೫. ಅಚೇಲಕವಗ್ಗೋ

೧. ಅಚೇಲಕಸಿಕ್ಖಾಪದವಣ್ಣನಾ

೨೭೩. ಪಞ್ಚಮವಗ್ಗಸ್ಸ ಪಠಮೇ ಮಯ್ಹಂ ನಾಮಾತಿ ಭಿಕ್ಖುನಾ ಭೂಮಿಯಂ ಠಪೇತ್ವಾ ದಿನ್ನಮ್ಪಿ ಸನ್ಧಾಯ ವದತಿ. ಅಞ್ಞತಿತ್ಥಿಯತಾ, ಅನನುಞ್ಞಾತತಾ, ಅಜ್ಝೋಹರಣೀಯತಾ, ಅಜ್ಝೋಹರಣತ್ಥಾಯ ಸಹತ್ಥಾ ಅನಿಕ್ಖಿತ್ತಭಾಜನೇ ದಾನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ.

ಅಚೇಲಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ಉಯ್ಯೋಜನಸಿಕ್ಖಾಪದವಣ್ಣನಾ

೨೭೪. ದುತಿಯೇ ಅನಾಚಾರಂ ಆಚರಿತುಕಾಮತಾ, ತದತ್ಥಮೇವ ಉಪಸಮ್ಪನ್ನಸ್ಸ ಉಯ್ಯೋಜನಾ, ತಸ್ಸ ಉಪಚಾರಾತಿಕ್ಕಮೋತಿ ಇಮಾನೇತ್ಥ ತೀಣಿ ಅಙ್ಗಾನಿ.

ಉಯ್ಯೋಜನಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಸಭೋಜನಸಿಕ್ಖಾಪದವಣ್ಣನಾ

೨೮೧. ತತಿಯೇ ಪಾಳಿಯಂ ಖುದ್ದಕೇ ಘರೇತಿ ಏತ್ಥ ಖುದ್ದಕಂ ಘರಂ ನಾಮ ಪಞ್ಚಹತ್ಥತೋ ಊನಕವಿತ್ಥಾರಂ ಅಧಿಪ್ಪೇತಂ. ತತ್ಥ ಚ ಪಿಟ್ಠಸಙ್ಘಾಟತೋ ಹತ್ಥಪಾಸೇ ಅವಿಜಹಿತೇಪಿ ಪಿಟ್ಠಿವಂಸಾತಿಕ್ಕಮೋ ಹೋತೀತಿ ಆಹ ‘‘ಪಿಟ್ಠಿವಂಸಂ ಅತಿಕ್ಕಮಿತ್ವಾ’’ತಿ. ಯಥಾ ತಥಾ ವಾ ಕತಸ್ಸಾತಿ ಪಿಟ್ಠಿವಂಸಂ ಆರೋಪೇತ್ವಾ ವಾ ಅನಾರೋಪೇತ್ವಾ ವಾ ಕತಸ್ಸ.

೨೮೩. ಪಾಳಿಯಂ ವೀತರಾಗಾತಿ ಅಪರಿಯುಟ್ಠಿತರಾಗಾನಂ, ಅನಾಗಾಮೀನಞ್ಚ ಸಙ್ಗಹೋ. ಸಚಿತ್ತಕನ್ತಿ ಅನುಪವಿಸಿತ್ವಾ ನಿಸೀದನಚಿತ್ತೇನ ಸಚಿತ್ತಕಂ. ಪರಿಯುಟ್ಠಿತರಾಗಜಾಯಮ್ಪತಿಕಾನಂ ಸನ್ನಿಹಿತತಾ, ಸಯನಿಘರತಾ, ದುತಿಯಸ್ಸ ಭಿಕ್ಖುನೋ ಅಭಾವೋ, ಅನುಪಖಜ್ಜ ನಿಸೀದನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ.

ಸಭೋಜನಸಿಕ್ಖಾಪದವಣ್ಣನಾ ನಿಟ್ಠಿತಾ.

೨೮೪-೨೮೯. ಚತುತ್ಥಪಞ್ಚಮಾನಿ ವುತ್ತತ್ಥಾನಿ.

೬. ಚಾರಿತ್ತಸಿಕ್ಖಾಪದವಣ್ಣನಾ

೨೯೮. ಛಟ್ಠೇ ‘‘ಪರಿಯೇಸಿತ್ವಾ ಆರೋಚನಕಿಚ್ಚಂ ನಾಮ ನತ್ಥೀ’’ತಿ ವುತ್ತತ್ತಾ ಯೋ ಅಪರಿಯೇಸಿತಬ್ಬೋ ಉಪಸಙ್ಕಮಿತುಂ ಯುತ್ತಟ್ಠಾನೇ ದಿಸ್ಸತಿ, ಸೋ ಸಚೇಪಿ ಪಕತಿವಚನಸ್ಸ ಸವನೂಪಚಾರಂ ಅತಿಕ್ಕಮ್ಮ ಠಿತೋ ಉಪಗನ್ತ್ವಾ ಆಪುಚ್ಛಿತಬ್ಬೋ. ತೇನಾಹ ‘‘ಅಪಿ ಚ…ಪೇ… ಯಂ ಪಸ್ಸತಿ, ಸೋ ಆಪುಚ್ಛಿತಬ್ಬೋ’’ತಿಆದಿ.

೩೦೨. ಅನಾಪತ್ತಿವಾರೇ ಚೇತ್ಥ ಅನ್ತರಾರಾಮಾದೀನಞ್ಞೇವ ವುತ್ತತ್ತಾ ವಿಹಾರತೋ ಗಾಮವೀಥಿಂ ಅನುಞ್ಞಾತಕಾರಣಂ ವಿನಾ ಅತಿಕ್ಕಮನ್ತಸ್ಸಾಪಿ ಆಪತ್ತಿ ಹೋತಿ, ನ ಪನ ಘರೂಪಚಾರಂ ಅತಿಕ್ಕಮನ್ತಸ್ಸೇವ.

ಯಂ ಪನ ಪಾಳಿಯಂ ‘‘ಅಞ್ಞಸ್ಸ ಘರೂಪಚಾರಂ ಓಕ್ಕಮನ್ತಸ್ಸ…ಪೇ… ಪಠಮಂ ಪಾದಂ ಉಮ್ಮಾರಂ ಅತಿಕ್ಕಾಮೇತೀ’’ತಿಆದಿ ವುತ್ತಂ. ತಂ ಗಾಮೇ ಪವಿಟ್ಠಂ ಸನ್ಧಾಯ ವುತ್ತಂ, ತಥಾಪಿ ಅಞ್ಞಸ್ಸ ಘರೂಪಚಾರಂ ಅನೋಕ್ಕಮಿತ್ವಾ ವೀಥಿಮಜ್ಝೇನೇವ ಗನ್ತ್ವಾ ಇಚ್ಛಿತಿಚ್ಛಿತಘರದ್ವಾರಾಭಿಮುಖೇ ಠತ್ವಾ ಮನುಸ್ಸೇ ಓಲೋಕೇತ್ವಾ ಗಚ್ಛನ್ತಸ್ಸಾಪಿ ಪಾಚಿತ್ತಿಯಮೇವ. ತತ್ಥ ಕೇಚಿ ‘‘ವೀಥಿಯಂ ಅತಿಕ್ಕಮನ್ತಸ್ಸ ಘರೂಪಚಾರಗಣನಾಯ ಆಪತ್ತಿಯೋ’’ತಿ ವದನ್ತಿ. ಅಞ್ಞೇ ಪನ ‘‘ಯಾನಿ ಕುಲಾನಿ ಉದ್ದಿಸ್ಸ ಗತೋ, ತೇಸಂ ಗಣನಾಯಾ’’ತಿ. ಪಞ್ಚನ್ನಂ ಭೋಜನಾನಂ ಅಞ್ಞತರೇನ ನಿಮನ್ತನಸಾದಿಯನಂ, ಸನ್ತಂ ಭಿಕ್ಖುಂ ಅನಾಪುಚ್ಛನಾ, ಭತ್ತಿಯಘರತೋ ಅಞ್ಞಘರೂಪಸಙ್ಕಮನಂ, ಮಜ್ಝನ್ಹಿಕಾನತಿಕ್ಕಮೋ, ಸಮಯಾಪದಾನಂ ಅಭಾವೋತಿ ಇಮಾನೇತ್ಥ ಪಞ್ಚ ಅಙ್ಗಾನಿ.

ಚಾರಿತ್ತಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಮಹಾನಾಮಸಿಕ್ಖಾಪದವಣ್ಣನಾ

೩೦೩. ಸತ್ತಮೇ ಮಹಾನಾಮೋತಿ ಸುಕ್ಕೋದನಸ್ಸ ಪುತ್ತೋ ಅನುರುದ್ಧತ್ಥೇರಸ್ಸ, ಸತ್ಥು ಚ ಜೇಟ್ಠಭಾತಾ. ಆನನ್ದತ್ಥೇರೋ ಅಮಿತೋದನಸ್ಸ ಪುತ್ತೋ, ನನ್ದತ್ಥೇರೋ ಪನ ಸುದ್ಧೋದನಸ್ಸೇವ.

೩೦೫. ಪಾಳಿಯಂ ಕಾಲಂ ಆಹರಿಸ್ಸಥಾತಿ ಅಜ್ಜತನಂ ಕಾಲಂ ವೀತಿನಾಮೇಸ್ಸಥ, ಸ್ವೇ ಭೇಸಜ್ಜಂ ಹರಿಸ್ಸಥಾತಿ ವಾ ಅತ್ಥೋ. ‘‘ಅತ್ಥಿ ಪವಾರಣಾ ಭೇಸಜ್ಜಪರಿಯನ್ತಾ ಚ ರತ್ತಿಪರಿಯನ್ತಾ ಚಾ’’ತಿ ತತಿಯಕೋಟ್ಠಾಸೇ ನಿಯಮಿತಮೇವ ಭೇಸಜ್ಜಂ ನಿಯಮಿತಕಾಲನ್ತರೇಯೇವ ಗಹೇತಬ್ಬಂ, ನ ತತೋ ಬಹಿ. ಇತರಥಾ ವಿಸುಂ ಪಯೋಜನಂ ನತ್ಥೀತಿ ದಟ್ಠಬ್ಬಂ. ಸಪರಿಯನ್ತಾ ಸಙ್ಘಪವಾರಣಾ, ತದುತ್ತರಿ ಭೇಸಜ್ಜವಿಞ್ಞತ್ತಿ, ಅಗಿಲಾನತಾತಿ ಇಮಾನೇತ್ಥ ತೀಣಿ ಅಙ್ಗಾನಿ.

ಮಹಾನಾಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ಉಯ್ಯುತ್ತಸೇನಾಸಿಕ್ಖಾಪದವಣ್ಣನಾ

೩೧೫. ಅಟ್ಠಮೇ ಏಕಮೇಕನ್ತಿ ಏತ್ಥ ದುವಙ್ಗಿನೀಪಿ ತಿವಙ್ಗಿನೀಪಿ ಸೇನಾ ಸಙ್ಗಯ್ಹತಿ. ಉಯ್ಯುತ್ತಚತುರಙ್ಗಸೇನಾದಸ್ಸನಾಯ ತಥಾರೂಪಪಚ್ಚಯಾದಿಂ ವಿನಾ ಗಮನಂ, ಅನನುಞ್ಞಾತೋಕಾಸೇ ದಸ್ಸನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ.

ಉಯ್ಯುತ್ತಸೇನಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ಸೇನಾವಾಸಸಿಕ್ಖಾಪದವಣ್ಣನಾ

೩೧೯. ನವಮೇ ಸೇನಾಯ ಚತುತ್ಥೋ ಸೂರಿಯತ್ಥಙ್ಗಮೋ, ಅಗಿಲಾನತಾತಿ ಇಮಾನೇತ್ಥ ದ್ವೇ ಅಙ್ಗಾನಿ.

ಸೇನಾವಾಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಉಯ್ಯೋಧಿಕಸಿಕ್ಖಾಪದವಣ್ಣನಾ

೩೨೨. ದಸಮೇ ಪಾಳಿಯಂ ಕತಿ ತೇ ಲಕ್ಖಾನಿ ಲದ್ಧಾನೀತಿ ಕಿತ್ತಕಾ ತಯಾ ಲದ್ಧಾತಿ ಅತ್ಥೋ. ಉಯ್ಯೋಧಿಕಾದಿದಸ್ಸನಾಯ ತಥಾರೂಪಪಚ್ಚಯಂ ವಿನಾ ಗಮನಂ, ಅನನುಞ್ಞಾತೋಕಾಸೇ ದಸ್ಸನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ.

ಉಯ್ಯೋಧಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

ನಿಟ್ಠಿತೋ ಅಚೇಲಕವಗ್ಗೋ ಪಞ್ಚಮೋ.