೨. ದುತಿಯಸಙ್ಘಾದಿಸೇಸಸಿಕ್ಖಾಪದವಣ್ಣನಾ

೬೮೩. ಪಾಳಿಯಂ ದುತಿಯೇ ಮಲ್ಲಗಣಭಟಿಪುತ್ತಗಣಾದಿಕನ್ತಿಆದೀಸು ಮಲ್ಲರಾಜೂನಂ ಗಣೋ ಮಲ್ಲಗಣೋ. ಭಟಿಪುತ್ತಾ ನಾಮ ಕೇಚಿ ಗಣರಾಜಾನೋ, ತೇಸಂ ಗಣೋ. ಕೇಚಿ ಪನ ‘‘ನಾರಾಯನಭತ್ತಿಕೋ ಪುಞ್ಞಕಾರಗಣೋ ಮಲ್ಲಗಣೋ. ತಥಾ ಕುಮಾರಭತ್ತಿಕೋ ಚ ಗಣೋ ಭಟಿಪುತ್ತಗಣೋ’’ತಿಪಿ (ಸಾರತ್ಥ. ಟೀ. ಸಂಘಾದಿಸೇಸಕಣ್ಡ ೩.೬೮೩) ವದನ್ತಿ. ಧಮ್ಮಗಣೋತಿ ಸಾಸನೇ, ಲೋಕೇ ವಾ ಅನೇಕಪ್ಪಕಾರಪುಞ್ಞಕಾರಕೋ ಗಣೋ. ಗನ್ಧವಿಕತಿಕಾರಕೋ ಗಣೋ ಗನ್ಧಿಕಸೇಣೀ. ಪೇಸಕಾರಾದಿಗಣೋ ದುಸ್ಸಿಕಸೇಣೀ. ಕಪ್ಪಗತಿಕನ್ತಿ ಕಪ್ಪಿಯಭಾವಗತಂ, ಪಬ್ಬಜಿತಪುಬ್ಬನ್ತಿ ಅತ್ಥೋ.

೬೮೫. ಪಾಳಿಯಂ ವುಟ್ಠಾಪೇತೀತಿ ಉಪಸಮ್ಪಾದೇತಿ. ಅಕಪ್ಪಗತಮ್ಪಿ ಪಬ್ಬಾಜೇನ್ತಿಯಾ ದುಕ್ಕಟನ್ತಿ ವದನ್ತಿ. ಖೀಣಾಸವಾಯಪಿ ಆಪಜ್ಜಿತಬ್ಬತೋ ‘‘ತಿಚಿತ್ತ’’ನ್ತಿ ವುತ್ತಂ. ಚೋರಿತಾ, ತಂ ಞತ್ವಾ ಅನನುಞ್ಞಾತಕಾರಣಾ ವುಟ್ಠಾಪನನ್ತಿ ದ್ವೇ ಅಙ್ಗಾನಿ.

ದುತಿಯಸಙ್ಘಾದಿಸೇಸಸಿಕ್ಖಾಪದವಣ್ಣನಾ ನಿಟ್ಠಿತಾ.