೨. ನತ್ಥಿಅರಹತೋಅಕಾಲಮಚ್ಚೂತಿಕಥಾವಣ್ಣನಾ

೭೮೦. ಅಲದ್ಧವಿಪಾಕವಾರಾನನ್ತಿ ವಿಪಾಕದಾನಂ ಪತಿ ಅಲದ್ಧೋಕಾಸಾನಂ. ಬ್ಯನ್ತೀಭಾವನ್ತಿ ವಿಗತನ್ತತಂ, ವಿಗಮಂ ಅವಿಪಾಕನ್ತಿ ಅತ್ಥೋ.

೭೮೧. ತತೋ ಪರನ್ತಿ ಬ್ಯತಿರೇಕೇನ ಅತ್ಥಸಿದ್ಧಿ, ನ ಕೇವಲೇನ ಅನ್ವಯೇನಾತಿ ಆಹ ‘‘ತಾವ ನ ಕಮತಿ, ತತೋ ಪರಂ ಕಮತೀತಿ ಲದ್ಧಿಯಾ ಪಟಿಕ್ಖಿಪತೀ’’ತಿ. ತತ್ಥ ತತೋ ಪರನ್ತಿ ಪುಬ್ಬೇ ಕತಸ್ಸ ಕಮ್ಮಸ್ಸ ಪರಿಕ್ಖಯಗಮನತೋ ಪರಂ. ನತ್ಥಿ ಪಾಣಾತಿಪಾತೋ ಪಾಣಾತಿಪಾತಲಕ್ಖಣಾಭಾವತೋತಿ ಅಧಿಪ್ಪಾಯೋ. ತಮೇವ ಲಕ್ಖಣಾಭಾವಂ ದಸ್ಸೇತುಂ ‘‘ಪಾಣೋಪಾಣಸಞ್ಞಿತಾ’’ತಿಆದಿ ವುತ್ತಂ. ತತ್ಥ ನ ತೇನಾತಿ ಯೋ ಪರೇನ ಉಪಕ್ಕಮೋ ಕತೋ, ತೇನ ಉಪಕ್ಕಮೇನ ನ ಮತೋ, ಧಮ್ಮತಾಮರಣೇನೇವ ಮತೋತಿ ದುಬ್ಬಿಞ್ಞೇಯ್ಯಂ ಅವಿಸೇಸವಿದೂಹಿ, ದುಬ್ಬಿಞ್ಞೇಯ್ಯಂ ವಾ ಹೋತು ಸುವಿಞ್ಞೇಯ್ಯಂ ವಾ, ಅಙ್ಗಪಾರಿಪೂರಿಯಾವ ಪಾಣಾತಿಪಾತೋ.

ನತ್ಥಿಅರಹತೋಅಕಾಲಮಚ್ಚೂತಿಕಥಾವಣ್ಣನಾ ನಿಟ್ಠಿತಾ.