಿ.