೫. ವಚೀಭೇದಕಥಾವಣ್ಣನಾ

೩೨೬. ಸೋತಿ ಪಠಮಮಗ್ಗಟ್ಠೋ. ತಸ್ಮಾತಿ ಯಸ್ಮಾ ‘‘ವಿರಜಂ ವೀತಮಲಂ ಧಮ್ಮಚಕ್ಖುಂ ಉದಪಾದಿ ‘ಯಂ ಕಿಞ್ಚಿ ಸಮುದಯಧಮ್ಮಂ, ಸಬ್ಬಂ ತಂ ನಿರೋಧಧಮ್ಮ’’’ನ್ತಿ ಸುತ್ತಸ್ಸ ಅತ್ಥಂ ಅಞ್ಞಥಾ ಗಹೇತ್ವಾ ಉದಯಬ್ಬಯಾನುಪಸ್ಸನಾನಿಸ್ಸನ್ದೇನ ಮಗ್ಗಕ್ಖಣೇಪಿ ದುಕ್ಖನ್ತಿ ವಿಪಸ್ಸನಾ ಉಪಟ್ಠಾತಿ, ತಸ್ಮಾ ‘‘ಸೋ ದುಕ್ಖಮಿಚ್ಚೇವ ವಾಚಂ ಭಾಸತೀ’’ತಿ ವದನ್ತಿ.

೩೨೮. ಇಚ್ಛಿತೇತಿ ಪರವಾದಿನಾ ಸಮ್ಪಟಿಚ್ಛಿತೇ. ಆರೋಪಿತೇತಿ ಯುತ್ತಿನಿದ್ಧಾರಣೇನ ತಸ್ಮಿಂ ಅತ್ಥೇ ಪತಿಟ್ಠಾಪಿತೇ ಯುಜ್ಜತಿ, ವಚೀಸಮುಟ್ಠಾಪನಕ್ಖಣತೋ ಪನ ಪಚ್ಛಾ ತಂ ಸದ್ದಂ ಸುಣಾತೀತಿ ಇಚ್ಛಿತೇ ನ ಯುಜ್ಜತಿ ಸೋತವಿಞ್ಞಾಣಸ್ಸ ಪಚ್ಚುಪ್ಪನ್ನಾರಮ್ಮಣತ್ತಾತಿ ಅಧಿಪ್ಪಾಯೋ. ಯಸ್ಮಾ ಪನ ಅತ್ತನಾ ನಿಚ್ಛಾರಿತಂ ಸದ್ದಂ ಅತ್ತನಾಪಿ ಸುಣಾತಿ, ತಸ್ಮಾ ಸೋತವಿಞ್ಞಾಣಂ ‘‘ಯೇನ ತಂ ಸದ್ದಂ ಸುಣಾತೀ’’ತಿ ಅಟ್ಠಕಥಾಯಂ ವುತ್ತನ್ತಿ ದಟ್ಠಬ್ಬಂ.

೩೩೨. ಲೋಕುತ್ತರಮಗ್ಗಕ್ಖಣೇತಿ ಪಠಮಜ್ಝಾನಿಕಸ್ಸ ಪಠಮಮಗ್ಗಸ್ಸ ಖಣೇ. ಅಭಿಭೂಸುತ್ತಾಹರಣೇ ಅಧಿಪ್ಪಾಯೋ ವತ್ತಬ್ಬೋತಿ ಏತೇನ ತದಾಹರಣಸ್ಸ ಅಸಮ್ಬನ್ಧತಂ ದಸ್ಸೇತಿ. ತೇನಾಹ ‘‘ತಸ್ಮಾ ಅಸಾಧಕ’’ನ್ತಿ.

ವಚೀಭೇದಕಥಾವಣ್ಣನಾ ನಿಟ್ಠಿತಾ.