೧೨. ಉಪಾದಾಪಞ್ಞತ್ತಾನುಯೋಗವಣ್ಣನಾ

೯೭. ನೀಲಗುಣಯೋಗತೋ ನೀಲೋ, ನೀಲೋ ಏವ ನೀಲಕೋ, ತಸ್ಸ, ಅಯಂ ಪನಸ್ಸ ನೀಲಪಞ್ಞತ್ತಿ ನೀಲರೂಪುಪಾದಾನಾತಿ ಆಹ ‘‘ನೀಲಂ…ಪೇ… ಪಞ್ಞತ್ತೀ’’ತಿ. ಏವಂ ಪನ ಪಾಠೇ ಠಿತೇ ನೀಲಂ ಉಪಾದಾಯ ನೀಲೋತಿ ಕಥಮಯಂ ಪದುದ್ಧಾರೋತಿ ಆಹ ‘‘ನೀಲಂ ರೂಪಂ…ಪೇ… ಏತ್ಥ ಯೋ ಪುಟ್ಠೋ ನೀಲಂ ಉಪಾದಾಯ ನೀಲೋ’’ತಿ. ಏತ್ಥಾತಿ ಏತಸ್ಮಿಂ ವಚನೇ. ತದಾದೀಸೂತಿ ‘‘ಪೀತಂ ರೂಪಂ ಉಪಾದಾಯಾ’’ತಿಆದಿಕಂ ಅಟ್ಠಕಥಾಯಂ ಆದಿ-ಸದ್ದೇನ ಗಹಿತಮೇವ ತದತ್ಥದಸ್ಸನವಸೇನ ಗಣ್ಹಾತಿ.

೯೮. ವುತ್ತನ್ತಿ ‘‘ಮಗ್ಗಕುಸಲೋ’’ತಿಆದೀಸು ಛೇಕಟ್ಠಂ ಸನ್ಧಾಯ ವುತ್ತಂ. ಕುಸಲಪಞ್ಞತ್ತಿಂ ಕುಸಲವೋಹಾರಂ.

೧೧೨. ಪುಬ್ಬಪಕ್ಖಂ ದಸ್ಸೇತ್ವಾ ಉತ್ತರಮಾಹಾತಿ ಪರವಾದೀ ಪುಬ್ಬಪಕ್ಖಂ ದಸ್ಸೇತ್ವಾ ಸಕವಾದಿಸ್ಸ ಉತ್ತರಮಾಹ.

೧೧೫. ‘‘ರೂಪಂ ರೂಪವಾ’’ತಿಆದಿನಯಪ್ಪವತ್ತಂ ಪರವಾದಿವಾದಂ ಭಿನ್ದಿತುಂ ‘‘ಯಥಾ ನ ನಿಗಳೋ ನೇಗಳಿಕೋ’’ತಿಆದಿನಾ ಸಕವಾದಿವಾದೋ ಆರದ್ಧೋತಿ ಆಹ ‘‘ಯಸ್ಸ ರೂಪಂ ಸೋ ರೂಪವಾತಿ ಉತ್ತರಪಕ್ಖೇ ವುತ್ತಂ ವಚನಂ ಉದ್ಧರಿತ್ವಾ’’ತಿ.

೧೧೮. ವಿಞ್ಞಾಣನಿಸ್ಸಯಭಾವೂಪಗಮನನ್ತಿ ಚಕ್ಖುವಿಞ್ಞಾಣಸ್ಸ ನಿಸ್ಸಯಭಾವೂಪಗಮನಂ. ತಯಿದಂ ವಿಸೇಸನಂ ಚಕ್ಖುಸ್ಸಾತಿ ಇಮಿನಾವ ಸಿದ್ಧನ್ತಿ ನ ಕತಂ ದಟ್ಠಬ್ಬಂ.

ಉಪಾದಾಪಞ್ಞತ್ತಾನುಯೋಗವಣ್ಣನಾ ನಿಟ್ಠಿತಾ.