ಅಪರದುತಿಯಗಾಥಾಸಙ್ಗಣಿಕಂ

ಕಾಯಿಕಾದಿಆಪತ್ತಿವಣ್ಣನಾ

೪೭೪. ವಿನಯೇ ಗರುಕಾ ವಿನಯಗರುಕಾ. ಕಿಞ್ಚಾಪಿ ಇದಂ ದ್ವೀಸು ಗಾಥಾಸು ಆಗತಂ, ಅಞ್ಞೇಹಿ ಪನ ಮಿಸ್ಸೇತ್ವಾ ವುತ್ತಭಾವತೋ ನಾನಾಕರಣಂ ಪಚ್ಚೇತಬ್ಬಂ.

ದೇಸನಾಗಾಮಿನಿಯಾದಿವಣ್ಣನಾ

೪೭೫. ದ್ವೇ ಸಂವಾಸಕಭೂಮಿಯೋತಿ ಏತ್ಥ ಭೂಮೀತಿ ಅವತ್ಥಾ. ಅಙ್ಗಹೀನತಾ ಕಾರಣವೇಕಲ್ಲವಸೇನಪಿ ವೇದಿತಬ್ಬಾತಿ ಆಹ ‘‘ಅಪಿಚೇತ್ಥಾ’’ತಿಆದಿ. ಏಸ ನಯೋತಿ ‘‘ಅಪಿಚೇತ್ಥಾ’’ತಿಆದಿನಾ ವುತ್ತನಯೋ. ವನಪ್ಪತಿಂ ಛಿನ್ದನ್ತಸ್ಸ ಪಾರಾಜಿಕನ್ತಿ ಅದಿನ್ನಾದಾನೇ ವನಪ್ಪತಿಕಥಾಯ ಆಗತಂ ಪರಸನ್ತಕಂ ಸನ್ಧಾಯ ವುತ್ತಂ. ವಿಸ್ಸಟ್ಠಿಛಡ್ಡನೇತಿ ಸುಕ್ಕವಿಸ್ಸಟ್ಠಿಯಾ ಮೋಚನೇ. ದುಕ್ಕಟಾ ಕತಾತಿ ದುಕ್ಕಟಂ ವುತ್ತಂ. ಪಠಮಸಿಕ್ಖಾಪದಮ್ಹಿಯೇವಾತಿ ಭಿಕ್ಖುನೋವಾದಕವಗ್ಗಸ್ಸ ಪಠಮಸಿಕ್ಖಾಪದೇಯೇವ. ಆಮಕಧಞ್ಞಂ ವಿಞ್ಞಾಪೇತ್ವಾ ಭುಞ್ಜನ್ತಿಯಾ ಪುಬ್ಬಪಯೋಗೇ ದುಕ್ಕಟಂ, ಅಜ್ಝೋಹಾರೇ ಪಾಚಿತ್ತಿಯಂ.

ಪಾಚಿತ್ತಿಯವಣ್ಣನಾ

೪೭೬. ಅಬ್ಭುಣ್ಹಸೀಲೋತಿ ಅಭಿನವಸೀಲೋ.

೪೭೮. ಅಸುತ್ತಕನ್ತಿ ಸುತ್ತವಿರಹಿತಂ, ಸುತ್ತತೋ ಅಪನೀತಂ ನತ್ಥೀತಿ ಅತ್ಥೋ.