೯. ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ

೩೯೧. ನವಮೇ ಮೇತ್ತಿಯಂ ಭಿಕ್ಖುನಿನ್ತಿ ಲಿಙ್ಗನಾಸನಾಯ ನಾಸಿತಾಯಪಿ ತಸ್ಸಾ ಭೂತಪುಬ್ಬವೋಹಾರಂ ಗಹೇತ್ವಾ ವುತ್ತಂ. ಅಞ್ಞಭಾಗಸ್ಸಾತಿ ಥೇರಸ್ಸ ಮನುಸ್ಸಜಾತಿಭಿಕ್ಖುಭಾವತೋ ಅಞ್ಞಸ್ಸ ತಿರಚ್ಛಾನಜಾತಿಛಗಲಕಭಾವಸಙ್ಖಾತಸ್ಸ ಕೋಟ್ಠಾಸಸ್ಸ. ಇದನ್ತಿ ಸಾಮಞ್ಞತೋ ನಪುಂಸಕಲಿಙ್ಗೇನ ವುತ್ತಂ, ಅಯಂ ಛಗಲಕೋತಿ ಅತ್ಥೋ. ಅಞ್ಞಭಾಗೋತಿ ಯಥಾವುತ್ತತಿರಚ್ಛಾನಜಾತಿಛಗಲಕಭಾವಸಙ್ಖಾತೋ ಅಞ್ಞೋ ಕೋಟ್ಠಾಸೋ, ಅಞ್ಞಭಾಗಸ್ಸ ಇದನ್ತಿ ಅಞ್ಞಭಾಗಿಯನ್ತಿ ಪಠಮವಿಗ್ಗಹಸ್ಸ ಅತ್ಥೋ, ಅಞ್ಞಭಾಗಮತ್ಥೀತಿ ದುತಿಯವಿಗ್ಗಹಸ್ಸ, ದ್ವೀಹಿಪಿ ಛಗಲಕೋವ ವುತ್ತೋ. ಇದಾನಿ ದ್ವೀಹಿಪಿ ವಿಗ್ಗಹೇಹಿ ವುತ್ತಮೇವತ್ಥಂ ವಿತ್ಥಾರತೋ ದಸ್ಸೇನ್ತೋ ‘‘ಯೋ ಹಿ ಸೋ’’ತಿಆದಿಮಾಹ. ತತ್ಥ ಯೋ ಹಿ ಸೋ ಛಗಲಕೋ ವುತ್ತೋ, ಸೋ ಅಞ್ಞಸ್ಸ ಭಾಗಸ್ಸ ಹೋತೀತಿ ಚ ಅಞ್ಞಭಾಗಿಯಸಙ್ಖ್ಯಂ ಲಭತೀತಿ ಚ ಯೋಜನಾ. ದುತಿಯವಿಗ್ಗಹಸ್ಸ ಅತ್ಥಂ ದಸ್ಸೇತುಂ ‘‘ಸೋ ವಾ’’ತಿಆದಿ ವುತ್ತಂ. ಅಧಿಕರಣನ್ತಿ ವೇದಿತಬ್ಬೋತಿ ಏತ್ಥಾಪಿ ಯೋ ಹಿ ಸೋ ‘‘ದಬ್ಬೋ ಮಲ್ಲಪುತ್ತೋ ನಾಮಾ’’ತಿ ಛಗಲಕೋ ವುತ್ತೋ, ಸೋತಿ ಆನೇತ್ವಾ ಸಮ್ಬನ್ಧಿತಬ್ಬಂ. ತಞ್ಹಿ ಸನ್ಧಾಯಾತಿ ‘‘ದಬ್ಬೋ’’ತಿ ನಾಮಕರಣಸ್ಸ ಅಧಿಟ್ಠಾನಭೂತಂ ಛಗಲಕಂ ಸನ್ಧಾಯ. ತೇ ಭಿಕ್ಖೂತಿ ತೇ ಅನುಯುಞ್ಜನ್ತಾ ಭಿಕ್ಖೂ. ಆಪತ್ತಿಯಾಪಿ ಪುಗ್ಗಲಾಧಿಟ್ಠಾನತ್ತಾ ‘‘ಪುಗ್ಗಲಾನಂಯೇವ ಲೇಸಾ’’ತಿ ವುತ್ತಂ.

೩೯೩. ಯಾ ಚ ಸಾ ಅವಸಾನೇ…ಪೇ… ಚೋದನಾ ವುತ್ತಾತಿ ‘‘ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿ ಹೋತಿ, ತಞ್ಚೇ ಪಾರಾಜಿಕೇನ ಚೋದೇತೀ’’ತಿಆದಿಂ (ಪಾರಾ. ೪೦೭) ಚೋದನಾಭೇದಂ ಸನ್ಧಾಯ ವದತಿ. ಸತ್ತನ್ನಮ್ಪಿ ಆಪತ್ತೀನಂ ಪಚ್ಚೇಕಂ ಪಾರಾಜಿಕತ್ತಾದಿಸಾಮಞ್ಞೇಪಿ ಮೇಥುನಾದಿನ್ನಾದಾನಾದಿವತ್ಥುತೋ, ರಾಗದೋಸತ್ತಾದಿಸಭಾವತೋ ಚ ವಿಸಭಾಗತಾಪಿ ಅತ್ಥೀತಿ ಆಹ ‘‘ಯಸ್ಮಾ ಪನ…ಪೇ… ನ ಹೋತೀ’’ತಿ.

ವುತ್ತನಯೇನೇವಾತಿ ‘‘ಸಭಾಗವಿಸಭಾಗವತ್ಥುತೋ’’ತಿಆದಿನಾ (ಪಾರಾ. ಅಟ್ಠ. ೨.೩೯೩) ವುತ್ತನಯೇನ. ಕಮ್ಮಲಕ್ಖಣಂ, ತಂಮನಸಿಕಾರೋ ಚ ಅವಿಪನ್ನಕಮ್ಮಸ್ಸ ನಿಮಿತ್ತತೋ ಫಲೂಪಚಾರೇನ ಕಮ್ಮನ್ತಿ ವುಚ್ಚತೀತಿ ಆಹ ‘‘ತಂ ನಿಸ್ಸಾಯ ಉಪ್ಪಜ್ಜನತೋ’’ತಿ. ಪರಿವಾಸಾದಿಂ ನಿಸ್ಸಾಯ ಮಾನತ್ತಾದೀನಂ ಉಪ್ಪಜ್ಜನತೋ ‘‘ಪುರಿಮಂ ಪುರಿಮ’’ನ್ತಿಆದಿ ವುತ್ತಂ.

೩೯೫. ಸವತ್ಥುಕಂ ಕತ್ವಾತಿ ಪುಗ್ಗಲಾಧಿಟ್ಠಾನಂ ಕತ್ವಾ. ದೀಘಾದಿನೋತಿ ದೀಘರಸ್ಸಾದಿಲಿಙ್ಗಸ್ಸ. ದಿಟ್ಠಾದಿನೋತಿ ದಿಟ್ಠಪುಬ್ಬಾದಿನೋ.

೪೦೮. ಏವಂ ತಥಾಸಞ್ಞೀತಿ ಅಞ್ಞಸ್ಸ ಮೇಥುನಾದಿಕಿರಿಯಂ ದಿಸ್ವಾ ‘‘ಅಯಂ ಸೋ’’ತಿ ಏವಂ ತಥಾಸಞ್ಞೀ. ಅಙ್ಗಾನಿ ಪಠಮದುಟ್ಠದೋಸೇ ವುತ್ತಸದಿಸಾನಿ, ಇಧ ಪನ ಕಿಞ್ಚಿದೇಸಂ ಲೇಸಮತ್ತಂ ಉಪಾದಿಯನಾ ಅಧಿಕಾ.

ದುತಿಯದುಟ್ಠದೋಸಸಿಕ್ಖಾಪದವಣ್ಣನಾ ನಿಟ್ಠಿತಾ.