೧೦. ಅನಿಚ್ಚತಾಕಥಾವಣ್ಣನಾ

೬೨೮. ರೂಪಾದೀನಂ ಅನಿಚ್ಚತಾ ರೂಪಾದಿಕೇ ಸತಿ ಹೋತಿ, ಅಸತಿ ನ ಹೋತೀತಿ ಇಮಿನಾ ಪರಿಯಾಯೇನ ತಸ್ಸಾ ತೇಹಿ ಸಹ ಉಪ್ಪಾದನಿರೋಧೋ ವುತ್ತೋ, ಉಪ್ಪಾದಾದೀಸು ತೀಸು ಲಕ್ಖಣೇಸು ಅನಿಚ್ಚತಾವೋಹಾರೋ ಹೋತೀತಿ ಯಥಾ ತಯೋ ದಣ್ಡೇ ಉಪಾದಾಯ ಪವತ್ತೋ ತಿದಣ್ಡವೋಹಾರೋ ತೇಸು ಸಬ್ಬೇಸು ಹೋತಿ, ಏವಂ ಜಾತಿಜರಾಮರಣಧಮ್ಮೋ ನ ನಿಚ್ಚೋ ಅನಿಚ್ಚೋ, ತಸ್ಸ ಜಾತಿಆದಿಪಕತಿತಾ ಅನಿಚ್ಚತಾಸದ್ದೇನ ವುಚ್ಚತೀತಿ ಉಪ್ಪಾದಾದೀಸು ಲಕ್ಖಣೇಸು ಅನಿಚ್ಚತಾವೋಹಾರೋ ಸಮ್ಭವತೀತಿ ವುತ್ತಂ ‘‘ತೀಸು…ಪೇ… ಹೋತೀ’’ತಿ. ವಿಭಾಗಾನುಯುಞ್ಜನವಸೇನಾತಿ ಪಭೇದಾನುಯುಞ್ಜನವಸೇನ. ತತ್ಥ ಯಥಾ ಜರಾಭಙ್ಗವಸೇನ ಅನಿಚ್ಚತಾ ಪಾಕಟಾ ಹೋತಿ, ನ ತಥಾ ಜಾತಿವಸೇನಾತಿ ಪಾಳಿಯಂ ಜರಾಮರಣವಸೇನೇವ ಅನಿಚ್ಚತಾವಿಭಾಗೋ ದಸ್ಸಿತೋತಿ ದಟ್ಠಬ್ಬಂ.

ಅನಿಚ್ಚತಾಕಥಾವಣ್ಣನಾ ನಿಟ್ಠಿತಾ.

ಏಕಾದಸಮವಗ್ಗವಣ್ಣನಾ ನಿಟ್ಠಿತಾ.