ಚೂಳವಗ್ಗೋ

ಪಾರಿವಾಸಿಕಕ್ಖನ್ಧಕಕಥಾ

೨೭೪೮. ತಜ್ಜನೀಯಂ ನಿಯಸ್ಸಞ್ಚ, ಪಬ್ಬಾಜಂ ಪಟಿಸಾರಣಂ;

ತಿವಿಧುಕ್ಖೇಪನಞ್ಚಾತಿ, ಸತ್ತ ಕಮ್ಮಾನಿ ದೀಪಯೇ.

೨೭೪೯. ತೇಚತ್ತಾಲೀಸ ವತ್ತಾನಿ, ಖನ್ಧಕೇ ಕಮ್ಮಸಞ್ಞಿತೇ;

ನವಾಧಿಕಾನಿ ತಿಂಸೇವ, ಖನ್ಧಕೇ ತದನನ್ತರೇ.

೨೭೫೦. ಏವಂ ಸಬ್ಬಾನಿ ವತ್ತಾನಿ, ದ್ವಾಸೀತೇವ ಮಹೇಸಿನಾ;

ಹೋನ್ತಿ ಖನ್ಧಕವತ್ತಾನಿ, ಗಹಿತಾಗಹಣೇನ ತು.

೨೭೫೧. ಪಾರಿವಾಸಞ್ಚ ವತ್ತಞ್ಚ, ಸಮಾದಿನ್ನಸ್ಸ ಭಿಕ್ಖುನೋ;

ರತ್ತಿಚ್ಛೇದೋ ಕಥಂ ವುತ್ತೋ, ವತ್ತಭೇದೋ ಕಥಂ ಭವೇ?

೨೭೫೨. ಸಹವಾಸೋ ವಿನಾವಾಸೋ, ಅನಾರೋಚನಮೇವ ಚ;

ಪಾರಿವಾಸಿಕಭಿಕ್ಖುಸ್ಸ, ರತ್ತಿಚ್ಛೇದೋ ಚ ದುಕ್ಕಟಂ.

೨೭೫೩. ಏಕಚ್ಛನ್ನೇ ಪನಾವಾಸೇ, ಪಕತತ್ತೇನ ಭಿಕ್ಖುನಾ;

ನಿವಾಸೋ ದಕಪಾತೇನ, ಉಕ್ಖಿತ್ತಸ್ಸ ನಿವಾರಿತೋ.

೨೭೫೪. ಪಾರಿವಾಸಿಕಭಿಕ್ಖುಸ್ಸ, ಅನ್ತೋಯೇವ ನ ಲಬ್ಭತಿ;

ಇಚ್ಚೇವಂ ಪನ ನಿದ್ದಿಟ್ಠಂ, ಮಹಾಪಚ್ಚರಿಯಂ ಪನ.

೨೭೫೫. ‘‘ಅವಿಸೇಸೇನ ನಿದ್ದಿಟ್ಠಂ, ಮಹಾಅಟ್ಠಕಥಾದಿಸು;

ಉಭಿನ್ನಂ ದಕಪಾತೇನ, ನಿವಾಸೋ ವಾರಿತೋ’’ತಿ ಹಿ.

೨೭೫೬. ಅಭಿಕ್ಖುಕೇ ಪನಾವಾಸೇ, ಅನಾವಾಸೇಪಿ ಕತ್ಥಚಿ;

ವಿಪ್ಪವಾಸಂ ವಸನ್ತಸ್ಸ, ರತ್ತಿಚ್ಛೇದೋ ಚ ದುಕ್ಕಟಂ.

೨೭೫೭. ಪಾರಿವಾಸಿಕಭಿಕ್ಖುಸ್ಸ, ಭಿಕ್ಖುಂ ದಿಸ್ವಾನ ತಙ್ಖಣೇ;

ನಾರೋಚೇನ್ತಸ್ಸ ಚೇತಸ್ಸ, ರತ್ತಿಚ್ಛೇದೋ ಚ ದುಕ್ಕಟಂ.

೨೭೫೮. ಪಞ್ಚೇವ ಚ ಯಥಾವುಡ್ಢಂ, ಲಭತೇ ಪಾರಿವಾಸಿಕೋ;

ಕಾತುಂ ತತ್ಥೇವ ಚ ಠತ್ವಾ, ಉಪೋಸಥಪವಾರಣಂ.

೨೭೫೯. ವಸ್ಸಸಾಟಿಂ ಯಥಾವುಡ್ಢಂ, ದೇನ್ತಿ ಚೇ ಸಙ್ಘದಾಯಕಾ;

ಓಣೋಜನಂ ತಥಾ ಭತ್ತಂ, ಲಭತೇ ಪಞ್ಚಿಮೇ ಪನ.

ಪಾರಿವಾಸಿಕಕ್ಖನ್ಧಕಕಥಾ.

ಸಮಥಕ್ಖನ್ಧಕಕಥಾ

೨೭೬೦. ವಿವಾದಾಧಾರತಾ ಚಾನು-ವಾದಾಧಿಕರಣಮ್ಪಿ ಚ;

ಆಪತ್ತಾಧಾರತಾ ಚೇವ, ಕಿಚ್ಚಾಧಿಕರಣಮ್ಪಿ ಚ.

೨೭೬೧. ಏತಾನಿ ಪನ ಚತ್ತಾರಿ, ವುತ್ತಾನಿ ಚ ಮಹೇಸಿನಾ;

ಭೇದಕಾರಕವತ್ಥೂನಿ, ವಿವಾದೋ ತತ್ಥ ನಿಸ್ಸಿತೋ.

೨೭೬೨. ವಿಪತ್ತಿಯೋ ಚತಸ್ಸೋವ, ಅನುವಾದೋ ಉಪಾಗತೋ;

ಆಪತ್ತಾಧಾರತಾ ನಾಮ, ಸತ್ತ ಆಪತ್ತಿಯೋ ಮತಾ.

೨೭೬೩. ಸಙ್ಘಕಿಚ್ಚಾನಿ ನಿಸ್ಸಾಯ, ಕಿಚ್ಚಾಧಿಕರಣಂ ಸಿಯಾ;

ಏತೇಸಂ ತು ಚತುನ್ನಮ್ಪಿ, ಸಮತ್ತಾ ಸಮಥಾ ಮತಾ.

೨೭೬೪. ಸಮ್ಮುಖಾ ಸತಿ ಚಾಮೂಳ್ಹೋ, ಪಟಿಞ್ಞಾವಿನಯೋಪಿ ಚ;

ತಸ್ಸಪಾಪಿಯಸೀ ಚೇವ, ತಥಾ ಯೇಭುಯ್ಯಸೀಪಿ ಚ.

೨೭೬೫. ತಿಣವತ್ಥಾರಕೋ ಚೇವ, ಸತ್ತಮೋ ವಿನಯೋ ಮತೋ;

ಸತ್ತಿಮೇ ಸಮಥಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ.

೨೭೬೬. ವಿವಾದೋ ಸಮ್ಮತಿ ದ್ವೀಹಿ, ಅನುವಾದೋ ಚತೂಹಿ ಚ;

ಆಪತ್ತಿ ಪನ ತೀಹೇವ, ಕಿಚ್ಚಮೇಕೇನ ಸಮ್ಮತಿ.

೨೭೬೭. ಛಟ್ಠೇನ ಪಠಮೇನಾಪಿ, ವಿವಾದೋ ಏತ್ಥ ಸಮ್ಮತಿ;

ಸಮ್ಮುಖಾವಿನಯಾದೀಹಿ, ಅನುಪುಬ್ಬೇನ ತೀಹಿಪಿ.

೨೭೬೮. ತಥೇವ ಪಞ್ಚಮೇನಾಪಿ, ಅನುವಾದೋ ಹಿ ಸಮ್ಮತಿ;

ಸಮ್ಮುಖೇನ ಪಟಿಞ್ಞಾಯ, ತಿಣವತ್ಥಾರಕೇನ ಚ.

೨೭೬೯. ಆಪತ್ತೂಪಸಮಂ ಯಾತಿ, ತೀಹೇವ ಸಮಥೇಹಿ ಸಾ;

ಸಮ್ಮುಖಾವಿನಯೇನೇವ, ಕಿಚ್ಚಮೇಕೇನ ಸಮ್ಮತಿ.

೨೭೭೦. ಯೇಭುಯ್ಯಸಿಕಕಮ್ಮೇ ತು, ಸಲಾಕಂ ಗಾಹಯೇ ಬುಧೋ;

ಗೂಳ್ಹೇನ ವಿವಟೇನಾಪಿ, ಕಣ್ಣಜಪ್ಪೇನ ವಾ ಪನ.

೨೭೭೧. ಅಲಜ್ಜುಸ್ಸದೇ ಗೂಳ್ಹೇನ, ವಿವಟೇನೇವ ಲಜ್ಜಿಸು;

ಬಾಲೇಸು ಕಣ್ಣಜಪ್ಪೇನ, ಸಲಾಕಂ ಗಾಹಯೇ ಬುಧೋ.

೨೭೭೨. ಲಜ್ಜೀ ಅಲಜ್ಜೀ ಬಾಲೋತಿ, ಕೇನ ಸಕ್ಕಾ ವಿಜಾನಿತುಂ?

ಸಕೇನ ಕಮ್ಮುನಾಯೇವ, ತೇನ ಸಕ್ಕಾ ವಿಜಾನಿತುಂ.

೨೭೭೩. ಆಪಜ್ಜತಿ ಚ ಸಞ್ಚಿಚ್ಚ, ಆಪತ್ತಿಂ ಪರಿಗೂಹತಿ;

ಛನ್ದಾದಿಅಗತಿಂ ಯಾತಿ, ಅಲಜ್ಜೀ ಏದಿಸೋ ಸಿಯಾ.

೨೭೭೪. ನಾಪಜ್ಜತಿ ಚ ಸಞ್ಚಿಚ್ಚ, ಆಪತ್ತಿಂ ನ ಚ ಗೂಹತಿ;

ನ ಗಚ್ಛತಿಗತಿಞ್ಚಾಪಿ, ಏದಿಸೋ ಲಜ್ಜಿ ಪುಗ್ಗಲೋ.

೨೭೭೫. ದುಚ್ಚಿನ್ತಿತೋ ಚ ದುಬ್ಭಾಸೀ, ತಥಾ ದುಕ್ಕಟಕಾರಿಕೋ;

ಏದಿಸೋ ಪನ ‘‘ಬಾಲೋ’’ತಿ, ಲಕ್ಖಣೇನೇವ ಞಾಯತಿ.

೨೭೭೬. ತಿಧಾ ಸಲಾಕಗಾಹೇನ, ಬಹುಕಾ ಧಮ್ಮವಾದಿನೋ;

ಯೇಭುಯ್ಯಸಿಕಕಮ್ಮೇನ, ಕತ್ತಬ್ಬನ್ತಿ ಜಿನೋಬ್ರವಿ.

೨೭೭೭. ಅಲಜ್ಜೀ ಸಾನುವಾದೋ ಚ, ಅಸುಚೀ ಕಮ್ಮತೋ ಚ ಯೋ;

ತಸ್ಸಪಾಪಿಯಸೀಕಮ್ಮ-ಯೋಗ್ಗೋ ಸೋ ಹೋತಿ ಪುಗ್ಗಲೋ.

೨೭೭೮. ಭಣ್ಡನೇ ಕಲಹೇ ಜಾತೇ, ವಿವಾದಸ್ಮಿಂ ಅನಪ್ಪಕೇ;

ಬಹುಅಸ್ಸಾಮಣೇ ಚಿಣ್ಣೇ, ಅನಗ್ಗೇಪಿ ಚ ಭಸ್ಸಕೇ.

೨೭೭೯. ಮೂಲಮೂಲಂ ಗವೇಸನ್ತಂ, ಹೋತಿ ವಾಳಞ್ಚ ಕಕ್ಖಳಂ;

ತಿಣವತ್ಥಾರಕೇನೇವ, ಕಾತಬ್ಬನ್ತಿ ಪಕಾಸಿತಂ.

೨೭೮೦. ಯಥಾ ಚ ತಿಣಪಣ್ಣೇನ, ಛನ್ನಂ ಗೂಥಞ್ಚ ಮುತ್ತಕಂ;

ನ ಚ ವಾಯತಿ ದುಗ್ಗನ್ಧಂ, ವೂಪಸಮ್ಮತಿ ತಙ್ಖಣೇ.

೨೭೮೧. ಠಪೇತ್ವಾ ಥುಲ್ಲವಜ್ಜಞ್ಚ, ಗಿಹೀಹಿ ಪಟಿಸಂಯುತಂ;

ದಿಟ್ಠಾವಿಕಮ್ಮಿಕಞ್ಚೇವ, ಯೋ ಚ ತತ್ಥ ನ ಹೋತಿ ತಂ.

೨೭೮೨. ಸೇಸಾಯಾಪತ್ತಿಯಾ ಯಾವ, ಉಪಸಮ್ಪದಮಾಳತೋ;

ಸುದ್ಧೋ ಹೋತಿ ನಿರಾಪತ್ತಿ, ತಿಣವತ್ಥಾರಕೇ ತಥಾ.

ಸಮಥಕ್ಖನ್ಧಕಕಥಾ.

ಖುದ್ದಕವತ್ಥುಕ್ಖನ್ಧಕಕಥಾ

೨೭೮೩. ರುಕ್ಖೇ ವಾ ಪನ ಕುಟ್ಟೇವಾ, ಅಟ್ಟಾನೇ ಥಮ್ಭಕೇಸು ವಾ;

ನ್ಹಾಯಮಾನೋ ಸಕಂ ಕಾಯಂ, ಉಗ್ಘಂಸೇಯ್ಯಸ್ಸ ದುಕ್ಕಟಂ.

೨೭೮೪. ಕಾಯಂ ಗನ್ಧಬ್ಬಹತ್ಥೇನ, ಕುರುವಿನ್ದಕಸುತ್ತಿಯಾ;

ಮಲ್ಲಕೇನ ನ ಘಂಸೇಯ್ಯ, ನಾಞ್ಞಮಞ್ಞಞ್ಚ ಕಾಯತೋ.

೨೭೮೫. ಅಕತಂ ಮಲ್ಲಕಂ ನಾಮ, ಗಿಲಾನಸ್ಸೇವ ವಟ್ಟತಿ;

ಕತಂ ತಂ ಮಲ್ಲಕಂ ನಾಮ, ಸಬ್ಬೇಸಮ್ಪಿ ನ ವಟ್ಟತಿ.

೨೭೮೬. ಕಪಾಲಿಟ್ಠಕಖಣ್ಡಾನಿ, ಸಬ್ಬಸ್ಸ ಪುಥುಪಾಣಿಕಂ;

ಗಿಲಾನಸ್ಸಾಗಿಲಾನಸ್ಸ, ವತ್ಥವಟ್ಟಿ ಚ ವಟ್ಟತಿ.

೨೭೮೭. ವುತ್ತಾ ಫೇಣಕಪಾಸಾಣ-ಕಥಲಾ ಪಾದಘಂಸನೇ;

ವಟ್ಟಂ ವಾ ಚತುರಸ್ಸಂ ವಾ, ಕತಕಂ ನ ಚ ವಟ್ಟತಿ.

೨೭೮೮. ಯಂ ಕಿಞ್ಚಿಪಿ ಅಲಙ್ಕಾರಂ, ಧಾರೇನ್ತಸ್ಸಪಿ ದುಕ್ಕಟಂ;

ಹೋತಿ ಅನ್ತಮಸೋ ತಾಲ-ಪಣ್ಣಮತ್ತಮ್ಪಿ ಭಿಕ್ಖುನೋ.

೨೭೮೯. ಓಸಣ್ಹೇಯ್ಯ ಸಕೇ ಕೇಸೇ, ಯೋ ಹತ್ಥಫಣಕೇನ ವಾ;

ಫಣಕೇನಪಿ ಕೋಚ್ಛೇನ, ದುಕ್ಕಟಂ ತಸ್ಸ ನಿದ್ದಿಸೇ.

೨೭೯೦. ಸಿತ್ಥತೇಲೋದತೇಲೇಹಿ, ಮಣ್ಡನತ್ಥಂ ನ ವಟ್ಟತಿ;

ಅನುಲೋಮನಿಪಾತತ್ಥಂ, ಉದ್ಧಂಲೋಮೇನ ಭಿಕ್ಖುನಾ.

೨೭೯೧. ಹತ್ಥಂ ತೇಲೇನ ತೇಮೇತ್ವಾ, ಪುಞ್ಛಿತಬ್ಬಾ ಸಿರೋರುಹಾ;

ವಟ್ಟತುಣ್ಹಾಭಿತತ್ತಸ್ಸ, ಅಲ್ಲಹತ್ಥೇನ ಪುಞ್ಛಿತುಂ.

೨೭೯೨. ಆದಾಸೇ ಉದಪತ್ತೇ ವಾ, ಯತ್ಥ ಕತ್ಥಚಿ ಅತ್ತನೋ;

ಮುಖಬಿಮ್ಬಂ ವಿನಾ ಹೇತುಂ, ಓಲೋಕೇನ್ತಸ್ಸ ದುಕ್ಕಟಂ.

೨೭೯೩. ‘‘ಸಞ್ಛವಿಂ ತು ಮುಖಂ, ನೋ’’ತಿ, ದಟ್ಠುಮಾಬಾಧಪಚ್ಚಯಾ;

‘‘ಜಿಣ್ಣೋ ನೋ’’ತಾಯುಸಙ್ಖಾರ-ಜಾನನತ್ಥಞ್ಚ ವಟ್ಟತಿ.

೨೭೯೪. ನಚ್ಚಂ ವಾ ಪನ ಗೀತಂ ವಾ, ವಾದಿತಂ ವಾಪಿ ಭಿಕ್ಖುನೋ;

ದಟ್ಠುಂ ವಾ ಪನ ಸೋತುಂ ವಾ, ಗಚ್ಛತೋ ಹೋತಿ ದುಕ್ಕಟಂ.

೨೭೯೫. ದಟ್ಠುಮನ್ತಮಸೋ ಮೋರ-ನಚ್ಚಮ್ಪಿ ಚ ನ ವಟ್ಟತಿ;

ಸೋತುಮನ್ತಮಸೋ ದನ್ತ-ಗೀತಮ್ಪಿ ಚ ನ ವಟ್ಟತಿ.

೨೭೯೬. ನಚ್ಚನ್ತಸ್ಸ ಸಯಂ ವಾಪಿ, ನಚ್ಚಾಪೇನ್ತಸ್ಸ ದುಕ್ಕಟಂ;

ಅನಾಪತ್ತನ್ತರಾರಾಮೇ, ಠತ್ವಾ ಸುಣಾತಿ ಪಸ್ಸತಿ.

೨೭೯೭. ‘‘ಪಸ್ಸಿಸ್ಸಾಮೀ’’ತಿ ನಚ್ಚಂ ವಾ, ಗೀತಂ ವಾ ಪನ ವಾದಿತಂ;

ವಿಹಾರತೋ ವಿಹಾರಂ ವಾ, ಗಚ್ಛತೋ ಹೋತಿ ದುಕ್ಕಟಂ.

೨೭೯೮. ಆಪತ್ತನ್ತೋವಿಹಾರೇಪಿ, ಉಟ್ಠಹಿತ್ವಾನ ಗಚ್ಛತೋ;

ಠತ್ವಾ ಗೀವಂ ಪಸಾರೇತ್ವಾ, ಪಸ್ಸತೋಪಿ ಚ ವೀಥಿಯಂ.

೨೭೯೯. ಕೇಸಾ ದೀಘಾ ನ ಧಾರೇಯ್ಯಾ, ಯೋ ಧಾರೇಯ್ಯಸ್ಸ ದುಕ್ಕಟಂ;

ದ್ವಙ್ಗುಲಂ ವಾ ದುಮಾಸಂ ವಾ, ತತೋ ಉದ್ಧಂ ನ ವಟ್ಟತಿ.

೨೮೦೦. ನಖೇ ನಾಸಿಕಲೋಮಾನಿ, ದೀಘಾನಿ ನ ತು ಧಾರಯೇ;

ನ ಚ ವೀಸತಿಮಟ್ಠಂ ವಾ, ಕಾತುಂ ವಟ್ಟತಿ ಭಿಕ್ಖುನೋ.

೨೮೦೧. ಕಪ್ಪಾಪೇಯ್ಯ ವಿಸುಂ ಮಸ್ಸುಂ, ದಾಠಿಕಂ ವಾ ಠಪೇಯ್ಯ ಯೋ;

ಸಂಹರಾಪೇಯ್ಯ ವಾ ಲೋಮಂ, ಸಮ್ಬಾಧೇ ತಸ್ಸ ದುಕ್ಕಟಂ.

೨೮೦೨. ಛಿನ್ದತೋ ದುಕ್ಕಟಂ ವುತ್ತಂ, ಕೇಸೇ ಕತ್ತರಿಕಾಯ ವಾ;

ಅಗಿಲಾನಸ್ಸ ಅಞ್ಞೇನ, ಛಿನ್ದಾಪೇನ್ತಸ್ಸ ವಾ ತಥಾ.

೨೮೦೩. ಛಿನ್ದತೋ ಅತ್ತನೋ ಅಙ್ಗ-ಜಾತಂ ಥುಲ್ಲಚ್ಚಯಂ ಸಿಯಾ;

ಸೇಸಙ್ಗಛೇದನೇ ಅತ್ತ-ವಧೇ ಆಪತ್ತಿ ದುಕ್ಕಟಂ.

೨೮೦೪. ಅಹಿಕೀಟಾದಿದಟ್ಠಸ್ಸ, ತಾದಿಸಾಬಾಧಪಚ್ಚಯಾ;

ನ ದೋಸೋ ಛಿನ್ದತೋ ಅಙ್ಗಂ, ಮೋಚೇನ್ತಸ್ಸ ಚ ಲೋಹಿತಂ.

೨೮೦೫. ಅಪರಿಸ್ಸಾವನೋ ಮಗ್ಗಂ, ಸಚೇ ಗಚ್ಛತಿ ದುಕ್ಕಟಂ;

ಯಾಚಮಾನಸ್ಸ ವಾ ಮಗ್ಗೇ, ತಥೇವಾದದತೋಪಿ ತಂ.

೨೮೦೬. ನ ಭುಞ್ಜೇ ನ ಪಿವೇ ನಗ್ಗೋ, ನ ಖಾದೇ ನ ಚ ಸಾಯಯೇ;

ನ ದದೇ ನ ಚ ಗಣ್ಹೇಯ್ಯ, ನ ಗಚ್ಛೇಯ್ಯಪಿ ಅಞ್ಜಸಂ.

೨೮೦೭. ವನ್ದಿತಬ್ಬಂ ನ ನಗ್ಗೇನ, ವನ್ದಾಪೇತಬ್ಬಮೇವ ವಾ;

ಪರಿಕಮ್ಮಂ ನ ಕಾತಬ್ಬಂ, ನ ನಗ್ಗೇನ ಚ ಕಾರಯೇ.

೨೮೦೮. ಪರಿಕಮ್ಮೇ ಪಟಿಚ್ಛಾದೀ, ತಿಸ್ಸೋ ಜನ್ತಾಘರಾದಿಕಾ;

ವುತ್ತಾ, ವತ್ಥಪಟಿಚ್ಛಾದೀ, ಸಬ್ಬತ್ಥ ಪನ ವಟ್ಟತಿ.

೨೮೦೯. ಯತ್ಥ ಕತ್ಥಚಿ ಪೇಳಾಯಂ, ಭುಞ್ಜಿತುಂ ನ ಚ ವಟ್ಟತಿ;

ಏಕತೋ ಭುಞ್ಜತೋ ಹೋತಿ, ದುಕ್ಕಟಂ ಏಕಭಾಜನೇ.

೨೮೧೦. ಏಕಪಾವುರಣಾ ಏಕ-ತ್ಥರಣಾ ವಾ ನಿಪಜ್ಜರೇ;

ಏಕಮಞ್ಚೇಪಿ ವಾ ತೇಸಂ, ಹೋತಿ ಆಪತ್ತಿ ದುಕ್ಕಟಂ.

೨೮೧೧. ನ ನಿಸೀದೇಯ್ಯ ಸಙ್ಘಾಟಿ-ಪಲ್ಲತ್ಥಿಕಮುಪಾಗತೋ;

ಕಿಞ್ಚಿ ಕೀಳಂ ನ ಕೀಳೇಯ್ಯ, ಪಲಿತಂ ನ ಚ ಗಾಹಯೇ.

೨೮೧೨. ಭಮುಕಾಯ ನಲಾಟೇ ವಾ, ದಾಠಿಕಾಯಪಿ ಉಗ್ಗತಂ;

ತಾದಿಸಂ ಪಲಿತಂ ಚಞ್ಞಂ, ಗಾಹಾಪೇತುಮ್ಪಿ ವಟ್ಟತಿ.

೨೮೧೩. ಅಗಿಲಾನೋ ಸಚೇ ಭಿಕ್ಖು, ಛತ್ತಂ ಧಾರೇಯ್ಯ ದುಕ್ಕಟಂ;

ಅತ್ತನೋ ಚೀವರಾದೀನಂ, ಗುತ್ತತ್ಥಂ ಪನ ವಟ್ಟತಿ.

೨೮೧೪. ಹತ್ಥಿಸೋಣ್ಡಂ ಚತುಕ್ಕಣ್ಣಂ, ವಸನಂ ಮಚ್ಛವಾಳಕಂ;

ವೇಲ್ಲಿಯಂ ತಾಲವಣ್ಟಞ್ಚ, ನಿವಾಸೇನ್ತಸ್ಸ ದುಕ್ಕಟಂ.

೨೮೧೫. ಗಹಿಪಾರುಪನಂ ವಾಪಿ, ಪಾರುಪನ್ತಸ್ಸ ದುಕ್ಕಟಂ;

ನಿವಾಸನೇ ಪಾರುಪನೇ, ಪರಿಮಣ್ಡಲತಾ ಮತಾ.

೨೮೧೬. ಲೋಕಾಯತಂ ನ ವಾಚೇಯ್ಯ, ನ ಚ ತಂ ಪರಿಯಾಪುಣೇ;

ನ ತಿರಚ್ಛಾನವಿಜ್ಜಾ ವಾ, ವಾಚೇತಬ್ಬಾವ ಭಿಕ್ಖುನಾ.

೨೮೧೭. ನ ಚ ವಟ್ಟತಿ ಧಾರೇತುಂ, ಸಬ್ಬಾ ಚಾಮರಿಬೀಜನೀ;

ನ ಚಾಲಿಮ್ಪೇಯ್ಯ ದಾಯಂ ವಾ, ನ ಚ ಲಞ್ಜೇ ಮುಖಮ್ಪಿ ಚ.

೨೮೧೮. ನ ವಹೇ ಉಭತೋಕಾಜಂ, ವಟ್ಟತನ್ತರಕಾಜಕಂ;

ಸೀಸಕ್ಖನ್ಧಕಟೋಲಮ್ಬ-ಭಾರೇ ದೋಸೋ ನ ವಿಜ್ಜತಿ.

೨೮೧೯. ಅಟ್ಠಙ್ಗುಲಾದಿಕಂ ಭಿಕ್ಖು, ಪಚ್ಛಿಮಂ ಚತುರಙ್ಗುಲಾ;

ಖಾದತೋ ದನ್ತಕಟ್ಠಞ್ಚ, ಹೋತಿ ಆಪತ್ತಿ ದುಕ್ಕಟಂ.