೪. ಚತುತ್ಥಸಙ್ಘಾದಿಸೇಸಸಿಕ್ಖಾಪದವಣ್ಣನಾ

೬೯೪. ಚತುತ್ಥೇ ಕಾರಕಗಣಸ್ಸಾತಿ ಇಮಸ್ಸ ಕಮ್ಮಂ ಕಾತಬ್ಬನ್ತಿ ಯೇಹಿ ಸನ್ನಿಟ್ಠಾನಂ ಕತಂ, ತೇ ಸನ್ಧಾಯ ವುತ್ತಂ. ಕಮ್ಮವಾಚಕ್ಖಣೇ ಸಹಠಿತೇತಿ ಕೇಚಿ. ನೇತ್ಥಾರವತ್ತೇತಿ ನಿತ್ಥರಣಹೇತುಮ್ಹಿ ವತ್ತೇ.

೬೯೮. ಪಾಳಿಯಂ ಅಸನ್ತೇ ಕಾರಕಸಙ್ಘೇತಿ ಏತ್ಥ ವಿಜ್ಜಮಾನಂ ಸುದೂರಮ್ಪಿ ಗನ್ತ್ವಾ ಆಪುಚ್ಛಿತಬ್ಬಂ. ಅನ್ತರಾಯೇ ಪನ ಸತಿ ಸಮ್ಮಾ ವತ್ತನ್ತಂ ಓಸಾರೇತುಂ ವಟ್ಟತೀತಿ. ಧಮ್ಮಕಮ್ಮೇನ ಉಕ್ಖಿತ್ತತಾ, ಅನನುಞ್ಞಾತಕಾರಣಾ ಓಸಾರಣನ್ತಿ ದ್ವೇ ಅಙ್ಗಾನಿ.

ಚತುತ್ಥಸಙ್ಘಾದಿಸೇಸಸಿಕ್ಖಾಪದವಣ್ಣನಾ ನಿಟ್ಠಿತಾ.