೧೧. ಅವಿಞ್ಞತ್ತಿದುಸ್ಸೀಲ್ಯನ್ತಿಕಥಾವಣ್ಣನಾ

೬೦೩-೬೦೪. ಮಹಾಭೂತಾನಿ ಉಪಾದಾಯ ಪವತ್ತೋ ಅಞ್ಞಚಿತ್ತಕ್ಖಣೇಪಿ ಲಬ್ಭಮಾನೋ ಕುಸಲಾಕುಸಲಾನುಬನ್ಧೋ ಅವಿಞ್ಞತ್ತೀತಿ ಅಯಂ ವಾದೋ ‘‘ಚಿತ್ತವಿಪ್ಪಯುತ್ತೋ ಅಪುಞ್ಞೂಪಚಯೋ’’ತಿ ಇಮಿನಾ ಸಙ್ಗಹಿತೋತಿ ತತೋ ಅಞ್ಞಾನುಬನ್ಧಾಯಂ ‘‘ಆಣತ್ತಿಯಾ’’ತಿಆದಿ ವುತ್ತನ್ತಿ ತಂ ದಸ್ಸೇತುಂ ‘‘ಆಣತ್ತಿಯಾ…ಪೇ… ಅಧಿಪ್ಪಾಯೋ’’ತಿ ವುತ್ತಂ. ತತ್ಥ ಆಣತ್ತೋ ಯದಾ ಆಣತ್ತಭಾವೇನ ವಿಹಿಂಸಾದಿಕಿರಿಯಂ ಸಾಧೇತಿ, ತದಾ ಆಣತ್ತಿಯಾ ಪಾಣಾತಿಪಾತಾದೀಸು ಅಙ್ಗಭಾವೋ ವೇದಿತಬ್ಬೋ. ಸಾ ಪನಾಣತ್ತಿ ಪಾರಿವಾಸಿಕಭಾವೇನ ವಿಞ್ಞತ್ತಿರಹಿತಾ ನಾಮ ಹೋತೀತಿ ಪರವಾದಿನೋ ಅಧಿಪ್ಪಾಯೋ, ತಂ ದಸ್ಸೇತುಂ ‘‘ಏಕಸ್ಮಿಂ ದಿವಸೇ’’ತಿಆದಿ ವುತ್ತಂ.

ಅವಿಞ್ಞತ್ತಿದುಸ್ಸೀಲ್ಯನ್ತಿಕಥಾವಣ್ಣನಾ ನಿಟ್ಠಿತಾ.

ದಸಮವಗ್ಗವಣ್ಣನಾ ನಿಟ್ಠಿತಾ.

ದುತಿಯೋ ಪಣ್ಣಾಸಕೋ ಸಮತ್ತೋ.