೭. ದಿಬ್ಬಚಕ್ಖುಕಥಾವಣ್ಣನಾ

೩೭೩. ವಿಸಿನೋತಿ ವಿಸೇಸೇನ ಬನ್ಧತಿ ವಿಸಯೀನಂ ಅತ್ತಪಟಿಬನ್ಧಂ ಕರೋತೀತಿ ವಿಸಯೋ, ಆರಮ್ಮಣಂ, ಅನುಭವತಿ ಏತೇನಾತಿ ಆನುಭಾವೋ, ಸಾಮತ್ಥಿಯಂ, ಬಲನ್ತಿ ಅತ್ಥೋ, ಗೋಚರಕರಣಂ ಗೋಚರೋ, ವಿಸಯೇ ಆನುಭಾವಗೋಚರಾ ವಿಸಯ…ಪೇ… ಚರಾತಿ. ತೇಹಿ ಯಥಾ ವಿಸಿಟ್ಠಂ ವಿಸೇಸಂ ಹೋತಿ, ತಥಾ ಪಚ್ಚಯಭೂತೇನ ಝಾನಧಮ್ಮೇನ ಆಹಿತಬಲಂ ಕತಬಲಾಧಾನಂ. ವಿಸಯಗ್ಗಹಣಞ್ಚೇತ್ಥ ಆನುಭಾವಗೋಚರಕರಣಾನಂ ಪವತ್ತಿಟ್ಠಾನದಸ್ಸನಂ ಯತ್ಥಸ್ಸ ತೇಹಿ ಉಪತ್ಥದ್ಧತ್ತಾ ಬಲಾಧಾನಂ ಪಾಕಟಂ ಹೋತಿ. ತೇನಾಹ ‘‘ಯಾದಿಸೇ ವಿಸಯೇ’’ತಿಆದಿ. ಬಲಾಧಾನಞ್ಚ ಉತ್ತರಿಮನುಸ್ಸಧಮ್ಮತೋ ಮಹಗ್ಗತಧಮ್ಮವಿಸೇಸತೋ ಉಪ್ಪನ್ನೇಹಿ ಪಣೀತೇಹಿ ಚಿತ್ತಜರೂಪೇಹಿ ವಿಸೇಸಾಪತ್ತಿ. ಯಂ ನಿಸ್ಸಾಯ ಪರಾವುತ್ತೀತಿ ಏಕೇ ವದನ್ತಿ. ಪುರಿಮಂ ಮಂಸಚಕ್ಖುಮತ್ತಮೇವಾತಿ ಯಥಾವುತ್ತಬಲಾಧಾನತೋ ಪುರಿಮಂ ಮಂಸಚಕ್ಖುಮತ್ತಮೇವ. ವದನ್ತೋ ಸಙ್ಗಹಕಾರೋ. ವಿಸಯಗ್ಗಹಣಂ ಪಾಳಿಯಂ ಕತಂ. ನ ವಿಸಯವಿಸೇಸದಸ್ಸನತ್ಥನ್ತಿ ನ ವಿಸಯಸ್ಸ ವಿಸೇಸದಸ್ಸನತ್ಥಂ. ಯತೋ ಉಭಿನ್ನಮ್ಪಿ ರೂಪಾಯತನಮೇವ ವಿಸಯೋತಿ ವಿಸಯಸ್ಸ ಸದಿಸತಂ ಅವಿಸೇಸಂ ಆಹ, ಸದಿಸಸ್ಸ ವಾ ವಿಸೇಸಂ ದೀಪೇತೀತಿ ಯೋಜನಾ.

ಧಮ್ಮುಪತ್ಥದ್ಧ …ಪೇ… ಅಧಿಪ್ಪಾಯೋ, ಅಞ್ಞಥಾ ಲದ್ಧಿಯೇವ ನ ಸಿಯಾತಿ ಭಾವೋ. ಮಗ್ಗೋತಿ ಉಪಾಯೋ, ಕಾರಣನ್ತಿ ಅತ್ಥೋ. ಪಕತಿಚಕ್ಖುಮತೋ ಏವ ಹಿ ದಿಬ್ಬಚಕ್ಖು ಉಪ್ಪಜ್ಜತಿ. ಕಸ್ಮಾ? ಕಸಿಣಾಲೋಕಂ ವಡ್ಢೇತ್ವಾ ದಿಬ್ಬಚಕ್ಖುಞಾಣಸ್ಸ ಉಪ್ಪಾದನಂ, ಸೋ ಚ ಕಸಿಣಮಣ್ಡಲೇ ಉಗ್ಗಹನಿಮಿತ್ತೇನ ವಿನಾ ನತ್ಥಿ, ತಸ್ಮಾ ವುತ್ತಂ ‘‘ಮಂಸಚಕ್ಖುಪಚ್ಚಯತಾದಸ್ಸನತ್ಥಮೇವ ವುತ್ತ’’ನ್ತಿ. ತೇನಾತಿ ‘‘ಮಗ್ಗೋ’’ತಿ ವಚನೇನ. ರೂಪಾವಚರಜ್ಝಾನಪಚ್ಚಯೇನಾತಿ ರೂಪಾವಚರಜ್ಝಾನೇನ ಪಚ್ಚಯಭೂತೇನ ಉಪ್ಪನ್ನಾನಿ ರೂಪಾವಚರಜ್ಝಾನಚಿತ್ತಸಮುಟ್ಠಿತಾನಿ. ಝಾನಕಮ್ಮಸಮುಟ್ಠಿತೇಸು ವತ್ತಬ್ಬಮೇವ ನತ್ಥಿ. ತಸ್ಸ ಹೇಸಾ ಲದ್ಧಿ.

೩೭೪. ಯೇನ ದಿಬ್ಬಚಕ್ಖುನೋ ಪಞ್ಞಾಚಕ್ಖುಭಾವಸ್ಸ ಇಚ್ಛನೇನ ಪಟಿಜಾನನೇನ. ತೀಣಿ ಚಕ್ಖೂನಿ ಮಂಸದಿಬ್ಬಪಞ್ಞಾಚಕ್ಖೂನಿ ಚಕ್ಖುನ್ತರಭಾವಂ ವದತೋ ಭವೇಯ್ಯುಂ, ತಸ್ಮಾ ತಂ ನ ಇಚ್ಛತೀತಿ ಅತ್ಥೋ.

ದಿಬ್ಬಚಕ್ಖುಕಥಾವಣ್ಣನಾ ನಿಟ್ಠಿತಾ.