೧೨. ದುಬ್ಬಚಸಿಕ್ಖಾಪದವಣ್ಣನಾ

೪೨೪. ದ್ವಾದಸಮೇ ವಮ್ಭನವಚನನ್ತಿ ಗರಹವಚನಂ. ಸಟ-ಸದ್ದೋ ಪತಿತಸದ್ದೇನ ಸಮಾನತ್ಥೋ, ತಸ್ಸ ಚ ವಿಸೇಸನಸ್ಸ ಪರನಿಪಾತೋತಿ ಆಹ ‘‘ತತ್ಥ ತತ್ಥ ಪತಿತಂ ತಿಣಕಟ್ಠಪಣ್ಣ’’ನ್ತಿ. ಕೇನಾಪೀತಿ ವಾತಾದಿಸದಿಸೇನ ಉಪಜ್ಝಾಯಾದಿನಾ.

೪೨೬. ಚಿತ್ತಪರಿಯೋನಾಹೋ ದಳ್ಹಕೋಧೋವ ಉಪನಾಹೋ. ತತೋಪಿ ಬಲವತರೋ ದುಮ್ಮೋಚನೀಯೋ ಕೋಧಾಭಿಸಙ್ಗೋ. ಚೋದಕಂ ಪಟಿಪ್ಫರಣತಾತಿ ಚೋದಕಸ್ಸ ಪಟಿವಿರುದ್ಧೋ ಹುತ್ವಾ ಅವಟ್ಠಾನಂ. ಚೋದಕಂ ಅಪಸಾದನಾತಿ ವಾಚಾಯ ಘಟ್ಟನಾ. ಪಚ್ಚಾರೋಪನಾತಿ ‘‘ತ್ವಮ್ಪಿ ಸಾಪತ್ತಿಕೋ’’ತಿ ಚೋದಕಸ್ಸ ಆಪತ್ತಿಆರೋಪನಾ. ಪಟಿಚರಣತಾತಿ ಪಟಿಚ್ಛಾದನತಾ. ಅಪದಾನೇನಾತಿ ಅತ್ತನೋ ಚರಿಯಾಯ. ನ ಸಮ್ಪಾಯನತಾತಿ ‘‘ಯಂ ತ್ವಂ ಚೋದಕೋ ವದೇಸಿ ‘ಮಯಾ ಏಸ ಆಪತ್ತಿಂ ಆಪನ್ನೋ ದಿಟ್ಠೋ’ತಿ, ತ್ವಂ ತಸ್ಮಿಂ ಸಮಯೇ ಕಿಂ ಕರೋಸಿ, ಅಯಂ ಕಿಂ ಕರೋತಿ, ಕತ್ಥ ಚ ತ್ವಂ ಅಹೋಸಿ, ಕತ್ಥ ಅಯ’’ನ್ತಿಆದಿನಾ ನಯೇನ ಚರಿಯಂ ಪುಟ್ಠೇನ ಸಮ್ಪಾದೇತ್ವಾ ಅಕಥನಂ.

‘‘ಯಸ್ಸ ಸಿಯಾ ಆಪತ್ತೀ’’ತಿ (ಮಹಾವ. ೧೩೪) ಇಮಿನಾ ನಿದಾನವಚನೇನ ಸಬ್ಬಾಪಿ ಆಪತ್ತಿಯೋ ಸಙ್ಗಹಿತಾತಿ ಆಹ ‘‘ಯಸ್ಸ ಸಿಯಾ’’ತಿಆದಿ. ಅಙ್ಗಾನಿ ಚೇತ್ಥ ಪಠಮಸಙ್ಘಭೇದಸದಿಸಾನಿ, ಅಯಂ ಪನ ವಿಸೇಸೋ ಯಥಾ ತತ್ಥ ಭೇದಾಯ ಪರಕ್ಕಮನಂ, ಇಧ ಅವಚನೀಯಕರಣತಾ ದಟ್ಠಬ್ಬಾ.

ದುಬ್ಬಚಸಿಕ್ಖಾಪದವಣ್ಣನಾ ನಿಟ್ಠಿತಾ.