೬. ಞಾಣಕಥಾವಣ್ಣನಾ

೮೭೬-೮೭೭. ‘‘ದ್ವಾದಸವತ್ಥುಕಂ ಞಾಣಂ ಲೋಕುತ್ತರ’’ನ್ತಿ ಏತ್ಥ ದ್ವಾದಸವತ್ಥುಕಸ್ಸ ಞಾಣಸ್ಸ ಲೋಕುತ್ತರತಾ ಪತಿಟ್ಠಾಪೀಯತೀತಿ ದಸ್ಸೇನ್ತೋ ಪಠಮವಿಕಪ್ಪಂ ವತ್ವಾ ಪುನ ಲೋಕುತ್ತರಞಾಣಸ್ಸ ದ್ವಾದಸವತ್ಥುಕತಾ ಪತಿಟ್ಠಾಪೀಯತೀತಿ ದಸ್ಸೇತುಂ ‘‘ತಂ ವಾ…ಪೇ… ಅತ್ಥೋ’’ತಿ ಆಹ. ಪರಿಞ್ಞೇಯ್ಯನ್ತಿ ಏತ್ಥ ಇತಿ-ಸದ್ದೋ ಆದಿಅತ್ಥೋ, ಪಕಾರತ್ಥೋ ವಾ. ತೇನ ‘‘ಪಹಾತಬ್ಬ’’ನ್ತಿ ಏವಮಾದಿಂ ಸಙ್ಗಣ್ಹಾತಿ. ಪರಿಞ್ಞಾತನ್ತಿ ಏತ್ಥಾಪಿ ಏಸೇವ ನಯೋ. ‘‘ಪರಿಞ್ಞೇಯ್ಯಂ ಪರಿಞ್ಞಾತ’’ನ್ತಿಆದಿನಾ ಪರಿಜಾನನಾದಿಕಿರಿಯಾಯ ನಿಬ್ಬತ್ತೇತಬ್ಬತಾ ನಿಬ್ಬತ್ತಿತತಾ ಚ ದಸ್ಸಿತಾ, ನ ನಿಬ್ಬತ್ತಿಯಮಾನತಾತಿ. ಯೇನ ಪನ ಸಾ ಹೋತಿ, ತಂ ದಸ್ಸೇತುಂ ‘‘ಸಚ್ಚಞಾಣಂ ಪನಾ’’ತಿಆದಿ ವುತ್ತಂ. ತತ್ಥ ಸಚ್ಚಞಾಣನ್ತಿ ದುಕ್ಖಾದಿಸಚ್ಚಸಭಾವಾವಬೋಧಕಂ ಞಾಣಂ, ಯಂ ಸನ್ಧಾಯ ‘‘ಇದಂ ದುಕ್ಖ’’ನ್ತಿಆದಿ ವುತ್ತಂ. ಮಗ್ಗಕ್ಖಣೇಪೀತಿ ಅಪಿ-ಸದ್ದೇನ ತತೋ ಪುಬ್ಬಾಪರಭಾಗೇಪೀತಿ ದಟ್ಠಬ್ಬಂ. ಪರಿಜಾನನಾದಿಕಿಚ್ಚಸಾಧನವಸೇನ ಹೋತಿ ಅಸಮ್ಮೋಹತೋ ವಿಸಯತೋ ಚಾತಿ ಅಧಿಪ್ಪಾಯೋ.

ಞಾಣಕಥಾವಣ್ಣನಾ ನಿಟ್ಠಿತಾ.

ವೀಸತಿಮವಗ್ಗವಣ್ಣನಾ ನಿಟ್ಠಿತಾ.

ಚತುತ್ಥೋ ಪಣ್ಣಾಸಕೋ ಸಮತ್ತೋ.