೯. ಅಪರಿಯಾಪನ್ನಕಥಾವಣ್ಣನಾ

೭೦೯-೭೧೦. ತಸ್ಮಾ ದಿಟ್ಠಿ ಲೋಕಿಯಪರಿಯಾಪನ್ನಾ ನ ಹೋತೀತಿ ಅತ್ಥಂ ವದನ್ತಿ, ಏವಂ ಸತಿ ಅತಿಪ್ಪಸಙ್ಗೋ ಹೋತಿ ವೀತದೋಸಾದಿವೋಹಾರಭಾವತೋತಿ. ತತೋ ಅಞ್ಞಥಾ ಅತ್ಥಂ ವದನ್ತೋ ‘‘ರೂಪದಿಟ್ಠಿಯಾ’’ತಿಆದಿಮಾಹ. ತತ್ಥ ಆದಿ-ಸದ್ದೇನ ಅರೂಪದಿಟ್ಠಿಆದಿಂ ಸಙ್ಗಣ್ಹಾತಿ. ಪರವಾದಿಅಧಿಪ್ಪಾಯವಸೇನ ಅಯಮತ್ಥವಿಭಾವನಾತಿ ಆಹ ‘‘ಯದಿ ಚ ಪರಿಯಾಪನ್ನಾ ಸಿಯಾ’’ತಿ. ತಥಾ ಚ ಸತೀತಿ ದಿಟ್ಠಿಯಾ ಕಾಮಧಾತುಪರಿಯಾಪನ್ನತ್ತೇ ಸತೀತಿ ಅತ್ಥೋ. ತಸ್ಮಾತಿ ‘‘ವೀತದಿಟ್ಠಿಕೋ’’ತಿ ಏವಂ ವೋಹಾರಾಭಾವತೋ. ನ ಹಿ ಸಾ ತಸ್ಸ ಅವಿಗತಾ ದಿಟ್ಠಿ, ಯತೋ ಸೋ ವೀತದಿಟ್ಠಿಕೋತಿ ನ ವುಚ್ಚತಿ. ಯೇನಾತಿ ಕಾಮದಿಟ್ಠಿಭಾವೇನ.

ಅಪರಿಯಾಪನ್ನಕಥಾವಣ್ಣನಾ ನಿಟ್ಠಿತಾ.

ಚುದ್ದಸಮವಗ್ಗವಣ್ಣನಾ ನಿಟ್ಠಿತಾ.