೬. ಆರಾಮವಗ್ಗವಣ್ಣನಾ

೧೦೨೧. ಪಠಮಸಿಕ್ಖಾಪದಂ ಉತ್ತಾನತ್ಥಮೇವ.

೨. ದುತಿಯಸಿಕ್ಖಾಪದವಣ್ಣನಾ

೧೦೩೦. ಭಿಕ್ಖುನೀ ಚೇ ಭಿಕ್ಖುಂ ಅಕ್ಕೋಸತಿ, ಇಮಿನಾ ಸಿಕ್ಖಾಪದೇನ ಪಾಚಿತ್ತಿಯಂ. ಭಿಕ್ಖುನಿಂ ಚೇ ಅಕ್ಕೋಸತಿ, ಓಮಸವಾದೇನ ಆಪಜ್ಜತಿ. ಓಮಸವಾದೇ ಸಮ್ಮುಖಾವ ರುಹತಿ, ಇಧ ಪನ ಪರಮ್ಮುಖಾಪಿ.

ತತ್ರಾಯಂ ವಿಚಾರಣಾ – ಭಿಕ್ಖುವಿಭಙ್ಗೇ ಓಸಮವಾದಸಿಕ್ಖಾಪದೇ ಭಿಕ್ಖುನೀ ಅನುಪಸಮ್ಪನ್ನಟ್ಠಾನೇ ತಿಟ್ಠತೀತಿ ಕತ್ವಾ ಭಿಕ್ಖುನಿವಿಭಙ್ಗೇಪಿ ಓಮಸವಾದಸಿಕ್ಖಾಪದೇ ಭಿಕ್ಖು ಭಿಕ್ಖುನಿಯಾ ಅನುಪಸಮ್ಪನ್ನಟ್ಠಾನೇ ತಿಟ್ಠತೀತಿ ಸಿದ್ಧಂ. ಇಧ ಚ ಅನುಪಸಮ್ಪನ್ನಸ್ಸ ಅಕ್ಕೋಸನೇ ದುಕ್ಕಟಂ ವುತ್ತಂ, ಭಿಕ್ಖುಸ್ಸ ಉಪಸಮ್ಪನ್ನಸ್ಸ ಅಕ್ಕೋಸನೇ ಪಾಚಿತ್ತಿಯಂ ವುತ್ತಂ, ತಸ್ಮಾ ಇಮಾನಿ ದ್ವೇ ಸಿಕ್ಖಾಪದಾನಿ ಭಿಕ್ಖುಮ್ಹಿ ಸಂಸನ್ದಿಯಮಾನಾನಿ ಅಞ್ಞಮಞ್ಞಂ ನ ಸಮೇನ್ತಿ. ಯಥಾ ಸಮೇನ್ತಿ, ತಥಾ ಜಾನಿತಬ್ಬಂ. ತತ್ಥ ಪೋರಾಣಗಣ್ಠಿಪದೇ ವುತ್ತನಯೇನ ಭಿಕ್ಖುನೀನಂ ಓಮಸವಾದಸಿಕ್ಖಾಪದೇ ಅನುಪಸಮ್ಪನ್ನೋತಿ ನ ಗಹೇತಬ್ಬೋ, ಇದಮೇತ್ಥ ಯುತ್ತಂ. ಪರಿಭಾಸೇಯ್ಯಾತಿ ಅಞ್ಞತ್ರ ಅಕ್ಕೋಸವತ್ಥೂಹಿ. ತೇಸು ಹಿ ಅಞ್ಞತರಸ್ಮಿಂ ಸತಿ ಓಮಸವಾದಪಾಚಿತ್ತಿಯಮೇವಾತಿ ಏಕೇ, ತಂ ನ ಯುತ್ತಂ. ಓಮಸವಾದೇ ಪಾಳಿಮುತ್ತಕಅಕ್ಕೋಸೇ ಹಿ ದುಕ್ಕಟಂ ಹೋತೀತಿ. ದುಕ್ಕಟೋಕಾಸೇ ಇದಂ ಪಾಚಿತ್ತಿಯಂ ತೇಹಿ ನಿದ್ದಿಟ್ಠಂ ಹೋತಿ, ತಸ್ಮಾ ‘‘ಬಾಲಾ ಏತಾ’’ತಿ ಪಾಳಿಯಂ ಇಧ ಆಗತಪದಾನಂಯೇವ ವಸೇನ ಪರಿಭಾಸನಂ ವೇದಿತಬ್ಬಂ.

ದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦೩೩. ತತಿಯಸಿಕ್ಖಾಪದಂ ಉತ್ತಾನತ್ಥಮೇವ.

೪. ಚತುತ್ಥಸಿಕ್ಖಾಪದವಣ್ಣನಾ

೧೦೩೮. ನಿಮನ್ತಿತಾ ವಾ ಪವಾರಿತಾ ವಾತಿ ಏತ್ಥ ಪೋರಾಣಗಣ್ಠಿಪದೇ ತಾವ ಏವಂ ವುತ್ತಂ ‘‘ಪವಾರಿತಾಪಿ ಯಾಗುಂ ಪಾತುಂ ಲಭತಿ, ಭೋಜ್ಜಯಾಗುಂ ನ ಲಭತಿ. ಯಾಗು ಪನೇತ್ಥ ಖಾದನೀಯಭೋಜನೀಯಸಙ್ಖ್ಯಂ ನ ಗಚ್ಛತಿ. ನಿಮನ್ತಿತಾ ಭಿಕ್ಖುನೀ ಪಿಣ್ಡಾಯ ಚರಿತ್ವಾ ಭುಞ್ಜಿತುಕಾಮಾ ಸಾಮಿಕೇ ಅಪಲೋಕೇತ್ವಾವ ಭುಞ್ಜಿತುಂ ಲಭತಿ. ಪರಮ್ಪರಭೋಜನಾಪತ್ತಿ ಭಿಕ್ಖುನೀನಂ ನತ್ಥಿ. ನಿಮನ್ತಿತಾ ತಂ ಭತ್ತಂ ಭುಞ್ಜಿತ್ವಾ ವಾ ಅಭುಞ್ಜಿತ್ವಾ ವಾ ಪವಾರಿತಾ ಕಪ್ಪಿಯಂ ಕಾರಾಪೇತ್ವಾ ಭುಞ್ಜಿತುಂ ನ ಲಭತಿ, ಅಕಪ್ಪಿಯನಿಮನ್ತನೇನ ನಿಮನ್ತಿಯಮಾನಾ ದ್ವೇ ನಿಮನ್ತನಾನಿ ಸಮ್ಪಟಿಚ್ಛಿತುಞ್ಚ ನ ಲಭತೀ’’ತಿ. ತತ್ಥ ‘‘ಪವಾರಿತಾಪಿ ಯಾಗುಂ ಪಾತುಂ ಲಭತೀ’’ತಿ ವುತ್ತಂ ಪಾಳಿಯಂ, ಅಟ್ಠಕಥಾಯಞ್ಚ ಅನುಞ್ಞಾತತ್ತಾ. ‘‘ನಿಮನ್ತಿತಾ ಅಪ್ಪವಾರಿತಾ ಯಾಗುಂ ಪಿವತೀ’’ತಿ ಹಿ ಪಾಳಿಯಂ ವುತ್ತಂ. ತತ್ರಿದಂ ಸಿಕ್ಖಾಪದವಣ್ಣನಾಪುಬ್ಬಙ್ಗಮಸನ್ನಿಟ್ಠಾನಂ – ನಿಮನ್ತಿತಾ ವಾ ಪವಾರಿತಾ ವಾತಿ ಏತ್ಥ ವಾಸದ್ದೇನ ಅಕಪ್ಪಿಯನಿಮನ್ತನೇನ ನಿಮನ್ತಿತಾ ಅಪ್ಪವಾರಿತಾ ಠಪೇತ್ವಾ ಯಾಗುಂ ಅಞ್ಞಂ ಖಾದನೀಯಂ ವಾ ಭೋಜನೀಯಂ ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಾಚಿತ್ತಿಯಂ ಅಞ್ಞತ್ರ ಸಾಮಿಕಾನಂ ಅಪಲೋಕನಾ. ಪರಮ್ಪರಭೋಜನಾಭಾವೇನ ಭಿಕ್ಖುನೀನಂ ಕೋ ಗುಣೋ ಜಾತೋತಿ? ನ ಏತಾಸಂ ಗುಣಲಾಭೋ, ಕೇವಲಂ ಪಾಕಟತರಂ ಜಾತಂ. ಭಿಕ್ಖೂಪಿ ವಿಕಪ್ಪೇತ್ವಾ ಮಿಸ್ಸೇತ್ವಾವ ಭುಞ್ಜಿತುಂ ಲಭನ್ತಿ. ಸಮಯೇ ಯಥಾಸುಖಂ ಲಭನ್ತಿ. ಇಮಿನಾ ಅಪಲೋಕನೇನ ಕಿನ್ತಿ? ಪವಾರಿತಾ ವಾ ಅನಿಮನ್ತಿತಾ ವಾ ನ ಕಿಞ್ಚಿ ಕಪ್ಪಿಯಂ ಕಾರಾಪೇತ್ವಾ ಗಿಲಾನಾತಿರಿತ್ತಮ್ಪಿ ಲಭನ್ತಿ, ನಿಮನ್ತಿತಾ ಚ ಪವಾರಿತಾ ಚ ಯಾಗುಮ್ಪಿ ನ ಲಭನ್ತಿ, ಅಪಲೋಕೇತ್ವಾಪಿ ನ ಲಭನ್ತೀತಿ.

ಚತುತ್ಥಸಿಕ್ಖಾಪದವಣ್ಣನಾ ನಿಟ್ಠಿತಾ.

ಆರಾಮವಗ್ಗವಣ್ಣನಾ ನಿಟ್ಠಿತಾ.