೧೧. ನಿರೋಧಕಥಾವಣ್ಣನಾ

೩೫೩. ಯೇಸಂ ದ್ವಿನ್ನನ್ತಿ ಯೇಸಂ ದ್ವಿನ್ನಂ ದುಕ್ಖಸಚ್ಚಾನಂ. ದ್ವೀಹಿ ನಿರೋಧೇಹೀತಿ ಅಪ್ಪಟಿಸಙ್ಖಾಪಟಿಸಙ್ಖಾಸಙ್ಖಾತೇಹಿ ದ್ವೀಹಿ ನಿರೋಧೇಹಿ. ತತ್ಥ ದುಕ್ಖಾದೀನಂ ಪಟಿಸಙ್ಖಾತಿ ಪಟಿಸಙ್ಖಾ, ಪಞ್ಞಾವಿಸೇಸೋ. ತೇನ ವತ್ತಬ್ಬೋ ನಿರೋಧೋ ಪಟಿಸಙ್ಖಾನಿರೋಧೋ. ಯೋ ಸಾಸವೇಹಿ ಧಮ್ಮೇಹಿ ವಿಸಂಯೋಗೋತಿ ವುಚ್ಚತಿ, ಯೋ ಪಚ್ಚಯವೇಕಲ್ಲೇನ ಧಮ್ಮಾನಂ ಉಪ್ಪಾದಸ್ಸ ಅಚ್ಚನ್ತವಿಬನ್ಧಭೂತೋ ನಿರೋಧೋ, ಸೋ ಪಟಿಸಙ್ಖಾಯ ನವತ್ತಬ್ಬತೋ ಅಪ್ಪಟಿಸಙ್ಖಾನಿರೋಧೋ ನಾಮಾತಿ ಪರವಾದಿನೋ ಲದ್ಧಿ. ಪಟಿಸಙ್ಖಾಯ ವಿನಾ ನಿರುದ್ಧಾತಿ ಪಚ್ಚಯವೇಕಲ್ಲೇನ ಅನುಪ್ಪತ್ತಿಂ ಸನ್ಧಾಯ ವುತ್ತಂ. ತೇನಾಹ ‘‘ನ ಉಪ್ಪಜ್ಜಿತ್ವಾ ಭಙ್ಗಾ’’ತಿ. ಅನುಪ್ಪಾದೋಪಿ ಹಿ ನಿರೋಧೋತಿ ವುಚ್ಚತಿ ಯತೋ ‘‘ಇಮಸ್ಸುಪ್ಪಾದಾ ಇದಂ ಉಪ್ಪಜ್ಜತೀ’’ತಿ ಲಕ್ಖಣುದ್ದೇಸಸ್ಸ ಪಟಿಲೋಮೇ ‘‘ಇಮಸ್ಸ ನಿರೋಧಾ ಇದಂ ನಿರುಜ್ಝತೀ’’ತಿ ದಸ್ಸಿತೋ. ತೇನಾತಿ ಪಟಿಸಙ್ಖಾಯ ನಿರೋಧಸ್ಸ ಖಣಿಕನಿರೋಧಸ್ಸ ಚ ಇಧ ನಾಧಿಪ್ಪೇತತ್ತಾ.

ನಿರೋಧಕಥಾವಣ್ಣನಾ ನಿಟ್ಠಿತಾ.

ದುತಿಯವಗ್ಗವಣ್ಣನಾ ನಿಟ್ಠಿತಾ.