೫. ತಥತಾಕಥಾವಣ್ಣನಾ

೮೪೧-೮೪೩. ರೂಪಾದೀನಂ ಸಭಾವತಾತಿ ಏತೇನ ರೂಪಾದಯೋ ಏವ ಸಭಾವತಾತಿ ಇಮಮತ್ಥಂ ಪಟಿಕ್ಖಿಪತಿ. ಯತೋ ತಂ ಪರವಾದೀ ರೂಪಾದೀಸು ಅಪರಿಯಾಪನ್ನಂ ಇಚ್ಛತಿ. ತೇನಾಹ ‘‘ಭಾವಂ ಹೇಸ ತಥತಾತಿ ವದತಿ, ನ ಭಾವಯೋಗ’’ನ್ತಿ. ತತ್ಥ ಭಾವನ್ತಿ ಧಮ್ಮಮತ್ತಂ, ಪಕತೀತಿ ಅತ್ಥೋ ‘‘ಜಾತಿಧಮ್ಮ’’ನ್ತಿಆದೀಸು ವಿಯ. ರೂಪಾದೀನಞ್ಹಿ ರುಪ್ಪನಾದಿಪಕತಿ ತಥಾ ಅಸಙ್ಖತಾತಿ ಚ ಪರವಾದಿನೋ ಲದ್ಧಿ. ತೇನ ವುತ್ತಂ ‘‘ನ ಭಾವಯೋಗ’’ನ್ತಿ. ಯೇನ ಹಿ ಭಾವೋ ಸಭಾವಧಮ್ಮೋ ಯುಜ್ಜತಿ, ಏಕೀಭಾವಮೇವ ಗಚ್ಛತಿ, ತಂ ರುಪ್ಪನಾದಿಲಕ್ಖಣಂ ಭಾವಯೋಗೋ. ತಂ ಪನ ರೂಪಾದಿತೋ ಅನಞ್ಞಂ, ತತೋ ಏವ ಸಙ್ಖತಂ, ಅವಿಪರೀತಟ್ಠೇನ ಪನ ‘‘ತಥ’’ನ್ತಿ ವುಚ್ಚತಿ.

ತಥತಾಕಥಾವಣ್ಣನಾ ನಿಟ್ಠಿತಾ.