೧೨. ಓತರಣಹಾರವಿಭಙ್ಗವಿಭಾವನಾ

೪೨. ಯೇನ ಯೇನ ಸಂವಣ್ಣನಾವಿಸೇಸಭೂತೇನ ಪಞ್ಞತ್ತಿಹಾರವಿಭಙ್ಗೇನ ಪಞ್ಞತ್ತಿಯೋ ವಿಭತ್ತಾ, ಸೋ ಸಂವಣ್ಣನಾವಿಸೇಸಭೂತೋ ವಿಭಙ್ಗೋ ಪರಿಪುಣ್ಣೋ, ‘‘ಕತಮೋ ಓತರಣೋ ಹಾರವಿಭಙ್ಗೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮೋ ಓತರಣೋ ಹಾರೋ’’ತಿಆದಿ ವುತ್ತಂ. ತತ್ಥ ತತ್ಥಾತಿ ತೇಸು ನಿದ್ದಿಟ್ಠೇಸು ಸೋಳಸಸು ದೇಸನಾಹಾರಾದೀಸು ಕತಮೋ ಸಂವಣ್ಣನಾವಿಸೇಸೋ ಓತರಣೋ ಹಾರೋ ಓತರಣಹಾರವಿಭಙ್ಗೋ ನಾಮಾತಿ ಪುಚ್ಛತಿ. ‘‘ಯೋ ಚ ಪಟಿಚ್ಚುಪ್ಪಾದೋ’’ತಿಆದಿನಿದ್ದೇಸಸ್ಸ ಇದಾನಿ ಮಯಾ ವುಚ್ಚಮಾನೋ ‘‘ಉದ್ಧಂ ಅಧೋ ಸಬ್ಬಧಿ ವಿಪ್ಪಮುತ್ತೋ’’ತಿಆದಿಕೋ ವಿತ್ಥಾರಸಂವಣ್ಣನಾವಿಸೇಸೋ ಓತರಣೋ ಹಾರೋ ಓತರಣಹಾರವಿಭಙ್ಗೋ ನಾಮಾತಿ ಗಹೇತಬ್ಬೋ.

ತತ್ಥ ಪಾಠೇ ‘‘ಕತಮೇ ಪಟಿಚ್ಚಸಮುಪ್ಪಾದಾದಯೋ ನಿದ್ಧಾರೇತ್ವಾ ಕತಮೇಹಿ ನಿದ್ಧಾರಿತೇಹಿ ಧಮ್ಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ಇಮಸ್ಮಿಂ ಪಾಠೇ ಇಮೇ ಪಟಿಚ್ಚಸಮುಪ್ಪಾದಾದಯೋ ನಿದ್ಧಾರೇತ್ವಾ ಇಮೇಹಿ ನಿದ್ಧಾರಿತೇಹಿ ಧಮ್ಮೇಹಿ ಓತರತೀತಿ ದಸ್ಸೇತುಂ ‘‘ಉದ್ಧಂ ಅಧೋ ಸಬ್ಬಧಿ ವಿಪ್ಪಮುತ್ತೋ’’ತಿಆದಿ ವುತ್ತಂ. ತತ್ಥ ಉದ್ಧನ್ತಿ ಕಾಮಧಾತುತೋ ಉದ್ಧಂ ಉಪರಿಭಾಗೇ ಪವತ್ತಾಯ ರೂಪಧಾತುಅರೂಪಧಾತುಯಾ. ಅಧೋತಿ ರೂಪಧಾತುತೋ ಹೇಟ್ಠಾಭಾಗೇ ಪವತ್ತಾಯ ಕಾಮಧಾತುಯಾ. ಸಬ್ಬಧೀತಿ ಸಬ್ಬಸ್ಮಿಂ ಕಾಮರೂಪಅರೂಪಧಾತುಮ್ಹಿ. ವಿಪ್ಪಮುತ್ತೋತಿ ಪಟಿಸನ್ಧಿವಸೇನ ಅಪ್ಪವತ್ತನತೋ ವಿಪ್ಪಮುತ್ತೋ ಅಸೇಕ್ಖೋ. ಅಯಂ ಸೇಕ್ಖೋ ದಸ್ಸನಮಗ್ಗೇನ ಸಕ್ಕಾಯದಿಟ್ಠಿಯಾ ಸಮುಗ್ಘಾತತ್ತಾ ‘‘ಅಹಂ ಅಸ್ಮೀ’’ತಿ ಅನಾನುಪಸ್ಸೀ ವಿಹರತಿ. ಏವಂ ಸೇಕ್ಖಾಯ ವಿಮುತ್ತಿಯಾ ಚೇವ ಅಸೇಕ್ಖಾಯ ವಿಮುತ್ತಿಯಾ ಚ ಸೇಕ್ಖೋ ಚೇವ ಅಸೇಕ್ಖೋ ಚ ಅತಿಣ್ಣಪುಬ್ಬಂ ಓಘಂ ಅಪುನಬ್ಭವಾಯ ವಿಮುತ್ತೋ ಉದತಾರೀತಿ ಗಾಥಾತ್ಥೋ ಗಹೇತಬ್ಬೋ.

ತಸ್ಮಿಂ ಗಾಥಾಪಾಠೇ ‘‘ಕತಮೇ ನಿದ್ಧಾರೇತ್ವಾ ಕತಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ‘‘ಉದ್ಧನ್ತಿ ರೂಪಧಾತೂ’’ತಿಆದಿ ವುತ್ತಂ. ಉದ್ಧನ್ತಿ ಮನುಸ್ಸಲೋಕತೋ ಉದ್ಧಂ ಚಾತುಮಹಾರಾಜಿಕಾದಯೋಪಿ ಗಹಿತಾತಿ ಅತ್ಥಸಮ್ಭವತೋ ತಂ ನಿವತ್ತೇತುಂ ‘‘ರೂಪಧಾತು ಅರೂಪಧಾತೂ’’ತಿ ವುತ್ತಂ. ಅಧೋತಿ ಮನುಸ್ಸಭವತೋ ಅಧೋ ಚತ್ತಾರೋ ಅಪಾಯಭೂಮಿಯೋ ಚ ಗಹಿತಾತಿ ಅತ್ಥಸಮ್ಭವತೋ ತಂ ನಿವತ್ತೇತುಂ ‘‘ಕಾಮಧಾತೂ’’ತಿ ವುತ್ತಂ. ಸಬ್ಬಧೀತಿ ಚತುಭೂಮಿಕೇತಿ ಅತ್ಥಸಮ್ಭವತೋ ‘‘ತೇಧಾತುಕೇ’’ತಿ ವುತ್ತಂ. ಅಯಂ ಅಸೇಕ್ಖಾ ವಿಮುತ್ತೀತಿ ವಿಮುತ್ತಸ್ಸ ಅಸೇಕ್ಖಸ್ಸ ಯಾ ವಿರಾಗತಾ ಅತ್ಥಿ, ಅಯಮ್ಪಿ ವಿರಾಗತಾ ಅಸೇಕ್ಖಫಲವಿಮುತ್ತಿ. ‘‘ಉದ್ಧಂ ಅಧೋ ಸಬ್ಬಧಿ ವಿಪ್ಪಮುತ್ತೋ’’ತಿ ಪಾಠೇ ವುತ್ತಪ್ಪಕಾರಾ ಅಯಂ ಅಸೇಕ್ಖಾ ವಿಮುತ್ತಿ ನಿದ್ಧಾರಿತಾತಿ ಅತ್ಥೋ. ನಿದ್ಧಾರಿತಾಯ ಅಸೇಕ್ಖಾಯ ವಿಮುತ್ತಿಯಾ ಯಾನಿ ಸದ್ಧಾದಿಪಞ್ಚಿನ್ದ್ರಿಯಾನಿ ನಿದ್ಧಾರಿತಾನಿ, ತಾನಿಯೇವ ಅಸೇಕ್ಖಾನಿ ಪಞ್ಚಿನ್ದ್ರಿಯಾನಿ ಭವನ್ತಿ. ಅಯಂ ವುತ್ತಪ್ಪಕಾರಾ ಓತರಣಾ ಇನ್ದ್ರಿಯೇಹಿ ವಿಮುತ್ತಿಯಾ ಓತರಣಾ ನಾಮ ಪವೇಸನಾ ನಾಮ.

ತಾನಿಯೇವ ಅಸೇಕ್ಖಾನಿ ಪಞ್ಚಿನ್ದ್ರಿಯಾನಿ ವಿಜ್ಜಾಯ ಉಪಕಾರಕತ್ತಾ, ಪಞ್ಞಾಪದಟ್ಠಾನತ್ತಾ ವಾ ವಿಜ್ಜಾ ಭವನ್ತಿ. ವಿಜ್ಜುಪ್ಪಾದಾ ತಾದಿಸಾಯ ವಿಜ್ಜಾಯ ಉಪ್ಪಾದಾ ಉಪ್ಪಾದಹೇತುತೋ ಅವಿಜ್ಜಾನಿರೋಧೋ ಅವಿಜ್ಜಾಯ ನಿರೋಧೋ ಹೋತಿ…ಪೇ… ದುಕ್ಖಕ್ಖನ್ಧಸ್ಸ ನಿರೋಧೋ ಹೋತಿ, ಅಯಂ ವುತ್ತಪ್ಪಕಾರಾ ಓತರಣಾ ಪಟಿಚ್ಚಸಮುಪ್ಪಾದೇಹಿ ಓತರಣಾ ನಾಮ.

ತಾನಿಯೇವ ಅಸೇಕ್ಖಾನಿ ಪಞ್ಚಿನ್ದ್ರಿಯಾನಿ ತೀಹಿ ಖನ್ಧೇಹಿ ಸಙ್ಗಹಿತಾನಿ ಸದ್ಧಾವೀರಿಯೇಹಿ ಸೀಲಸಮ್ಭವತೋ, ಸತಿಯಾ ಚ ಪಞ್ಞಾನುವತ್ತಕತ್ತಾ. ಸೇಸಾ ವುತ್ತನಯಾನುಸಾರೇನ ವೇದಿತಬ್ಬಾ.

‘‘ಉದ್ಧಂ ಅಧೋ ಸಬ್ಬಧಿ ವಿಪ್ಪಮುತ್ತೋ’’ತಿ ಪಾಠೇ ನಿದ್ಧಾರೇತ್ವಾ ಓತರಣಾ ಆಚರಿಯೇನ ವಿಭತ್ತಾ, ಅಮ್ಹೇಹಿ ಚ ಞಾತಾ, ‘‘ಅಯಂ ಅಹಸ್ಮೀತಿ ಅನಾನುಪಸ್ಸೀ’’ತಿ ಪಾಠೇ ‘‘ಕತಮೇ ನಿದ್ಧಾರೇತ್ವಾ ಕತಮೇಹಿ ಓತರಣೇಹಿ ಓತರತೀ’’ತಿ ವತ್ತಬ್ಬತ್ತಾ ‘‘ಅಯಂ ಅಹಸ್ಮೀತಿ ಅನಾನುಪಸ್ಸೀತಿ ಅಯಂ ಸಕ್ಕಾಯದಿಟ್ಠಿಯಾ’’ತಿಆದಿ ವುತ್ತಂ. ಯೋ ಅಯಂ ಸೇಕ್ಖೋ ‘‘ಅಹಮಸ್ಮೀ’’ತಿ ನಾನುಪಸ್ಸೀ, ತಸ್ಸ ಸೇಕ್ಖಸ್ಸ ಸಕ್ಕಾಯದಿಟ್ಠಿಯಾ ಯೋ ಸಮುಗ್ಘಾತೋ ಅತ್ಥಿ, ಯಾ ಸಮುಗ್ಘಾತಸಙ್ಖಾತಾ ಸಮುಗ್ಘಾತವಿಮುತ್ತಿ ಸೇಕ್ಖಾ ವಿಮುತ್ತಿ ಹೋತಿ, ತಸ್ಸಾ ಸೇಕ್ಖಾಯ ವಿಮುತ್ತಿಯಾ ಯಾನಿ ಸದ್ಧಾದಿಪಞ್ಚಿನ್ದ್ರಿಯಾನಿ ನಿದ್ಧಾರಿತಾನಿ, ತಾನಿಯೇವ ಸೇಕ್ಖಾನಿ ಪಞ್ಚಿನ್ದ್ರಿಯಾನಿ ಭವನ್ತಿ. ಅಯಂ ವುತ್ತಪ್ಪಕಾರಾ ಓತರಣಾ ಇನ್ದ್ರಿಯೇಹಿ ಓತರಣಾ ನಾಮ. ಸೇಸಾ ವುತ್ತನಯಾನುಸಾರೇನ ವೇದಿತಬ್ಬಾ.

೪೩. ‘‘ಉದ್ಧಂ ಅಧೋ’’ತಿಆದಿಗಾಥಾಯಂ ಓತರಣಾ ಆಚರಿಯೇನ ವಿಭತ್ತಾ, ಅಮ್ಹೇಹಿ ಚ ಞಾತಾ, ‘‘ನಿಸ್ಸಿತಸ್ಸ ಚಲಿತ’’ನ್ತಿಆದಿಪಾಠೇ ‘‘ಕತಮೇ ನಿದ್ಧಾರೇತ್ವಾ ಕತಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ‘‘ನಿಸ್ಸಿತಸ್ಸ ಚಲಿತಂ, ಅನಿಸ್ಸಿತಸ್ಸ ಚಲಿತಂ ನತ್ಥೀ’’ತಿಆದಿ ವುತ್ತಂ. ನಿಸ್ಸಿತಸ್ಸ ಪುಗ್ಗಲಸ್ಸ ಚಲಿತಂ ಚಲನಂ ಅತ್ಥಿ, ಅನಿಸ್ಸಿತಸ್ಸ ಪುಗ್ಗಲಸ್ಸ ಚಲಿತಂ ಚಲನಂ ನತ್ಥಿ. ಚಲಿತೇ ಚಲನೇ ಅಸತಿ ಪಸ್ಸದ್ಧಿ ಭವತಿ, ಪಸ್ಸದ್ಧಿಯಾ ಸತಿ ವಿಜ್ಜಮಾನಾಯ ನತಿ ನ ಹೋತಿ, ನತಿಯಾ ಅಸತಿ ಅವಿಜ್ಜಮಾನಾಯ ಆಗತಿಗತಿ ನ ಹೋತಿ, ಆಗತಿಗತಿಯಾ ಅಸತಿ ಅವಿಜ್ಜಮಾನಾಯ ಚುತೂಪಪಾತೋ ನ ಹೋತಿ, ಚುತೂಪಪಾತೇ ಅಸತಿ ಅವಿಜ್ಜಮಾನೇ ಇಧ ಛಸು ಅಜ್ಝತ್ತಿಕಾಯತನೇಸು ಅತ್ತಾನಂ ನೇವ ಪಸ್ಸತಿ, ಹುರಂ ವಾ ಛಸು ಬಾಹಿರಾಯತನೇಸು ಅತ್ತಾನಂ ನ ಪಸ್ಸತಿ, ಉಭಯಂ ಅನ್ತರೇನ ವಜ್ಜೇತ್ವಾ ಫಸ್ಸಾದಿಸಮುದಾಯೇಸು ಧಮ್ಮೇಸು ಅತ್ತಾನಂ ನ ಪಸ್ಸತಿ, ಏಸೋವ ಪಟಿಚ್ಚಸಮುಪ್ಪಾದೋ ‘‘ಅವಿಜ್ಜಾನಿರೋಧಾ’’ತಿಆದಿಕೋ ದುಕ್ಖಸ್ಸ ಅನ್ತೋ ಅವಸಾನಂ ಕರೋತೀತಿ ಅತ್ಥೋ.

ನಿಸ್ಸಿತಸ್ಸ ಚಲಿತನ್ತಿ ಏತ್ಥ ‘‘ನಿಸ್ಸಯೋ ಕತಿವಿಧೋ’’ತಿ ಪುಚ್ಛಿತಬ್ಬತ್ತಾ ‘‘ನಿಸ್ಸಿತಸ್ಸ ಚಲಿತನ್ತಿ ನಿಸ್ಸಯೋ ನಾಮಾ’’ತಿಆದಿ ವುತ್ತಂ. ತತ್ಥಾತಿ ತೇಸು ದುವಿಧೇಸು ತಣ್ಹಾನಿಸ್ಸಯದಿಟ್ಠಿನಿಸ್ಸಯೇಸು ಯಾ ಚೇತನಾ ರತ್ತಸ್ಸ ಪುಗ್ಗಲಸ್ಸ ನಿದ್ಧಾರಿತಾ, ಅಯಂ ಚೇತನಾಧಮ್ಮೋ ತಣ್ಹಾನಿಸ್ಸಯೋ ನಾಮ. ಯಾ ಚೇತನಾ ಮೂಳ್ಹಸ್ಸ ಪುಗ್ಗಲಸ್ಸ ನಿದ್ಧಾರಿತಾ. ಅಯಂ ಚೇತನಾಧಮ್ಮೋ ದಿಟ್ಠಿನಿಸ್ಸಯೋ ನಾಮ. ಸಾ ದುವಿಧಾ ಚೇತನಾ ಪನ ಸಙ್ಖಾರಾ ನಾಮ. ಸಙ್ಖಾರಪಚ್ಚಯಾ ವಿಞ್ಞಾಣಂ…ಪೇ… ಸಬ್ಬೋ ಪಟಿಚ್ಚಸಮುಪ್ಪಾದೋ ನಿದ್ಧಾರಿತೋ. ಅಯಂ ವುತ್ತಪ್ಪಕಾರಾ ಓತರಣಾ ಪಟಿಚ್ಚಸಮುಪ್ಪಾದೇಹಿ ಓತರಣಾ ನಾಮ.

ತತ್ಥಾತಿ ತಸ್ಮಿಂ ತಣ್ಹಾನಿಸ್ಸಯದಿಟ್ಠಿನಿಸ್ಸಯೇ ಯಾ ವೇದನಾ ರತ್ತಸ್ಸ ಪುಗ್ಗಲಸ್ಸ ನಿದ್ಧಾರಿತಾ, ಅಯಂ ಸುಖಾ ವೇದನಾ. ಯಾ ಚೇತನಾ ಸಮ್ಮೂಳ್ಹಸ್ಸ ಪುಗ್ಗಲಸ್ಸ ನಿದ್ಧಾರಿತಾ, ಅಯಂ ಅದುಕ್ಖಮಸುಖಾ ವೇದನಾ. ಯೇಭುಯ್ಯೇನ ಸೇಸಾ ವುತ್ತನಯಾನುಸಾರೇನ ವೇದಿತಬ್ಬಾ.

೪೪. ‘‘ನಿಸ್ಸಿತಸ್ಸ ಚಲಿತ’’ನ್ತಿಆದಿಪಾಠೇ ಓತರಣಾ ಆಚರಿಯೇನ ವಿಭತ್ತಾ, ಅಮ್ಹೇಹಿ ಚ ಞಾತಾ.

‘‘ಯೇ ಕೇಚಿ ಸೋಕಾ ಪರಿದೇವಿತಾ ವಾ…ಪೇ…

ಪಿಯಂ ನ ಕಯಿರಾಥ ಕುಹಿಞ್ಚಿ ಲೋಕೇ’’ತಿ. –

ಗಾಥಾಪಾಠೇ ‘‘ಕತಮೇ ನಿದ್ಧಾರೇತ್ವಾ ಕತಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ‘‘ಯೇ ಕೇಚಿ ಸೋಕಾ’’ತಿಆದಿ ವುತ್ತಂ. ಯೇ ಕೇಚಿ ಸೋಕಾ ವಾ ಯಾ ಕಾಚಿ ಪರಿದೇವಿತಾ ವಾ ಅನೇಕರೂಪಾ ಯಾ ಕಾಚಿ ದುಕ್ಖಾ ವಾ ಲೋಕಸ್ಮಿಂ ಸಮ್ಭವನ್ತಿ. ಏತೇ ಸೋಕಾದಯೋ ಪಿಯಂ ಪಟಿಚ್ಚ ಪಭವನ್ತಿ, ಪಿಯೇ ಅಸನ್ತೇ ಏತೇ ಸೋಕಾದಯೋ ನ ಭವನ್ತಿ. ತಸ್ಮಾ ಪಿಯೇ ಅಸನ್ತೇ ಸೋಕಾದೀನಂ ಅಭಾವತೋ ಯೇಸಂ ವೀತಸೋಕಾನಂ ಕುಹಿಞ್ಚಿ ಲೋಕೇಪಿ ನತ್ಥಿ, ತೇ ವೀತಸೋಕಾ ಸುಖಿನೋ ಭವನ್ತಿ. ತಸ್ಮಾ ವೀತಸೋಕಾನಂ ಸುಖಸಮ್ಪನ್ನತ್ತಾ ಅಸೋಕಂ ವಿರಜಂ ಪತ್ಥಯಾನೋ ಸಪ್ಪುರಿಸೋ ಕುಹಿಞ್ಚಿ ಲೋಕೇ ಪಿಯಂ ನ ಕಯಿರಾಥಾತಿ ಗಾಥಾತ್ಥೋ.

‘‘ಯೇ ಕೇಚಿ ಸೋಕಾ ಪರಿದೇವಿತಾ ವಾ, ದುಕ್ಖಾ ಚ ಲೋಕಸ್ಮಿಮನೇಕರೂಪಾ ಪಿಯಂ ಪಟಿಚ್ಚ ಪಭವನ್ತಿ ಏತೇ’’ತಿ ಏತ್ಥ ಪಾಠೇ ಯಾ ವೇದನಾ ನಿದ್ಧಾರಿತಾ, ಅಯಂ ದುಕ್ಖಾ ವೇದನಾ. ಸೇಸಾ ವುತ್ತನಯಾನುಸಾರೇನ ವೇದಿತಬ್ಬಾ.

‘‘ಯೇ ಕೇಚಿ ಸೋಕಾ’’ತಿಆದಿಗಾಥಾಪಾಠೇ ಓತರಣಾ ಆಚರಿಯೇನ ವಿಭತ್ತಾ, ಅಮ್ಹೇಹಿ ಚ ಞಾತಾ, ‘‘ಕಾಮಂ ಕಾಮಯಮಾನಸ್ಸಾ’’ತಿಆದಿಗಾಥಾಪಾಠೇ ‘‘ಕತಮೇ ನಿದ್ಧಾರೇತ್ವಾ ಕತಮೇಹಿ ಓತರತೀ’’ತಿ ವತ್ತಬ್ಬತ್ತಾ ‘‘ಕಾಮಂ ಕಾಮಯಮಾನಸ್ಸಾ’’ತಿಆದಿ ವುತ್ತಂ. ತಸ್ಸಂ ಗಾಥಾಯಂ ಅತ್ಥೋ ಹೇಟ್ಠಾ ವುತ್ತೋವ.

ತತ್ಥಾತಿ ತಸ್ಮಿಂ ‘‘ಪೀತಿಮನೋ ಹೋತೀ’’ತಿ ಪಾಠೇ ಯಾ ಪೀತಿಮನತಾ ವುತ್ತಾ ನಿದ್ಧಾರಿತಾ, ಅಯಂ ಪೀತಿಮನತಾ ಅನುನಯೋ ಹೋತಿ. ‘‘ಸಲ್ಲವಿದ್ಧೋವ ರುಪ್ಪತೀ’’ತಿ ಪಾಠೇ ಯಂ ರುಪ್ಪನಂ ಆಹ, ಇದಂ ರುಪ್ಪನಂ ಪಟಿಘಂ ಹೋತಿ, ಅನುನಯೋ ಚ ಪಟಿಘಞ್ಚ ನಿದ್ಧಾರಿತಾತಿ ಅತ್ಥೋ.

‘‘ಅನುನಯೇ ಚ ಪಟಿಘೇ ಚ ನಿದ್ಧಾರಿತೇ ಕತಮೋ ಧಮ್ಮೋ ನಿದ್ಧಾರಿತೋ’’ತಿ ವತ್ತಬ್ಬತ್ತಾ ‘‘ಅನುನಯೋ ಪಟಿಘಞ್ಚ ಪನ ತಣ್ಹಾಪಕ್ಖೋ’’ತಿ ವುತ್ತಂ. ತಣ್ಹಾಪಕ್ಖೋತಿ ತಣ್ಹಾಪಕ್ಖತ್ತಾ ತಣ್ಹಾ ನಿದ್ಧಾರಿತಾ. ‘‘ಅನುನಯೋ ತಣ್ಹಾಪಕ್ಖೋ ಹೋತು, ಪಟಿಘಂ ಪನ ತಣ್ಹಾಪಕ್ಖಂ ನ ಸಿಯಾ’’ತಿ ಚೇ ವದೇಯ್ಯ? ಪಟಿಘಸ್ಸ ಅತ್ತಸಿನೇಹವಸೇನ ಪವತ್ತನತೋ ಪಟಿಘಮ್ಪಿ ತಣ್ಹಾಪಕ್ಖಂ ಹೋತಿ. ‘‘ತಣ್ಹಾಯ ನಿದ್ಧಾರಿತಾಯ ಕತಮೋ ನಿದ್ಧಾರಿತೋ’’ತಿ ವತ್ತಬ್ಬತ್ತಾ ‘‘ತಣ್ಹಾಯ ಚ ಪನಾ’’ತಿಆದಿ ವುತ್ತಂ. ದಸನ್ನಂ ರೂಪಾಯತನಾನಂ ತಣ್ಹಾಯ ಪದಟ್ಠಾನತ್ತಾ ದಸ ರೂಪಾನಿ ಆಯತನಾನಿ ನಿದ್ಧಾರಿತಾನಿ. ಅಯಂ ವುತ್ತಪ್ಪಕಾರಾ ಓತರಣಾ ಆಯತನೇಹಿ ಓತರಣಾ ನಾಮ. ಸುತ್ತೇ ಆಗತಾ ಪಟಿಚ್ಚಸಮುಪ್ಪಾದಾದಯೋ ತೇನ ಸಂವಣ್ಣನಾವಿಸೇಸೇನ ನಯೇನ ನಿದ್ಧಾರಿತಾ, ಸುತ್ತತ್ಥಮುಖೇನ ವಾ ನಿದ್ಧಾರಿತಾ, ತೇನ…ಪೇ… ನಯೇನ ನಿದ್ಧಾರಿತೇಸು ಪಟಿಚ್ಚಸಮುಪ್ಪಾದಾದೀಸು ಯೋ ಸಂವಣ್ಣನಾನಯವಿಸೇಸೋ ತದತ್ಥವಾಚಕವಸೇನ ವಾ ತದತ್ಥಞಾಪಕವಸೇನ ವಾ ಓತರತಿ ಪವಿಸತಿ ಸಮೋಸರತಿ, ಸೋ ಸಂವಣ್ಣನಾನಯವಿಸೇಸೋ ಓತರಣೋ ಹಾರೋ ನಾಮಾತಿ ಅಧಿಪ್ಪಾಯೋ ದಟ್ಠಬ್ಬೋ. ಸೇಸೇಸುಪಿ ವುತ್ತನಯಾನುಸಾರೇನ ಓತರಣಾ ಗಹೇತಬ್ಬಾ. ‘‘ತೇನಾಹ ಆಯಸ್ಮಾ’’ತಿಆದ್ಯಾನುಸನ್ಧ್ಯಾದಿಅತ್ಥೋ ಚೇವ ‘‘ನಿಯುತ್ತೋ ಓತರಣೋ ಹಾರೋ’’ತಿ ಅನುಸನ್ಧ್ಯಾದಿಅತ್ಥೋ ಚ ವುತ್ತನಯಾನುಸಾರೇನ ವೇದಿತಬ್ಬೋ.

ಇತಿ ಓತರಣಹಾರವಿಭಙ್ಗೇ ಸತ್ತಿಬಲಾನುರೂಪಾ ರಚಿತಾ

ವಿಭಾವನಾ ನಿಟ್ಠಿತಾ.

ಪಣ್ಡಿತೇಹಿ ಪನ ಅಟ್ಠಕಥಾಟೀಕಾನುಸಾರೇನ ಗಮ್ಭೀರತ್ಥೋ ವಿತ್ಥಾರತೋ ವಿಭಜಿತ್ವಾ ಗಹೇತಬ್ಬೋತಿ.