ಸಙ್ಘಾದಿಸೇಸಕಥಾ

೩೨೫. ಮೋಚೇತುಕಾಮತಾಚಿತ್ತಂ, ವಾಯಾಮೋ ಸುಕ್ಕಮೋಚನಂ;

ಅಞ್ಞತ್ರ ಸುಪಿನನ್ತೇನ, ಹೋತಿ ಸಙ್ಘಾದಿಸೇಸತಾ.

೩೨೬. ಪರೇನುಪಕ್ಕಮಾಪೇತ್ವಾ, ಅಙ್ಗಜಾತಂ ಪನತ್ತನೋ;

ಸುಕ್ಕಂ ಯದಿ ವಿಮೋಚೇತಿ, ಗರುಕಂ ತಸ್ಸ ನಿದ್ದಿಸೇ.

೩೨೭. ಸಞ್ಚಿಚ್ಚುಪಕ್ಕಮನ್ತಸ್ಸ, ಅಙ್ಗಜಾತಂ ಪನತ್ತನೋ;

ಥುಲ್ಲಚ್ಚಯಂ ಸಮುದ್ದಿಟ್ಠಂ, ಸಚೇ ಸುಕ್ಕಂ ನ ಮುಚ್ಚತಿ.

೩೨೮. ಸಞ್ಚಿಚ್ಚುಪಕ್ಕಮನ್ತಸ್ಸ, ಆಕಾಸೇ ಕಮ್ಪನೇನಪಿ;

ಹೋತಿ ಥುಲ್ಲಚ್ಚಯಂ ತಸ್ಸ, ಯದಿ ಸುಕ್ಕಂ ನ ಮುಚ್ಚತಿ.

೩೨೯. ವತ್ಥಿಂ ಕೀಳಾಯ ಪೂರೇತ್ವಾ, ಪಸ್ಸಾವೇತುಂ ನ ವಟ್ಟತಿ;

ನಿಮಿತ್ತಂ ಪನ ಹತ್ಥೇನ, ಕೀಳಾಪೇನ್ತಸ್ಸ ದುಕ್ಕಟಂ.

೩೩೦. ತಿಸ್ಸನ್ನಂ ಪನ ಇತ್ಥೀನಂ, ನಿಮಿತ್ತಂ ರತ್ತಚೇತಸಾ;

ಪುರತೋ ಪಚ್ಛತೋ ವಾಪಿ, ಓಲೋಕೇನ್ತಸ್ಸ ದುಕ್ಕಟಂ.

೩೩೧. ಏಕೇನೇಕಂ ಪಯೋಗೇನ, ದಿವಸಮ್ಪಿ ಚ ಪಸ್ಸತೋ;

ನಾಪತ್ತಿಯಾ ಭವೇ ಅಙ್ಗಂ, ಉಮ್ಮೀಲನನಿಮೀಲನಂ.

೩೩೨. ಅಮೋಚನಾಧಿಪ್ಪಾಯಸ್ಸ, ಅನುಪಕ್ಕಮತೋಪಿ ಚ;

ಸುಪಿನನ್ತೇನ ಮುತ್ತಸ್ಮಿಂ, ಅನಾಪತ್ತಿ ಪಕಾಸಿತಾ.

ಸುಕ್ಕವಿಸಟ್ಠಿಕಥಾ.

೩೩೩. ಆಮಸನ್ತೋ ಮನುಸ್ಸಿತ್ಥಿಂ, ಕಾಯಸಂಸಗ್ಗರಾಗತೋ;

‘‘ಮನುಸ್ಸಿತ್ಥೀ’’ತಿ ಸಞ್ಞಾಯ, ಹೋತಿ ಸಙ್ಘಾದಿಸೇಸಿಕೋ.

೩೩೪. ಲೋಮೇನನ್ತಮಸೋ ಲೋಮಂ, ಫುಸನ್ತಸ್ಸಾಪಿ ಇತ್ಥಿಯಾ;

ಕಾಯಸಂಸಗ್ಗರಾಗೇನ, ಹೋತಿ ಆಪತ್ತಿ ಭಿಕ್ಖುನೋ.

೩೩೫. ಇತ್ಥಿಯಾ ಯದಿ ಸಮ್ಫುಟ್ಠೋ, ಫಸ್ಸಂ ಸೇವನಚೇತನೋ;

ವಾಯಮಿತ್ವಾಧಿವಾಸೇತಿ, ಹೋತಿ ಸಙ್ಘಾದಿಸೇಸತಾ.

೩೩೬. ಏಕೇನ ಪನ ಹತ್ಥೇನ, ಗಹೇತ್ವಾ ದುತಿಯೇನ ವಾ;

ತತ್ಥ ತತ್ಥ ಫುಸನ್ತಸ್ಸ, ಏಕಾವಾಪತ್ತಿ ದೀಪಿತಾ.

೩೩೭. ಅಗ್ಗಹೇತ್ವಾ ಫುಸನ್ತಸ್ಸ, ಯಾವ ಪಾದಞ್ಚ ಸೀಸತೋ;

ಕಾಯಾ ಹತ್ಥಮಮೋಚೇತ್ವಾ, ಏಕಾವ ದಿವಸಮ್ಪಿ ಚ.

೩೩೮. ಅಙ್ಗುಲೀನಂ ತು ಪಞ್ಚನ್ನಂ, ಗಹಣೇ ಏಕತೋ ಪನ;

ಏಕಾಯೇವ ಸಿಯಾಪತ್ತಿ, ನ ಹಿ ಕೋಟ್ಠಾಸತೋ ಸಿಯಾ.

೩೩೯. ನಾನಿತ್ಥೀನಂ ಸಚೇ ಪಞ್ಚ, ಗಣ್ಹಾತ್ಯಙ್ಗುಲಿಯೋ ಪನ;

ಏಕತೋ ಪಞ್ಚ ಸಙ್ಘಾದಿ-ಸೇಸಾ ಹೋನ್ತಿಸ್ಸ ಭಿಕ್ಖುನೋ.

೩೪೦. ಇತ್ಥಿಯಾ ವಿಮತಿಸ್ಸಾಪಿ, ಪಣ್ಡಕಾದಿಕಸಞ್ಞಿನೋ;

ಕಾಯೇನ ಇತ್ಥಿಯಾ ಕಾಯ-ಸಮ್ಬದ್ಧಂ ಫುಸತೋಪಿ ವಾ.

೩೪೧. ಪಣ್ಡಕೇ ಯಕ್ಖಿಪೇತೀಸು, ತಸ್ಸ ಥುಲ್ಲಚ್ಚಯಂ ಸಿಯಾ;

ದುಕ್ಕಟಂ ಕಾಯಸಂಸಗ್ಗೇ, ತಿರಚ್ಛಾನಗತಿತ್ಥಿಯಾ.

೩೪೨. ಭಿಕ್ಖುನೋ ಪಟಿಬದ್ಧೇನ, ಕಾಯೇನ ಪನ ಇತ್ಥಿಯಾ;

ಕಾಯೇನ ಪಟಿಬದ್ಧಞ್ಚ, ಫುಸನ್ತಸ್ಸಪಿ ದುಕ್ಕಟಂ.

೩೪೩. ಇತ್ಥೀನಂ ಇತ್ಥಿರೂಪಞ್ಚ, ದಾರುಲೋಹಮಯಾದಿಕಂ;

ತಾಸಂ ವತ್ಥಮಲಙ್ಕಾರಂ, ಆಮಸನ್ತಸ್ಸ ದುಕ್ಕಟಂ.

೩೪೪. ತತ್ಥಜಾತಫಲಂ ಖಜ್ಜಂ, ಮುಗ್ಗಾದಿಂ ತತ್ಥಜಾತಕಂ;

ಧಞ್ಞಾನಿ ಪನ ಸಬ್ಬಾನಿ, ಆಮಸನ್ತಸ್ಸ ದುಕ್ಕಟಂ.

೩೪೫. ಸಬ್ಬಂ ಧಮನಸಙ್ಖಾದಿಂ, ಪಞ್ಚಙ್ಗತುರಿಯಮ್ಪಿ ಚ;

ರತನಾನಿ ಚ ಸಬ್ಬಾನಿ, ಆಮಸನ್ತಸ್ಸ ದುಕ್ಕಟಂ.

೩೪೬. ಸಬ್ಬಮಾವುಧಭಣ್ಡಞ್ಚ, ಜಿಯಾ ಚ ಧನುದಣ್ಡಕೋ;

ಅನಾಮಾಸಮಿದಂ ಸಬ್ಬಂ, ಜಾಲಞ್ಚ ಸರವಾರಣಂ.

೩೪೭. ಸುವಣ್ಣಪಟಿಬಿಮ್ಬಾದಿ, ಚೇತಿಯಂ ಆರಕೂಟಕಂ;

ಅನಾಮಾಸನ್ತಿ ನಿದ್ದಿಟ್ಠಂ, ಕುರುನ್ದಟ್ಠಕಥಾಯ ಹಿ.

೩೪೮. ಸಬ್ಬಂ ಓನಹಿತುಂ ವಾಪಿ, ಓನಹಾಪೇತುಮೇವ ವಾ;

ವಾದಾಪೇತುಞ್ಚ ವಾದೇತುಂ, ವಾದಿತಂ ನ ಚ ವಟ್ಟತಿ.

೩೪೯. ‘‘ಕರಿಸ್ಸಾಮುಪಹಾರ’’ನ್ತಿ, ವುತ್ತೇನ ಪನ ಭಿಕ್ಖುನಾ;

ಪೂಜಾ ಬುದ್ಧಸ್ಸ ಕಾತಬ್ಬಾ, ವತ್ತಬ್ಬಾತಿ ಚ ವಿಞ್ಞುನಾ.

೩೫೦. ಸಯಂ ಫುಸಿಯಮಾನಸ್ಸ, ಇತ್ಥಿಯಾ ಪನ ಧುತ್ತಿಯಾ;

ಅವಾಯಮಿತ್ವಾ ಕಾಯೇನ, ಫಸ್ಸಂ ಪಟಿವಿಜಾನತೋ.

೩೫೧. ಅನಾಪತ್ತಿ ಅಸಞ್ಚಿಚ್ಚ, ಅಜಾನನ್ತಸ್ಸ ಭಿಕ್ಖುನೋ;

ಮೋಕ್ಖಾಧಿಪ್ಪಾಯಿನೋ ಚೇವ, ತಥಾ ಉಮ್ಮತ್ತಕಾದಿನೋ.

೩೫೨. ಪಠಮೇನ ಸಮಾನಾವ, ಸಮುಟ್ಠಾನಾದಯೋ ಪನ;

ಕಾಯಸಂಸಗ್ಗರಾಗಸ್ಸ, ತಥಾ ಸುಕ್ಕವಿಸಟ್ಠಿಯಾ.

ಕಾಯಸಂಸಗ್ಗಕಥಾ.

೩೫೩. ದುಟ್ಠುಲ್ಲವಾಚಸ್ಸಾದೇನ, ಇತ್ಥಿಯಾ ಇತ್ಥಿಸಞ್ಞಿನೋ;

ದ್ವಿನ್ನಞ್ಚ ಪನ ಮಗ್ಗಾನಂ, ವಣ್ಣಾವಣ್ಣವಸೇನ ಚ.

೩೫೪. ಮೇಥುನಯಾಚನಾದೀಹಿ, ಓಭಾಸನ್ತಸ್ಸ ಭಿಕ್ಖುನೋ;

ವಿಞ್ಞುಂ ಅನ್ತಮಸೋ ಹತ್ಥ-ಮುದ್ದಾಯಪಿ ಗರುಂ ಸಿಯಾ.

೩೫೫. ‘‘ಸಿಖರಣೀಸಿ, ಸಮ್ಭಿನ್ನಾ, ಉಭತೋಬ್ಯಞ್ಜನಾ’’ತಿ ಚ;

ಅಕ್ಕೋಸವಚನೇನಾಪಿ, ಗರುಕಂ ತು ಸುಣನ್ತಿಯಾ.

೩೫೬. ಪುನಪ್ಪುನೋಭಾಸನ್ತಸ್ಸ, ಏಕವಾಚಾಯ ವಾ ಬಹೂ;

ಗಣನಾಯ ಚ ವಾಚಾನಂ, ಇತ್ಥೀನಂ ಗರುಕಾ ಸಿಯುಂ.

೩೫೭. ಸಾ ಚೇ ನಪ್ಪಟಿಜಾನಾತಿ, ತಸ್ಸ ಥುಲ್ಲಚ್ಚಯಂ ಸಿಯಾ;

ಆದಿಸ್ಸ ಭಣನೇ ಚಾಪಿ, ಉಬ್ಭಜಾಣುಮಧಕ್ಖಕಂ.

೩೫೮. ಉಬ್ಭಕ್ಖಕಮಧೋಜಾಣು-ಮಣ್ಡಲಂ ಪನ ಉದ್ದಿಸಂ;

ವಣ್ಣಾದಿಭಣನೇ ಕಾಯ-ಪಟಿಬದ್ಧೇ ಚ ದುಕ್ಕಟಂ.

೩೫೯. ಥುಲ್ಲಚ್ಚಯಂ ಭವೇ ತಸ್ಸ, ಪಣ್ಡಕೇ ಯಕ್ಖಿಪೇತಿಸು;

ಅಧಕ್ಖಕೋಬ್ಭಜಾಣುಮ್ಹಿ, ದುಕ್ಕಟಂ ಪಣ್ಡಕಾದಿಸು.

೩೬೦. ಉಬ್ಭಕ್ಖಕಮಧೋಜಾಣು-ಮಣ್ಡಲೇಪಿ ಅಯಂ ನಯೋ;

ಸಬ್ಬತ್ಥ ದುಕ್ಕಟಂ ವುತ್ತಂ, ತಿರಚ್ಛಾನಗತಿತ್ಥಿಯಾ.

೩೬೧. ಅತ್ಥಧಮ್ಮಪುರೇಕ್ಖಾರಂ, ಕತ್ವಾ ಓಭಾಸತೋಪಿ ಚ;

ವದತೋಪಿ ಅನಾಪತ್ತಿ, ಪುರಕ್ಖತ್ವಾನುಸಾಸನಿಂ.

೩೬೨. ತಥಾ ಉಮ್ಮತ್ತಕಾದೀನಂ, ಸಮುಟ್ಠಾನಾದಯೋ ನಯಾ;

ಅದಿನ್ನಾದಾನತುಲ್ಯಾವ, ವೇದನೇತ್ಥ ದ್ವಿಧಾ ಮತಾ.

ದುಟ್ಠುಲ್ಲವಾಚಾಕಥಾ.

೩೬೩. ವಣ್ಣಂ ಪನತ್ತನೋ ಕಾಮ-ಪಾರಿಚರಿಯಾಯ ಭಾಸತೋ;

ತಸ್ಮಿಂಯೇವ ಖಣೇ ಸಾ ಚೇ, ಜಾನಾತಿ ಗರುಕಂ ಸಿಯಾ.

೩೬೪. ನೋ ಚೇ ಜಾನಾತಿ ಸಾ ಯಕ್ಖಿ-ಪೇತಿದೇವೀಸು ಪಣ್ಡಕೇ;

ಹೋತಿ ಥುಲ್ಲಚ್ಚಯಂ ತಸ್ಸ, ಸೇಸೇ ಆಪತ್ತಿ ದುಕ್ಕಟಂ.

೩೬೫. ಚೀವರಾದೀಹಿ ಅಞ್ಞೇಹಿ, ವತ್ಥುಕಾಮೇಹಿ ಅತ್ತನೋ;

ನತ್ಥಿ ದೋಸೋ ಭಣನ್ತಸ್ಸ, ಪಾರಿಚರಿಯಾಯ ವಣ್ಣನಂ.

೩೬೬. ಇತ್ಥಿಸಞ್ಞಾ ಮನುಸ್ಸಿತ್ಥೀ, ಪಾರಿಚರಿಯಾಯ ರಾಗಿತಾ;

ಓಭಾಸೋ ತೇನ ರಾಗೇನ, ಖಣೇ ತಸ್ಮಿಂ ವಿಜಾನನಂ.

೩೬೭. ಪಞ್ಚಙ್ಗಾನಿ ಇಮಾನೇತ್ಥ, ವೇದಿತಬ್ಬಾನಿ ವಿಞ್ಞುನಾ;

ಸಮುಟ್ಠಾನಾದಯೋಪ್ಯಸ್ಸ, ಅನನ್ತರಸಮಾ ಮತಾ.

ಅತ್ತಕಾಮಪಾರಿಚರಿಯಕಥಾ.

೩೬೮. ಪಟಿಗ್ಗಣ್ಹಾತಿ ಸನ್ದೇಸಂ, ಪುರಿಸಸ್ಸಿತ್ಥಿಯಾಪಿ ವಾ;

ವೀಮಂಸತಿ ಗರು ಹೋತಿ, ಪಚ್ಚಾಹರತಿ ಚೇ ಪನ.

೩೬೯. ‘‘ಯಸ್ಸಾ ಹಿ ಸನ್ತಿಕಂ ಗನ್ತ್ವಾ, ಆರೋಚೇಹೀ’’ತಿ ಪೇಸಿತೋ;

ತಮದಿಸ್ವಾ ತದಞ್ಞಸ್ಸ, ಅವಸ್ಸಾರೋಚಕಸ್ಸ ಸೋ.

೩೭೦. ‘‘ಆರೋಚೇಹೀ’’ತಿ ವತ್ವಾ ತಂ, ಪಚ್ಚಾಹರತಿ ಚೇ ಪನ;

ಭಿಕ್ಖು ಸಙ್ಘಾದಿಸೇಸಮ್ಹಾ, ಸಞ್ಚರಿತ್ತಾ ನ ಮುಚ್ಚತಿ.

೩೭೧. ‘‘ಮಾತರಾ ರಕ್ಖಿತಂ ಇತ್ಥಿಂ, ಗಚ್ಛ ಬ್ರೂಹೀ’’ತಿ ಪೇಸಿತೋ;

ಪಿತುರಕ್ಖಿತಮಞ್ಞಂ ವಾ, ವಿಸಙ್ಕೇತೋವ ಭಾಸತೋ.

೩೭೨. ಪಟಿಗ್ಗಣ್ಹನತಾದೀಹಿ, ತೀಹಿ ಅಙ್ಗೇಹಿ ಸಂಯುತೇ;

ಸಞ್ಚರಿತ್ತೇ ಸಮಾಪನ್ನೇ, ಗರುಕಾಪತ್ತಿಮಾದಿಸೇ.

೩೭೩. ದ್ವೀಹಿ ಥುಲ್ಲಚ್ಚಯಂ ವುತ್ತಂ, ಪಣ್ಡಕಾದೀಸು ತೀಹಿಪಿ;

ಏಕೇನೇವ ಚ ಸಬ್ಬತ್ಥ, ಹೋತಿ ಆಪತ್ತಿ ದುಕ್ಕಟಂ.

೩೭೪. ಚೇತಿಯಸ್ಸ ಚ ಸಙ್ಘಸ್ಸ, ಗಿಲಾನಸ್ಸ ಚ ಭಿಕ್ಖುನೋ;

ಗಚ್ಛತೋ ಪನ ಕಿಚ್ಚೇನ, ಅನಾಪತ್ತಿ ಪಕಾಸಿತಾ.

೩೭೫. ಮನುಸ್ಸತ್ತಂ ತಥಾ ತಸ್ಸಾ, ನನಾಲಂವಚನೀಯತಾ;

ಪಟಿಗ್ಗಣ್ಹನತಾದೀನಂ, ವಸಾ ಪಞ್ಚಙ್ಗಿಕಂ ಮತಂ.

೩೭೬. ಇದಞ್ಹಿ ಛಸಮುಟ್ಠಾನಂ, ಅಚಿತ್ತಕಮುದೀರಿತಂ;

ಅಲಂವಚನೀಯತ್ತಂ ವಾ, ಪಣ್ಣತ್ತಿಂ ವಾ ಅಜಾನತೋ.

೩೭೭. ಗಹೇತ್ವಾ ಸಾಸನಂ ಕಾಯ-ವಿಕಾರೇನೂಪಗಮ್ಮ ತಂ;

ವೀಮಂಸಿತ್ವಾ ಹರನ್ತಸ್ಸ, ಗರುಕಂ ಕಾಯತೋ ಸಿಯಾ.

೩೭೮. ಸುತ್ವಾ ಯಥಾನಿಸಿನ್ನೋವ, ವಚನಂ ಇತ್ಥಿಯಾ ಪುನ;

ತಂ ತತ್ಥೇವಾಗತಸ್ಸೇವ, ಆರೋಚೇನ್ತಸ್ಸ ವಾಚತೋ.

೩೭೯. ಅಜಾನನ್ತಸ್ಸ ಪಣ್ಣತ್ತಿಂ, ಕಾಯವಾಚಾಹಿ ತಂ ವಿಧಿಂ;

ಕರೋತೋ ಹರತೋ ವಾಪಿ, ಗರುಕಂ ಕಾಯವಾಚತೋ.

೩೮೦. ಜಾನಿತ್ವಾಪಿ ಕರೋನ್ತಸ್ಸ, ಗರುಕಾಪತ್ತಿಯೋ ತಥಾ;

ಸಚಿತ್ತಕೇಹಿ ತೀಹೇವ, ಸಮುಟ್ಠಾನೇಹಿ ಜಾಯರೇ.

ಸಞ್ಚರಿತ್ತಕಥಾ.

೩೮೧. ಸಯಂಯಾಚಿತಕೇಹೇವ, ಕುಟಿಕಂ ಅಪ್ಪಮಾಣಿಕಂ;

ಅತ್ತುದ್ದೇಸಂ ಕರೋನ್ತಸ್ಸ, ತಥಾದೇಸಿತವತ್ಥುಕಂ.

೩೮೨. ಹೋನ್ತಿ ಸಙ್ಘಾದಿಸೇಸಾ ದ್ವೇ, ಸಾರಮ್ಭಾದೀಸು ದುಕ್ಕಟಂ;

ಸಚೇ ಏಕವಿಪನ್ನಾ ಸಾ, ಗರುಕಂ ಏಕಕಂ ಸಿಯಾ.

೩೮೩. ಪುರಿಸಂ ಯಾಚಿತುಂ ಕಮ್ಮ-ಸಹಾಯತ್ಥಾಯ ವಟ್ಟತಿ;

ಮೂಲಚ್ಛೇಜ್ಜವಸೇನೇವ, ಯಾಚಮಾನಸ್ಸ ದುಕ್ಕಟಂ.

೩೮೪. ಅವಜ್ಜಂ ಹತ್ಥಕಮ್ಮಮ್ಪಿ, ಯಾಚಿತುಂ ಪನ ವಟ್ಟತಿ;

ಹತ್ಥಕಮ್ಮಮ್ಪಿ ನಾಮೇತಂ, ಕಿಞ್ಚಿ ವತ್ಥು ನ ಹೋತಿ ಹಿ.

೩೮೫. ಗೋಣಮಾಯಾಚಮಾನಸ್ಸ, ಠಪೇತ್ವಾ ಞಾತಕಾದಿಕೇ;

ದುಕ್ಕಟಂ ತಸ್ಸ ನಿದ್ದಿಟ್ಠಂ, ಮೂಲಚ್ಛೇಜ್ಜೇನ ತೇಸುಪಿ.

೩೮೬. ‘‘ಗೋಣಂ ದೇಮಾ’’ತಿ ವುತ್ತೇಪಿ, ಗಹೇತುಂ ನ ಚ ವಟ್ಟತಿ;

ಸಕಟಂ ದಾರುಭಣ್ಡತ್ತಾ, ಗಹೇತುಂ ಪನ ವಟ್ಟತಿ.

೩೮೭. ವಾಸಿಫರಸುಕುದ್ದಾಲ-ಕುಠಾರಾದೀಸ್ವಯಂ ನಯೋ;

ಅನಜ್ಝಾವುತ್ಥಕಂ ಸಬ್ಬಂ, ಹರಾಪೇತುಮ್ಪಿ ವಟ್ಟತಿ.

೩೮೮. ವಲ್ಲಿಆದಿಮ್ಹಿ ಸಬ್ಬಸ್ಮಿಂ, ಗರುಭಣ್ಡಪ್ಪಹೋನಕೇ;

ಪರೇಸಂ ಸನ್ತಕೇಯೇವ, ಹೋತಿ ಆಪತ್ತಿ ದುಕ್ಕಟಂ.

೩೮೯. ಪಚ್ಚಯೇಸು ಹಿ ತೀಸ್ವೇವ, ವಿಞ್ಞತ್ತಿ ನ ಚ ವಟ್ಟತಿ;

ತತಿಯೇ ಪರಿಕಥೋಭಾಸ-ನಿಮಿತ್ತಾನಿ ಚ ಲಬ್ಭರೇ.

೩೯೦. ‘‘ಅದೇಸಿತೇ ಚ ವತ್ಥುಸ್ಮಿಂ, ಪಮಾಣೇನಾಧಿಕಂ ಕುಟಿಂ;

ಕರಿಸ್ಸಾಮೀ’’ತಿ ಚಿನ್ತೇತ್ವಾ, ಅರಞ್ಞಂ ಗಚ್ಛತೋಪಿ ಚ.

೩೯೧. ಫರಸುಂ ವಾಪಿ ವಾಸಿಂ ವಾ, ನಿಸೇನ್ತಸ್ಸಾಪಿ ದುಕ್ಕಟಂ;

ಛಿನ್ದತೋ ದುಕ್ಕಟಂ ರುಕ್ಖಂ, ತಸ್ಸ ಪಾಚಿತ್ತಿಯಾ ಸಹ.

೩೯೨. ಏವಂ ಪುಬ್ಬಪಯೋಗಸ್ಮಿಂ, ಕುಟಿಕಾರಕಭಿಕ್ಖುನೋ;

ಯಥಾಪಯೋಗಮಾಪತ್ತಿಂ, ವಿನಯಞ್ಞೂ ವಿನಿದ್ದಿಸೇ.

೩೯೩. ಯಾ ಪನ ದ್ವೀಹಿ ಪಿಣ್ಡೇಹಿ, ನಿಟ್ಠಾನಂ ತು ಗಮಿಸ್ಸತಿ;

ಹೋತಿ ಥುಲ್ಲಚ್ಚಯಂ ತೇಸು, ಪಠಮೇ ದುತಿಯೇ ಗರು.

೩೯೪. ಅನಾಪತ್ತಿ ಸಚಞ್ಞಸ್ಸ, ದೇತಿ ವಿಪ್ಪಕತಂ ಕುಟಿಂ;

ತಥಾ ಭೂಮಿಂ ಸಮಂ ಕತ್ವಾ, ಭಿನ್ದತೋಪಿ ಚ ತಂ ಕುಟಿಂ.

೩೯೫. ಗುಹಂ ಲೇಣಂ ಕರೋನ್ತಸ್ಸ, ತಿಣಪಣ್ಣಚ್ಛದಮ್ಪಿ ವಾ;

ವಾಸಾಗಾರಂ ಠಪೇತ್ವಾನ, ಅಞ್ಞಸ್ಸತ್ಥಾಯ ವಾ ತಥಾ.

೩೯೬. ದೇಸಾಪೇತ್ವಾವ ಭಿಕ್ಖೂಹಿ, ವತ್ಥುಂ ಪನ ಚ ಭಿಕ್ಖುನೋ;

ಕ್ರಿಯತೋವ ಸಮುಟ್ಠಾತಿ, ಕರೋತೋ ಅಪ್ಪಮಾಣಿಕಂ.