ಉಪಾಲಿಪಞ್ಚಕವಣ್ಣನಾ

೪೨೦-೪೨೧. ಓಮದ್ದಕಾರಕೋತಿ ಓಮದ್ದಿತ್ವಾ ಅಭಿಭವಿತ್ವಾ ಕಾರಕೋ. ಉಪತ್ಥಮ್ಭೋ ನ ದಾತಬ್ಬೋತಿ ಸಾಮಗ್ಗಿವಿನಾಸಾಯ ಅನುಬಲಂ ನ ದಾತಬ್ಬಂ. ದಿಟ್ಠಾವಿಕಮ್ಮಮ್ಪಿ ಕತ್ವಾತಿ ‘‘ನ ಮೇತಂ ಖಮತೀ’’ತಿ ದಿಟ್ಠಿಂ ಆವಿ ಕತ್ವಾಪಿ.

ವೋಹಾರವಗ್ಗವಣ್ಣನಾ

೪೨೪. ಕಾಯಪ್ಪಯೋಗೇನ ಆಪಜ್ಜಿತಬ್ಬಾ ಕಾಯಪ್ಪಯೋಗಾ. ವಚೀಪಯೋಗೇನ ಆಪಜ್ಜಿತಬ್ಬಾ ವಚೀಪಯೋಗಾ. ನವಸು ಠಾನೇಸೂತಿ ಓಸಾರಣಾದೀಸು ನವಸು ಠಾನೇಸು. ದ್ವೀಸು ಠಾನೇಸೂತಿ ಞತ್ತಿದುತಿಯಞತ್ತಿಚತುತ್ಥಕಮ್ಮೇಸು. ತಸ್ಮಾತಿ ಯಸ್ಮಾ ಮಹಾಅಟ್ಠಕಥಾಯಂ ವುತ್ತನಯೇನ ಉಭತೋವಿಭಙ್ಗಾ ಅಸಙ್ಗಹಿತಾ, ತಸ್ಮಾ. ಯಂ ಕುರುನ್ದಿಯಂ ವುತ್ತಂ, ತಂ ಗಹೇತಬ್ಬನ್ತಿ ಸಮ್ಬನ್ಧೋ.

ದಿಟ್ಠಾವಿಕಮ್ಮವಗ್ಗವಣ್ಣನಾ

೪೨೫. ‘‘ಚತೂಹಿ ಪಞ್ಚಹೀ’’ತಿ ವಚನತೋ ದ್ವೀಹಿ ವಾ ತೀಹಿ ವಾ ಏಕತೋ ದೇಸೇತುಂ ವಟ್ಟತಿ, ತತೋ ಪರಂ ನ ವಟ್ಟತಿ. ಮಾಳಕಸೀಮಾಯಾತಿ ಖಣ್ಡಸೀಮಾಯ. ಅವಿಪ್ಪವಾಸಸೀಮಾಯಾತಿ ಮಹಾಸೀಮಾಯ.

ಮುಸಾವಾದವಗ್ಗವಣ್ಣನಾ

೪೪೪. ಪರಿಯಾಯೇನ ಜಾನನ್ತಸ್ಸ ವುತ್ತಮುಸಾವಾದೋತಿ ಯಸ್ಸ ಕಸ್ಸಚಿ ಜಾನನ್ತಸ್ಸ ಪರಿಯಾಯೇನ ವುತ್ತಮುಸಾವಾದೋತಿ ಅತ್ಥೋ.

೪೪೬. ಅನುಯೋಗೋ ನ ದಾತಬ್ಬೋತಿ ತೇನ ವುತ್ತಂ ಅನಾದಿಯಿತ್ವಾ ತುಣ್ಹೀ ಭವಿತಬ್ಬನ್ತಿ ಅತ್ಥೋ.

ಭಿಕ್ಖುನೋವಾದವಗ್ಗವಣ್ಣನಾ

೪೫೪. ಏಕೂನವೀಸತಿಭೇದಾಯಾತಿ ಮಗ್ಗಪಚ್ಚವೇಕ್ಖಣಾದಿವಸೇನ ಏಕೂನವೀಸತಿಭೇದಾಯ.

ಅಧಿಕರಣವೂಪಸಮವಗ್ಗವಣ್ಣನಾ

೪೫೮. ಪಞ್ಚಹಿ ಕಾರಣೇಹೀತಿ ಇದಂ ಅತ್ಥನಿಪ್ಫಾದನಕಾನಿ ತೇಸಂ ಪುಬ್ಬಭಾಗಾನಿ ಚ ಕಾರಣಭಾವಸಾಮಞ್ಞೇನ ಏಕಜ್ಝಂ ಗಹೇತ್ವಾ ವುತ್ತಂ, ನ ಪನ ಸಬ್ಬೇಸಂ ಪಞ್ಚನ್ನಂ ಸಮಾನಯೋಗಕ್ಖೇಮತ್ತಾ. ಅನುಸ್ಸಾವನೇನಾತಿ ಭೇದಸ್ಸ ಅನುರೂಪಸಾವನೇನ. ಯಥಾ ಭೇದೋ ಹೋತಿ, ಏವಂ ಭಿನ್ದಿತಬ್ಬಾನಂ ಭಿಕ್ಖೂನಂ ಅತ್ತನೋ ವಚನಸ್ಸ ಸಾವನೇನ ವಿಞ್ಞಾಪನೇನಾತಿ ಅತ್ಥೋ. ತೇನಾಹ ‘‘ನನು ತುಮ್ಹೇ’’ತಿಆದಿ. ಕಣ್ಣಮೂಲೇ ವಚೀಭೇದಂ ಕತ್ವಾತಿ ಏತೇನ ಪಾಕಟಂ ಕತ್ವಾ ಭೇದಕರವತ್ಥುದೀಪನಂ ವೋಹರಣಂ. ತತ್ಥ ಅತ್ತನಾ ವಿನಿಚ್ಛಿತಮತ್ತಂ ರಹಸ್ಸವಸೇನ ವಿಞ್ಞಾಪನಂ ಅನುಸ್ಸಾವನನ್ತಿ ದಸ್ಸೇತಿ. ಕಮ್ಮಮೇವ ಉದ್ದೇಸೋ ವಾ ಪಮಾಣನ್ತಿ ತೇಹಿ ಸಙ್ಘಭೇದಸಿದ್ಧಿತೋ ಪಮಾಣಂ, ಇತರೇ ಪನ ತೇಸಂ ಸಮ್ಭಾರಭೂತಾ. ತೇನಾಹ ‘‘ವೋಹಾರಾ’’ತಿಆದಿ. ತತ್ಥಾತಿ ವೋಹರಣೇ.

ಕಥಿನತ್ಥಾರವಗ್ಗವಣ್ಣನಾ

೪೬೭. ಅನ್ತರಾ ವುತ್ತಕಾರಣೇನಾತಿ ‘‘ತಞ್ಹಿ ವನ್ದನ್ತಸ್ಸ ಮಞ್ಚಪಾದಾದೀಸುಪಿ ನಲಾಟಂ ಪಟಿಹಞ್ಞೇಯ್ಯಾ’’ತಿಆದಿನಾ ವುತ್ತಕಾರಣೇನ.